ივნისი 2021 - Page 3

გერმანიის ფეხბურთის ფედერაციამ დაადასტურა, რომ UEFA-მ შეწყვიტა მოკვლევა გერმანიის ნაკრების კაპიტნის, მანულ ნოიერის მიერ, EURO 2020-ის მატჩებზე ცისარტყელიანი სამკალურის ტარების ფაქტზე. ლგბტქ+ საზოგადოების მიმართ სოლიდარობის გამოხატვის მიზნით, ივნისში, პრაიდის თვეში, ნოიერს ცისარტყელას სამკლაური პირველად ლატვიის წინააღმდეგ მატჩში ეკეთა, ასე გააგრძელა თამაში EURO 2020-ის ჯგუფური ეტაპის მატჩების განმავლობაშიც – საფრანგეთთან და პორტუგალიასთან.

UEFA განიხილავდა, არღვევდა თუ არა სამკლაური წესს, რომელიც მოედანზე პოლიტიკური განცხადებების გაკეთებას კრძალავს, თუმცა განხილვა შეწყდა და განმარტეს, რომ ნოიერის ჟესტი სოლიდარობას გამოხატავს ლგბტქ თემის მიმართ და ”კარგ მიზნებს” ემსახურება. სამკლაური, როგორც მრავალფეროვნების სიმბოლო, ისე შეფასდა. 

ოთხშაბათს, უნგრეთის წინააღმდეგ მატჩის დროს, გერმანია მიუნხენის სტადიონის – ”ალიანც არენას” განათებას პრაიდის დროშის ფერებში გეგმავს. მიუნხენის მერმა, დიტერ რაიტერმა კვირას განაცხადა, რომ ის UEFA-ს ”ალიანც არენის” პრაიდის დროშის ფერებში განათების ნებართვას სთხოვს. ”ეს ტოლერანტობისა და თანასწორობის ნიშანი იქნება.” – თქვა რეიტერმა ახალ ამბებში.

მიუნხენის საკრებულომ უკვე მოითხოვა სტადიონის ცისარტყელის ფერებით განათება, რისი მიზანიც უნგრეთის დეპუტატების მიერ, სამშაბათს მიღებული ახალი კანონის გაპროტესტებაა, რომელიც ჰომოსექსუალობის ან სქესის შეცვლის შესახებ ნებისმიერი შინაარსის კონტენტის კარასრულწლოვნებთან გაზიარებას კრძალავს. ადამიანთა უფლებების დამცველი ორგანიზაციები ამ კანონს გმობენ, როგორც ანტი-ლგბტქ-სა და დისკრიმინაციულს.

”მნიშვნელოვანია, რომ მიუნხენმა გამოიჩინოს სოლიდარობა უნგრეთის ლგბტ+ საზოგადოების მიმართ, რომელიც უნგრეთის მთავრობის ამჟამინდელი ჰომოფობიური და ტრანსფობიური კანონმდებლობით იჩაგრება.”- განაცხადა მიუნხენის საბჭომ.

როგორც ღონისძიების ორგანიზატორი, საბოლოო გადაწყვეტილებას UEFA მიიღებს.

ამავდროულად, UEFA-მ დაადასტურა, რომ იგი იძიებს სავარაუდო დისკრიმინაციულ ინციდენტებს, რომელიც EURO 2020-ის პირველი ორი მატჩის დროს, უნგრეთში, ”პუშკაშის” სახელობის არენაზე მოხდა.

ანტიდისკრიმინაციულმა ჯგუფის მიერ გაგზავნილ ანგარიშში აღნიშნულია, რომ სამშაბათს, ბუდაპეშტში, პორტუგალიასთან მატჩის დროს, ტრიბუნებზე ჰომოფობიური ბანერი იდგა.

ასევე, დისკრიმინაციული შეძახილები გაისმა შავკანიანების მიმართ შაბათს, უნგრეთის საფრანგეთთან შეხვედრის დროს. აღნიშნული ფაქტის გამოსაძიებლად, ეთიკისა და დისციპლინური ინსპექტორი დაინიშნა.

