,ჩვენ ვქორწინდებით, მართლა ვქორწინდებით”, – თქვა 2 ნოემბერს კრისტენ სტიუარტმა და თავის შეყვარებულზე, უკვე საცოლეზე მიანიშნა, რომელსაც ბოლო 2 წელია ხვდება.

სტიუარტმა 2019 წლის ნოემბრის ინტერვიუშიც თქვა, რომ მოუთმენლად ელოდა იმ მომენტს, როცა მეიერს ხელს სთხოვდა. ,,ზოგჯერ ერთი შეხედვით იცი, რაც გინდა”,- თქვა მან იმ დროს.

წყვილმა, რვა წლის წინ, გადასაღებ მოედანზე გაიცნო ერთმანეთი, თუმცა ექვსი წელი დასჭირდათ, სანამ შეხვედრას დაიწყებდნენ. კრისტენი იხსენებს: „მეიერი პირველად მეგობრის დაბადების დღეზე ვნახე, შევხედე და უცებ საკუთარ თავს ვკითხე – სად ვიყავი ამდენ ხანს და როგორ არ ვიცნობდი აქამდე?“ ზუსტად ორ კვირის შემდეგ, უკვე შეყვარებულების სტატუსით გამოჩნდნენ. მას შემდეგ, საზოგადოებაში ყოველთვის ერთად ჩნდებოდნენ. ამბობენ, რომ მეიერი და კრისტენი ერთ-ერთი ყველაზე საყვარელი ქვიარ წყვილია, ხელჩაკიდებული და ანთებული თვალებით.

როდის უნდა ველოდოთ ქორწილს, კონკრეტული თარიღი ცნობილი არ არის.

წყარო: them.us

ქვიარ ისტორიის კინოდოკუმენტალისტიკა 1960-იანი წლებიდან, ჯერ კიდევ სტოუნვოლის ჯანყამდე იწყება და დღესაც საკმაოდ აქტუალურია. მათთვის, ვისაც ქვიარ ისტორია აინტერესებს, ასევე, დოკუმენტური ფილმების მოყვარულებისთვის, ქვიარ დოკუმენტური ფილმები ნამდვილად მისწრებაა. ამიტომ წარმოგიდგენთ რამდენიმე ფილმს, რომლებსაც თავისუფალ დროს შეგიძლიათ, უყუროთ:

Pride (2021) — პრაიდი

პრაიდი სულ ახალი დოკუმენტური სერიალია, რომლის პრემიერაც 2021 წლის მაისში შედგა და მთლიანობაში ექვს ეპიზოდს მოიცავს. სერიალი სხვადასხვა რეჟისორის კოლაბორაციას წარმოადგენს — თითოეული ეპიზოდი ქვიარ ისტორიის კონკრეტულ პერიოდს ეხება და 1950-იანი წლებიდან დღემდე მიმდინარე მნიშვნელოვანი პროცესების გარშემო ვითარდება. სერიალში განხილულია როგორც 1969 წლის სტოუნვლის აჯანყება და შიდსის პანდემია 1980-იან წლებში, ასევე, ხშირად მივიწყებული, სტოუნვოლამდელი ქვიარ ისტორია, ადრეული დრეგ კულტურა, ქვიარ თემის ურთიერთობა მეორე ტალღის ფემინისტურ მოძრაობასთან და 1990-იან წლებში დაწყებული ერთგვარი “კულტურული ომი”, რომელიც ქვიარ კულტურის საზოგადოებაში წინ წამოწევამ გამოიწვია. სერიალი დატვირთულია განხილული პროცესების უშუალო მონაწილეების ინტერვიუებითა და დოკუმენტური მასალით, რაც ქვიარ ისტორიით დაინტერესებული მაყურებლისთვის ნამდვილად საინტერესო იქნება.

სერიალის ტრეილერი იხილეთ აქ.

