ივლისი 2021 - Page 2

მას შემდეგ, რაც Amazon-მა უარი თქვა, ტრასფობიური წიგნი გაყიდვიდან ამოეღო, Amazon-ი ორმა თანამშრომელმა დატოვა. ამ წიგნმა აზრთა სხვადასხვაობა ჯერ კიდევ გასული წლის ივნისში, გამოქვეყნებისთანავე გამოიწვია.

აპრილში, Amazon-ის 467 თანამშრომელმა მხარი დაუჭირა ორგანიზაციულ საჩივარს წიგნის – Irreversible Damage-ის (”შეუქცევადი ზიანი”) წინააღმდეგ, რომელიც Wall Street Journal-ის მიმომხილველმა, აბიგაილ შრიერმა დაწერა. წიგნის ქვესათაური მკითხველს აფრთხილებს, რომ ”ტრანსგენდერების სიგიჟე” ახალგაზრდა გოგონებს ”უბიძგებს” ტრანზიციისკენ. Amazon-ის თანამშრომლების მტკიცებით, მწერლის პოზიცია არ შეესაბამება Amazon-ის პოლიტიკას, რომელიც კრძალვს ისეთი წიგნების გაყიდვას, სადაც ლგბტქ+ იდენტობა ფსიქიკურ დაავადებად მიიჩნევა. აღნიშნული პოლიტიკა ძალაში მიმდინარე წლის მარტში შევიდა.

Amazon-ის წიგნის შინაარსისა და ხარისხის დირექტორი ამტკიცებს, რომ ”წიგნი არ არღვევს კომპანიის პოლიტიკას” და ზემოაღნიშნული წიგნის საცალო გაყიდვები გაგრძელდება. სწორედ ამ გადაწყვეტილებამ გამოიწვია ორი თანამშრომლის სამსახურიდან წასვლა.

აბიგაილ შრიერი თავის წიგნში ამბობს, რომ ტრანსგენდერი ახალგაზრდების რეკორდული ზრდა გამოწვეულია არა საზოგადოების მიმღებლობით, არამედ სწრაფად მზარდი გენდერული დისფორიით. წიგნში ხაზგასმულია, რომ ტრასგენდერობა ტრენდადაა ქცეული, სისგენდერი ქალები ფიქრობენ, რომ ეს “მაგარია” და ტრასგენდერობისკენ მიისწრაფვიან.

მიუხედავად ამისა, შრიერმა არაერთხელ განაცხადა, რომ მისი წიგნი არ არის ტრანსფობიური. ”ვინც ფიქრობს, რომ ჩემი წიგნი ტრანსგენდერობას დაავადებად წარმოაჩენს, ან არ წაუკითხავს, ან კეთილსინდისიერი იდიოტია”, – დაწერა მან Twitter-ზე.

ავტორმა ერთ-ერთ ინტერვიუში თქვა, რომ ის პატივს სცემს ტრანსი მოზარდების გადაწყვეტილებას და დასძენს, რომ მისი მთვარი მიზანი მათი მშობლების გაფრთხილება იყო ტრანზიციის პროცესთან დაკავშირებით.

დოქტორმა ჯეკ ტურბანმა, Stanford Medicine-ის ბავშვთა ფსიქიატრიის საზოგადოების თავმჯდომარემ აღნიშნა, რომ შრიერმა რეალურად ვერ შეძლო ინტერვიუ ჩაეტარებინა იმ თინეიჯერებთან, რომელთა ისტორიებიც წიგნში გვიამბო. მან დასძინა, რომ მოზარდობის შემდეგ იშვიათია ტრანსგენდერი ახალგაზრდა, რომელიც მოგვიანებით გადაწყვიტეს, რომ სისგენდერია.

ბევრი ამბობს, რომ ამაზონის გადაწყვეტილება, გააგრძელოს წიგნის გაყიდვა, საფრთხეს უქმნის ტრანსი ახალგაზრდების უსაფრთხოებას. Amazon-ის თანამშრომლები შეშფოთებული არიან იმით, რომ ტრანსგენდერთა საძიებო ჩამონათვალში Irreversible Damage პირველ ადგილს იკავებს.