ლისაბონის პრაიდის ფესტივალი ორი განსხვავებული შინაარსის მატარებელია – ეს არის ღირსების აღლუმი ”Marcha do Orgulho”, რომელიც პრაიდის პირველ კვირას იმართება, მეორე მხრივ კი, ეს არის ბრძოლა გაზრდილი დისკრიმინაციული შემთხვევებისა და იმ აგრესიის წინააღმდეგ, რომელიც სხვადასხვა მცირე ჯგუფებისგან მოდის.

იმისთვის, რომ ლგბტქი თემის წევრებისა და პრაიდის სტუმრების ხმა ყველამ გაიგოს, ფესტივალის კვირეულის ფარგლებში, ისინი ქალაქის ქუჩებს სრულად დაიკავებენ – იზეიმებენ იმას, რაც უკვე მიღწეულია და გააგრძელებენ ბრძოლას იმისთვის, რაც ჯერ ვერ მოიპოვეს.

პრაიდის ფესტივალის მსვლელობისას, გაიმართება გამოფენები, მუსიკალური საღამოები, ღირსების მარში და მსვლელობები..

აღსანიშნავია ისიც, რომ გეი აღლუმის სოფელში პოლიტიკური შეკრებები და გასართობი პროგრამები ერთად უნდა ჩატარებულიყო, მაგრამ პანდემიიდან გამომდინარე, 25-27 ივნისის ღონისძიებები გაუქმდა.

ოსლოს პრაიდ ფესტივალი წელს 23 ივნისიდან დაიწყება. მრავალფეროვანი ღონისძიებები გაიმართება როგორც ონლაინ სივრცეში, ასევე – ქალაქში. 2020 წლის მოვლენების შემდეგ ( COVID-19-ის გამო, 2020 წლის ოსლოს პრაიდი ციფრულ ფორმატში გაიმართა), წელს აღლუმი ქალაქის ქუჩებში მოეწყობა და მსვლელობას მორთული ავტობუსები და სატვირთო მანქანებიც გააფორმებენ. ოსლოს ლგბტქი ორგანიზაციები 150-ზე მეტი ღონისძიების გამართვას გეგმავენ.

Pride Park და Pride House ღია სივრცეებს დაიკავებენ. ოსლოს გეი პრაიდი, რომელიც Skeive Dager-ის სახელითაა ცნობილი, ნორვეგიის ერთ-ერთი ყველაზე ლამაზი სანახაობაა. ძირითადი ღონისძიებები ოსლოს ფერწერულ ჰავანაში, კარვების სოფელში იმართება, აქ ეწყობა ფერადი ბაზრობა, სადაც სტუმრებს მათთვის სასურველი ნივთის შეძენა შეუძლიათ.

Pride Park-ი ”თაუნ სკვერში” იხსნება და იქ იმართება კულტურული, მუსიკალური და სხვადასხვა სახელოვნებო წარმოდგენა. ყოველწლიურად, ამ სანახაობებს 40000-ზე მეტი ადამიანი ესწრება. ყველაზე მიმზიდველ გეი ბარად კი ოსლოში, 70-იან წლებში გახსნილი ლონდონური პაბი ითვლება, რომელიც ორსართულიან სახლშია მოწყობილი და თავისი პირვანდელი იერსახით დღესაც საუკეთესო ადგილია დასასვენებლად. ადგილობრივი ლგბტქი ორგანიზაციების წარმომადგენლების თქმით, ოსლოს პრაიდის კვირეულის დროს, ”მზე თითქმის არ ჩადის”.

2021 წლის საკრამენტოს პრაიდის კვირეული 21 ივნისს გაიხსნება. ქვეყნის ერთ-ერთ უმსხვილეს ქალაქში ლგბტქი საზეიმო მსვლელობა გაიმართება. ღონისძიებების მთავარი მიზანი ლგბტქი ადამიანების მიმართ მიმღებლობის გაზრდა და ქვიარ თემის მრავალფეროვნების აღიარებაა.

ძირითადი სანახაობები, მათ შორის, “ღირსების მარში” – სამხრეთის მესამე ქუჩიდან დაიწყება და ჩრდილოეთის ქუჩისკენ გადაინაცვლებს, რის შემდეგაც, საზეიმო საღამო კაპიტოლიუმის სავაჭრო ცენტრში, ღია სივრცეში გაიმართება.

