Tbilisi Pride

სველი ქვიშა — ქართული ქვიარ ფილმი, რომლის პრემიერითაც პრაიდ კვირეული იწყება

28 ივნისს პრაიდ კვირეული 2022 ქართული ქვიარ ფილმის ჩვენებით იწყება, რომლის რეჟისორი არაბინარული იდენტობის მქონე ელენე ნავერიანია. სველი ქვიშა 22-წლიანი საიდუმლო სიყვარულის ტრაგიკული ამბავია, რომლის სიუჟეტი შავი ზღვისპირა სოფელში, ერთ-ერთი გმირის გარდაცვალებით

დრეგ შემსრულებლების შეჯიბრებების სერია The Drag Ball იწყება

„თბილისი პრაიდის“ ახალი პროექტი THE DRAG BALL უნიკალური ღამეების სერიაა, რომელიც მიზნად ისახავს ქვიარ არტისტებისა და თემის გაძლიერებას, ბოლის კულტურის განვითარებასა და უსაფრთხო სივრცის შექმნას, სადაც  ყველას შეეძლება საკუთარი თავის თავისუფლად წარმოჩენა. 24 მარტს დაგეგმილი პირველი ღონისძიება – Prayers and Flowers უკრაინას

თბილისი პრაიდისა და GDI-ს ლგბტქი აქტივისტური ბანაკი მათთვის, ვისაც თემის აქტიური წევრობა სურს

საქართველოს დემოკრატიული ინიციატივა (GDI) და თბილისი პრაიდი გაეროს ფონდის მხარდაჭერით ლგბტქი აქტივისტურ ბანაკს გამართავენ. 3-დღიანი ტრენინგი 26, 27 და 28 აპრილს კახეთში ჩატარდება და

GDI-ის და Tbilisi Pride-ის აქტივისტური ბანაკი — ცოდნისა და გამოცდილებების ოჯახურ გარემოში გაზიარების შესაძლებლობა

ლგბტქი თემის წევრებისა და მხარდამჭერებისთვის სოციალიზაციისა და ერთმანეთის რეალურ სივრცეში გაცნობის ნაკლები შესაძლებლობები არსებობს. კიდევ უფრო შეზღუდულია ისეთი სივრცეები, სადაც ერთმანეთს ცოდნასა და გამოცდილებას

დაღლილი დრეგ ქვინი სიწმინდეების წინააღმდეგ — Not So Virgin Mary-ის ისტორია

ჩემი დრეგი არის აქტივისტური დრეგი და ის ყოველთვის პოლიტიკურია, ყოველთვის არის მიმართული კაპიტალიზმის, იმპერიალიზმის, პატრიარქატის და კოლონიალიზმის წინააღმდეგ. ვცდილობ, ჩემი შოუებით გავზარდო სხეულის მიმღებლობის პოლიტიკა და ვაჩვენო ადამიანებს, რომ არ არის აუცილებელი, ყველა ქვინის სხეული აკმაყოფილებდეს საზოგადოების მიერ დაწესებულ სტანდარტებს. დრეგი იძლევა საშუალებას, რომ არა მარტო კორსეტშემოჭერილმა, გაპარსულმა და გაპრანჭულმა აკეთო შოუები, არამედ იყო ბებერი ქვინი, რომელსაც სახლში რვა კატა ჰყავს და მეზობლის ბავშვებს ეჩხუბება. ასეთია ჩემი დრეგ პერსონა.

არ უნდა გაგიკვირდეთ, შოუს დროს წყალი თუ შემოგასხით, ან ტრაკზე წამოგარტყით, ან გაგლოღნეთ. თუ მოდიხარ ჩემს შოუზე, მზად უნდა იყო, რომ საყურეს დაკარგავ. თუ ფიქრობდი, რომ “ამას ვინ გაბედავდა”, კი, ყველაფერსაც გავბედავ.

პროტესტი, როგორც ხელოვნება და პირველი შეხება დრეგთან

Not So Virgin Mary
Instagram Not So Virgin Mary

ნებისმიერი სახის აქტივიზმი ჩემთვის არის ხელოვნება, სწორედ ამიტომ დრეგსაც ყოველთვის ხელოვნებად მოვიაზრებ. ის ჩემთვის Performance art-ის ერთ-ერთი ყველაზე ძველი და ლამაზი ფორმაა, რომელიც ძალიან მრავლისმომცველია. მისი საზღვრები ამოუწურავია და გაძლევს ძალიან ბევრის საშუალებას და პერსპექტივას, ოღონდ უნდა ხვდებოდე, რა არის ქვიარ ესთეტიკა. საერთოდ, ჰეტერონორმატიული პერფორმანს არტი ჩემთვის ცოტა დრომოჭმულია, ძალიან იშვიათად თუ “გაუვარდება” ვინმეს რამე ღირებული. დანარჩენ შემთხვევებში, ის არის პერფორმანსი პერფორმანსისთვის. ქვიარ კულტურა ძალიან სპეციფიკური რამეა და თუ მას კარგად არ იცნობ, სთრეითვოშინგის მცდელობები სრულიად უაზროა.

მე რომ მკითხო, დრეგთან ჩემი პირველი შეხება 8 მარტს, პარლამენტის კიბეებზე შედგა, როცა რუპორით წარმოვთქვი სიტყვა და მერე ჩემი ფრაზა: “ჩემი ფუჩუ ჩემი არჩევანია”, უამრავმა ადამიანმა აიტაცა. დღემდე ციტირებენ და ჩემი აზრით ეგ არის ნამდვილი დრეგი. პირველი დრეგ შეჯიბრება თანასწორობის მოძრაობის მიერ იყო ორგანიზებული და რა თქმა უნდა, დავმარცხდი, რადგან კიდევ ერთმა დრეგ ქვინმა, Sofia McQueen-მა ამიღო და ჩემით იატაკი მოწმინდა (იცინის). მე, რა თქმა უნდა, არც გავბრაზდი ამაზე, პირიქით — ძალიან ბედნიერი ვიყავი, იმდენად კარგად გააკეთა ეს ყველაფერი და ისეთი კარგი სანახავი იყო.

დაღლილი ქვინი სიწმინდეების წინააღმდეგ და ქართული ქემპი

ჩემი დრეგ პერსონაჟი, რომელიც დიდად არ განსხვავდება ჩემგან, არის საზოგადოებისგან და ტრადიციული მართლმადიდებლური წარმოდგენებისგან ძალიან, ძალიან, ძალიან დაღლილი ქვინი, რომელსაც ერთადერთი ისღა დარჩენია, რომ გადათელოს ყველაფერი, რაც წმინდაა: ჯვრები, წმინდანები, ხატები და ა.შ.

Not So Virgin Mary მეგობრებთან საუბრის დროს გაჩნდა. წმინდანებზე და ღვთისმშობელზე წამოიჭრა თემა და რადგანაც მარიამი მქვია, ვთქვი, მე ქალწულისგან ყველაზე შორს მდგომი წმინდანი ვარ-მეთქი.

ძალიან მეცინება, როცა ჩემს მთავარ ინსპირაციებზე ვფიქრობ. როგორც წესი, როცა მეგობარ ქვინებთან ვსაუბრობ ამ თემაზე, ყველა იხსენებს სახელოვან ქვინებს: დივაინს, რუპოლს, ლეიდი ბანს და როცა ჩემზე მიდგება საქმე, ვერკა სერდუჩკა მახსენდება. დრეგი პირველად ვერკა სერდუჩკას შესრულებით ვნახე და თუ ვინმეს შეიძლება ჩემი Drag Mother დავარქვა, ეს არის ვერკა სერდიუჩკა. თრეშ კულტურა ჩემი დრეგის მთავარი წყაროა.

