გუშინ სოციალური ქცელით გავრცელდა ლელა კურტანიძის პოსტი, რომლითაც ის ორ სასულიერო პირს სექსუალურ შევიწროვებაში ადანაშაულებს. ამავდროულად ლელა სთხოვდა მედია გამოცემაბს მისი ამბის გაჟღერებას. გთავაზობთ ლელასთან ჩაწერილ ინტერვიუს. ეს იყო ჯავახეთის სტუდენტური ექსპედიციის
“პოსტჰუმანიზმი” ის ტერმინია, რომელიც ბოლო წლების მანძილზე ხშირად გვხვდება განვითარებული ქვეყნების როგორც ვიწროდ აკადემიურ, ისე – საჯარო დისკურსში. წლიდან წლამდე ტექნოლოგიის მნიშვნელოვანმა განვითარებამ ურთიერთშედეგობრივად გამოიწვია არა მხოლოდ უშუალუდ ამ მიმართულებით დაინტერესებული, არამედ ყველა იმ ადამიანის ყურადღებაც, ვისაც ინტერნეტსა და ტექნოლოგიასთან
ბიოგრაფია 1983 წელს, თბილისში დავიბადე. წელს 40 წელი შემისრულდა. ოჯახს რაც შეეხება, დედაჩემი რუსული ენის პედაგოგია სკოლაში, მამა – მხატვარი. ძალიან ვღიზიანდები, როცა ამბობენ
სტატიის ავტორი: მეგი თედორაძე დეფინიცია და მიზნები ბრაზის განმარტება მრავალწახნაგოვანია, თუმცა იგი ყველაზე ხშირად განისაზღვრება, როგორც უსიამოვნების მძაფრი შეგრძნება, მტრული დამოკიდებულება თავისი ობიექტის მიმართ,
სამოქალაქო საზოგადოების ორგანიზაციები GLOBSEC-ის ბრატისლავის ფორუმზე 30 მაისს, საქართველოს პრემიერ-მინისტრის, ირაკლი ღარიბაშვილის მიერ გაკეთებულ განცხადებას გმობენ.
მათი თქმით, ღარიბაშვილი იმეორებს კრემლის პოზიციას და უკრაინის ტერიტორიაზე რუსეთის უსამართლო შეჭრის მიზეზად უკრაინის ნატოში გაერთიანების სურვილს მიიჩნევს.
“პრემიერ-მინისტრს შევახსენებთ, რომ უკრაინის ნატოში გაწევრება უკრაინის ხალხის ისტორიული არჩევანია, რომელიც უკრაინის კონსტიტუციით არის გამყარებული. პრემიერს შევახსენებთ იმასაც, რომ ჰელსინკის აქტი განსაზღვრავს თითოეული ქვეყნის სუვერენულ უფლებას, თავისი შეხედულებისამებრ შეუერთდეს ნებისმიერ ხელშეკრულებას ან ალიანსს.
სინანულს გამოვთქვათ იმის გამო, რომ საქართველოს პრემიერ- მინისტრის გამოსვლა სრულად იყო თანხვედრაში კრემლის ნარატივთან, რომლის მიხედვითაც, ნატოს გაფართოება საფრთხეს უქმნის რუსეთს. ამასთან, სამწუხაროდ საქართველოს პრემიერ-მინისტრმა არც ამჯერად გამოიყენა შესაძლებლობა, ყველა შესაძლო ფორმით დაეგმო რუსეთის ფედერაციის უსამართლო და არაპროვოცირებული თავდასხმა უკრაინაზე.
ასევე შევახსენებთ პრემიერ-მინისტრს, რომ ის წარმოადგენს სახელმწიფოს, რომლის ხალხმაც, აბსოლუტური უმრავლესობით, 2008 წლის 5 იანვარს გამართული პლებისტიცის საფუძველზე, მხარი დაუჭირა საქართველოს ნატოში გაწევრებას. აღნიშნული არჩევანი გამყარებულია საქართველოს კონსტიტუციის 78-ე მუხლით, რომლის მიხედვითაც კონსტიტუციურმა ორგანოებმა თავიანთი უფლებამოსილების ფარგლებში ყველა ზომა უნდა მიიღონ ევროპის კავშირსა და ნატოში საქართველოს სრული ინტეგრაციის უზრუნველსაყოფად”, – ნათქვამია განცხადებაში.
