დეკემბერი 2021 - Page 4

ლეგენდარული ქვიარ სერიალი – Queer as Folk, გამოსვლიდან 20 წლის შემდეგ ეკრანებს განახლებული ვერსიით უბრუნდება. რასელ დეივისის 1999 წლის ბრიტანული სატელევიზიო შოუ, რომელიც ქვიარ მეგობრებისა და მათი ოჯახის წევრების ყოველდღიურ გამოცდილებებზე ჰყვებოდა, მალევე აიტაცა მაყურებელმა და 2000 წელს სერიალის ამერიკული ვერსიაც შეიქმნა, რომელიც ბევრად დიდმა აუდიტორიამ ნახა. სერიალის ამერიკული ანალოგი 5 სეზონისგან შედგებოდა და პირველი სერიალი იყო, რომელმაც გეი კაცებისა და ქალების მეგობრობის, საჭიროებებისა და სირთულეების ასახვა დაისახა მიზნად.

Queer as Folk-ის ბრიტანული ვერსიის მსახიობები / Channel 4

სერიალის განახლებული ვერსიის სიუჟეტი ნიუ ორლეანში განვითარდება. Variety-ში გამოქვეყნებული სტატიის თანახმად, სატელევიზიო შოუ Queer as Folk-ის ორიგინალ ვერსიაზე იქნება დაფუძნებული და საკლუბო ცხოვრების მოყვარული მეგობრების ისტორიას გაგვაცნობს, რომლებიც ნიუ ორლეანში მომხდარი ტრაგედიის შემდეგ ტრავმულ გამოცდილებასთან გამკლავებას შეეცდებიან. ახალი სატელევიზიო შოუს აღმასრულებელი პროდიუსერი რასელ დეივისი იქნება, შემქმნელი კი 2015 წლის კანადური ფილმის – Closet Monster-ის რეჟისორი, სტივენ დანი. შოუ NBCUniversal-ის ახალ სტრიმინგ პლატფორმაზე – Peacock – იქნება ხელმისაწვდომი.

სტივენ დანის თქმით, როდესაც შოუს ბრიტანული ვერსია გამოვიდა, სატელევიზიო სივრცეში ქვიარ ისტორიების მოყოლა პროვოკაციადაც კი ითვლებოდა, ახლა კი ბევრი რამ შეიცვალა.

„როცა შოუს ორიგინალი ვერსია გამოვიდა, ქვიარ ამბების სატელევიზიო სივრცეში მოყოლა პროვოკაციადაც კი ითვლებოდა და სერიალს საიდუმლოდ ვუყურებდი. ახალ თაობას ქვიარ ამბებისთვის თვალის დევნება სიმარტოვეში აღარ მოუწევთ, მათ მეტი შესაძლებლობა აქვთ, შოუს მეგობრებთან და ოჯახის წევრებთან ერთად უყურონ“, – აღნიშნა დანმა.

ფოტო: Gay Nation

სერიალში მთავარ როლებს ქვიარ მსახიობები შეასრულებენ. პირველი მსახიობი, რომელიც სერიალზე დაამტკიცეს, არაბინარული გენდერული იდენტობის მქონე ჯესი ჯეიმს კეიტლია. კეიტლი „ტრანგენდერი გოგოს როლს შეასრულებს, რომელსაც ზრდასრულობაში გადაბიჯება უჭირს“. უკვე ცნობილია სერიალის სხვა მთავარი როლის შემსრულებლებიც, მათ შორის, ფინ არგუსი, ჯონი სიბილი, ქენდეს გრეისი, რაიან ო’კონელი, არმანდ ფილდსი, ბენიტო სკინერი, ქრის რენფრო და დევინ ვეი.

Queer as Folk-ის განახლებული ვერსიის გადაღებები უკვე დაწყებულია და ახალი, ბევრად მრავალფეროვანი ქვიარ გამოცდილებების ნახვას, სავარაუდოდ, მომავალ წელს შევძლებთ.

წყარო: Slash Film

მთავარი ფოტო: Warner Bros.

,,პატარა საყვარელი მატყუარების” მსახიობმა, ჯულიან მორისმა, სულ რამდენიმე დღის წინ ინსტაგრამზე თავის პარტნიორ მამაკაცთან 18-წლიანი ურთიერთობის საიუბილეო პოსტი გამოაქვეყნა.