NBC News ავრცელებს Amazon-ის ერთ-ერთი თანამშრომლის შიდა ფორუმზე დაწერილ განცხადებას: ”ჩვენი პლატფორმის მასშტაბურობის გამო, ტრანსგენდერი ადამიანების მშობლები შემოვლენ ჩვენს საიტზე ინფორმაციის მისაღებად და ჩვენ ვალდებული ვართ დავრწმუნდეთ, რომ არ გამოვიყენებთ ჩვენს უპირატესობას ამ წიგნით მიყენებული ზიანის გასაზრდელად.”

მიუხედავად ვნებათაღელვისა, Amazon-ის წარმომადგენელი ამბობს, რომ არ შეცვლის გადაწყვეტილებას და წიგნს გაყიდვაში დატოვებს. ერთ-ერთმა დიდმა ონლაინ მაღაზია ”თარგეთმა” ნოემბერში განაცხადა, რომ წიგნს გაყიდვიდან ამოიღებდა, შემდეგ ცენზურის გამო დროებით გადაიფიქრა, თუმცა მარტის თვიდან წიგნი მათ ვებსაიტზე აღარ იძებნება.

წყარო: them.us

უნგრეთის პრემიერმინისტრი ვიქტორ ორბანი გეგმავს, რომ რეფერენდუმის გზით დაიცვას გასულ თვეში მიღებული ანტი-ლგბტქ+ კანონი. ოთხშაბათს, ფეისბუქზე გამოქვეყნებულ ვიდეოში ორბანმა განაცხადა, რომ ჩატარდება ეროვნული რეფერენდუმი, რომლის საშუალებითაც, უნგრელი ამომრჩეველი შეაფასებს ამ კანონს, რომელსაც ცოტა ხნის ევროკავშირმა ”სამარცხვინო” უწოდა და მის წინააღმდეგ სარჩელი შეიტანა სასამართლოში.

კანონი კრძალავს, რომ 18 წლამდე ასაკის ბავშვებმა ინფორმაცია მიიღონ ჰომოსექსუალობის ან სქესის შეცვლის შესახებ სკოლებსა და მედიაში. ”ჩვენი ბავშვების მომავალი საფრთხის ქვეშ დგას, ამიტომ ამ საკითხს ასე ვერ დავთმობთ. ბოლო კვირების განმავლობაში, ბრიუსელმა აშკარად შეუტია უნგრეთს ბავშვების დაცვის კანონის გამო.” – ამბობს ორბანი.

ეს ნაბიჯი საპასუხო რეაქციაა ევროკავშირის ლიდერების განცხადებების წინააღმდეგ, რომლებმაც მკაცრად დაგმეს ანტი-ლგბტქ + კანონი. ჰოლანდიის პრემიერმინისტრმა, მარკ რუტერმა, უნგრეთს მოუწოდა, დაეტოვებინა ევროკავშირი და თქვა, რომ ევროკავშირში უნგრეთის ადგილი არ არის. როგორც ცნობილია, ივნისში ორბანს დახურულ შეხვედრაზე დაუპირისპირდა ლუქსემბურგის ღიად გეი პრემიერმინისტრი ქსავიერ ბეთელი.

”ბაბუაჩემი ებრაელი იყო, მე გეი ვარ და შემიძლია, თავისუფლად ვიცხოვრო. მე წავიკითხე ეს კანონი, მე ვიცი, რა ხდება, როდესაც თქვენ ხალხს უმცირესობად აქცევთ.” – თქვა ბეთელმა ევროკავშირის ხელმძღვანელობის შეხვედრაზე.

საბოლოოდ, საკითხს ევროპული სასამართლო გადაწყვეტს, რომელსაც შეუძლია, უნგრეთს მნიშვნელოვანი ჯარიმები დაუწესოს.

