ივლისი 2021

”საერთაშორისო სოციალური კვლევის პროგრამის”, ISSP-ის მიერ ჩატარებული გამოკითხვის შედეგების მიხედვით, საქართველო ევროპაში ყველაზე ჰომოფობიური ქვეყნაა. ”საქართველოში განვითარებულმა ბოლოდროინდელმა მოვლენებმა კიდევ ერთხელ გამოავლინა ჰომოფობიის მასშტაბი ქვეყანაში.” – ნათქვამია oc-media.org-ზე გამოქვეყნებულ სტატიაში.

ორგანიზაციამ კვლევა 33 ქვეყანაში ჩაატარა. საქართველოში გამოკითხულთა 84% მიიჩნევს, რომ ”ორ ზრდასრულ, ერთსა და იმავე სქესის ადამიანს შორის სექსუალური ურთიერთობა ყოველთვის არასწორია.

გამოკითხვის შედეგებით საქართველოს თურქეთი მოსდევს, სადაც საზოგადოების 80% ამბობს, რომ ერთნაირსქესიანთა სექსუალური ურთიერთობები მიუღებელია. რუსების 69% ამბობს იმავეს. უნგრეთში, რომელსაც ევროკავშირი ამჟამად ჰომოფობიური კანონმდებლობის მიღებისთვის უჩივის, გამოკითხულთა დაახლოებით ნახევარი, 45% ამბობს, რომ მსგავსი ურთიერთობები ყოველთვის არასწორია. კვლევაში მონაწილეობა არ მიუღია სომხეთსა და აზერბაიჯანს.

მონაცემები ასევე განსხვავდება ასაკისა და სქესის მიხედვით – ახალგაზრდები ნაკლებად ჰომოფობები არიან, ვიდრე ხანდაზმულები და ამასთან, ქალებს უფრო აქვთ ჰომოფობიური განწყობები, ვიდრე მამაკაცებს, 35-54 წლამდე ასაკის მამაკაცებისა და ქალების გარდა, რომლებიც თანაბრად ჰომოფობები არიან.

ფოტო: ვახო ქარელი

პალმირა მარტინეს გალარდო ვალდესმა და გაბრიელა ფლორეს კასტრომ 5 წლის რიკარდოს შვილად აყვანა მიმდინარე წლის თებერვალში დაიწყეს,  6-თვიანი განხილვის შემდეგ, მოსამართლემ შვილად აყვანა 13 ივლისს დაამტკიცა, როდესაც რიკარდომ მიიღო დაბადების მოწმობა, რომელზეც ორივე დედის სახელი იყო ჩაწერილი.

რიკარდო 2015 წლის ნოემბერში დაბადებისთანავე მიატოვეს ბიოლოგიურმა მშობლებმა და მას შემდეგ სახელწიფო ზრუნვის პროგრამაში იყო. შემდეგ ის გადაიყვანეს პროგრამაში, სადაც მისი მომავალი დედები მოხალისეებად მუშაობდნენ. ‘’ჩვენ ვიგრძენით კავშირი’’ – ამბობს ერთ-ერთი დედა კასტრო

ამ ფაქტამდე მექსიკაში მნიშვნელოვანი საკანონმდებლო ცვლილებები გატარდა:

Human Rights Watch-ის მიხედვით, შვილად აყვანის უფლება მექსიკაში ერთი და იმავე სქესის წყვილებისთვის მას შემდეგ დამტკიცდა, რაც ქვეყნის უზენაესმა სასამართლომ 2010 წელს დაამტკიცა, რომ მთავრობას არ შეეძლო ჩამოერთვა ლგბტქ+ თემისთვის მათ იდენტობასთან დაკავშირებული ფუნდამენტური უფლებები.

2009 წელს მექსიკაში გამოიცა ვერდიქტი, რომელიც ერთი და იმავე სქესის ადამიანებს ქორწინების უფლებას აძლევდა, თუმცა მექსიკის გენერალური პროკურორის ოფისი ამტკიცებდა, რომ სახელმწიფო ვერ იცავდა ბავშვის საუკეთესო ინტერესს და ვერ აკმაყოფილებდა ოჯახის კონცეფციას, როცა ეს ვერდიქტი ერთსქესიან წყვილებს აყვანის უფლებას აძლევდა.