A Secret Love (2020) — საიდუმლო სიყვარული

საიდუმლო სიყვარული, რომელიც Netflix-მა შარშან, აპრილში გამოუშვა, უდავოდ ერთ-ერთი საუკეთესო ქვიარ დოკუმენტური ფილმია. სიუჟეტი ტერისა და პეტის გარშემო ვითარდება, რომლებმაც ერთად 72 წელი გაატარეს. ფილმი ერთდროულად ბევრ საკითხს მოიცავს — პირველ რიგში, პეტისა და ტერის ულამაზესი სიყვარულის ამბავს და ურთიერთობას, რომელიც ათწლეულების განმავლობაში მათი ოჯახის წევრებისგან საიდუმლოდ არსებობდა. ღიად ქვიარობა ადამიანებისთვის გასული საუკუნის ბოლომდე დიდ საფრთხეს წარმოადგენდა. 1950-60-იან წლებში პოლიცია რეგულარულად არბევდა იმ ბარებს, სადაც ქვიარ ადამიანები იკრიბებოდნენ. ბარში მყოფთა უმეტესობას აპატიმრებდნენ, სახელებსა და მონაცემებს კი საჯაროდ აქვეყნებდნენ. ეს ძალიან რთული წლები ტერიმ და პეტმა ერთად გამოიარეს ისე, რომ მათმა ოჯახებმა ურთიერთობის შესახებ, ფაქტობრივად, არაფერი იცოდნენ. გარდა ამისა, ფილმში კარგად ჩანს ის პრობლემები, რომლებსაც ხანდაზმული წყვილები აწყდებიან მას შემდეგ, რაც ყოველდღიურობაში სხვა ადამიან(ებ)ის დახმარება სჭირდებათ. სცენარის ავტორი და რეჟისორი, კრის ბოლანი, ტერის ნათესავია, რომელმაც ტერისა და პეტის სიყვარულის ისტორის შესახებ ერთ-ერთ ოჯახურ შეკრებაზე გაიგო და ფილმის გადაღება გადაწყვიტა. ძველი სურათები, ჩანაწერები, წერილები და უშუალო კადრები მაყურებელს ტერისა და პეტთან ერთგვარი ემოციური კავშირის დამყარების საშუალებას აძლევს, რაც ამ ფილმს სხვა, შედარებით მშრალი და უემოციო, დოკუმენტური ფილმებისგან ძალიან განასხვავებს.

ფილმის ტრეილერი შეგიძლიათ, ნახოთ აქ.