ჩემი შოუების შეფასებისას ყველაზე სწორი სიტყვა არის Camp. შოუების დროს შეიძლება ვიყო გაბრაზებული, კარგ ხასიათზე, ძალიან სექსუალური და გამომწვევი, მაგრამ ამის მიუხედავად, ეს ყველაფერი იქნება ძალიან მხიარული და სანახაობრივი.

Camp არის სატირაში გაერთიანებული პოლიტიკური პროტესტი. სამეფო კარზე კლოუნები იყვნენ ასეთი ადამიანები — მასხარები, რომლებიც საზარელ რეალობას აჩვენებდნენ ყველაზე სასაცილო და მხიარული გზით.

დედოფლობა, როგორც იდენტობის ნაწილი

Not So Virgin Mary
Instagram: Not So Virgin Mary

ერთი შეხედვით, შეიძლება იფიქროთ, რომ დრეგს არ გააჩნია საზღვრები, თუმცა ამის მიუხედავად, მაინც არსებობს პატარა წესები. პირველი და ყველაზე მთავარი — არავითარ შემთხვევაში არ უნდა მიიღო საკუთარი თავი ზედმეტად სერიოზულად. საკუთარ თავს თუ არ დასცინი სხვების დასაცინი გახდები. მეორე და ასევე ძალიან მნიშვნელოვანი — რაღაც აუცილებლად გქონდეს სათქმელი, უბრალოდ ლამაზი საკმარისი არ არის. მესამე არის ის, რომ სუნთქავ — ფული მოითხოვე, აცემინებ — ფული მოითხოვე, თმა გადაიწიე — ფული მოითხოვე, უფასოდ არასდროს არაფერი გააკეთო, ყოველთვის უნდა გახსოვდეს რომ ქვინი ხარ, დედოფალი ხარ და შენი ადგილი უნდა იცოდე. მაგრამ თან უნდა გახსოვდეს, რომ მარტო შენ არ ხარ ქვინი, ბევრი ქვინია და ყველასთვის არსებობს საკმარისი ადგილი.

პერფორმანსებისთვის მომზადება იწყება კონცეფციის ძებნით. არსებობს თემატიკა და ვცდილობ, მის გარშემო შევკრა ამბავი. ამას მოჰყვება სამგორის მეორადები და მეიქაფ არტისტის ძებნა, რადგან ძალიან ცუდი ხელი მაქვს და დამოუკიდებლად მაკიაჟის გაკეთება არ შემიძლია. მერე მოდის კოსტიუმის ჯერი. შოუების გაკეთების წინ ჩემი მეგობარი და რეჟისორი სალომე ბაუერი მეხმარება, რომელიც თავის იდეებსაც მაწოდებს. მე, რა თქმა უნდა, ყველაფერს ვაიგნორებ და ისე ვაკეთებ, როგორც მე მინდა. ასე შეიქმნა უზარმაზარი ვაგინის ინსტალაცია Tbilisi Pride Fest-ისთვის. შემდეგი ეტაპია პერფორმანსის მომზადება, ადგილზე მისვლა, სცენის და განათების ნახვა. მერე ვარჯიშები და ბოლოს აღმოჩნდება, რომ არც სცენაა, არც განათება. მერე გულის შეტევა, ყველაფრის შეცვლა, გადაწყობა (იცინის).

მეიქაფს რომ გიკეთებენ, სულ სხვა ადამიანი იბადები. თბილისი პრაიდისა და საინიციატივო ჯგუფის (გიორგი ჩემინავა, დავით გოგიშვილი, მათე ხიდეშელი) მიერ ორგანიზებულ პირველ Drag Ball-ზე, მახსოვს, რომ მაკიაჟის გაკეთების შემდეგ ძალიან ვიჩხუბე, თან სრულიად უმიზეზოდ და მეორე დღეს ბოდიშებს ვიხდიდი. ნამდვილი ქვინივით მოვიქეცი, აღარ მახსოვდა არაფერი… ტრანსფორმაციის შემდეგ მართლა დედოფლად იქცევი, სხვანაირი ხდები —  არ მომეკარო, გამატარე, ფოტოს გადაღება გინდა? რიგში ჩადექი და 20 ლარი მოამზადე.

არც ისე ქალწული მარიამი დრეგის მიღმა და ლგბტქ+ საზოგადოება, რომელსაც ვეღარაფერი შეაჩერებს

Not So Virgin Mary
Instagram: Not So Virgin Mary

დრეგის მიღმაც დაახლოებით იგივე ადამიანი ვარ, უბრალოდ, ამხელა თავდაჯერება და უტაქტობა არ მაქვს, უფრო ზრდილობიანი ვარ. იმისთვის, რომ ვიარსებო, მიწევს ფრილანსერად მუშაობა. დიდი განსხვავება არ არის ჩემსა და ჩემს დრეგ პერსონას შორის. პატრიარქალურ, ორთოდოქსულ სამყაროში შენი იდენტობა უკვე არის პროტესტის ერთგვარი ფორმა — ის, რომ ქალი ხარ, ფეხებს არ იპარსავ, ქუჩაში გადიხარ ლიფის გარეშე, უკვე პერფორმანსია და გადადიხარ თავდაცვით რეჟიმში. იგივე ვრცელდება ფემინურ გეებზე, ტრანს ქალეზე, ბუჩ ლესბოსელებზე და ა.შ.

დიდი დრო დაგვჭირდა, მაგრამ ლგბტქ+ თემი გაიზარდა და მზად არის რაღაც თემებზე თამამად და საჯაროდ საუბრისთვის. 2013 წლის შემდეგ ყველაფერი შეიცვალა, გაჩუმებას აღარ ვაპირებთ და გასაგებია რატომაც. 5-მა ივლისმაც კი ვერ გაგვაჩუმა და მაინც ვაგრძელებთ განვითარებას. იგივე ვრცელდება დრეგზეც. მის გარშემო არსებული განსაკუთრებული ინტერესი კი იმით არის გამოწვეული, რომ თანამედროვე ხელოვნებაში უკვე თითქმის აღარაფერი დარჩა ჰეტერო, ყველაფერი არის გეი და ადამიანებს ნელ-ნელა ამასთან შეგუება მოუწევთ. ყველაზე დიდი და გავლენიანი თანამედროვე ქართველი ხელოვანი არის დემნა გვასალია და თუ დააკვირდებით, მთელი მისი შემოქმედება დრეგ კულტურით არის ნასაზრდოები. თავიდან ბოლომდე დრეგია. აღარ უნდათ ადამიანებს “აბა, დელი, დელი, დელა”.

დრეგი არის ძალიან ძვირი. იმის მიუხედავადაც, რომ საქართველოში ძალიან ბევრი ნიჭიერი ქვინია, რომელიც მზად არის ამ ყველაფერში მთელი თავისი ენერგიის ჩასადებად  და ლარადაც შეუძლიათ უკარგესი ლუქის აწყობა, უნდა ვისწავლოთ თიფინგი. სხვადასხვა ვენიუემაც უნდა გაიაზროს, რომ მეტი გადაიხადოს ქვინების შოუებში, რადგან ეს არ არის მხოლოდ რამდენიმე წუთიანი შოუ, ამ 5 წუთიანი პერფორმანსის უკან მრავალი კვირის შრომა დევს. თუ გვინდა ხარისხიანი დრეგის გაკეთება, მაყურებელმა თიფინგი უნდა ისწავლოს და ვენიუებმა შრომის შესაბამისად დაფასება.