„18 წელი ერთად, ეს საუკეთესო წლები იყო იმიტომ, რომ ერთად ვართ. მიყვარხარ, ლანდონ როსს!“ – წერს მსახიობი ინსტაგრამის პოსტში.

ჯულიან მორისი, რომელსაც აქამდე საჯაროდ არ უსაუბრია თავის სექსუალურ ორიენტაციაზე, მაყურებელი გახმაურებული თინეიჯერული სერიალიდან, „პატარა საყვარელი მატყუარებიდან“ იცნობს. სერიალში მსახიობი სამედიცინოს სტუდენტის, ვრენის როლს ასრულებს და რომანტიკული გრძნობები აკავშირებს ერთ-ერთ „მატყუარა” სპენსერთან.

ბრიტანელ მსახიობს ასევე შესრულებული აქვს როლები სერიალებში – 24, New Girl და Once Upon A Time.

მისი ბოიფრენდი, ლანდორ როსი, საზოგადოებისთვის ნაკლებად ცნობილი არტისტია, რომელიც სხვადასხვა მედიუმის საშუალებით ქმნის ხელოვნებას.

მსახიობის პოსტს ინსტაგრამზე „პატარა საყვარელი მატყუარების“ სხვა მსახიობებიც, კიგან ალენი და ბრენტ დოგერტიც გამოეხმაურნენ.

უკვე ორი წელია, ყველა ადამიანის ყოველდღიურობა შეიცვალა კორონავირუსის გამო. პანდემიურმა რეალობამ სოციალური ურთიერთობები შეიწირა, რაც მენტალურ ჯანმრთელობაზე მძიმედ აისახება. ექსტროვერტებისთვის ეს პერიოდი ჩაკეტილობის გამო იყო რთული, რადგან ყოველდღიურობა მცირე სანაცნობო წრით ან სრული მარტოობით შემოისაზღვრა. ინტროვერტი ადამიანები კი, რომლებიც საკუთარი კომფორტის ზონიდან გასვლას ცდილობდნენ და სოციალური ურთიერთობის უნარ-ჩვევებს ავითარებდნენ, არჩევნის გარეშე დარჩნენ.

2021 წლის ზაფხულში შეზღუდვები შემცირდა, ბარები და კაფეები გაიხსნა, მუსიკალური ფესტივალები, მართალია, მცირე რაოდენობით, მაგრამ განახლდა. გამონაკლისი მხოლოდ საკლუბო სივრცეები იყო, რომლებიც ქვიარ ადამიანებისთვის ყველაზე უსაფრთხო და თანასწორია. ამას ,,ხიდისა’’ და ,,ბასიანის’’ ქვიარ ღონისძიებების სერიები – კიკი და ჰორუმის ღამეებიც მოწმობს. მსგავსი ღონისძიებები ქვიარებისთვის საკუთარი იდენტობის ღიად დაფიქსირების, თემის წევრებთან კომუნიკაციისა და ყოველდღიურ გამოწვევებზე ცეკვით პასუხის გაცემის საშუალებად იქცა.

ერთი თვის წინ ხიდზე სატესტო ღონისძიება გაიმართა, რომელზე დასწრებაც მხოლოდ მწვანე კოვიდ სტატუსის მქონე პირებს შეეძლოთ. ინიციატივა მიზნად ისახავდა საკლუბო სივრცეების გახსნასთან დაკავშირებული რისკების შეფასებასა და კლუბში სტუმრობის მსურველთა უსაფრთხოებაზე ზრუნვას.