Welcome to Chechnya (2020) — კეთილი იყოს თქვენი მობრძანება ჩეჩნეთში

კეთილი იყოს თქვენი მობრძანება ჩეჩნეთში HBO-ს 2020 წლის ნამუშევარია, რომელიც, სამწუხაროდ, ჯერჯერობით ქართულად ხელმისაწვდომი არ არის, თუმცა შეგიძლიათ, ინგლისურ და რუსულ ენებზე უყუროთ. ჩეჩნეთი რუსეთის ფედერაციის ერთ-ერთი რესპუბლიკაა, რომელიც კონსერვატიული, რელიგიურ-ექსტრემისტული ტრადიციებითა და შეხედულებებით გამოირჩევა და სხვა რესპუბლიკებისგან თვალშისაცემად იზოლირებულია. გვიან 2010-იან წლებში, რესპუბლიკაში დაწყებული “ანტი-გეი წმენდა” მსოფლიოსთვის მეტ-ნაკლებად შეუმჩნეველია — ეს საშინელი პროცესი ქვიარ ადამიანების დაპატიმრებას, არაადამიანურ წამებას და ზოგჯერ, მკვლელობასაც გულისხმობს. ასეთი “საკონცენტრაციო ბანაკები”, როგორც თვითმხილველები ამ ადგილს უწოდებენ, ჩეჩნეთის ლიდერის, რამზან კადიროვის აზრით, საერთოდ არ არსებობს. მეტიც, ის ფიქრობს, რომ ჩეჩნეთში ქვიარ ადამიანები არ არიან და რომც იყვნენ, მათივე ოჯახები მოკლავდნენ. სწორედ ამიტომ, ქვიარ აქტივისტებმა საფრთხეში მყოფი ადამიანების რუსეთიდან ჩუმად გაყვანა გადაწყვიტეს. ისინი ჯერ მოსკოვში ან სანკტ-პეტერბურგში, გასაიდუმლოებულ თავშესაფარში, შემდეგ კი საზღვარგარეთ უსაფრთხო ლოკაციაზე გადაჰყავდათ. დოკუმენტური ფილმი აქტივისტების ნაბიჯებს მიჰყვება — კადრების უმეტესობა გადაღებულია საიდუმლო კამერებით, მობილური ტელეფონებით და ისეთი საშუალებებით, რაც ჩეჩნეთის ხელისუფლებისთვის საეჭვო არ იქნებოდა. ფილმში მონაწილე ადამიანების უმრავლესობის ვინაობა დამალულია, ისინი იყენებენ ზედმეტსახელებს, მათი სახე და ხმა ციფრულადაა შენიღბული. გარდა ამისა, გამოყენებულია წამების ამსახველი რეალური, მძიმე კადრებიც, ამიტომ კარგი იქნება, თუ ფილმის ნახვამდე საკუთარ თავს ფსიქოლოგიურად შეამზადებთ. აქვე, გთავაზობთ ძალიან საინტერესო ინტერვიუს, რომელშიც რეჟისორი და აქტივისტები ფილმზე მუშაობის პროცესზე უფრო დეტალურად საუბრობენ.

ფილმის ტრეილერი შეგიძლიათ, ნახოთ აქ.

Prejudice and Pride (2021) — ცრურწმენა და სიამაყე

2021 წლის 1-5 ივლისს თბილისში პრაიდ კვირეული უნდა ჩატარებულიყო, რომელიც კვირეული სამ ღონისძიებას გულისხმობდა – დოკუმენტური ფილმის ჩვენებას, მუსიკალურ ფესტივალსა და ღირსების მარშს. წინააღმდეგობების მიუხედავად, ფილმის ჩვენებისა და ფესტივალის ჩატარება მოხერხდა. 5 ივლისს, ღირსების მარშის ჩატარებამდე, თბილისში მობილიზდნენ ძალადობრივი, ჰომოფობიური ჯგუფები. გამომსვლელთა უსაფრთხოების მიზნით, თბილისი პრაიდმა 15:00 საათისთვის ღირსების მარში გააუქმა. ცრურწმენა და სიამაყე რადიო თავისუფლების ფილმია, რომელიც 2021 წლის ივლისის ბოლოს გამოვიდა. ფილმი პრაიდ კვირეულის დაგეგმვასა და მიმდინარეობის პროცესს ასახავს და გვაჩვენებს 1-5 ივლისს მიმდინარე მოვლენებს ქვიარ აქტივისტების პერსპექტივიდან.

ფილმს შეგიძლიათ, უყუროთ აქ.

THE DEATH AND LIFE OF MARSHA P. JOHNSON (2017) — მარშა პ. ჯონსონის სიკვდილი და ცხოვრება