ტექსტი: ზურა აბაშიძე

თელავში ფილმის „სველი ქვიშა“ ჩვენება გაიმართა

დღეს თელავში, დემოკრატიული ჩართულობის ცენტრში, თბილისი პრაიდის ორგანიზებით ქართველი რეჟისორის, ელენე ნავერიანის ფილმის, „სველი ქვიშა“ ჩვენება გაიმართა.

„მეგობრული ხალხით დასახლებულ შავი ზღვისპირა სოფელში, სადაც ადამიანებს სჯერათ, რომ ერთმანეთს იცნობენ, ერთ დღეს, ელიკოს ჩამომხრჩვალს პოულობენ. მისი შვილიშვილი, მოე სოფელში დაკრძალვის ორგანიზებისთვის ჩადის და იმ ტყუილების ქსელის პირისპირ აღმოჩნდება, რაც ელიკოს და ამნონის 22-წლიანი საიდუმლო სიყვარულის ტრაგიკული გამოძახილია. სიმართლე მოეში სიყვარულის უნარს აღვიძებს, სოფლელებს კი ხმის ამაღლებისკენ უბიძგებს“, — ვკითხულობთ ფილმის აღწერაში.

 

 

„სველი ქვიშა“ დავიწყებულ ადამიანებს ეძღვნება. ეს არის სიძულვილისა და დისკრიმინაციის წინააღმდეგ ბრძოლის აქტი, რომელიც საკუთარი იდენტობის ძიებაში გატანჯულ თაობებს შთააგონებს და აძლევს ძალას, იცხოვრონ ისეთი ცხოვრებით, როგორითაც სურთ და ოცნებებზე უარი არასდროს თქვან.

ფილმის ჩვენების შემდეგ გაიმართა დისკუსია. მაყურებლებმა აღნიშნეს, რომ მსგავს საკითხებზე მსჯელობა დახურულ კარს მიღმა, ღია სივრცეშიც შეიძლება გაიმართოს. განსაკუთრებით, სოფლებსა და ეთნიკური უმცირესობებით დასახლებულ რეგიონებში. მათი აზრით, ფილმი საკმაოდ ემოციური, იშვიათად ესთეტიკური, ღრმა და დამაფიქრებელი იყო.

შეგახსენებთ, რომ 28 ივნისს, „თბილისი პრაიდის“ კვირეული სწორედ „სველი ქვიშის“ პრემიერით გაიხსნა.

Tbilisi Pride-ის ოფისში შეჭრაში ბრალდებულები სასამართლომ 5 000 ლარით დააჯარიმა

Tbilisi Pride-ის თანადირექტორის, მარიამ კვარაცხელიას მიერ ფეისბუკზე გავრცელებული ინფორმაციით, სასამართლომ ორგანიზაციის ოფისში შეჭრაში ბრალდებულ 3 ადამიანს — გიორგი ოძელაშვილს, გიორგი ელიზბარაშვილსა და ალიკა ალაზოვს განაჩენი დამამძიმებელი გარემოებით, ჯგუფურად და ძალადობის მუქარით ბინაში უნებართვოდ შეჭრისთვის გამოუტანა და 5 ათასლარიანი ჯარიმის სანაცვლოდ გაათავისუფლა.

„დევნა და ორგანიზებული დანაშაული ვერ დაინახა სასამართლომ (პროკურატურას ჰქონდა წაყენებული ეს მუხლებიც… გადაწყვეტილების გამოცხადებისას არ გაჟღერებულა 53 პრიმა, რაც სიძულვილით მოტივირებულ დანაშაულს გულისხმობს“, — წერს მარიამ კვარაცხელია პირად ფეისბუკის გვერდზე.

შეგახსენებთ, 5 ივლისს ძალადობრივი აქციის მონაწილეებმა სხვადასხვა ორგანიზაციების ოფისებზე შეტევა მიიტანეს, მედიის 50-ზე მეტ წარმომადგენელს კი ფიზიკურად გაუსწორდნენ. ულტრა-მემარჯვენე ჯგუფების მიერ ორგანიზებული აქციის არაერთმა მონაწილემ Tbilisi Pride-ის ოფისიც დაარბია, თუმცა ბრალი მხოლოდ 3  ადამიანს წარუდგინეს. ამასთან, ჰომოფობიური აქციის ორგანიზატორები  ძალადობრივი მოვლენებიდან ერთი წლის შემდეგაც კი არ არიან დასჯილი.

Tbilisi Pride მთავრობისგან კვირეულის უსაფრთხოდ ჩატარების გარანტიებსა და პოზიციის მკაფიოდ დაფიქსირებას ითხოვს

28 ივნისს პრაიდ კვირეული 2022 იწყება, რომელიც 3 დახურულ ღონისძიებას აერთიანებს — ქართული ქვიარ ფილმის ჩვენებას, რეგიონულ კონფერენციასა და პრაიდ ფესტივალს. აღნიშნულთან დაკავშირებით Tbilisi Pride-მა საგანგებო ბრიფინგი გამართა, რომლითაც მთავრობისგან კვირეულის მონაწილეთა უსაფრთხოების დაცვა, კვირეულის დღეებში ღონისძიებების ტერიტორიებზე და მთელ ქალაქში წესრიგის დაცვა, საკუთარი პოზიციის მკაფიოდ დაფიქსირება, ასევე გასული წლის 5 ივლისის ძალადობრივი ქმედებების ორგანიზატორთა დასჯა მოითხოვა.

Tbilisi Pride-ის თანადირექტორმა ბრიფინგზე გააჟღერა, რომ დაძაბულობის კერების თავიდან არიდების მიზნით, წელს საჯაროდ შეკრებისა და მანისფესტაციის უფლებაზე უარი თქვეს და დახურული ღონისძიებების გამართვა გადაწყვიტეს, თუმცა ულტრა-მემარჯვენე ჯგუფები ძალადობრივი შინაარსის გეგმების შესახებ იფორმაციას მაინც აჟღერებენ.

„ჩვენ ორი თვეა აქტიურ კოორდინაციაში ვართ შინაგან საქმეთა სამინისტროსთან, ვაწვდით სრულ და ზუსტ ინფორმაციას კვირეულის ღონისძიებებთან დაკავშირებულ დეტალებზე. ასევე, ძალოვან სტრუქტურებს ვაწვდით ფაქტებს გაჟღერებული მუქარების და ძალადობის ორგანიზების შესახებ. შსს-სთან შეხვედრები მიმდინარეობს საერთაშორისო ორგანიზაციების, დიპლომატიური კორპუსისა და სახალხო დამცველის ოფისის მონაწილეობით. ხაზგასმით გვინდა ვთქვათ, რომ შინაგან საქმეთა სამინისტრო გვაძლევს სამივე ღონისძიების დაცვის გარანტიებს და როგორც მათ მიერ გაჟღერდა, ამ საკითხთან დაკავშირებით, უახლოეს მომავალში თავადაც გააკეთებენ განცხადებას. ასევე, მუქარისა და ძალადობრივი ქმედებისკენ მოწოდების ფაქტებზე დაწყებულია გამოძიება“, — აღნიშნულია Tbilisi Pride-ის განცხადებაში.

შსს-სთან აქტიური თანამშრომლობის მიუხედავად, ორგანიზაციის წევრებს უსაფრთხოების გარანტიებთან დაკავშირებით ეჭვები აქვთ, რადგან „მაღალი თანამდებობის პირების მხრიდან, ბოლო დღეებში აქტიურად ჟღერდება თბილისი პრაიდისა და ლგბტ თემის დამაზიანებელი, მადისკრედიტებელი და ძალადობის წამახალისებელი განცხადებები“.

