ნოემბერი 2021 - Page 4

13 წლიანი მეურვეობის შემდეგ ლეგენდარული ამერიკელი პოპვარსკვლავი, ბრიტნი სპირსი, საბოლოოდ თავისუფალია!

გადაწყვეტილება ლოს ანჯელესის უზენაესი სასამართლოს მოსამართლემ, ბრენდა ლენიმ, პარასკევს მიიღო. მისი გადაწყვეტილებით, მეურვეობა უნდა დასრულდეს ბრიტნი სპირსის მენტალური ჯანმრთელობის გადამოწმების გარეშე.

მეურვეობა, რომელიც 13 წლის განმავლობაში გრძელდებოდა, 2008 წელს დაიწყო, ბრიტნი იმ დროს 26 წლის იყო და მასზე მეურვეობა მისმა მამამ, ჯეიმი სპირსმა აიღო. მეურვეობა ითვალისწინებდა, როგორც ბრიტნის პირად ცხოვრებაზე, ასევე, მის ფინანსებზე სრულ კონტროლს.

მეურვეობის ქვეშ პოპვარსკვლავმა ოთხი ალბომი ჩაწერა, ორი საკონცერტო ტურნე გამართა და ამერიკული X-ფაქტორის ჟიურის წევრი იყო, თუმცა ამის მიუხედავად, პოპვარსკლავის ფინანსებზე, პერსონალურ ცხოვრებასა და კარიერაზე პასუხისმგებელი მთლიანად მომღერლის მამა, ჯეიმი სპირსი იყო, რომელიც ბოროტად იყენებდა დაკისრებულ ვალდებულებას.

ბრიტნის სპირსის მდგომარეობის გარშემო ეჭვები მას შემდეგ გაჩნდა, რაც ფანებმა 2019 წელს ამერიკაში წამოიწყეს კამპანია #FreeBritney, კამპანიას მალევე მოჰყვა დოკუმენტური ფილმი – Framing Britney Spears. შოკისმომგვრელმა ფილმმა ნათლად აჩვენა, რომ ბრიტნი სპირსის მდგომარეობა იყო საგანგაშო და სჭირდებოდა გათავისუფლება მამისგან.

39 წლის მომღერალმა 2021 წლის ივნისში სასამართლო მოსმენაზე დაადასტურა, რომ ის აღარ საჭიროებდა მეურვეს და რომ მამამისი არაკეთილსინდისიერად იყენებდა თავის მოვალეობებს.

2021 წლის MTV EMA-ს დაჯილდოება ახლოვდება და ახლახანს გახდა ცნობილი, რომ MTV დააჯილდოვებს 5 ლგბტ+ აქტივისტს სხვადასხვა ქვეყნიდან. პრიზი გადაეცემათ აქტივისტებს, რომლებიც არ ზოგავენ ძალებს იმისთვის, რომ ლგბტ+ ადამიანების მდგომარეობა გაუმჯობესდეს.

საპატიო ტიტულის მფლობელები არიან: ამირ აშური, მეთიუ ბლაისი, სეიჯ დოლან-სანდრინო, ერიკა ჰილტონი და ვიქტორია რადვანი. დაჯილდოების ცერემონია, კვირას ღამე, უნგრეთში გაიმართება და პირდაპირ ეთერში მილიონობით ადამიანს შეეძლება მისი ხილვა. საპატიო ტიტულების მფლობელ აქტივისტებს საშუალება ექნებათ, აირჩიონ არასამთავრობო ორგანიზაცია, რომელსაც MTV გადასცემს ფულს.

გაიცანით წლევანდელი საპატიო ტიტულის მფლობელი აქტივისტები, რომლებიც თავს არ ზოგავენ ადვოკატირებაში და ემსახურებიან თავიანთ საზოგადოებას:

ამირ აშური (ერაყი) 

ამირ აშური ერაყელი აქტივისტია, რომელმაც დაარსა ორგანიზაცია iraQueer, ამირი ორგანიზაციაში ამჟამად ბორდის თავმჯდომარის პოზიციას იკავებს. ის თანამშრომლობს ერაყისა და ადამიანის უფლებების საერთაშორისო ორგანიზაციებთან, ეხმარება ლგბტ+ ადამიანებს, ქალებს, სექსმუშაკებს, ლტოლვილებსა და სხვა მარგინალიზებულ ჯგუფებს. ამირი ამჟამად ჰარვარდის უნივერსიტეტში სამართალს სწავლობს.