ხელმომწერი ორგანიზაციები:
ადამიანის უფლებათა ცენტრი;
დემოკრატიის კვლევის ცენტრი;
ეკონომიკური პოლიტიკის კვლევის ცენტრი
ინფორმაციის თავისუფლების განვითარების ინსტიტუტი;
მედიის განვითარების ფონდი;
მმართველობის მონიტორინგის ცენტრი
პარტნიორობა ადამიანის უფლებებისთვის
პრევენცია პროგრესისთვის;
რონდელის ფონდი;
საერთაშორისო გამჭვირვალობა-საქართველო;
საქართველოს ახალგაზრდა იურისტთა ასოციაცია;
საქართველოს დემოკრატიული ინიციატივა
საქართველოს სასამართლოს გუშაგი;
სოციალური სამართლიანობის ცენტრი;
ტოლერანტობის და მრავალფეროვნების ინსტიტუტი;
უფლებები საქართველო;
ფონდი ღია საზოგადოება საქართველო;
წამების მსხვერპლთა რეაბილიტაციის საერთაშორისო ცენტრი.
ფორუმზე ღარიბაშვილმა უკრაინაში რუსეთის შეჭრის საბაბად ნატო დაასახელა, იგივეს ამბობენ რუსეთშიც.
ბრაზილიური მედიის ინფორმაციით, რიოში 31 წლის ქართველი მეზღვაური ილია კახაბერიძე მოკლეს. მედიის ცნობით, ის სასტუმროს ნომერში საწოლზე მიბმული იპოვეს.
მკვლელობაში ბრალდებული უსაფრთხოების კამერების საშუალებით ამოიცნეს და დააკავეს. მოტივი ამ დროისთვის უცნობია.
საქართველოს საგარეო საქმეთა სამინისტროს განცხადებით, ოჯახთან კონტაქტზე არიან.
“ბრაზილიაში, საქართველოს საელჩოში შევიდა ოფიციალური შეტყობინება საქართველოს მოქალაქის გარდაცვალების შესახებ. საელჩო კონტაქტზეა როგორც გარდაცვლილის ოჯახის წევრებთან, ასევე ადგილობრივ სამართალდამცავებთან. განხორციელდება შესაბამისი პროცედურები”, – ამბობენ უწყებაში.
საქართველოს დემოკრატიული ინიციატივის (GDI) განცხადებით, შინაგან საქმეთა სამინისტრო მარტის აქციების დროს დაკავებული ლაზარე გრიგორიადისის მამის, ბექა გრიგორიადისის შეკრებისა და გამოხატვის უფლებას უხეშად არღვევს.
ორგანიზაცია მოუწოდებს შსს-ს, პატივი სცეს ადამიანის უფლებას – მშვიდობიანი პროტესტის ფარგლებში ტროტუარზე ან სკვერში განათავსოს კარავი.
გრიგორიადისს პოლიციამ პარლამენტის უკან მშვიდობიანი პროტესტის გამოხატვის მიზნით კარვის გაშლის უფლება არ მისცა. სამინისტროს წარმომადგენლებმა ბექა გრიგორიადისს კარავი ძალის გამოყენებით წაართვეს.
“საქართველოს კონსტიტუცია იცავს შეკრებისა და გამოხატვის თავისუფლებას, რაც მოქალაქეებს საშუალებას აძლევს მშვიდობიანად გამოხატონ თავიანთი პროტესტი და განსხვავებული აზრი. პროტესტის დროს კარვების გამოყენება ისტორიულად ეფექტური საშუალება იყო აქტივისტებისთვის საზოგადოების ყურადღების მისაქცევად და საკუთარი პროტესტის გამოსახატად.