„იზოლაციისა და კარანტინის წესების დამტკიცების შესახებ“ საქართველოს მთავრობის მიერ 2020 წლის 23 მაისს მიღებულ N322 დადგენილებაში მიმდინარე წლის 30 ნოემბერს ცვლილებები შევიდა. უკანასკნელი ცვლილებებით, სათეატრო და კინემატოგრაფიული ღონისძიებების ჩატარება დასაშვები გახდა „მწვანე“ სტატუსის მქონე პირების დასწრების პირობით, სასტუმროს ტერიტორიაზე კონცერტის ჩატარებაზე დაწესებული შეზღუდვაც მოიხსნა, თუმცა ნებისმიერი სხვა გასართობი, სახელოვნებო, საფესტივალო და კულტურული ღონისძიებების ჩატარება აკრძალულია. შეზღუდვების შემსუბუქება არ შეეხო საკლუბო სივრცეებს, რომლებიც უსაფრთხო ღონისძიებების ჩატარების ინიციატორები იყვნენ და საკლუბო კულტურის აღდგენის მიზნით, საკვლევ ღონისძიებებში იყვნენ ჩართული.

თამუნა აქსანდერი, ხიდის დამფუძნებელი

ფოტო: ანა ბოკო / Forbes Woman

აკრძალვის მიუხედავად, 3 დეკემბერს ხიდზე ღონისძიება გაიმართა, რის გამოც შრომის ინსპექციამ კლუბი 10 ათასი ლარით დააჯარიმა და ობიექტის დალუქვის გადაწყვეტილება მიიღო. აღნიშნული ინფორმაცია ,,ხიდის’’ დამფუძნებელმა, თამუნა აქსანდერმა ფეისბუკზე გაავრცელა და თქვა, რომ ფაქტთან შეგუებას არ აპირებენ.

„დღეს ახალი პრეცედენტი მოხდა – პირველ დაჯარიმებასთან ერთად, პირდაპირ დაგვლუქეს. თითქმის 2 წელია გაჩერებულები ვართ, მოწესრიგებულად ველოდებით მუშაობის უფლების მიღებას, ვერთვებით საპილოტე კვლევით ღონისძიებებში იმისთვის, რომ მაქსიმალურად შევამციროთ ვირუსის გავრცელება ჩვენს სივრცეებში. შემოიღეს მწვანე პასპორტის სისტემა, ჩვენ კვლავ არ აღმოვჩნდით გასახსნელ სიაში. 3 დეკემბერს გავხსენით კარი და ვუმასპინძლეთ მხოლოდ მწვანე პასპორტის მქონე პირებს უფრო მეტად შეზღუდული კრიტერიუმებით, ვიდრე თავად დაადგინეს საქვეყნოდ. დღევანდელი დალუქვის ერთადერთი მიზანი ჩვენი დასჯა, შეშინება და სამომავლო სიგნალია. საკლუბო ფილოსოფია და კულტურა თავისუფლებაზეა დაფუძნებული, მსგავსი პრეცედენტები აქ არ გაგივათ. მოგიწოდებთ, დროულად მოგვიხსნათ ლუქი და მოგვცეთ მუშაობის საშუალება სხვა კლუბებთან ერთად. იმაზე მეტი ვითმინეთ, ვიდრე ვალდებულება გვქონდა“, – დაწერა ხიდის დამფუძნებელმა ფეისბუკზე.

შრომის ინსპექციამ საკლუბო სივრცეში გამართულ ღონისძიებასთან დაკავშირებით განცხადება გაავრცელა და კლუბებს მოუწოდა, არ განახორციელონ დადგენილებით აკრძალული საქმიანობები, წინააღმდეგ შემთხვევაში, ადმინისტრაციული სახდელის დაკისრებისა და დალუქვის პირობა გააჟღერეს.