მეთიუ ბლეისი (ნიგერია) 

არაბინარული და ღიად გეი აქტივსტი, მეთიუ ბლაისი,The Oasis Project-ის დამფუძნებელია. ორგანიზაცია მიზნად ისახავს, ნიგერიელი ქვიარ ადამიანების რეპრეზენტაციასა და ჰუმანიზებას, ამასთან ერთად, აქტივისტი ცდილობს, გამოიყენოს სოციალური ქსელები და მედიაკამპანიები, რათა აჩვენოს ხალხს, რამდენად რთული და უსამართლოა ნიგერიელი ქვიარ ადამიანების ცხოვრება.

სეიჯ დოლან-სანდრინო – (ამერიკა)

სეიჯ დოლან-სანდრინო წარმოშობით აფრო-კუბელი ქვიარ ტრანს არტისტია, რომელიც ამერიკაში ცხოვრობს. მისი, როგორც არტისტისა და აქტივისტის მთავარი მიზანია, შექმნას ისეთი ნარატივები, სადაც შავკანიანები არ იქნებიან მხოლოდ ჩაგვრისა და რეპრესიის მსხვერპლები და სამყაროს აჩვენოს ცხოვრება ფერადკანიანი ადამიანების თვალიდან. დოლან-სანდრინო ასევე იყო ამბასადორი ობამას მმართველობის დროს თეთრ სახლში, პროგრამით – განათლების მაღალი ხარისხი აფრიკელი ამერიკელებისთვის.

ერიკა ჰილტონი – ბრაზილია 

ერიკა ჰილტონი პირველი ფერადკანიანი ტრანსგენდერი ქალია, რომელმაც გაიმარჯვა სან პაულოს არჩევნებში და დღეს ის საკანონმდებლო ორგანოდან ეხმარება ლგბტ+ ადამიანებს, შავკანიანებს, სექსმუშაკებს და მათ, ვინც სხვადასხვა მიზეზის გამო, მარგინალიზებულ ადამიანებად მიიჩნევენ ბრაზილიაში.

ვიქტორია რადვანი – უნგრეთი 

MTV EMA წელს უნგრეთის დედაქალაქ ბუდაპეშტში იმართება, ქვეყანაში, სადაც წელს სკოლებიდან და საბავშვო ტელევიზიებიდან LGBTQ+ შინაარსის შემცველი მასალა ამოიღეს. ვიქტორია რადვანი უნგრელი აქტივისტია, ის ბუდაპეშტის პრაიდის ბორდის წევრია და მრავალი წლის განმავლობაში იბრძვის ლგბტ+ უფლებებზე და ცდილობს, ადამიანებს შეუქმნას გარემო, სადაც თავს დაცულად იგრძნობენ და არ შეეშინდებათ დისკრიმინაციის. ვიქტორია ღიად უპირისპირდება ქვეყანაში ამჟამად მიმდინარე ცვლილელებს და აკრიტიკებს უნგრეთის მთავრობას.

2021 წლის 11-12 ნოემბერს, სოციალური სამართლიანობის ცენტრი რიგით მესამე ქვიარ ფორუმს მართავს. წელს ქვიარ ფორუმის მთავარი თემაა – „კრიზისი, პოსტ-კრიზისი და ქვიარ ემანსიპაციის პერსპექტივები საქართველოში“. ქვიარ ფორუმის პირველი დღე – 11 ნოემბერს, ფიზიკურ სივრცეში ჩატარდა, ხოლო 12 ნოემბერს დამსწრეებს შეუძლიათ ღონისძიებას ZOOM-ის საშუალებით დაესწრონ.