ქვიარ მოძრაობის ისტორიაში ტრანს თემი ყოველთვის ყველაზე მოწყვლადი ჯგუფი იყო. დევიდ ფრენსის 2017 წლის ნამუშევარიც, მარშა პ. ჯონსონის სიკვდილი და ცხოვრება სწორედ ამ პრობლემას ეხება. ტრანსგენდერი ქალების მკვლელობა და დამნაშავეების არაადეკვატური გასამართლება თანამედროვე ამერიკის საკმაოდ დიდი პრობლემაა. ამერიკელი ქვიარ აქტივისტი 90-იანი წლების ბოლოდან, ვიქტორია კრუზი, თანამედროვე საქმეების პარალელურად, 1992 წელს საეჭვო გარემოებებში გარდაცვლილი მარშა პ. ჯონსონის საქმის გამოძიებას იწყებს. მარშა ერთ-ერთი იყო იმ მამაც აქტივისტებს შორის, რომლებიც 1969 წელს სტოუნვოლის ცნობილ აჯანყებას ლიდერობდნენ. 1992 წელს, 4 ივლისის მარშის შემდეგ გაუჩინარებული მარშა 6 ივლისს ჰუდსონის მდინარეში გარდაცვლილი იპოვეს. გამოძიებამ სიკვდილის მიზეზად სუიციდი დაასახელა, რასაც ქვიარ თემისგან საპასუხო რეაქცია მაშინვე მოჰყვა, თუმცა უშედეგოდ. 25 წლის შემდეგ ვიქტორია კრუზი ცდილობს, გაარკვიოს მარშას გარდაცვალების რეალური მიზეზი. გამოძიების პარალელურად, ფილმში ნახავთ კიდევ ერთი ქვიარ აქტივისტის, სილვია რივერას ცხოვრების საინტერესო მომენტებს. ფილმის ნახვის შემდეგ კი, შეგიძლიათ, მოუსმინოთ ამ ძალიან საინტერესო პოდკასტს მარშა პ. ჯონსონის შესახებ.

ფილმის ტრეილერი შეგიძლიათ, ნახოთ აქ.

Paris is burning (1990) — პარიზი იწვის

პარიზი იწვის ერთ-ერთი ყველაზე ცნობილი ქვიარ დოკუმენტური ფილმია. ფილმი 1980-იან წლების ნიუ-იორკში ballroom სუბკულტურის გარშემო ვითარდება და რაიმე ტიპის ჩარევისა თუ “შელამაზების” გარეშე აჩვენებს იმ რეალობას, რომელიც იყო 1980-იანი წლების ნიუ-იორკში. ცალკეულ ინტერვიუებში ძალიან საინტერესოდ არის გააზრებული ballroom-ის, როგორც ერთგვარი უსაფრთხო სივრცის მნიშვნელობა იმ ადამიანებისთვის, რომლებიც კონკრეტული იარლიყის გამო ჰეტერონორმატიულ და რასისტულ “გარე” სამყაროში თავს ვერ იმკვიდრებენ. ფილმი ძირითადად ballroom შოუების კადრებისა და ინტერვიუების ერთობლიობაა — მიმდინარე პროცესების ერთგვარი შეფასება. ეს შეფასებები თანამედროვე გადმოსახედიდან საკამათოც კი შეიძლება იყოს, რაც ფილმს კიდევ უფრო საინტერესოს ხდის, რადგან ამ კონტრასტში იკვეთება გზა, რომელიც ქვიარ თემმა ბოლო ათწლეულებში გამოიარა.

ფილმის ტრეილერი შეგიძლიათ, ნახოთ აქ.

ავტორი: ანამარია

სერიალი ,,გრეის ანატომია’’ უფრო და უფრო ორიენტირებული ხდება ქვიარ თემატიკაზე.

გასართობი გამოცემა Variety-ის ცნობით, მსახიობი E.R. Fightmaster სერიალის ისტორიაში პირველი არაბინარული ექიმის როლს შეასრულებს. მას ჯერჯერობით ეპიზოდური როლი ჰქონდა, თუმცა მე-18 სეზონის მომდევნო სერიებში ისევ დაბრუნდება.

არაბინალური პერსონაჟი, კაი, სერიალში პირველად როგორც მინესოტას კვლევითი ჯგუფის წევრი, ისე გამოჩნდა. ის მერედიტ გრეისა (ელენ პომპეო) და ამელია შეფარდს (კატერინა სკორსონი) მოუწოდებდა, შეერთებოდნენ მათ პარკინსონის დაავადების სამკურნალოდ. ამავე სერიაში ჩანს კაისა და ამელიას ურთიერთობა,  რომლებიც პანდემიის დროს, Zoom-ის მეშვეობით, ფლირტს იწყებენ.