პრორუსული, ძალადობრივი გაერთიანება კონსერვატიული მოძრაობის წევრები დაჯგუფების ტელევიზიის, ალტ-ინფოს ეთერში მუდმივად ცდილობენ ლგბტქი ორგანიზაციის დისკრედიტაციას. დაჯგუფების ერთ-ერთმა ლიდერმა, ზურაბ მახარაძემ კი 22 ივნისს განაცხადა, რომ პრაიდ კვირეულის საწინააღმდეგოდ ხალხის მობილიზაციას იწყებენ.

გარდა იმისა, რომ მახარაძის განცხადება ძალადობრივ ნიშნებს შეიცავდა —  „ამათ ჩვენ საბოლოოდ გადავამტვრევთ“, პრორუსული დაჯგუფების ლიდერმა შესაძლო ანტისახელმწიფოებრივი გზავნილიც გააკეთა — „საქართველოში არა ერთი ხელისუფლება მეორით, არამედ წყობა, სისტემა და მიზანი შეიცვლება“. 

მახარაძის განცხადების პარალელურად პარლამენტში პრემიერ მინისტრის, ირაკლი ღარიბაშვილის გამოსვლა შედგა, რომლემაც, გასული წლის 5 ივლისის მოვლენები თბილისი პრაიდის პასუხისმგებლობად მოიხსენია და აღნიშნა, რომ „ლგბტ ორგანიზაციის დირექტორი და სირცხვილია — ეს ერთი ორგანიზმია, ამათ უკან სააკაშვილი და ნაციონალური მოძრაობა დგას. მათი წახალისებული იყო ეს ვითომ ღირსების მარში თუ რაღაც რომ უნდა  ჩაეტარებინათ. პირდაპირი პროვოკაცია, პირდაპირი ანტიეროვნული, ანტისახელმწიფოებრივი პროვოკაცია, უნდოდათ, ქვეყანაში დესტაბილიზაცია გამოეწვიათ, მასობრივი არეულობა, შეტაკებები, პოლიციას ძალა გამოეყენებინა. ეს ამ ადამიანებმა დაგეგმეს“. 

პრემიერ ღარიბაშვილის თქმით, 5 ივლისის ძალადობრივ ქმედებებზე პასუხისმგებელი პირები დაიჭირეს და გაასამართლეს, თუმცა აღსანიშნავია, რომ ძალადობრივი აქციის ორგანიზატორები დღემდე არ არიან გასამართლებული, მეტიც, დაჯგუფების ლიდერმა, ზურაბ მახარაძემ ტელევიზიის ეთერით ახალი თავდასხმისთვის ხალხის მობილიზაციის დაწყების შესახებ განაცხადა.

ქართული ოცნების თავმჯდომარემ, ირაკლი კობახიძემ კი ძალადობრივი დაჯგუფების ლიდერები ოპოზიციური პარტიების წარმომადგენლებთან გაათანაბრა და აღნიშნა, რომ მორგოშიას და მახარაძის დაკავების სტანდარტს თუ გავითვალისწინებთ, ნახევარი ოპოზიცია დასაჭერია, „არსებობს სისხლის სამართალი და სისხლის სამართალს აქვს თავისი მტკიცებულების სტანდარტი — უნდა დგინდებოდეს, რომ ვიღაცის გამონათქვამს აქვს მიზეზ-შედეგობრივი კავშირი კონკრეტულ ძალადობასთან“.

სველი ქვიშა — ქართული ქვიარ ფილმი, რომლის პრემიერითაც პრაიდ კვირეული იწყება

28 ივნისს პრაიდ კვირეული 2022 ქართული ქვიარ ფილმის ჩვენებით იწყება, რომლის რეჟისორი არაბინარული იდენტობის მქონე ელენე ნავერიანია. სველი ქვიშა 22-წლიანი საიდუმლო სიყვარულის ტრაგიკული ამბავია, რომლის სიუჟეტი შავი ზღვისპირა სოფელში, ერთ-ერთი გმირის გარდაცვალებით იწყება.

„მეგობრული ხალხით დასახლებულ შავი ზღვისპირა სოფელში, სადაც ადამიანებს სჯერათ, რომ ერთმანეთს იცნობენ, ერთ დღეს, ელიკოს ჩამომხრჩვალს პოულობენ. მისი შვილიშვილი, მოე სოფელში დაკრძალვის ორგანიზებისთვის ჩადის და იმ ტყუილების ქსელის პირისპირ აღმოჩნდება, რაც ელიკოს და ამნონის 22-წლიანი საიდუმლო სიყვარულის ტრაგიკული გამოძახილია. სიმართლე მოეში სიყვარულის უნარს აღვიძებს, სოფლელებს კი ხმის ამაღლებისკენ უბიძგებს“, — ვკითხულობთ ფილმის აღწერაში.

ელენე ნავერიანის თქმით, უნდოდა, ფილმით პატივი მიეგო დავიწყებული ადამიანებისთვის და მცდარი წარმოდგენებისა და დისკრიმინაციის საპასუხოდ ნაბიჯი გადაედგა.

„საქართველოში, პატარა სოფელში, სადაც ტალღები გამუდმებით ეხლებიან ნაპირს, მიუხედავად ძალადობრივი ნაციონალისტური ღირებულებებისა, ტრადიციებისა და რელიგიისა, რომელიც ადამიანების ხმებს ახშობს, მათ თავისუფლებას ზღუდავს და მათი არსებობის უმცირეს ანაბეჭდსაც კი შლის, სიყვარული მაინც პოულობს არსებობის გზას. სველი ქვიშა დავიწყებული ადამიანებისთვის პატივის მიგებაა, მცდარი წარმოდგენებისა და დისკრიმინაციის საპასუხო ნაბიჯი და საკუთარი იდენტობის ძიებისას სირთულეების წინაშე აღმოჩენილი თაობების გაძლიერების მცდელობა. მინდოდა, მათთვის გამეზიარებინა ამბავი, რომლის გმირადაც საკუთარი თავის წარმოდგენა მათივე ქვეყანაში შეეძლებოდათ და გამბედაობა მიმეცა, რომ იცხოვრონ ისე, როგორც მათ სურთ, არასოდეს თქვან უარი ოცნებებზე“, — აღნიშნავს ელენე ნავერიანი სველი ქვიშის ოფიციალურ საიტზე გამოქვეყნებულ კომენტარში.

AT.ge

ელენე ნავერიანმა საკუთარი მეორე სრულმეტრაჟიანი მხატვრული ფილმის გადაღების პროცესზე The Calvert Journal-თან ისაუბრა და აღნიშნა, რომ მსახიობების დათანხმება განსაკუთრებით გაუჭირდა, რადგან ფილმში განხილული თემების გამო უარს ეუბნებოდნენ.

„არავის უნდოდა, რომ ფილმის ნაწილი ყოფილიყო. როცა ფილმის სცენარს ნახულობდნენ და იმ სცენას კითხულობდნენ, სადაც ორ კაცს შორის ფიზიკური კონტაქტია, უარს ამბობდნენ. რატომღაც პირადად იღებდნენ და ივიწყებდნენ, რომ მსახიობს შეუძლია, ნებისმიერი რამ ქნას“, — აღნიშნა ელენე ნავერიანმა.

maximage

მიუხედავად გადაღებისთვის მზადების რთული პროცესისა, პროექტი მაინც შედგა. ფილმში მთავარ როლებს ბებე სესიტაშვილი, მეგი კობალაძე, გიორგი წერეთელი, ეკა ჩაველიშვილი, ზაალ გოგუაძე, კახა კობალაძე და დებიუტანტი მსახიობი გია აგუმავა ასრულებენ, რომლის მიერ შესრულებული ამნონის როლი კრიტიკამ განსაკუთრებით მოიწონა. აგუმავას ლოკარნოს კინო ფესტივალზე საუკეთესო მსახიობის ჯილდოც გადაეცა.