,,წლევანდელი ქვიარ ფორუმი ემსახურება ქვიარ სხეულების ადგილის გააზრებას პოსტ-კრიზისულ საქართველოში, ქვიარ ჯგუფების საჯარო სივრციდან გაქრობისა და გაჩენის პოლიტიკურ მანიპულაციას, ქვიარ ჯგუფების ტრამვის მუდმივობასა და იმას თუ რად გარდაიქმნება და რად უნდა გარდაიქმნას ტრამვისა და ტკივილის მეხსიერება.” – ვკითხულობთ ღონისძიების აღწერაში.

პანეულურ დისკუსიებზე განხილული იქნება ქვიარ წინააღმდეგობის პრაქტიკების ბუნება და ფორმები – მათი სიკეთე და ზიანი, ისევე როგორც, მასთან დაპირისპირებაში მყოფი ძალადობრივი ჯგუფების მიზნები და მათი წარმოქმნის მიზეზები. აღნიშნული საკითხების განხილვამ ხელი უნდა შეუწყოს დომინანტური და დისციპლინირებული აქტივისტური პრაქტიკებისგან ალტერნატიული ხედვებისა და სტრატეგიების დასახვას.

ქვიარ ფორუმი წარმოადგენს აკადემიური და აქტივისტური სივრცის ჰიბრიდს, რომელიც ხსნის პლატფორმას კრიტიკულ საკითხებზე მსჯელობისა და მრავალმხრივი დისკუსიისთვის. ქვიარ ფორუმი მიზნად ისახავს ხელი შეუწყოს ალტერნატიული საგანმანათლებლო სივრცის შექმნასა და აქტივისტური ჯგუფების მობილიზებას. შესაბამისად, კონფერენცია განსაკუთრებით ღირებული შეიძლება იყოს ქვიარ და ფემინისტურ პოლიტიკით, აქტივიზმითა და სოციალური მეცნიერებებით დაინტერესებული ჯგუფებისა და ინდივიდებისთვის.

ქვიარ ფორუმის საჯარო ლექციათა 2 დღიან ციკლში მონაწილეობენ ფილოსოფიის, სოციალური მეცნიერებების და გენდერის კვლევების სფეროში მოღვაწე მომხსენებლები საქართველოდან და აღმოსავლეთ ევროპის ქვეყნებიდან.

ბოჟან ბილიჩი მუშაობს პოსტ-იუგოსლავიის სივრცეში ლგბტქ აქტივიზმის, ლგბტქ-აფირმატიულ ფსიქოთერაპიაზე, არაჰეტეროსექსუალობასა და გენდერული ვარიაციის საკითხებზე. ბოჟაბ ბილიჩი არის ლაიზა მეიტნერის მეცნიერ-თანამშრომელი ვენის უნივერსიტეტის გენდერის კვლევების, ფილოსოფიისა და განათლების ფაკულტეტზე, ასევე, გენდერისა და სამხრეთ-აღმოსავლეთ ევროპის სოციალური მოძრაობების პროფესორი ბოლონიის უნივერსიტეტის პოლიტიკის მეცნიერებათა სკოლაში.

ანდრეა პეტო არის ისტორიკოსი და ცენტრალური ევროპის უნივერსიტეტის (CEU) გენდერის კვლევების დეპარტამენტის პროფესორი (ვენა, ავსტრია). ის არის CEU-ს დემოკრატიის ინსტიტუტის აფილირებული მკვლევარი ბუდაპეშტში და უნგრეთის მეცნიერებათა აკადემიის მეცნიერებათა დოქტორი. მისი ნაშრომები გენდერზე, პოლიტიკაზე, ჰოლოკოსტსა და ომზე 23 ენაზე არის თარგმნილი. 2018 წელს მას მიენიჭა ALLEA-ს მადამ დე სტაელის პრემია კულტურული ღირებულებებისთვის. პეტო ასევე არის სოდერტორნის უნივერსიტეტის საპატიო დოქტორი (სტოკჰოლმი, შვედეთი). მისი ბოლო ნაშრომებიდან აღსანიშნავია: The Women of the Arrow Cross Party. Invisible Hungarian Perpetrators in the Second World War. Palgrave, Macmillan, 2020. ასევე, Forgotten Massacre: Budapest 1944. DeGruyter, 2021.