აღსანიშნავია, რომ ღონისძიებების დიდი ნაწილი გაუქმდა: “ჯანმრთელობა და უსაფრთხოება ძალიან მნიშვნელოვანია ლგბტქი ორგანიზაციებისთვის, მიუხედავად იმისა, რომ COVID-19-ით ინფიცირებულთა რიცხვი საგრძნობლად მცირეა და გაზრდილია ვაქცინაცია, მრავალათასიანი ღონისძიებების მოწყობისგან თავს მაინც ვიკავებთ, როგორც ამას პანდემიამდე ვაკეთებდით. მიუხედავად დიდი სამზადისისა, ჩვენი მოსახლეობისა და სტუმრების ჯანმრთელობა უპირველესია.” – განაცხადა ლგბტქი ცენტრის გენერალურმა დირექტორმა დევიდ ჰეიტუმანმა.

შეგახსენებთ, რომ საკრამენტოში პრაიდის ფესტივალი ბოლოს 2019 წელს ჩატარდა.

FIFA-ს დისციპლინური კომიტეტის განცხადებით, მექსიკის ეროვნულ გუნდს მსოფლიო თასის შესარჩევი ორი მატჩის ჩატარება – 2 სექტემბერს იამაიკასთან და 7 ოქტომბერს კანადასთან, ცარიელ სტადიონზე, გულშემატკივრების გარეშე მოუწევს. მარტში, მექსიკის ნაკრების გულშემატკივრები ჰომოფობიურ ტექსტებს სკანდირებდნენ ოლიმპიური ტურნირის საკვალიფიკაციო მატჩში დომინიკის რესპუბლიკისა და აშშ-ს ნაკრებების წინააღმდეგ.

გუნდი 73,000 აშშ დოლარითაც დაჯარიმდა.

მექსიკის ფეხბურთის ფედერაციის პრეზიდენტმა, იონ დე ლუიზამ სანქციების შესახებ ისაუბრა და გულშემატკივრებს მიმართა: ”გთხოვთ, ახლავე შევწყვიტოთ! მსგავსი ქცევა დისკრიმინაციულია და გვაშორებს FIFA-ს შეჯიბრებებს. იმ ადამიანებისთვის, რომლებიც ფიქრობენ, რომ ეს სახალისოა, ახალი ამბავი მაქვს – ეს ასე არ არის.”

გულშემატკივარების მატჩებზე არდასწრება ყველაზე მკაცრი სანქციაა, რაც მექსიკის ეროვნული ნაკრების წინააღმდეგ აქამდე გამოუყენებიათ და შესაძლოა, ეს სანქციები კიდევ უფრო გამკაცრდეს.

FIFA-მ დისციპლინური კოდექსი მსგავსი ფაქტების წინააღმდეგ საბრძოლველად, 2019 წლის ივლისში მიიღო. კოდექსის თანახმად, ასეთ დროს, ოფიციალურმა პირებმა მაყურებლები ჯერ უნდა გააფრთხილონ და თუ ისინი კვლავ გააგრძელებენ შეურაცხმყოფელ შეძახილებს, მათ უარი უნდა თქვან მატჩის ჩატარებაზე.

დიდი ხანია, მექსიკელი გულშემატკივრები ჰომოფობიურ ტექსტებს იყენებენ, რაც წლების განმავლობაში ეროვნული ნაკრების დაჯარიმების საფუძველი ხდებოდა.

“თქვენი გუნდის მიმართ სიყვარულის გამოხატვის მილიონი გზა არსებობს, ჩვენ პოზიტიურ გზებზე უნდა გავამახვილოთ ყურადღება და არა – დისკრიმინაციულზე. ეს არ არის საამაყო და არ არის ის, რისი ჩვენებაც გვინდა ჩვენი გულშემატკივრებისთვის, ჩვენი საზოგადოებისა და დანარჩენი მსოფლიოსთვის.”- განაცხადა იონ დე ლუიზამ.