“შეკრებებისა და მანიფესტაციების შესახებ” კანონის მე-11 პრიმა მუხლის მე-4 პუნქტის თანახმად: ,,დაუშვებელია ტრანსპორტის სავალი ნაწილის ავტომანქანებით, სხვადასხვა კონსტრუქციებით ან/დასაგნებით გადაკეტვა.“
კანონი კრძალავს კარვის, სხვაგვარი კონსტრუქციის ან საგნის ტრანსპორტის სავალ ნაწილზე განთავსებას, რაც გამოიწვევს ტრანსპორტის მოძრაობის შეფერხებას ან/და შენობის შესასვლელის ბლოკირებას. კანონი არ კრძალავს შეკრებისა და მანიფესტაციის ჩატარებისას კარვის ტროტუარზე – ფეხით მოსიარულეთა ადგილზე განთავსებას, ტროტუარზე კარავის დადგმის მეშვეობით პროტესტის გამოხატვა, არათუ კანონით აკრძალულ ქმედებას წარმოადგენს, არამედ შეკრებისა და მანიფესტაციის კონსტიტუციური უფლების შემადგენელი ნაწილია. ტროტუარზე კარვის განთავსება კონსტიტუციური უფლების ნაწილია, თუკი ამით არ ხდება ადმინისტრაციული ორგანოს პარალიზება ან მისი ნორმალური საქმიანობისთვის ხელშეშლა.
გავრცელებული კადრებიდან ჩანს, რომ აქციის მონაწილეები გეგმავდნენ კარვის დადგმას, არა ტრანსპორტის სავალ ნაწილზე, არამედ პარლამენტის მიმდებარე ტერიტორიაზე/სკვერში. ამგვარად, პოლიციის მიერ აქციის მონაწილეებისთვის კარვის ჩამორთმევა იყო უკანონო და მიზნად ისახავდა შეკრებისა და გამოხატვის თავისუფლების შეზღუდვას”, – ნათქვამია განცხადებაში.
ორგანიზაცია უფლებები საქართველოს ინფორმაციით, უვადო თავისუფლების აღკვეთა მიუსაჯეს კაცს, რომელმაც შვილების თვალწინ ქალი მოკლა. მკვლელობა სიღნაღის მუნიციპალიტეტის სოფელ ბოდბეში 2022 წლის 4 სექტემბერს მოხდა. კაცმა ქალი სანადირო თოფით დაჭრა. ბავშვების დედა 2022 წლის 23 ნოემბერს, საავადმყოფოში გარდაიცვალა.
მათი ცნობით, საქმეში უფლებები საქართველოს ჩართვის შედეგად, არასრულწლოვანებს დაზარალებულის სტატუსი მიენიჭათ.
“საყურადღებოა, რომ ბავშვებთან ორგანიზაციის იურისტების მუშაობამ გამოავლინა არა მხოლოდ მათი მძიმე ფსიქო-ემოციური მდგომარეობა, რაც გამოწვეული იყო მამის მიერ მათი თანდასწრებით დედის მკვლელობის ფაქტით, ასევე, მამის მხრიდან შვილების მიმართ ფიზიკური ძალადობის არაერთი ეპიზოდი”, – ამბობენ ორგანიზაციაში.
მათი განცხადებით, გამოძიების მიმდინარეობისას, ორგანიზაციის იურისტებმა მაქსიმალურად უზრუნველყვეს ბავშვების მონაწილეობით საგამოძიებო და საპროცესო მოქმედებების არასრულწლოვანთა საუკეთესო ინტერესების დაცვითა და მეორეული ვიქტიმიზაციის თავიდან არიდებით ჩატარება.
უფლებები საქართველო აღნიშნულ საქმეს USAID სამართლის უზენაესობის პროგრამის მხარდაჭერით აწარმოებს.
საზოგადოებრივი ორგანიზაციები ბრიუსელში 22-25 მაისს გამართულ შეხვედრებს აჯამებენ.
მათი თქმით, შეხვედრებზე ხაზგასმით აღინიშნა ქართული მხარის მხრიდან რეფორმების გასატარებლად საჭირო პოლიტიკური ნების ნაკლებობა.
“22-25 მაისს, საზოგადოებრივი ორგანიზაციის წარმომადგენლებმა, რომლებიც მონიტორინგს ვუწევთ ხელისუფლების მიერ ევროკავშირს წევრობის კანდიდატის სტატუსის მისაღებად საჭირო წინაპირობების შესრულების პროცესს, შეხვედრები გავმართეთ ბრიუსელში ევროკავშირის ინსტიტუტებისა და წევრი ქვეყნების წარმომადგენლებთან. შეხვედრების მიზანს წარმოადგენდა საქართველოსთვის ევროკავშირში წევრობის კანდიდატის სტატუსის მინიჭების კუთხით ადვოკატირება.