წყარო: სოციალური სამართლიანობის ცენტრი

ქართველი დიზაინერი, დემნა გვასალია, მოდის სამყაროში ყველაზე პრესტიჟული დაჯილდოების, ამერიკის მოდის დიზაინერთა საბჭოს დაჯილდოების გამარჯვებულია. ის გამარჯვებული გახდა კატეგორიაში – ქალის სამოსის წლის საერთაშორისო დიზაინერი.

CFDA-ის საბჭოს ტომ ფორდი ხელმძღვანელობდა და დემნასთან ერთად, ამ კატეგორიაში წარდგენილი იყვნენ: დანიელ ლი – Bottega Veneta, რაფ სიმონსი და მიუჩია პრადა – Prada, პიერპაოლო პიჩოლი – Valentino, სიმონ ჟაკმუსი –JACQUEMUS.

დემნა გვასალია Balenciaga-ს კრეატიული დირექტორია და მან ეს ჯილდო პირველად 2017 წელს მიიღო.

აშშ-ს საზღვაო ფლოტმა გეი უფლებების აქტივისტის, ჰარვი მილქის სახელი დაარქვა საზღვაო გემს. 1950-იან წლებში, სექსუალობის გამო, მილქი იძულებული გახდა, სამსახური დაეტოვებინა.

გემი Harvey Milk სან დიეგოს სანაპიროდან გავიდა. პროცესს საზღვაო ძალების მდივანი, კარლოს დელ ტორო და თავად ჰარვი მილქის ძმისშვილი, სტიუარტი, ესწრებოდნენ.

Harvey Milk ერთ-ერთია იმ ექვსი გემიდან, რომლებსაც აშშ-ის სამოქალაქო უფლებების დამცველების სახელი დაარქვეს. მათ შორის არიან ყოფილი მთავარი მოსამართლე – ერლ უორენი და მოკლული საპრეზიდენტო კანდიდატი, რობერტ კენედი.

ჰარვი მილქი სამაშველო გემზე მყვინთავი ოფიცერი და ლეიტენანტი იყო, მაგრამ 1955 წელს, მისი სექსუალობის შესახებ ორკვირიანი დაკითხვის შემდეგ, ის იძულებული გახდა, სამსახური დაეტოვებინა. მოგვიანებით კი, ის გახდა ამერიკის ერთ-ერთი პირველი ღიად გეი პოლიტიკოსი, რომელიც 1977 წელს სან-ფრანცისკოს სამეთვალყურეო საბჭოს წევრად აირჩიეს. 1978 წელს ის დენ უაიტმა, ქალაქის ყოფილმა ზედამხედველმა, გასროლით მოკლა. მათ ხშირად ჰქონდა დაპირისპირება სხვადასხვა საკითხის გამო.

Harvey Milk-ის გაშვების ცერემონიაზე სიტყვით გამოსვლისას, დელ ტორომ თქვა, რომ არასწორი იყო, საზღვაო ძალებში ყოფნის დროს რომ მილქი იძულებული გახდა „დაემალა თავისი ცხოვრების ძალიან მნიშვნელოვანი ნაწილი“.

,,ძალიან დიდი ხნის განმავლობაში, მეზღვაურები, როგორიც ლეიტენანტი მილქი იყო, იძულებული იყვნენ, ჩრდილში დარჩენილიყვნენ. კიდევ უფრო უარესი, მათ აძევებდნენ საზღვაო ძალებიდან. ეს უსამართლობა ჩვენი საზღვაო ძალების ისტორიის ნაწილია, მაგრამ ასევე აღსანიშნავია ყველა იმ ადამიანის შეუპოვრობა, ვინც ამ უსამართლობის წინააღმდეგ ბრძოლას აგრძელებს.” – თქვა დელ ტორომ.

წყარო: bbc.com