Variety-მ დაადასტურა, რომ ამელიასა და კაიას შესაძლოა უბრალო თანამშრომლობაზე მეტი აკავშირებდეთ.

,,გრეის ანატომია”, რომელიც მრავალი წელია გრძელდება, ქვიარ პერსონაჟების ნაკლებობას არ უჩივის.

ამ მხრივ ყველაზე დასამახსოვრებელი მსახიობი სარა რამირესი იყო, რომელმაც შოუში კალი ტორესის როლი შეასრულა. კალის პერსონაჟი ბისექსუალი ქალი იყო, რომელსაც ურთიერთობა არიზონა რობინსთან ჰქონდა.

წყვილი მაყურებლისთვის დიდი ხნის მანძილზე იყო პოპულარული და საყვარელი.

წყარო: them.us

მსახიობი კრისტენ სტიუარტი ამბობს, რომ ადამიანები, რომლებიც ლგბტქ+ სუპერგმირებს აპროტესტებენ, წარსულში ცხოვრობენ და შეუძლიათ, იქ დარჩნენ. „თუ თქვენ უფრო ბედნიერი ხართ და კომფორტულად იყურებით უკანა ხედვის სარკეში, მაშინ სწორედ იქ დაგტოვებთ“, – უთხრა სტიუარტმა Variety-ს.

Variety-ის ვიდეო გადაცემაში The Take, წამყვანმა კლეიტონ დევისმა Marvel-ის მომავალი ფილმი – Eternals ახსენა, რომელშიც გეი სუპერგმირის, ფასტოსის როლს ბრაიან ტაირი ჰენრი თამაშობს. სტიუარტმა თქვა, რომ ფილმის სიუჟეტის შესახებ ბევრი არაფერი იცის, თუმცა უხარია, რომ მასში გეი ხალხია.

ტრეილერი

დევისმა ახალი სუპერმენი, ჯონ კენტიც ახსენა, ცოტა ხნის წინ გაირკვა, რომ პერსონაჟი ბისექსუალია.

წლების წინ კრისტენ სტიუარტი დაქამინგაუთდა, როგორც ქვიარი, მიუხედავად იმისა, რომ მასზე ჰოლივუდში ზეწოლას ახდენდნენ, რომ გაჩუმებულიყო. 2015 წელს მან თქვა: „დამგუგლეთ, მე ამას არ ვმალავ.”

სტიუარტის კარიერა აღმავლობის გზაზეა – წელს მას პრინცესა დიანა სპენსერის როლში ვიხილავთ, ფილმი დიანას ცხოვრების იმ პერიოდს ასახავს, როდესაც ის პრინც ჩარლზთან განქორწინების გადაწყვეტილებას იღებს. ფილმის პრემიერა 5 ნოემბერს შედგება.

გასული საუკუნის 90-იანი წლებიდან ქვიარ პოპ-კულტურის განვითარება შედარებით უფრო ღიად დაიწყო, რამაც საკმაოდ დიდი გავლენა იქონია ქვიარ ხილვადობის გაზრდაზე. დაახლოებით 10 წლის წინ, ინტერნეტსივრცეში გაჩნდა ტერმინი Queerbaiting, რომელიც ერთგვარ მარკეტინგულ ხრიკს – ლიტერატურულ, კინემატოგრაფიულ, მუსიკალურ თუ სხვა ტიპის ნამუშევარში არა ღიად, არამედ შეფარულად შექმნილ ქვიარ კონტექსტს გულისხმობს. Queerbaiting-ის მნიშვნელობის შეფასება სხვადასხვაგვარად ხდება – მაგალითისთვის, ამ მოვლენას ცნობილი ამერიკული ჟურნალი ,,როლინგ სტოუნზი’’ სტატიაში ცალსახად უარყოფითად აფასებს, განსხვავებით BBC-ის სტატიისგან, რომელშიც ავტორი შედარებით ნეიტრალურ პოზიციას ინარჩუნებს. ცალკეული მოსაზრებების მიუხედავად, Queerbaiting-ის კონკრეტული შემთხვევების გასააზრებლად, კონტექსტის გათვალისწინება ძალიან მნიშვნელოვანია.