„მას შემდგომ, რაც პირველი დეკემბრიდან საქართველოში ამოქმედდა მწვანე პასპორტის კონცეფცია, შრომის ინსპექციამ აქტიურად დაიწყო შეხვედრები სხვადასხვა ბიზნეს სექტორის წარმომადგენლებთან. მათ შორის, ღამის კლუბების ასოციაციასთან (საქართველოს კულტურისა და შემოქმედების ინდუსტრიების ერთობა / act4culture), რომლის დროსაც განხილულ იქნა საქმიანობის უსაფრთხო და მდგრადი აღდგენის საკითხები. შეხვედრაზე მიღწეულ იქნა შეთანხმება, რომ უახლოეს პერიოდში სექტორი განაახლებს ფუნქციონირებას, რისთვისაც მწვანე პასპორტებთან ერთად, შრომის ინსპექცია სხვა კომპეტენტური უწყებების ჩართულობით შეიმუშავებს უსაფრთხოდ ფუნქციონირების პროტოკოლს, რომელიც უზრუნველყოფს მსგავსი ტიპის ღონისძიებებზე მომხმარებელთა მაქსიმალურ დაცვას. აღნიშნული ინფორმაცია ჩვენი მხრიდან აქტიურად მიეწოდა სექტორში რეგისტრირებულ სხვადასხვა ბიზნეს სუბიექტს. მიუხედავად ამისა, ზოგიერთი მათგანი, რეგულაციების გვერდის ავლით, კვლავ განაგრძობს არანებადართული ღონისძიებების ორგანიზებას, რომლის შედეგადაც მნიშვნელოვნად უარესდება ქვეყანაში არსებული ეპიდვითარება. სწორედ ამიტომ, შრომის ინსპექცია რეაგირებას მოახდენს ყველა არანებადრთულიეკონომიკური საქმიანობის გამოვლენის ფაქტზე. სექტორული რეკომენდაციის/პროტოკოლის დამტკიცების შემდგომ, უახლოეს პერიოდში დაგეგმილია სექტორის ფუნქციონირების განახლება. შრომის ინსპექციის სამსახური კიდევ ერთხელ მოუწოდებს ღამის კლუბებს, არ განახორციელონ დადგენილებით აკრძალული საქმიანობები, წინააღმდეგ შემთხვევაში ობიექტების მიმართ გამოყენებული იქნება შესაბამისი ადმინისტრაციული სახდელი ჯარიმისა თუ დალუქვის სახით“, – აღნიშნული იყო შრომის ინსპექციის მიერ გავრცელებულ განცხადებაში.

შრომის ინსპექციამ 6 დეკემბერს კიდევ ერთი განცხადება გაავრცელა, რომელშიც ნათქვამი იყო, რომ ღამის კლუბების უსაფრთხო აღდგენის მიზნით, პროტოკოლის შემუშავება გრძელდებოდა და კიდევ ერთი შეხვედრა გაიმართა, რომელზეც საკლუბო კულტურის უსაფრთხო ფუნქციონირების პროტოკოლზე იმსჯელეს.

ნაჯა ორაშვილი, ბასიანის დამფუძნებელი

ფოტო: ანა ბოკო / Forbes Woman

კლუბ ,,ბასიანის’’ დამფუძნებელმა, ნაჯა ორაშვილმა კი 7 დეკემბერს ფეისბუკზე სასიხარულო სიახლე გაავრცელა – მისი თქმით, 17 დეკემბერს საქართველოს მასშტაბით კლუბების კარი გაიხსნება და იმედი გამოთქვა, რომ აღარასოდეს დაიხურება.

„ელექტრონული მუსიკისა და საკლუბო კულტურის აღდგენის ფონდის და Act4culture / The Cultural and Creative Industries Union of Georgia -ის მიერ ინიციირებული უსაფრთხო ღონისძიებების იდეა მხარდაჭერილია. სამოქმედო გეგმას საფუძვლად უდევს ღია და დახურულ სივრცეებში ჩვენ მიერ ჩატარებული ორი საპილოტე ღონისძიების კვლევის შედეგი. ამ ეტაპზე მიმდინარეობს სახელმძღვანელო დოკუმენტში ტექნიკური საკითხების დაზუსტება, იმისთვის რომ ელექტრონული მუსიკის სივრცეებმა მოიპოვონ უსაფრთხო ღონისძიებისთვის საჭირო მწვანე სტატუსი. 17 დეკემბერს, თითქმის ორწლიანი პაუზის შემდეგ, საქართველოს მასშტაბით კლუბების კარი გაიხსნება და იმედი მაქვს, აღარასოდეს დაიხურება.

მადლობა ყველას, ვინც ერთგულად და მტკიცედ დაიცვა საკლუბო კულტურის მთავარი მონაპოვარი – უსაფრთხო სივრცის იდეა, სადაც ზრუნვა და ცოდნის გაზიარება ფუნდამენტურ პრინციპს წარმოადგენს. მალე შევხვდებით საცეკვაო მოედნებზე“, – ვკითხულობთ ბასიანის დამფუძნებლის მიერ გამოქვეყნებულ პოსტში.