ფოტო: Mark Kerrison/Getty Images

წყარო: them.us

43 წლის კარინ ჟან-პიერი ჰაიტელი ემიგრანტების შვილი და პირველი შავკანიანი ქვიარ ქალია, რომელმაც მაისში თეთრი სახლის საკონფერენციო დარბაზში ბრიფინგი გამართა.

”ვაფასებ ამ მოვლენის ისტორიულ ხასიათს, ნამდვილად ასეა, მაგრამ მჯერა, რომ ტრიბუნის უკან ყოფნა, ამ ოთახში ყოფნა, ამ შენობაში ყოფნა, არ ეხება მხოლოდ ერთ ადამიანს. ეს ეხება იმას, რასაც ჩვენ ამერიკელი ხალხის სახელით ვაკეთებთ.”

ადვოკატირების ჯგუფის, MoveOn-ის საზოგადოებასთან ურთიერთობის ყოფილი მთავარი ოფიცერი ჟან-პიერი, ბაიდენის პრეზიდენტობის პირველივე თვეებში მოექცა ყურადღების ცენტრში და შევიდა ისტორიაში. პირველად 2020 წელს, როდესაც ის ბაიდენის საპრეზიდენტო კამპანიისას, შტაბის უფროსად დაინიშნა – ის იყო პირველი ლგბტქ + ადამიანი ამ როლში. ასევე, ის არის პრეზიდენტის პრესმდივნის მთავარი მოადგილე.

როგორც კარინი ამბობს, თეთრ სახლში მისი ყოფნა უპრეცედენტო ამბავია და პრეზიდენტ ჯო ბაიდენის მიერ თანასწორობის იდეის ერთგულებას ასახავს. თანამდებობაზე მუშაობის პირველ დღეს ბაიდენმა ხელი მოაწერა მემორანდუმს, რომლითაც ფედერალური მთავრობის ყველა განყოფილებას დაავალა, შეესწავლათ და გამოეკვლიათ ლგბტქ+ ადამიანების საწინააღდეგო პროცესები და რამდენიმე დღეში გააუქმა დონალდ ტრამპის ტრანს სამხედრო აკრძალვა.

”პრეზიდენტს სჯერა, რომ ქვიარ წარმომადგენლობას მნიშვნელობა აქვს და მე ვაფასებ, რომ ეს შესაძლებლობა მომეცა. ჩვენ ყველანი ვამაყობთ, რომ ისტორიაში ეს არის პრეზიდენტის ყველაზე მრავალფეროვანი ადმინისტრაცია .” – ამბობს კარინ ჟან-პიერი.

ჟან-პიერთან ერთად ამერიკის ამჟამინდელი პრეზიდენტის ადმინისტრაციაში მუშაობს ტრანსგენდერი ქალი, დოქტორი რეიჩელ ლევინი, რომელიც მუშაობდა ჯანდაცვის მდივნის თანაშემწედ, ჯანმრთელობისა და ადამიანთა მომსახურების დეპარტამენტში (HHS).

წყარო: them.us

ევროკავშირი ოფიციალურად უჩივის სასამართლოში უნგრეთსა და პოლონეთს ლგბტქ+ თემის წინააღმდეგ ადამიანის უფლებების სავარაუდო დარღვევის ფაქტის გამო. ევროკომისიამ ხუთშაბათს გამოაცხადა, რომ იწყებს მოქმედებას. გასულ თვეში უნგრეთმა ანტი-ლგბტქ+ ”პროპაგანდისტული” კანონი მიიღო, ხოლო პოლონეთის 100-ზე მეტმა მუნიციპალიტეტმა თავი “ლგბტ თემისგან თავისუფლად” გამოაცხადა.

ივნისში, უნგრეთმა მიიღო რუსეთის ტიპის ”ანტიპროპაგანდისტული” კანონი, რომელიც კრძალავს ჰომოსექსუალობის ან სქესის შეცვლის ”პოპულარიზაციას” არასრულწლოვნებში. აკრძალვა ეხება როგორც სკოლებს, ასევე, მედიას – სატელევიზიო გადაცემებსა და რეკლამებსაც კი.