ბოლო პერიოდში Queerbaiting-ის ახალი შემთხვევა მაყურებელმა Pixar-ის ახალ ანიმაციაში Luca იპოვა. ამ მოსაზრებას ანიმაციის შემქმნელები უარყოფენ. ანიმაციის სიუჟეტი კი უდავოდ ძალიან საინტერესოა: იტალიაში, ზღვისპირა ქალაქში, წყლის ქვეშ ადამიანის მსგავსი არსებები ცხოვრობენ, რომლებსაც ხმელეთზე ამოსვლა და ადამიანად გარდასახვა შეუძლიათ, თუმცა მათ მიმართ სასტიკი დამოკიდებულების გამო, მუდმივად წყალში ყოფნას არჩევენ. ახალგაზრდა ცნობისმოყვარე ბიჭი, ლუკა, ადამიანების ცხოვრებით ინტერესდება, წყლიდან ამოდის და შეხვდება ალბერტოს, რომელიც ასევე წყლის არსებაა, თუმცა ხმელეთზე შედარებით დიდი დრო აქვს გატარებული. ლუკა და ალბერტო ადამიანებთან ურთიერთობას იწყებენ და კლასიკურ, დისნეის ანიმაციებისთვის დამახასიათებელ თავგადასავლებში ეხვევიან.

Pixar Animation Studios

მაყურებლის გარკვეულმა ნაწილმა ანიმაციის სიუჟეტი ანდრე ასიმანის ცნობილი რომანის Call Me by Your Name 2017 წლის ეკრანიზაციასთან დააკავშირა და ლუკასა და ალბერტოს მეგობრობის მიღმა, ერთგვარი სასიყვარულო ურთიერთობა დაინახა, რაც ანიმაციის შემქმნელებმა კატეგორიულად უარყვეს. ამის მიუხედავად, ქვიარ ინტერპრეტრირების საშუალებას ანიმაციაში არამხოლოდ ლუკასა და ალბერტოს ურთიერთობა, არამედ გარდასახვისა და შენიღბვის იდეა იძლევა. ხმელეთზე ამოსული წყლის არსებები ზღვას, წვიმას, შადრევნებს მაქსიმალურად ერიდებიან, რადგან მათი სხეული დასველებისას ძველ იერსახეს იბრუნებს (დიახ, ჩვენი თაობისთვის ცნობილი სერიალის H₂O: Just Add Water პერსონაჟების მსგავსად). ამ გარდასახვების, ლუკას ოჯახის გარე სამყაროსადმი განწყობის, ,,რეალური სახის’’ გამუდმებული მალვისა და ადამიანების სრულიად უსაფუძვლო უარყოფით დამოკიდებულებების ერთობლიობა ქვიარ ინტერპრეტირებისთვის საკმაოდ დიდ სივრცეს ქმნის. SPOILER ALERT: განსაკუთრებით ანიმაციის ბოლოს, როდესაც ლუკას და ალბერტოს ნამდვილი სახის გამოაშკარავების შემდეგ, ადამიანებში მცხოვრები ,,მალული’’ ზღვის არსებებიც იწყებენ გამოჩენას, რაც ქამინგაუთის ერთგვარ სიმბოლოდ შეგვიძლია დავინახოთ.