შრომის ინსპექციას სამუშაო შეხვედრების შედეგად მიღებული საბოლოო გადაწყვეტილების შესახებ ინფორმაცია ჯერ არ გაუვრცელებია.

ავტორი: გიორგი ბასხაჯაური

5 დეკემბერს, Tbilisi Pride-ის ოფისში ლევან გელბახიანთან სათემო შეხვედრა შედგა. მსახიობი კარიერის გასაგრძელებლად აშშ-ში მიემგზავრება, იქამდე კი ფილმ And Then We Danced-ის გადაღების პროცესსა და გამოწვევებზე ისაუბრა, გაიხსენა ფილმის პრემიერის თანმდევი მოვლენები, ასევე ის გავლენა შეაფასა, რაც ფილმს მის ცხოვრებაზე ჰქონდა.

ლევან გელბახიანის თქმით, პირველი სირთულე როლზე დათანხმება იყო, რადგან აგრესიული განწყობების მოლოდინი ჰქონდა, თუმცა პრემიერის თანმდევი ძალადობრივი აქციების მიუხედავად, აგრესიის სამიზნე არ გამხდარა.

„როცა ფილმში მონაწილეობის მიღება შემომთავაზეს, დათანხმება გამიჭირდა, რადგან მოსალოდნელი შედეგების განსაზღვრა რთული იყო, თანაც, ოჯახისგან ვიგრძენი დიდი წინააღმდეგობა, ისინი თვლიდნენ, რომ აგრესიის სამიზნე გავხდებოდი. სამსახიობო კარიერა მცირე ასაკიდან ჩემი მიზანი იყო, რაშიც ოჯახიც მხარს მიჭერდა და როცა ფილმში მონაწილეობა საბოლოოდ გადავწყვიტე, ოჯახიც იმ არგუმენტით დავითანხმე, რომ ეს იყო რეალური შანსი, რაც ჩემს კარიერას წაადგებოდა. გასაკვირი იყო ის, რომ პირადი თავდასხმის სამიზნე არ გავხდი, ონლაინ სივრცეში აგრესიული ადამიანებიც მრავლად იყვნენ, თუმცა რეალურ სივრცეში ყველა დადებითად იყო განწყობილი”, — აღნიშნა ლევანმა.

მსახიობმა იმ გამოწვევებზეც ისაუბრა, რაც გადაღების პროცესს უძღოდა წინ. მისი თქმით, ყველაზე რთული ქორეოგრაფისა და მოცეკვავეების დათანხმება იყო, რეჟისორს უარი იმ მიზეზით უთხრეს, რომ ქართულ ცეკვას გეი ვერ შეასრულებს.

„ერთ-ერთ წამყვან ქართულ ანსამბლთან შეხვედრაზე, ფილმის რეჟისორი, ლევან აკინი, შვედეთის დიპლომატიურ კორპუსთან ერთად მივიდა, სადაც განხილვის გარეშე უთხრეს უარი, მიზეზად კი ის უთხრეს, რომ ,,ქართულ ცეკვაში გეი არ არის” და სჯობდა, სხვა ნებისმიერი ცეკვის მიმდინარეობაზე გადაეღო ფილმი. ანსამბლის წარმომადგენელმა სხვა ანსამბლის ხელმძღვანელებიც გააფრთხილა, რომ თანამშრომლობაზე უარი ეთქვათ. მეორეხარისხოვანი როლების შემსრულებლები პერსონალური კონტაქტებითა და კასტინგებით შეარჩიეს. ერთ-ერთი მთავარი კრიტერიუმი ის იყო, რომ ფილმის წარმოებაში ჰომოფობიურად განწყობილი ადამიანები არ უნდა ყოფილიყვნენ ჩართული, რამაც გადამღები ჯგუფის შეკრება გაართულა, ამ გამოწვევების გამო, ფილმზე მუშაობა 2 წელი გაგრძელდა, გადაღების პროცესი კი 27 დღის განმავლობაში გრძელდებოდა“, — გაიხსენა ლევანმა.