ევროკომისიის განმარტების თანახმად, ასეთი პოლიტიკა არღვევს ევროკავშირის ხელშეკრულების მე-2 მუხლს. მიუხედავად იმისა, რომ 1992 წლის დეკლარაციაში კონკრეტულად არ არის ნახსენები LGBTQ+ თანასწორობა, პრესრელიზში აღნიშნულია, რომ ხელშეკრულებაში მოცემულია ევროკავშირის ძირითადი ღირებულებები – თანასწორობა, ღირსებისა და ადამიანის უფლებების პატივისცემა. ”კომისია გამოიყენებს თავის ხელთ არსებულ ყველა ინსტრუმენტს ამ ღირებულებების დასაცავად” – ნათქვამია პრესრელიზში.

ევროკავშირის მხრიდან ეს ღონისძიებები მოსალოდნელი იყო მას შემდეგ, რაც ევროკომისიის პრეზიდენტმა, ურსულა ფონ დერ ლეიენმა, გასულ კვირას პირობა დადო, რომ ევროკავშირი გამოიყენებდა ყველა შესაძლო საშუალებას უნგრეთსა და პოლონეთში ანტი-ლგბტქ+ კანონის წინააღმდეგ. ამ კანონის გარდა, უნგრეთმა ასევე მიიღო კანონი, რომელიც 2020 წლიდან უკრძალავს ტრანს ადამიანებს სქესის შეცვლასა და ერთნაირსქესიან წყვილებს შვილის აყვანას. ”ევროპა არასდროს დაუშვებს ჩვენი საზოგადოების რომელიმე წევრის სტიგმატიზირებას, იქნება ეს იმის გამო, თუ ვინ უყვართ, მათი ასაკის, ეთნიკური ნიშნის, პოლიტიკური მოსაზრებებისა თუ რელიგიური მრწამსის გამო.” – თქვა ფონ დერ ლეიენმა.

უნგრეთსა და პოლონეთს ორი თვე აქვთ იმისთვის, რომ უპასუხონ ევროკავშირის საჩივარს. საბოლოო გადაწყვეტილებას ევროპული სასამართლო მიიღებს, ევროკავშირის უმაღლესი იურიდიული ორგანო, რომელსაც აქვს შესაძლებლობა, დააკისროს მნიშვნელოვანი ჯარიმები ამ ქვეყნებს.

კანონი, რომელიც ოფიციალურად გასულ კვირას ამოქმედდა, უკვე მნიშვნელოვან ზიანს აყენებს ქვეყნის ლგბტქ+ თემს. ბუდაპეშტში წიგნის მაღაზია 700 დოლარით დააჯარიმეს ერთნაირსქესიანთა ოჯახების შესახებ წიგნის გაყიდვის გამო, ასევე, ტრანსგენდერმა მასწავლებელმა ცოტა ხნის წინ უთხრა Reuters- ს, რომ ნერვიულობს, რაგან შეიძლება სამსახურიდან გააგდონ. ”მე ყურადღებით გავეცანი კანონს, რომ ვნახო, შეიძლება თუ არა ჩემთვის მასწავლებლად მუშაობის გაგრძელება” – ამბობს ფლორის ფელეგი-ბალტა, რომელიც საშუალო სკოლაში ქიმიას ასწავლის. ”კანონის ერთი ინტერპრეტაცია ის არის, რომ სკოლაში უბრალო მისვლითაც, მე ტრანსსექსუალობას გამოვხატავ.”

მიუხედავად იმისა, რომ ამ კანონს უარყოფითი რეაქცია მოჰყვა უცხოელი ლიდერების მხრიდანაც, რომლებიც მოითხოვენ, რომ უნგრეთმა ევროკავშირი დატოვოს, უნგრეთი უკან არ იხევს.

წყარო: them.us

ფოტო: NurPhoto