უზენაესი სასამართლო არ დაეთანხმა გენერალური პროკურორის ოფისს და მაგალითად ადამიანის უფლებათა ევროპული სასამართლოს (ECHR) 2008 წლის გადაწყვეტილება მოიყვანა, რომლის თანახმად, ერთი და იმავე სქესის წყვილებს ისევე აქვთ შვილად აყვანის უფლება, როგორც ჰეტეროსექსუალ წყვილებს და მარტოხელა ადამიანებს. ECHR– ის თანახმად, ბავშვის საუკეთესო ინტერესებში ასევე შედის მოსიყვარულე ოჯახი სექსუალური ორიენტაციის მიუხედავად.

2015 წელს კი, მექსიკის უზენაესმა სასამართლომ კიდევ ერთხელ დაადასტურა თავისი გადაწყვეტილება, როცა იუკატანის ნახევარკუნძულის კამპეჩეს შტატში გააუქმა კანონი, რომელის მიხედვით, ერთი და იმავე სქესის წყვილებს ეკრძალებოდათ შვილად აყვანა.

ერთნაირსქესიანი წყვილების დაქორწინება ნებადართულია მექსიკის 32 შტატიდან 20-ში.

‘’მიუხედავად მექსიკაში თანასწორობისკენ გადადგმული მნიშვნელოვანი ნაბიჯებისა, ქვიარ ადამინები იურიდიულ და სოციალურ წინააღმდეგობებს მაინც აწყდებიან, ამიტომ ძალიან მნიშვნელოვანია ლგბტ+ ოჯახების არსებობის დადასტურება. ამის კარგი მაგალითია პალმირასა და გაბრიელას ამბავი და ეს ამბავი ორმაგად მნიშვნელოვანია მექსიკის ისეთი კონსერვატიული შტატისთვის, როგორიც არის ხალისტო” – განაცხადა მექსიკელმა ლგბტქ+ აქტივისტმა, ენრიკე ტორე მოლინამ.

წყარო: them.us

ჩილეს სენატმა ოთხშაბათს კანონპროექტი მიიღო, რომელიც ერთნაირსქესიანთა ურთიერთობის დაკანონებას გულისხმობს. ქვეყანა ასე ახლოს არასდროს ყოფილა გეი ქორწინების აღიარებასთან.

Buenos Aires Times-ის ცნობით, კანონპროექტის მიხედვით, ჰომოსექსუალ წყვილებსაც ექნებათ შვილის აყვანის შესაძლებლობა, როგორც ჰეტეროსექსუალ წყვილებს.

კანონპროექტი დასამტკიცებლად გადაეგზავნება ჩილეს ეროვნული კონგრესის ქვედა პალატას, საბოლოოდ კი, პრეზიდენტის ვალიდაციით შევა ძალაში.

Movilh – ორგანიზაცია, რომელიც წლებია ლგბტქ+ უფლებებზე მუშაობს და ადვოკატირებას უწევს თემის წევრებს ქორწინების უფლებისთვის, ამ კანონპროექტს “სამართლიანობისა და თანასწორობის ტრიუმფს” უწოდებს. “გეი წყვილების დისკრიმინაციის დასასრული უკვე ძალიან ახლოსაა” – ვკითხულობთ მათ შეფასებას Twitter-ზე.

“გვინდა, მადლიერება გამოვხატოთ ყველა იმ ადამიანის მიმართ, ვინც იმუშავა, ვინც მცირედი წვლილი შეიტანა ამ კანონპროექტში და დააჩქარა ეს მოვლენები”- აღნიშნა Movilh- ის სპიკერმა დენიელა ანდრადემ Facebook-ზე გამოქვეყნებულ ვიდეოში. “დღეს შეგვიძლია ვთქვათ, რომ ეს არის ახალი მომავლისკენ მსვლელობა, რომელშიც შენ, მე და ყველას შეგვიძლია შევქმნათ ოჯახი, რომელსაც სახელმწიფო იცავს ადამიანის უფლებებით, იმ უფლებებით, რომელსაც ჩვენ ნამდვილად ვიმსახურებთ – როგორც ადამიანები, როგორც ღირსეული ქვეყნის მოქალაქეები”.

ანდრადე აქვე აღნიშნავს, რომ კანონპროექტის განხილვა ძალიან გაჭიანურდა სენატის მიერ – “სენატში ოთხი წლის განმავლობაში იყო თაროზე შემოდებული ეს კანონპროექტი, რომელსაც წლების განმავლობაში ჩილეს მოსახლეობის უმეტესობა უჭერდა მხარს. ვიმედოვნებთ, რომ დეპუტატთა პალატა სხვა გზას აირჩევს და უმოკლეს დროში დააკანონებს ქორწინების თანასწორობას.”