Pixar Animation Studios

Queerbaiting-ის ყველაზე ცნობილი შემთხვევაა 2010 წლის ბრიტანული სერიალის Sherlock სიუჟეტური ხაზი და მთავარი პერსონაჟების, შერლოკ ჰოლმსისა და ჯონ უოტსონის ურთიერთობა. აქვე, მნიშვნელოვანია, Queerbaiting და თავისუფალი ქვიარ ინტერპრეტაცია ერთმანეთში არ აგვერიოს. Queerbaiting-ის მთავარი მახასიათებელი საკმაოდ მკაფიო მინიშნებებია, რომლებიც მაყურებელს/მკითხველს/მსმენელს ინტერპრეტირების საშუალებას აძლევს, თუმცა რეალურ ქვიარ რეპრეზენტაციას არასდროს ქმნის, რაც სხვადასხვა მიზეზებითაა გამოწვეული. პირველ რიგში, Queerbaiting-ს ჰომოფობია და ჰომოფობიასთან გადაჯაჭვული კაპიტალისტური მისწრაფებები განაპირობებს – ღიად ქვიარ ფილმების/სერიალების/წიგნების დაფინანსება ნაკლებად შესაძლებელია, ნაკლებად წაკითხვადი და ყურებადია. ამ მარკეტინგული ხრიკით კი ქვიარ კონტექსტით დაინტერესებულ ადამიანებს მიიზიდავენ, თუმცა სიუჟეტური ხაზი ამ ზედაპირულ მინიშნებებს არასდროს გაცდება. იგივე შემთხვევაა ზემოთ აღნიშნულ სერიალშიც, რომელშიც შერლოკისა და ჯონის ურთიერთობის ქვიარ კონტექსტზე მინიშნება არაერთხელ, ხშირად ერთგვარი იუმორით ხდება, თუმცა ამ კუთხით არასდროს ვითარდება.

BBC

ქვიარ რეპრეზენტაციის არსებობა უმნიშვნელოვანესია და პოპ-კულტურაში არსებული ჰომოფობიაც (რომელიც, დიახ, ისევ არსებობს) იმხელა დაბრკოლებას აღარ წარმოადგენს, რომ კინემატოგრაფიაში, ლიტერატურასა თუ სხვა სფეროებში Queerbaiting-ის საჭიროება გაჩნდეს.

კიდევ ერთ ძალიან საინტერესო შემთხვევას წარმოადგენს ამერიკელი მწერლის, ფენი ფლაგის 1987 წლის რომანი ,,შემწვარი მწვანე პომიდვრები კაფე უისელ სტოპში’’, რომელიც რამდენიმე წლის წინ ქართულ ენაზეც ითარგმნა. იჯისა და რუთის ურთიერთობა, რომელსაც მეგობრობად მხოლოდ ძალიან ჰეტერონორმატიული თვალებით მკითხველი თუ მონათლავს, რომანში ერთ-ერთი უმნიშვნელოვანესი სიუჟეტური ხაზია. 1994 წელს რომანის ეკრანიზაციაც, ნოველის მსგავსად, იჯისა და რუთის ქვიარ ურთიერთობაზე პირდაპირ ყურადღებას არ ამახვილებს. ერთი მხრივ, ნოველაც და ეკრანიზაციაც Queerbaiting-ის აშკარა შემთხვევებია, თუმცა კრიტიკისას აუცილებლად უნდა გავითვალისწინოთ კონტექსტი – გასული საუკუნის 80-იანი და 90-იანი წლები ნამდვილად არ ყოფილა უსაფრთხო სივრცე ღიად ქვიარ ლიტერატურისა და კინემატოგრაფიისთვის.

ქვიარ მინიშნებების ძიება და ინტერპრეტირება ნამდვილად ძალიან საინტერესო და ზოგჯერ სახალისოც კია, თუმცა მნიშვნელოვანია, სწორი რეპრეზენტაციისთვის, მაყურებელმაც შეძლოს განსხვავების დანახვა Queerbaiting-ისა და პოზიტიურ/რელევანტურ რეპრეზენტაციას შორის.