სველი ქვიშის პრემიერა 28 ივნისს, 19:00 საათზე შედგება. ფილმზე დასწრება უფასოდ, აღნიშნულ ლინკზე წინასწარი რეგისტრაციით შეგიძლიათ, კინოჩვენების შესახებ დეტალურ ინფორმაციას ვერიფიკაციის გავლის შემთხვევაში მიიღებთ.

ალტ-ინფომ პრაიდ კვირეულისთვის ხალხის მობილიზაცია დაიწყო, ქვეყნის პრემიერმა კი წინა წლის მოვლენებზე პასუხისმგებლობა თბილისი პრაიდს დააკისრა

22 ივნისს, პრორუსული, ძალადობრივი დაჯგუფება კონსერვატიული მოძრაობის ერთ-ერთმა ლიდერმა, ზურაბ მახარაძემ დაჯგუფების ტელევიზიის, ალტ-ინფოს ეთერში პრაიდ კვირეულის საწინააღმდეგოდ ხალხის მობილიზება გამოაცხადა.

ზურაბ მახარაძემ აღნიშნა, რომ „ამათ ჩვენ საბოლოოდ გადავამტვრევთ“, ამასთან, ძალადობრივი დაჯგუფების ლიდერის თქმით, „საქართველოში არა ერთი ხელისუფლება მეორით, არამედ წყობა, სისტემა და მიზანი შეიცვლება“ იმის, რასაც აკეთებენ.

მახარაძის განცხადების პარალელურად პარლამენტში პრემიერ მინისტრის, ირაკლი ღარიბაშვილის გამოსვლა შედგა, რომლემაც, გასული წლის 5 ივლისის მოვლენები თბილისი პრაიდის პასუხისმგებლობად მოიხსენია და აღნიშნა, რომ „ლგბტ ორგანიზაციის დირექტორი და სირცხვილია — ეს ერთი ორგანიზმია, ამათ უკან სააკაშვილი და ნაციონალური მოძრაობა დგას. მათი წახალისებული იყო ეს ვითომ ღირსების მარში თუ რაღაც რომ უნდა  ჩაეტარებინათ. პირდაპირი პროვოკაცია, პირდაპირი ანტიეროვნული, ანტისახელმწიფოებრივი პროვოკაცია, უნდოდათ, ქვეყანაში დესტაბილიზაცია გამოეწვიათ, მასობრივი არეულობა, შეტაკებები, პოლიციას ძალა გამოეყენებინა. ეს ამ ადამიანებმა დაგეგმეს“. 

პრემიერ ღარიბაშვილის თქმით, 5 ივლისის ძალადობრივ ქმედებებზე პასუხისმგებელი პირები დაიჭირეს და გაასამართლეს, თუმცა აღსანიშნავია, რომ ძალადობრივი აქციის ორგანიზატორები დღემდე არ არიან გასამართლებული, მეტიც, დაჯგუფების ლიდერი, ზურაბ მახარაძემ ტელევიზიის ეთერით ახალი თავდასხმისთვის ხალხის მობილიზაციის დაწყების შესახებ განაცხადა.

მივიღებთ ყველა იმ ზომას, რაც კანონითაა განსაზღვრული — შს მინისტრის მოადგილე პრაიდ კვირეულის შესახებ

შინაგან საქმეთა მინისტრის მოადგილე ალექსანდრე დარახველიძემ პრაიდ კვირეულის შესახებ ჟურნალისტების კითხვის საპასუხოდ განაცხადა, რომ შსს დაიცავს „ყველა იმ პირის უფლებას, ვისაც აქვს კანონით გარანტირებული შეკრებისა და გამოხატვის თავისუფლება“.

მისი თქმით, აღნიშნული ღონისძიების შესახებ შსს-ს ინფორმაცია აქვს და „სამინისტრო მიიღებს ყველა იმ ზომას, რაც კანონითაა განსაზღვრული”.

Tbilisi Pride-ის თანადირექტორის, ანა სუბელიანის თქმით, ხელისუფლებასთან მუდმივი კომუნიკაცია აქვთ და მათი მხრიდან ღონისძიების დაცვის მზაობასაც ხედავენ.

„ნებისმიერი ღონისძიების უსაფრთხოდ ჩატარება პოლიტიკურ ნებაზეა დამოკიდებული, რაც, ვფიქრობ, არ არსებობს, თუმცა ხელისუფლებას დახურულ ღონისძიებებთან დაკავშირებით განსხვავებული მიდგომა აქვს. წინა წელს ხელისუფლებამ უკეთ დაიცვა დახურული ღონისძიებები და წელსაც მუდმივი კომუნიკაცია გვაქვს, მათთან თანამშრომლობას ვაპირებთ და ვხედავთ, რომ უსაფრთხოების დაცვისთვის მზაობაც აქვთ. გავაგრძელებთ მუდმივ ჩართულობას, რათა დაცვის გარანტიები შევქმნათ“, — აღნიშნა ანა სუბელიანმა. 

Tbilisi Pride-მა პრაიდ კვირეული 31 მაისს დააანონსა. ორგანიზაციის განცხადებაში ნათქვამია, რომ კვირეული 28 ივნისიდან 2 ივლისის ჩათვლით გაიმართება და 3 ღონისძიებას გააერთიანებს — ქვიარ ფილმის ჩვენებას, რეგიონულ კონფერენციას და მუსიკალურ პრაიდ ფესტივალს. 

პრაიდ კვირეულის დაანონსებას ალტ-ინფოს წევრების კომენტარები მოჰყვა, რომელთაც აღნიშნეს, რომ ღონისძიებების ჩატარებას არ დაუშვებენ და აქციის ორგანიზებას გეგმავენ.

2021 წლის 5 ივლისს პრაიდ კვირეულის ფარგლებში დაგეგმილი ღირსების მარში ალტ-ინფოს ორგანიზებული ძალადობრივი აქციის გამო ჩაიშალა, რომლის დროსაც სხვადასხვა ორგანიზაციის ოფისი დაარბიეს და მედიის 50-ზე მეტ წარმომადგენელს ფიზიკურად გაუსწორდნენ.

პრაიდ კვირეული 2022 — ერთმანეთზე ზრუნვის, სოლიდარობისა და იარების მოშუშების წელი

ამ ზაფხულს, 28 ივნისიდან 2 ივლისის ჩათვლით, თბილისი პრაიდის კვირეული კიდევ ერთხელ ბრუნდება და ლგბტქი თემის წევრებს, თანამოაზრეებს, მხარდამჭერებს და ყველა იმ ადამიანს, ვისაც თანასწორობის სწამს, კიდევ ერთხელ გააერთიანებს. ეს წელი იქნება „იარების მოშუშების, ძალის მოკრების, სოლიდარობის, გაერთიანების, ერთმანეთზე ზრუნვის, მიღწეული შედეგების დაფასების, სტრატეგიების გამრავალფეროვნებისა და გაფართოების წელი. ამავდროულად, კვირეული იქნება ხმამაღალი, პოლიტიკური, ემოციური, მრავალფეროვანი და თავს მოუყრის ყველას, ვისაც თანასწორობის სწამს“.

წლევანდელი კვირეული 3 ღონისძიებას აერთიანებს, რომლებიც ლგბტქი თემს საგანმანათლებლო, გამოცდილების გაზიარების, გართობის უსაფრთხო სივრცეებს შესთავაზებს. 

