ლელუკა ლაშხი საფრანგეთში მცხოვრები ქართველი მწერალია. მასთან ინტერვიუ ქვიარმა 2 წლის წინ ჩაწერა. მიმდინარე პერიოდში ლელუკამ ახალ რომანზე მუშაობა დაასრულა და მის რიგით მეხუთე წიგნთან დაკავშირებით კომენტარიც მოგვცა.
ლელუკა ლაშხი:
„ნეირონი“ რეალურ ისტორიაზე დაფუძნებული რომანია, ფანტასტიკის ელემენტებით. ჩვენი ფიქრები ხშირად გაცილებით რეალურია, ვიდრე ის ყოფა, რომელშიც ვართ, ხოლო ჩვენი პიროვნების სხვადასხვა „მე“-ები ქვეცნობიერში რეალობის პარალელურად მიმდინარე ამბებზე არიან კონცენტრირებულები. პრაქტიკულად ამაზეა ეს რომანი.
თინა ქართველი ქალია, რომელიც დაიბადა და გაიზარდა გაგრაში. ის მშობლიური სახლიდან რუსეთის რეჟიმმა გამოაძევა. ქუთაისში ჩასვლის შემდეგ თინა მოიტაცეს, იძულებით დააქორწინეს. მას საკუთარი ამბის გახსენება ძალიან გაუჭირდა. ის წლების განმავლობაში ძალადობის მსხვერპლი იყო, ქმარი აუპატიურებდა. ამჟამად თინა საფრანგეთში ცხოვრობს. მე მის ამბავს ლიტერატურული ფორმა მივეცი, ზუსტი სიტყვების შერჩევაში, ამბის გადმოცემაში დავეხმარე.
ძალადობაზე ხმამაღლა, საჯაროდ საუბარი სხვა ჩაგრულ ქალებს ეხმარება, მოტივაციას აძლევს. როცა ერთი ქალი ამბობს, − „ეს მე გადამხდა“, მეორე დაფიქრდება, − „მგონი მეც ცუდად ვარ“, მესამე იტყვის, − „მე თქვენზე ცუდად ვარ“. ამის შემდეგ იწყებენ იმ მიზეზების ძებნას, თუ რატომ არიან ცუდად. როცა იპოვიან, შემდეგ უჩნდებათ სურვილი, რომ ეს მოიშორონ, აქედან, ამ მოცემულობიდან გავიდნენ. ეს გასვლა ხმაურს იწვევს. ჩრდილში მყოფი ქალებიც ფიქრობენ, − „მგონი, ჯობია, ამაზე ვილაპარაკოთ“.
სამწუხაროდ, საქართველოში, ისევე როგორც სხვა განვითარებად ქვეყნებში, საზოგადოება მიჰყვება ფართოდ გავრცელებულ შეხედულებებსა და ტენდენციებს. აი, რას ვგულისხმობ, ზედაპირული საუბრები, რაც ვერაფერს ცვლის, უხარისხოდ და უგულოდ გაკეთებული საქმე, თუნდაც ძალიან კარგი მიზნები იყოს გაცხადებული. ასევე ვგულისხმობ პოლიტიკურ და სამოქალაქო სექტორის ლიდერების მხრიდან პოპულისტურ განცხადებებს. ხარისხიანი განათლება ძალიან გვაკლია.
ქალებს ვუსურვებდი, იპოვონ საკუთარი მიზნები. ყველაფერში, რასაც არ უნდა ვაკეთებდეთ, გვჭირდება მიზანი. როცა ვიღვიძებ, რისთვის უნდა ავდგე საწოლიდან, ხომ მჭირდება მიზანი. ჩვენი ცხოვრება ხომ ასეთი პატარა დეტალებისგან შედგება. მიზანია ყოველი გააზრებული ნაბიჯი. ამავდროულად, ჩემთვის მიზანი არ ამართლებს საშუალებას. არ შემიძლია ისეთ ადამიანებთან კომუნიკაცია, ვინც ამ თვალსაზრისით თანმიმდევრული არ არის. ასევე ჩემი მოტივაცია სიყვარულის გარეშე არ არსებობს. ჯერ არის სიყვარული და მერე სხვა დანარჩენი.
წიგნში განვითარებულ ქვიარ ისტორიას რაც შეეხება არც ეს ამბავია გამოგონილი. შეიძლება ვინმეს პროვოკაციულიც მოეჩვენოს. მე საერთოდ მიმაჩნია, რომ ყველა ადამიანი ბისექსუალია, რადგან ყველას შეუძლია სექსუალური ურთიერთობა ჰქონდეს ნებისმიერი სქესის ადამიანთან. სექსუალური ორიენტაცია ხომ ჩვენს თავშია. პირადად მე არ მინდა რაიმე ჩარჩოთი ვიყო შემოსაზღვრული. ვერ ვიტან საზღვრებს.
რომანის სახელწოდებაა „ნეირონი“ და სწორედ ეს არის ფანტასტიკის ელემენტი. გარკვეულ ექსპერიმენტს აქვს ადგილი, რომელშიც მოხალისეები მონაწილეობენ. ექსპერიმენტის მიზანია საკუთარი შესაძლებლობების გამოცდა.
წიგნი უკვე დაიბეჭდა გამომცემლობა “პალიტრა L”-ის მიერ და მალე ხელმისაწვდომი იქნება წიგნების მაღაზია „ბიბლუსის“ ქსელში.