შეხვედრებზე მეტ-ნაკლებად დადებითად შეფასდა ძალისხმევა და გადადგმული ნაბიჯები სხვადასხვა პრიორიტეტების შესრულებაში. სამწუხაროდ, შეშფოთება გამოითქვა საქართველოს ხელისუფლების მიერ კანდიდატის სტატუსის მიღების წინაპირობად წარმოდგენილი რეფორმების ისეთი მნიშვნელოვანი პრიორიტეტების არაჯეროვანი შესრულების თვალსაზრისით, როგორებიცაა დეპოლარიზაცია, დამოუკიდებელი სასამართლო, დეოლიგარქიზაცია, თავისუფალი მედია და გადაწყვეტილების მიღების პროცესში სამოქალაქო საზოგადოების ჩართულობა. ხაზგასმით აღინიშნა ქართული მხარის მხრიდან ამ რეფორმების გასატარებლად საჭირო პოლიტიკური ნების ნაკლებობა.
ევროკავშირის ინსტიტუტების წარმომადგენლებმა კვლავ გამოხატეს იმედგაცრუება რუსეთთან პირდაპირი ფრენების შესახებ მიღებულ გადაწყვეტილებასთან დაკავშირებით, ვინაიდან ის არ შეესაბამება ევროკავშირში გაწევრების სულისკვეთებას და წინააღმდეგობაშია ევროკავშირის ერთიან საგარეო და უსაფრთხოების პოლიტიკასთან. შეშფოთება გამოითქვა საქართველოში ევროკავშირის მიერ სანქცირებული რუსეთის საგარეო საქმეთა მინისტრის ოჯახის წევრების ვიზიტთან დაკავშირებით.
შეხვედრებზე ასევე ხაზი გაესვა „ქართული ოცნების“ წარმომადგენლების მიერ, ევროკავშირის ინსტიტუტებისა და ჩვენი ქვეყნის საზოგადოებრივი ორგანიზაციების წარმომადგენლების წინააღმდეგ მიმდინარე აგრესიული რიტორიკის დაუშვებლობას, რაც „რუსული კანონის“ გაწვევის შემდეგ კიდევ უფრო მეტად გაძლიერდა.
ევროკავშირში ნათლად ხედავენ და აფასებენ ქართველი ხალხის ძალისხმევას დაიცვას ქვეყნის ევროპული კურსი, თუმცა კანდიდატის სტატუსის მისაღებად ეს შესაძლოა საკმარისი არ აღმოჩნდეს, რადგან ამ მხრივ საჭიროა 12 პრიორიტეტის შესრულება, რაც უპირველეს ყოვლისა ხელისუფლების პასუხისმგებლობაა.
ევროკომისიის მიერ საქართველოს შეფასების ანგარიშის წარდგენამდე დაახლოებით 5 თვეა დარჩენილი. მმართველი პარტიისგან განსხვავებით, ბრიუსელში მიიჩნევენ, რომ 12 პუნქტის შესასრულებლად ჯერ კიდევ გადასადგმელია მნიშვნელოვანი ნაბიჯები. მიგვაჩნია, რომ ხელისუფლებამ უნდა გაითვალისწინოს ქართველი ხალხის ევროპული მისწრაფება, აჩვენოს პოლიტიკური ნება, ევროპულ ღირებულებებთან ერთგულება და მიიღოს შესაბამისი გადაწყვეტილებები”, – ნათქვამია განცხადებაში.
მათი თქმით, კვლავაც აგრძელებენ მუშაობას საქართველოსთვის ევროკავშირის წევრობის კანდიდატის სტატუსის მოსაპოვებლად.
“საქართველო ირჩევს ევროპას” – რუსთაველის გამზირზე ევროკავშირისა და საქართველოს დროშებით მსვლელობა გაიმართა.
საპროტესტო მსვლელობა მას შემდეგ დაიგეგმა, რაც საქართველოს მთავრობამ პარლამენტის შენობის ფასადზე ევროკავშირის დროშა არ გამოფინა. ამის საპასუხოდ მოქალაქეებმა ევროკავშირის დროშები სახლებიდან და ოფისებიდან თავად გადმოფინეს, დღეს კი რუსთაველზე შეიკრიბნენ და მსვლელობა გამართეს.