„2021 წლის 5 ივლისის უმძიმესმა გამოცდილებამ სრულად გააშიშვლა უმოქმედო, მოძალადე, თანაგრძნობისგან დაცლილი სისტემა, რომელიც უარს ამბობს მოქალაქეების უფლებების დაცვაზე, საზოგადოებრივი ცხოვრებიდან და საჯარო სივრციდან რიყავს ლგბტქ ადამიანებს. Სწორედ ჰომოფობიის საფუძველზე ჟურნალისტებზე უპრეცედენტო თავდასხმას შეეწირა ლექსო ლაშქარავას სიცოცხლე. ჩვენ კვლავ გვყავს ხელისუფლება, რომელიც ახალისებს ქუჩებში მოთარეშე ძალადობრივ ჯგუფებს, არ სჯის ძალადობის მთავარ შემოქმედებს და არ აღიარებს მოქალაქეთა თანასწორობას.

წელს ჩვენ არ გაგვაჩნია არავითარი სივრცე და შესაძლებლობა ღირსების მარშის ჩასატარებლად. ვრჩებით ერთადერთ ჯგუფად, რომელსაც ფაქტობრივად ჩამორთმეული აქვს შეკრებისა და მანიფესტაციის უფლება. ამასთანავე, ჩვენს დღის წესრიგში დგას უმწვავესი პრობლემები, როგორებიცაა განათლებაზე, დასაქმებაზე, ჯანდაცვაზე ხელმისაწვდომობა, უსახლკარობა, გენდერის სამართლებრივი არ აღიარება, ოჯახში ძალადობა, დისკრიმინაცია. თუმცა გვწამს, რომ ჩვენი დაუღალავი ბრძოლითა და თანადგომით ამ რეალობას აუცილებლად შევცვლით“,  — აღნიშნულია Tbilisi Pride-ის განცხადებაში.

Tbilisi Pride-ის თანადირექტორის, ანა სუბელიანის თქმით, წელს სტრატეგიების გადახედვა, გაფართოება და განსხვავებული ფორმატით ღონისძიების ჩატარება უსაფრთხოების მიზნების გამო გადაწყვიტეს.

„მნიშვნელოვანია, რომ ჩვენივე სტრატეგიების გადახედვა, გადაფასება და არსებული მოცემულობისა და კონტექსტის გათვალისწინებით, გადაწყვეტილების მიღება შევძლოთ. უცვლელი პოლიტიკური ვითარება და, მათ შორის ის, რომ წინა წლის 5 ივლისის ძალადობრივი თავდასხმის ორგანიზატორები არ დასჯილან, გვაფიქრებინებს, რომ საჯაროდ შეკრებისთვის სივრცე ნაკლებადაა. ეს, რა თქმა უნდა, სამწუხაროა და ხაზს უსვამს იმას, რომ ჩვენ ვრჩებით ერთადერთ ჯგუფად, რომელსაც საჯაროდ შეკრებისა და მანიფესტაციის უფლება არ ეძლევა. ამის გამო, არ ვაპირებთ, რომ ხილვადობის პოლიტიკიდან გადავუხვიოთ, ნაკლებად ხმამაღალი ვიყოთ ან იმ პოლიტიკური დღის წესრიგიდან გადავუხვიოთ, რომელიც განსაკუთრებით მნიშვნელოვანია ლგბტქი უფლებების განმტკიცებისთვის, წელს, უბრალოდ, განსხვავებულ სტრატეგიას ვირჩევთ, ვიტყოდი, რომ ვაფართოებთ სტრატეგიებს“, — ამბობს ანა სუბელიანი.

ანა სუბელიანის თქმით, „რეგიონული კონფერენცია განსაკუთრებით მნიშვნელოვანია, რადგან ჩვენ და მეზობელი რეგიონის ქვეყნებს გვაერთიანებს მსგავსი გეოპოლიტიკური გამოწვევები, რაც რუსული პოლიტიკის, ომის, ანტიდასავლური პროპაგანდის შედეგია და განსაკუთრებით ლგბტქი თემს აზიანებს“.

წელს ისევ ბრუნდება მუსიკალური პრაიდ ფესტივალი, რომელიც წინა წელსაც გაიმართა და თანამოაზრეები კარგი მუსიკის ფონზე თანასწორ, მშვიდ და ამაღელვებელ გარემოში შეკრიბა. ანა სუბელიანის თქმით, წლევანდელი ფესტივალი უფრო მასშტაბური იქნება და 2022 წელს მიზანი პატარა გამარჯვებების გადაფასება და ერთმანეთზე ზრუნვაა.

„ფესტივალი კიდევ უფრო მასშტაბური იქნება, რათა ქვიარ ადამიანების და თანასწორობის მხარდამჭერების ერთ სივრცეში გაერთიანება, გაძლიერება შევძლოთ. ფესტივალი იმ შეგრძნებისთვის არის მნიშვნელოვანი, რომ მარტო არ ვართ, იმ პოზიტიური ცვლილებებისა და გამოცდილებების გადაფასებისთვის, რაც გვაქვს და ამ სასიკეთო ცვლილებებს ბოლოდროინდელი კვლევებიც ადასტურებს. წელს, პატარა გამარჯვებების გადაფასება გვჭირდება, რათა უფრო მომზადებულები შევხვდეთ ახალ გამოწვევებს. 2022 ერთმანეთზე ზრუნვის, გაძლიერების, სოლიდარობის, თანასწორობის განმტკიცების, მრავალფეროვანი სტრატეგიების შემუშავების წელი იქნება“,  — ამბობს ანა სუბელიანი.

ფესტივალი კვირეულის მთავარი ღონისძიება იქნება და გარდა გემოვნებიანი მუსიკისა, გააერთიანებს ინფორმაციულ, საგანმანათლებლო ნაწილს თუ სხვა მნიშვნელოვან მიმართულებას, რაც წარსული გამოცდილების გადაფასებასა და სამომავლო გეგმების დასახვას შეუწყობს ხელს.

„ფესტივალის მნიშვნელოვანი ნაწილი მუსიკა იქნება, რაც არტისტებს, განსაკუთრებით ქვიარ არტისტებს, მისცემს შესაძლებლობას, რომ ფართო აუდიტორიის წინაშე წარდგნენ. ასევე იქნება გამოფენები, სადაც ვიზუალური ნამუშევრების დათვალიერებას შევძლებთ, ამ მიმართულებითაც ვცდილობთ, განსაკუთრებით ქვიარ არტისტებს მივცეთ პლატფორმა. გარდა ამისა, იქნება ვორქშოპები, საგანმანათლებლო აქტივობები, სიღრმისეული დისკუსიები, მათ შორის, 5 ივლისთან და 15 მაისებთან დაკავშირებული ტრავმული გამოცდილებების შესახებ, ასევე 16-წლიანი აქტივიზმის ისტორიის გადაფასება და იმ მიღწევების გაანალიზება, რომლებიც გასულმა წლებმა მოიტანა. მაგალითად, მოეწყობა კუთხე, რომელში ქართული ქვიარ ისტორიის მნიშვნელოვანი ადამიანების ხილვის თუ საერთაშორისო მოძრაობების მნიშვნელოვანი ფიგურების უკეთ გაცნობის შესაძლებლობას შექმნის. ფესტივალის უმთავრესი მიზანი ემოციების გაზიარება, პოზიტიური გამოცდილების შექმნა, იმ საზოგადოების მოდელის დანახვა იქნება, რომლის შენებასაც ვცდილობთ“, — აღნიშნავს ანა პრაიდ ფესტივალზე საუბრისას.