ავტორი: ანამარია

მსოფლიოს მრავალ ქვეყანაში 31 ოქტომბერს ჰელოუინი იზეიმეს. წელიწადის ყველაზე საშიშ დღეს მოუთმენლად ელოდებიან პატარები და ის ადამიანები, რომლებსაც განსაკუთრებით უყვართ სხვადასხვა პერსონაჟისა თუ მითიური გმირის როლის მორგება, სპეციალურ ტანისამოსში გამოწყობა და დემონების გათავისუფლება.

გთავაზობთ წლევანდელი ჰელოუინის გამორჩეულ კოსტიუმებს:

ჰეილი ბიბერი 

ჰეილი ბიბერმა წელს ბრიტნი სპირსობა გადაწყვიტა და ლეგენდარული პოპშემსრულებლის ორი მუსიკალური კლიპი, Hit Me Baby One More Time და Oops, I did it Again! გააცოცხლა.

კენდალ ჯენერი 

კენდალ ჯენერი წლევანდელ ჰელოუინს 1996 წელს გადაღებული კომედიური ფილმის, Mar Attack-ის ერთ-ერთი გმირის კოსტუმში შეხვდა.

ჰარი სტაილსი

27 წლის ჰარი სტაილსი ამჟამად საკონცერტო ტურნეში იმყოფება და გასულ ღამეს თავის მსმენელს ნიუ-იორკში გამართულ კონცერტზე „ოზის ჯადოქრის“ ერთ-ერთი გმირის, დოროთის ფორმაში გამოწყობილი შეხვდა.

კორტნი კარდაშიანი და ტრეივის ბარკერი 

კარდაშიან-ჯენერების ოჯახის ერთ-ერთი წევრი, კორტნი, რამდენიმე კვირის წინ Blink 182-ის სოლისტ, ტრეივის ბეიკერზე დაინიშნა. წყვილმა ჰელოუინზე ჯგუფ Sex Pistols-ის სოლისტის, სიდ ვიშესის და მისი შეყვარებულის, ნენსი სპანჯენის როლი მოირგეს.

Cardi B 

ამერიკელი ჰიპ-ჰოპის შემსრულებელი Cardi B წლევანდელ ჰელოუინზე მორტიშა ადამსის როლში მოგვევლინა.

Lizzo 

Lizzo-მ წლევანდელ ჰელოუინზე Baby Yoda-ს როლი მოირგო „ვარსკლავური ომებიდან“

ქერი ვეშინგტონი 

წლევანდელ ჰელოუინზე განსაკუთრებით პოპულარული იყო Netflix-ის ახალი სერიალის, Squid Game-ის კოსტუმები.

არიანა გრანდე 

არიანა გრანდეს წლევანდელი კოსტუმი გასული საუკუნის 50-იანი წლების საშინელებათა ჟანრის ფილმის – Creature from the Black Lagoon-ის ინსპირაციით შეიქმნა.

Lil Nas X 

ამერიკელმა ჰიპ-ჰოპ არტისტმა, რომელმაც ახლახანს გამოუშვა სადებიუტო ალბომი Montero, წლევანდელ ჰელოუინზე Nickelodeon-ის ერთ-ერთი სერიალის გმირის როლი მოირგო

პერის ჰილტონი 

ლეგენდარული პერის ჰილტონი, რომელიც მსოფლიოში პირველ ინფლუენსერად არის მიჩნეული, წლევანდელ ჰელოუინზე კონკიას კაბაში გამოეწყო.

ჩარლი დამელიო 

ჩარლი დამელიომ წლევანდელ ჰელოუინზე ლუის კეროლის და უოლტ დისნეის „ელისი საოცრებათა ქვეყანაშის“ გაცოცხლება გადაწყვიტა.

რიზ ვიზერსპუნი 

ოსკაროსანი მსახიობი რიზ ვიზერსპუნი წლევანდელ ჰელოუინზე ლეგენდარული კინორეჟისორის, ალფრედ ჰიჩკოკის ერთ-ერთ გმირს განასახიერებს ფილმიდან „ჩიტები“