Georgian Airways-ის დირექტორის, თამაზ გაიაშვილის განცხადებით, თბილისი-მოსკოვს შორის ფრენებზე მოლოდინი არ გამართლდა. ამის შესახებ მან რადიო თავისუფლებასთან განაცხადა.
მისი თქმით, 50%-იანი დატვირთვაც კი არ არის.
“რაც პირდაპირი რეისები დაფრინავს, 50%-იანი დატვირთვაც არ არის… მოლოდინი იყო, რომ ბევრი იქნებოდა – როგორც ქუხს, ისე არ წვიმს… ერთი-ორი თვე უნდა გავიდეს, შევხედოთ. [ფრენების სიხშირეზე] წინასწარ ლაპარაკი არაფრისმომცემია. ვერავინ ფლობს ინფორმაციას… ორი-სამი რეისია შესრულებული – 40%-იანი დატვირთვაა დაახლოებით… ჯერ არც კონკურენციაა, არც არაფერი, დგას ყველაფერი… არ ხდება ისე, როგორც ელოდებოდნენ. მე, მაგალითად, გათვლები არ მქონდა”, – ამბობს გაიაშვილი.
რუსეთთან ფრენები 19 მაისს აღდგა. ქართული ავიაკომპანია Georgian Airways მოსკოვის მიმართულებით კვირაში 7-ჯერ დაფრინავს.
ქალთა ინიციატივების მხარდამჭერი ჯგუფის (WISG) განცხადებით, საქართველოს ფეხბურთის ფედერაცია ქალთა პირველ და მეორე ლიგაში მოასპარეზე ფეხბურთელების სპორტულ სამედიცინო დაზღვევას სრულად დააფინანსებს.
“მიმდინარე წელს განსაკუთრებული მნიშვნელობის ცვლილებებს მივაღწიეთ ფეხბურთელ ქალთა მიმართ გენდერული დისკრიმინაციის აღმოფხვრის მიმართულებით.
ქალთა ინიციატივების მხარდამჭერი ჯგუფი ფეხბურთელ ქალებთან და სახალხო დამცველთან 4 წლიანი მუშაობის წარმატებულ შედეგად მივიჩნევთ საქართველოს ფეხბურთის ფედერაციის (სფფ) 1 მაისის განცხადებას, რომლის თანახმად სფფ ქალთა პირველ და მეორე ლიგაში მოასპარეზე ფეხბურთელების სპორტულ სამედიცინო დაზღვევას სრულად დააფინანსებს.
ფეხბურთელ ქალებს არ ჰქონდათ ჯანმრთელობის დაზღვევა და დამსაქმებელი კლუბი მათ არ უნაზღაურებდა ვარჯიშისა და თამაშის დროს მიღებული ტრავმების მკურნალობის ხარჯებს. საფეხბურთო კლუბი არამხოლოდ დასაქმებულთა სპორტული ტრავმების მკურნალობა/რეაბილიტაციას უგულებელყოფდა, არამედ ჯანდაცვასთან დაკავშირებული მთელი რიგი საბაზისო საჭიროებების იგნორირებით ატარებდა ვარჯიშებსა და თამაშებს”, – ნათქვამია WISG-ის განცხადებაში.
მომღერალი ტინა ტერნერი, რომლის Soul კლასიკებმა და პოპ-ჰიტებმა, როგორიცაა The Best და What’s Love Got To Do With It, სუპერვარსკვლავად აქცია, 83 წლის ასაკში გარდაიცვალა.
ბოლო წლებში ტერნერს ჯანმრთელობის მრავალი პრობლემა ჰქონდა, მათ შორის კიბო, ინსულტი და თირკმლის უკმარისობა.
ტინამ პოპულარობა ქმართან აიკთან ერთად მოიპოვა 1960-იან წლებში, სიმღერებით: Proud Mary და River Deep, Mountain High.
ტერნერი მოძალადე ქმარს 1978 წელს დაშორდა და როგორც სოლო არტისტმა კიდევ უფრო დიდ წარმატებას მიაღწია.
როკ-ენ-როლის დედოფალად წოდებული ტინა ტერნერი განთქმული იყო თავისი მღელვარე და ენერგიული სასცენო შესრულებითა და ძლიერი ვოკალით.