2021 წლის 5 ივლისი მძიმე გამოცდილება იყო როგორც თემის წევრების, ისე მხარდამჭერებისთვის, თუმცა წინა წლის კვირეულის ტრაგიკულ მოვლენებამდე კინოჩვენება და პრაიდ ფესტივალი უსაფრთხო გარემოში ჩატარდა. ანა ამბობს, რომ ხელისუფლებასთან წელსაც მუდმივი კომუნიკაცია აქვთ, რათა დახურულ სივრცეებში ღონისძიებების უსაფრთხოდ ჩატარებისთვის გარანტიები შექმნან.

„ნებისმიერი ღონისძიების უსაფრთხოდ ჩატარება პოლიტიკურ ნებაზეა დამოკიდებული, რაც ვფიქრობ, არ არსებობს, თუმცა ხელისუფლებას დახურულ ღონისძიებებთან დაკავშირებით განსხვავებული მიდგომა აქვს. წინა წელს ხელისუფლებამ უკეთ დაიცვა დახურული ღონისძიებები და წელსაც მუდმივი კომუნიკაცია გვაქვს, მათთან თანამშრომლობას ვაპირებთ და ვხედავთ, რომ უსაფრთხოების დაცვისთვის მზაობაც აქვთ. გავაგრძელებთ მუდმივ ჩართულობას, რათა დაცვის გარანტიები შევქმნათ“, — ამბობს ანა სუბელიანი.

ივნისის ბოლოს და ივლისის დასაწყისში არაფერი უნდა დაგეგმოთ და პრაიდის კვირეულს შეუერთდეთ, თუ თვლით, რომ „თავისუფლებისთვის, თანასწორობისთვის, სიყვარულისთვის, ხილვადობისთვის, ღირსეული ცხოვრებისთვის, წართმეული ხმის დასაბრუნებლად“ ბრძოლა ჯერ კიდევ წინაა. თუ მიაგჩნიათ, რომ „სიძულვილთან, რუსულ პროპაგანდასთან, ძალაუფლების უთანასწორო ღერძებთან, ჩაგვრასთან, დისკრიმინაციასა და გარიყვასთან“ ბრძოლა ყველა სოციალური ჯგუფისთვის თანაბრად მნიშვნელოვანია და ეს საერთო გამარჯვებისთვის აუცილებელია.

მიუხედავად იმისა, რომ პრაიდ კვირეულის ღონისძიებებზე დასწრება უფასოა, უსაფრთხოების მიზნებიდან გამომდინარე, დასწრებას Tbilisi Pride-ის საიტზე წინასწარი რეგისტრაციით შეძლებთ, ამიტომ Tbilisi Pride-ის ფეისბუკ გვერდს თვალი უნდა ადევნოთ.

„თბილისი პრაიდის“ ახალი კამპანია — „მე ვიყავი ჰომოფობი“

„მე ვიყავი ჰომოფობი“ — ასე ჰქვია ლგბტქი ორგანიზაცია „თბილისი პრაიდის“ მიერ წამოწყებულ ახალ კამპანიას, რომელიც ადამიანებს, რომლებიც ნეგატიურად იყვნენ განწყობილი ლგბტქი თემის მიმართ და საბოლოოდ ჰომოფობია უკან მოიტოვეს, საშუალებას აძლევს, საკუთარ შეცვლილ შეხედულებებსა და დამოკიდებულაზე ისაუბრონ. Keep Reading

17 მაისი: მეხსიერება და პერსპექტივები — პანელური დისკუსია წარსულის გამოცდილების გადაფასებისა და სამომავლო პერსპექტივების დასახვის მიზნით

ჰომოფობიასთან, ტრანსფობიასთან და ბიფობიასთან ბრძოლის საერთაშორისო დღესთან დაკავშირებით, Tbilisi Pride-მა ეროვნული დემოკრატიული ინსტიტუტის (NDI) მხარდაჭერით, პანელური დისკუსია — 17 მაისი: მეხსიერება და პერსპექტივები — დააორგანიზა.

პანელურმა დისკუსიამ თავი მოუყარა ლგბტქი თემის წევრებს, ადგილობრივი და საერთაშორისო სამოქალაქო ორგანიზაციების წარმომადგენლებს, აქტივისტებს, დიპლომატიურ კორპუსს, მედიის წარმომადგენლებსა და პოლიტიკოსებს, რათა მომხსენებლებთან ერთად განეხილათ ქართველი ქვიარ ადამიანების წინაშე არსებული გამოწვევები, შეკრებისა და გამოხატვის თავისუფლების შეზღუდვისა და ძალადობის მრავალწლიანი გამოცდილება და გაეაზრებინათ ის პროგრესი, რაც ლგბტქი უფლებადაცვითი მიმართულებით მიიღწა.

თბილისი პრაიდის პირდაპირი ეთერი

უმცირესობების მდგომარეობის, საერთო ჩაგვრებისა და ურთიერთსოლიდარობის მნიშვნელობის შესახებ, მოხსენებით პარლამენტარი, ტარიელ ნაკაიძე წარსდგა. ნაკაიძის თქმით, დემოკრატიული ქვეყნისა და თავისუფალი გარემოს შენება ადამიანის მიმართ სოლიდარობის გარეშე ძნელად წარმოსადგენია, რაც განსაკუთრებით მნიშვნელოვანი იმ დროს არის, როცა სახელმწიფოს მხრიდან ამის ნება არ არსებობს.

„თუ ჩვენ გვინდა, რომ ნათელი მომავალი გვქონდეს, დემოკრატიულ ქვეყანაში, თავისუფალ გარემოში ვიცხოვროთ, პირველ რიგში, ადამიანის მიმართ სოლიდარულები უნდა ვიყოთ, მიუხედავად მისი ორიენტაციისა თუ ნებისმიერი განმასხვავებელი ნიშნისა. სამწუხაროდ, ჩვენი დღევანდელი ხელისუფლების მხრიდან ვერცერთი უმცირესობის მიმართ კარგად მოპყრობას ვერ ვხედავთ, ძნელია რაიმე დაიმაიმედებლის პოვნა, დადებითი კონტექსტის მოძებნა ჭირს, ამიტომ სხვადასხვა სოციალური ჯგუფები ამ მომენტში კიდევ უფრო მეტად უნდა ვიყოთ სოლიდარულები ერთმანეთის მიმართ. მთავარი ღირებულება ადამიანია და ინდივიდის უფლებებთან დაკავშირებით მკაფიო, ღია და აშკარა პოზიცია უნდა გვქონდეს. აუცილებელია, რომ საპარლამენტო პროცესებში სულ უფრო მეტი აქტივისტი იყოს ჩართული და მე პირადად მზად ვარ, რომ ხმა ვიყო უმცირესობების, რადგან აუცილებელია, ტაბუდადებულ თემებზე აქტიურად საუბარი დაიწყოს. რთულია თქმა, რამდენად შესაძლებელია ამ პირობებში პროგრესის მიღწევა, თუმცა მგონია, რომ ბრძოლას ყოველთვის აქვს შედეგი და ყველა ერთად უნდა დავდგეთ — პოლიტიკოსები, საზოგადოება. ის ცვლილებები, რაც მოქალაქეთა განწყობების მიმართულებით მიიღწა, უნდა გაგრძელდეს და ამაში საკუთარი როლი უნდა შეასრულოს ყველამ, მათ შორის, ჩვენ, პარლამენტარებმა“, — აღნიშნა ჩვენთან საუბრისას ტარიელ ნაკაიძემ. 