ჩილეში 2015 წელს ერთი და იმავე სქესის სამოქალაქო კავშირების ლეგალიზაცია მოხდა, მაგრამ ქორწინების თანასწორობის შესახებ კანონპროექტი 2017 წლიდან მუშავდება, როდესაც ის პირველად გაიგზავნა საკანონმდებლო ორგანოში ყოფილი პრეზიდენტის, მიშელ ბაჩელეტის მიერ.

კანონპროექტის შემოღება “მოვილჰსა” და ჩილეს მთავრობას შორის 2016 წლის ივნისის შეთანხმებას მოჰყვა, რადგან ქვეყანამ მხარი არ დაუჭირა ერთნაირსქესიანთა ქორწინების თანასწორობას. 2012 წელს Movilh- მა შეიტანა სარჩელი ადამიანის უფლებათა ამერიკულ კომისიაში Inter-American Commission on Human Rights (IACHR), რამდენიმე ქვიარ წყვილის სახელით, რომელთაც დაქორწინება სურდათ.

შემდეგ კანონპროექტი რამდენიმე წლის განმავლობაში შეჩერდა ბაჩელეტის მემკვიდრის, სებასტიან პინერას კონსერვატორული შეხედულებებისა და ადმინისტრაციის წყალობით, რომლის კოალიციამ მას მხარი არ დაუჭირა.

როგორც LGBTQ + გაზეთი, Washington Blade იტყობინება, შარშან Movilh-მა გააკრიტიკა პინერა კანონპროექტის უგულებელყოფის გამო, IACHR- ის 2018 წლის განჩინებით, ჩილე, როგორც ყველა სხვა ქვეყანა, რომლებმაც მიიღეს ადამიანის უფლებათა ამერიკული კონვენცია, ვალდებულია, უზრუნველყოს თანასწორი უფლებები წყვილებისთვის განურჩევლად მათი ორიენტაციისა.

ამ თვის დასაწყისში ლგბტქ+ თემის ადვოკატები თუ კონსერვატორები გაოცებული დარჩნენ პინერას გადაწყვეტილებით -კანონპროექტი სასწრაფო წესით უნდა განხილულიყო: “ვფიქრობ, თანაბარი ქორწინების დრო დადგა”, – თქვა მან. “ჩვენ უნდა გავაღრმავოთ თავისუფლების მნიშვნელობა, მათ შორის, სიყვარულისა და საყვარელ ადამიანთან ოჯახის შექმნის თავისუფლება.”

ქორწინების თანასწორობა ამჟამად დაკანონებულია ლათინური ამერიკის შემდეგ ქვეყნებში: არგენტინა, ბრაზილია, კოლუმბია, ეკვადორი და ურუგვაი.

წყარო: them.us

დღეს მადრიდში პრაიდის კვირეული გაიხსნა

მადრიდში პრაიდის კვირეული, ”მადო” გაიხსნა. ღონისძიების მთვარი მიზანი, საზოგადოებაში ლგბტქ თემის მიმართ მიმღებლობის გაზრდაა. აღლუმი ქალაქის მთავარი მოედნიდან დაიწყება. კვირეულის ფარგლებში სპორტული და კულტურული ღონისძიებებიც იგეგმება.

კონცერტებისა და სპექტაკლების ორგანიზატორები მადრიდის ლგბტქი უფლებებზე მომუშავე ასოციაციები და კომპანიები არიან. გართობასთან ერთად, მოეწყობა საღამოები, რომელზეც ლგბტქი ადამიანის უფლებებზე ისაუბრებენ.

სტუმრებს ქუსლებით სირბილში მონაწილეობის მიღება შეეძლებათ. ქალაქის ყველაზე დიდი ლგბტქი რაიონი ჩუეკა კი თავის გეი ბარებსა და კლუბებში უმასპინძლებს მათ.

აღსანიშნავია, რომ მადრიდის ხელისუფლების წარმომადგენლების თქმით, მადრიდში დაახლოებით 500,000 ლგბტქი თემის წევრი ცხოვრობს, რაც იმაზე მეტყველებს, რომ ამ ქალაქში ქვიარ თემის წარმომადგენლები თავისუფლად და ლაღად გრძნობენ თავს.

მადრიდში პრაიდის ფესტივალი პირველად 1977 წელს ჩატარდა.