მისი გარდაცვალების შესახებ ინსტაგრამის ოფიციალურ გვერდზე გამოქვეყნდა.
„მისი მუსიკით და სიცოცხლისადმი უსაზღვრო გატაცებით მან მოხიბლა მილიონობით გულშემატკივარი მთელს მსოფლიოში და შთააგონა ხვალინდელი დღის ვარსკვლავები“ – ნათქვამია პოსტში.
“დღეს ჩვენ ვემშვიდობებით ძვირფას მეგობარს, რომელმაც დაგვიტოვა თავისი უდიდესი ნამუშევარი: მუსიკა.”
ტერნერმა რვა გრემის ჯილდო მოიგო და 2021 წელს შეიყვანეს Rock ‘n’ Roll Hall of Fame-ში, როგორც სოლო არტისტი, პირველად კი ეს წოდება აიკ ტერნერთან ერთად მიანიჭეს 1991 წელს.
Hall of Fame-მა აღნიშნა თუ როგორ შეცვალა ტინამ ოდესღაც შეზღუდული იდეა იმის შესახებ, შეეძლო თუ არა შავკანიან ქალს დაეპყრო სცენა და ერთდროულად ყოფილიყო ძლიერიც და მრავალმხრივიც.
ახალგაზრდა ვარსკვლავები, რომლებმაც განიცადეს ტინას გავლენა, არიან: ბიონსე, ჯანეტ ჯექსონი, ჯანელ მონა და რიანა.
როჯერ დევისმა, რომელიც ტერნერის მენეჯერი იყო 30 წელი განაცხადა, რომ ტინა იყო ბუნების უნიკალური და შესანიშნავი ძალა, წარმოუდგენელი ენერგიითა და უზარმაზარი ნიჭით”.
“პირველივე დღიდან, 1980 წელს, როცა მას შევხვდი, საკუთარი თავის სრულიად სჯეროდა, როცა სხვებს ცოტას თუ სჯეროდათ… ძალიან მომენატრება”- დასძინა მან.
ამერიკელმა მომღერალმა გლორია გეინორმა, რომელმაც ასევე 1960-იან წლებში მოიპოვა პოპულარობა თქვა, რომ ტერნერმა „უამრავ ქალს, თეთრკანიანსა თუ შავკანიანს, გზა გაუხსნა როკ მუსიკისკენ“.
სერ ელტონ ჯონმა, რომელიც თავის ავტობიოგრაფიაში იმ მწარე კამათების შესახებ წერდა, რომელიც 2997 წელს მას და ტინას ჰქონდათ ერთად მუშაობის პერიოდში, თქვა რომ ტინა იყო მსოფლიოში ერთ-ერთი ყველაზე საინტერესო და ელექტრული შემსრულებელი“.
მსახიობმა ვიოლა დევისმა შეაქო ტერნერი, როგორც “ჩვენი ბრწყინვალებისა და სექსუალობის აღვირახსნილი საკუთრების სიმბოლო!”
სამეწარმეო ოჯახში, ტენესის შტატში დაბადებულმა, ტინამ პირველად პოპულარობა მოიპოვა, როგორც მისი მეუღლის ჯგუფის The Kings of Rhythm-ის ერთ-ერთ ბექ მომღერლად.
ტინა მალევე მოექცა ჯგუფის სათავეში და წყვილმა წარმატებას მიაღწია სიმღერებით: Fool in Love და It’s Gonna Work Out Fine, რომლებიც 60-იანი წლების დასაწყისში აშშ-ს ჩარტებში მოხვდნენ.
მათი სხვა ჰიტები მოიცავდა 1973 წლის Nutbush City Limits, პატარა ქალაქს, სადაც ტინა დაიბადა. თუმცა, აიკის ფიზიკურმა და ემოციურმა ძალადობამ ტინაზე თავისი შედეგი მოიტანა.
სწორედ აიკმა შეცვალა ტინას სახელი მისი დაბადების სახელიდან. მისი დაბადების სახელი იყო – ანა მეი ბულოკი. აიკმა კი ტინა ტერნერით შეცვალა და გადაწყვეტილება მარტომ მიიღო. ესაა აიკის მაკონტროლებელი ქცევის ერთ-ერთი მაგალითი.