ლევან გელბახიანის თქმით, პრემიერის თანმდევი მოვლენები საერთაშორისო ფესტივალებში მონაწილეობისა და საოსკარე კამპანიის პროცესს დაემთხვა, რაც დიდი სტრესი იყო, რადგან ძალადობრივ აქციებთან დაკავშირებული სიახლეები მათ მთავარ საზრუნავად იქცა, რაც საერთაშორისო აუდიტორიას დიდად არ ესმოდა.

მსახიობის თქმით, ფილმმა მის კარიერაზე დადებითი გავლენა იქონია, თუმცა სირთულეც ახლდა თან, რადგან როგორც კი ფილმის შესახებ ინფორმაცია გავრცელდა, ურეკავდნენ და გეი პერსონაჟის შესრულებას სთავაზობდნენ, მისი მიზანი კი მრავალფეროვანი, განსხვავებული როლების შესრულება იყო.

„როგორც კი ფილმის შესახებ ხმა გავრცელდა, მირეკავდნენ და სხვადასხვა კლიპში თუ ფილმში გეი პერსონაჟის შესრულებას მთავაზობდნენ, რაც პრობლემა შეიძლება არ არის, თუმცა ჩემი მიზანი მრავალფეროვანი, საინტერესო პერსონაჟების შესრულებაა და მხოლოდ პირველი ფილმის მსგავსი როლებით კარიერის განსაზღვრა არ მინდა“, — აღნიშნა მსახიობმა.

ლევან გელბახიანი კარიერის გასაგრძელებლად ნიუ იორკში მიემგზავრება და სათემო შეხვედრაზე სამომავლო გეგმებსა და იმ მიზეზებზე, რამაც წასვლა გადააწყვეტინა, უფრო დეტალურად ისაუბრა.

„პანდემიის პერიოდმა მიმახვედრა, რომ საქართველოში ჩემი რესურსი ამოვწურე. ერთ ადგილას გაჩერებამ და უძრაობამ ნათლად დამანახა, რომ წასვლა საუკეთესო გამოსავალია. უკვე გავაფორმე ერთ-ერთ სააგენტოსთან კონტრაქტი, ისინი როლების მოპოვებაში დამეხმარებიან. დიდი მოლოდინებით არ მივდივარ და მცირე ნაბიჯებით ვაპირებ კარიერის განვითარებას, ამჟამად ჩემი მთავარი მიზანი საინტერესო როლების მოპოვებაა, რაც აქ ნაკლებად წარმომიდგენია“, — აღნიშნა სამომავლო გეგმებზე საუბრისას ლევანმა.

მსახიობმა აუდიტორიის კითხვებსაც უპასუხა და აღნიშნა, რომ ფილმით უამრავი ადამიანი დაინტერესდა, დისკუსია დაიწყო, რაც იმის მაჩვენებელია, რომ აგრესიულად განწყობილი მცირე ჯგუფის მიღმა უამრავი ადამიანია, რომელსაც ცვლილებებისთვის მზაობა აქვს.

„ფილმის ქართულ პრემიერაზე 6 ათასი ბილეთი იყო ხელმისაწვდომი, რომელიც პირველივე დღეს გაიყიდა, არალეგალურად გავრცელებული ჩანაწერი კი 200 ათასზე მეტმა ადამიანმა ნახა, რაც იმის მაჩვენებელია, რომ მცირე, მართული ძალადობრივი ჯგუფის იქეთ უამრავი ადამიანია, რომელიც დაინტერესდა, ფილმის ნახვის სურვილი გაუჩნდა, რაც სასიკეთო ცვლილებაა. ფილმს ძირითადად კარგი გამოხმაურება მოჰყვა და ამან ხილვადობას, ქვიარ თემის საჭიროებებზე საუბარს ხელი შეუწყო. იმ ადამიანებს, რომლებიც ქვიარ უფლებების ადვოკატირებაში არიან ჩართული, ბევრად დიდი პასუხისმგებლობა მოეთხოვებათ, რადგან სასიკეთო ცვლილებების მოტანა კონსტრუქციული ნაბიჯების გარეშე ძნელად წარმოსადგენია, მიხარია, თუ ამ პროცესს მცირედით მაინც შევუწყეთ ხელი“, — აღნიშნა საუბრის დასასრულს ლევან გელბახიანმა.