პარლამენტარ ხათუნა სამნიძე კი თვლის, რომ უმთავრესი პრობლემა პოლიტიკაში ლგბტქი საკითხებზე საუბრის შიშია, რაც პროგრესის მიღწევას ართულებს.

„პირველ რიგში, პოლიტიკაში ქვიარ თემებზე საუბრის, დისკუსიის, თემთან ურთიერთობის შიში უნდა დაიძლიოს. ლგბტქი საკითხები პოლიტიკის, საპარლამენტო მუშაობის ნაწილი არ არის და ეს მთავარი პრობლემა მგონია. პოლიტიკოსები თავს არიდებენ მსგავს თემებზე მუშაობას და თემთან ურთიერთობას, რაც უნდა შეიცვალოს. თანასწორობის მოპოვება ხანგრძლივი, დამღლელი პროცესია, რაც თემისა და მათი მხარდამჭერებისგან მოთმინებას ითხოვს, თანაც, სახელმწიფო პრობლემას არ აღიარებს, რაც პროგრესის მიღწევასაც ართულებს. საზოგადოებრივი განწყობა იცვლება, რასაც გამოკითხვებიც მოწმობს და თუნდაც მიუღებლობის შემთხვევაში, ძალადობას ბევრი გმობს. თუმცა, ახლა კიდევ უფრო მეტი მუშაობაა საჭირო, რომ მიღწეული პროგრესი ნათლად დავინახოთ“, — განაცხადა ხათუნა სამნიძემ.

თბილისი პრაიდის პირდაპირი ეთერი

საქართველოს სახალხო დამცველის მოადგილემ, ეკატერინე სხილაძემ, ლგბტქი ადამიანების უფლებრივი მდგომარეობისა და საზოგადოების დამოკიდებულებების შესახებ ისაუბრა. სხილაძემ ჩვენთან საუბრისას ლგბტქი თემის წინაშე არსებული გამოწვევები შეაფასა და აღნიშნა, რომ უმთავრესი პრობლემა ისაა, რომ ლგბტქი საკითხები სახელმწიფო პოლიტიკის ნაწილი არ არის.

„დღეს ლგბტქი თემის ყველაზე დიდი გამოწვევა ისაა, რომ მათთვის მნიშვნელოვანი საკითხები სახელმწიფო პოლიტიკის ნაწილი არ არის. არათანმიმდევრული სახელმწიფო პოლიტიკა ვერ პასუხობს დისკრიმინაციის შემთხვევებს თუ სხვა მნიშვნელოვან უფლებადაცვით საკითხებს. ამასთან, მნიშვნელოვანია, რომ 17 მაისის აღნიშვნა შეკრებისა და გამოხატვის უფლების დარღვევას დაუკავშირდა. წლებია, თემის წევრები და მათი მხარდამჭერები სახელმწიფო ნების არარსებობის გამო ამ დღის თავისუფალ, უსაფრთხო სივრცეში აღნიშვნას ვერ ახერხებენ, შესაბამისად, მნიშვნელოვანია, რომ სახელმწიფო უწყებების წარმომადგენლებმა თანასწორუფლებიანობის მიმართულებით მათი პასუხისმგებლობა გაიაზრონ, მხარდამჭერი განცხადებები გააკეთონ და ამ პროცესის ნაწილი იყვნენ“, — აღნიშნა ეკატერინე სხილაძემ.

თბილისი პრაიდის პირდაპირი ეთერი

ჟურნალისტური ეთიკის ქარტიის საბჭოს წევრმა, ჟურნალისტმა ხატია ღოღობერიძემ მოხსენება ჰომოფობიისა და ტრანსფობიის დაძლევაში მედიის როლის შესახებ წარადგინა. მისი თქმით, მედიამ უნდა გაიაზროს ის როლი, რაც მას საზოგადოების განათლების მიმართულებით აქვს და ეცადოს, რომ აუდიტორიას ინფორმაცია მიაწოდოს ისე, რომ ხალხმა დასკვნები სიყვარულისა და სიკეთის სასარგებლოდ გააკეთოს.

„მედიის წარმომადგენლები ინფორმაციას ვაწოდებთ აუდიტორიას და ისე უნდა ვიმუშაოთ, რომ საზოგადოებამ დასკვნები არა სიძულვილის და ბოროტების სასარგებლოდ, არამედ სიყვარულისა და სიკეთის სასარგებლოდ გააკეთოს, მიხვდნენ, რომ ადამიანები არ იმსახურებენ სიძულვილსა და გარიყვას. მედიას საზოგადოების განათლების როლიც აქვს და თუ ჩვენ ფეხს ავუწყობთ საზოგადოების ამდროინდელ განწყობას, ვერ მივიღებთ იმ შედეგს, რაც გვინდა ჩვენი ქვეყნის, ჩვენი მომავალი იყოს. ერთი ადამიანის ჩაგვრაც კი არის ნებისმიერი იმ მოქალაქის პასუხისმგებლობა, რომელიც ქვეყნის ბედზე წუხს. მედიის როლიც სწორედ ის არის, რომ გაზარდოს მოქალაქეების თვითშეგნება, მოძალადეებს პირდაპირ უწოდოს მოძალადეები და ისინი უფლებადამცველებად არ მოიხსენიოს, რისი გამოცდილებაც გვაქვს. ქუჩაში ადამიანებს დადევნებულ ხალხს მედია უფლებადამცველებად მოიხსენიებდა. მნიშვნელოვანია, რომ გავმიჯნოთ ერთმანეთისგან და ვუწოდოთ ყველაფერს თავისი სახელი, ეს შედეგს აუცილებლად მოიტანს. მცირე მიღწევა გვაქვს, თუმცა აუცილებელია, კიდევ უფრო წინ წავიდეთ და საინფორმაციო სივრცის გარდა, კომედიურ თუ გასართობ გადაცემებზე მუშაობისას უკეთ გავაცნობიეროთ, რამდენად ძლიერდება სიძულვილის ფონი, სტიგმა“, — თქვა ხატია ღოღობერიძემ მედიის როლზე საუბრისას.

პანელური დისკუსიის მომხსენებლებს შორის ასევე იყვნენ გენდერისა და ადამიანის უფლებების მკვლევარი, აქტივისტი, ლევან ბერიანიძე, რომელმაც 17 მაისების ისტორიის, ხილვადობის პოლიტიკის მიმართულებით არსებული მიღწევებისა და გამოწვევების შესახებ ისაუბრა. თანასწორობა 17-ის დირექტორმა, ნინო ბოლქვაძემ კი შეკრებისა და მანიფესტაციის თავისუფლების მნიშვნელობის შესახებ, ასევე ევროსასამართლოს გადაწყვეტილებების შესახებ ისაუბრა.

პანელური დისკუსიისას, გამხსნელი სიტყვით აუდიტორიას საქართველოს სახალხო დამცველმა, ნინო ლომჯარიამ, ეროვნული დემოკრატიული ინსტიტუტის (NDI) საქართველოს ოფისის დირექტორის მოადგილე, თეონა ყუფუნიამ და გაეროს განვითარების პროგრამის (UNDP) მუდმივმა წარმომადგენელმა საქართველოში, ნიკ ბერესფორდმა მიმართეს.

პანელური დისკუსიის დასკვნითი ნაწილი კითხვა-პასუხის ფორმატში წარიმართა, რომლის დროსაც მომხსენებლებმა დამსწრეებთან ერთად განიხილეს ის გამოწვევები, რაც ლგბტქი თემს დღეს აქვს და გეგმები, რომლითაც თანასწორობის მიმართულებით პროგრესი უნდა მიიღწეს.