ტინამ 2018 წელს მემუარებში My Love Story, გაიხსენა ერთ-ერთი ტრავმა და აიკთან სექსი შეადარა „ერთგვარ გაუპატიურებას“.
“მან იმდენჯერ გამოიყენა ჩემი ცხვირი, როგორც კრივის ტომარა, რომ სიმღერის დროს ყელში მიმავალი სისხლის გემო ვიგრძენი” – წერს ტინა.
მოძალადისგან თავის დაღწევის შემდეგ, ტინამ განაგრძო კარიერის აღდგენა და გახდა 80-90-იანი წლების ერთ-ერთი უდიდესი პოპ და როკ ვარსკვლავი, ჰიტებით, როგორიცაა: Let’s Stay Together, Steamy Windows, Private Dancer, James Bond theme GoldenEye, I Don’t Wanna Fight და It Takes Two.
ტინამ ასევე ითამაშა 1985 წელს ფილმში Mad Max Beyond Thunderdome – რომელშიც შეასრულა მისი კიდევ ერთი ჰიტი, We Don’t Need Another Hero და The Who’s 1975 წლის როკ ოპერა ტომი Acid Queen-ის როლში.
ტინამ ბედნიერება მეორე ქმართან, გერმანელი მუსიკის აღმასრულებელთან ერვინ ბაკთან ერთად იპოვა. მათ ურთიერთობა 80-იანი წლების შუა ხანებში დაიწყეს და 2013 წელს დაქორწინდნენ.
წყვილი შვეიცარიაში ცხოვრობდა და ტერნერმა შვეიცარიის მოქალაქეობა მიიღო. 2017 წელს ერვინმა ტინას ერთი თირკმელი გადაუნერგა, მას შემდეგ რაც გაირკვა, რომ ტინა თირკმლის უკმარისობით იყო დაავადებული.
ტინამ ასევე განიცადა ტრაგედია 2018 წელს უფროსი ვაჟის, კრეიგის თვითმკვლელობით დაკარგვით. მისი მამა იყო ტერნერის ყოფილი ჯგუფის წევრი, რეიმონდ ჰილი.
კიდევ ერთი ვაჟი, რონი, რომლის მამა იყო აიკ ტერნერი, გარდაიცვალა 2022 წელს. ტინას ასევე ჰყავდა ორი ნაშვილები ვაჟი, აიკ უმცროსი და მაიკლი, აიკის შვილები წინა ურთიერთობიდან.
1993 წელს ტინას ცხოვრებაზე გადაიღეს ბიოგრაფიული ფილმი What’s Love Got To Do With It, რომელმაც ანჯელა ბასეტს ვარსკვლავის როლის შესრულებისთვის ოსკარის ნომინაცია მოუტანა. გარდა ამისა, 2021 წელს HBO გადაიღო დოკუმენტური ფილმი ტინაზე.
2018 წელს სამხრეთ აფრიკის რესპუბლიკასთან Marie Claire-თან ინტერვიუში ტერნერმა თქვა: „ხალხი ფიქრობს, რომ ჩემი ცხოვრება რთული იყო, მაგრამ ვფიქრობ, რომ ეს მშვენიერი მოგზაურობა იყო. რაც უფრო ბერდები, მით უფრო ხვდები, რომ მნიშვნელოვანი ის კი არაა რა მოხდა, არამედ ის თუ როგორ გაუმკლავდი“.
მოძალადე ჯგუფის ლიდერი კონსტანტინე მორგოშია ამბობს, რომ ქართულმა ოცნებამ წელს უკრაინის და ევროკავშირის დროშა ჩამოხსნა, რაც დასაფასებელია.
მისი თქმით, “რეალური დამოუკიდებლობა ჯერ ისევ შორსაა”.
“რეალური დამოუკიდებლობა ჯერ ისევ შორსაა!!! მაგრამ წელს უკრაინის და ევროკავშირის დროშები მაინც ჩამოხსნეს და ესეც დასაფასებელია!!! ბრძოლას ყოველთვის აქვს აზრი!!! დიდება უფალს!!! გაუმარჯოს საქართველოს!” – დაწერა მორგოშიამ.
წელს დამოუკიდებლობის დღესთან დაკავშირებით ქართულმა ოცნებამ პარლამენტის წინ ევროკავშირის დროშა არ გამოფინა.
