მაისი 2023 - Page 3

წალენჯიხაში, სოფელ ლიის საჯარო სკოლის კედელზე თანასწორობის იდეის გამოსახატად შესრულებული ნახატიდან სკოლის ადმინისტრაციამ ცისარტყელა გადაღება. ინფორმაციას რადიო ათინათი ავრცელებს.

სოფელ ლიაში მერის წარმომადგენელი თამთა ფიფია ათინათთან ამბობს, რომ ნახატის ყველა დეტალი სკოლასთან შეთანხმებული იყო, თუმცა მოგვიანებით “ცისარტყელის ფერები გამაღიზიანებელი აღმოჩნდა”.

“ეს იყო სათემო პროექტი, თემად ავირჩიეთ გენდერული თანასწორობა. კედელზე დავხატეთ წიგნების გორა, რომელზეც თანაბარ სიმაღლეზე დგანან გოგო და ბიჭი. ცისარტყელა თავიდან იყო მიხატული, მაგრამ გადაიშალა. ვერ გეტყვით, რატომ წაშალეს… სკოლის ინიციატივა იყო, სკოლასთან შეთანხმებული იყო ნახატის ყველა დეტალი. როცა პრეტენზია გაჩნდა, მივიღეთ ჩვენც ინფორმაცია. ცისარტყელას ფერები იყო გამაღიზიანებელი მათთვის, შესაძლოა, ცისარტყელას LGBTQ+ თემთან ასოცირება იყო პრობლემა”, – განაცხადა ლიის გამგებელმა.

სკოლის დირექტორი ელგუჯა როგავა ათინათთან ადასტურებს, რომ ცისარტყელა თავად გადაღებეს, რადგან არ მოეწონათ.

“დაახლოებით, ერთი წლის წინ დაიხატა. სოფლის გამგებლის ინიციატივით გაკეთდა. ეს ნამუშევარი იყო და ცისარტყელაც იყო დატანილი, მაგრამ არ მოგვეწონა და მოვშალეთ. რა მნიშვნელობა აქვს უკვე რატომ, მოშლილია. ნახატი დავხატეთ იმიტომ, რომ კედლის გაფერადება გვინდოდა, მაგრამ არ მოგვეწონა რაღაც და წავშალეთ. რატომ მეკითხებით ამას, არ მინდა ამ თემაზე საუბარი. არ მოეწონა ზოგ მშობელს და წავშალეთ”, – თქვა ელგუჯა როგავამ.

სკოლის კედელზე ნახატი 2022 წლის სასწავლოს წლის დაწყებამდე ადგილობრივი ქალების ინიაციტივითა და პროექტის “ქალთა ფონდი საქართველოსთვის” მხარდაჭერით განხოციელდა.

“პროექტის ფარგლებში მცირე სათემო ინიციატივების განხორციელება იყო დაგეგმილი. ეს ნახატი ადგილობრივი ქალების ინიციატივას წარმოადგენდა, რომელთა შვილებიც ამ სკოლაში სწავლობენ. თვითონ მოიძიეს ნახატი, ყველა საქმის კურსში იყო, სკოლის ადმინისტრაციაც და რესურსცენტრიც. ძალიან მნიშვნელოვანი მიზანი ჰქონდა ამ ნამუშევარს, როცა 2022 წლის სასწავლო წელი დაიწყო, ბავშვებს დახვდათ ფერადი კედელი, რამაც დიდი სიხარული გამოიწვია მათში. ცისარტყელა მშობლებისთვის გასხივოსნებულ, მშვიდობიან მომავალთან ასოცირდებოდა. ვიმედოვნებ,რომ გაუგებრობა იყო და უკეთეს ნახატს შექმნიან ადგილზე”, – უთხრა რადიო ათინათს პროექტის კოორდინატორმა ნანა გოგოხიამ.

არტისტი ანდრო დადიანი, რომელმაც გუშინ, 17 მაისს საპატრიარქოსთან პროტესტის ნიშნად ხორცის ფარი დადგა, წერს, რომ პოლიციამ მაღაზიიდან კამერების ჩანაწერები ამოიღო და მისი “ქცევის განზრახულობას” იკვლევენ.

დადიანი კიდევ ერთხელ განმარტავს, რატომ გააკეთა ეს ინსტალაცია საპატრიარქოსთან.

“პოლიცია დამეძებს, საპატრიარქოდან გამოყვნენ კამერების ჩანაწერებს, მოვიდნენ ჩემს სახლამდე, მაღაზიიდან ამოიღეს ჩანაწერები და იკვლევენ ჩემი ქცევის განზრახულობას. აქედან განვუმარტავ და გავუმარტივებ საქმეს მათ: – არაფერი მეგობრებო, ბინძური ძალაუფლების ცენტრები უნდა მოირყეს, უნდა დაკარგონ სოციალური, პოლიტიკური მნიშვნელობა, იმისთვის, რომ ჩვენი ჩაგვრა ვეღარ შეძლონ.

ქართული ეკლესია არის ამ ქვეყნის სახელმწიფოებრიობის, ადამიანის და ცხოვრების მოდერნულობის ყველაზე დიდი მტერი, მაგრამ ამის მიუხედავად მათ გაჟლეტას კი არა, უბრალოდ მათთან ზურგშექცევით დგომაში ვხედავ გამოსავალს. ამათმა მოკლეს ყველაფერი ახალი აღთქმისეული ეკლესიურ ცხოვრებაში და არაფერი გვესაქმება ასე ღვთივგანძარცვულ შენობებში არქიტექტურული ინტერესის გარდა.

ხშირად უნდა ვილაპარაკოთ ჩვენ მათზე, რომ უფრო და უფრო მეტი არგუმენტი გვქონდეს ამ ღმერთის გამანადგურებელი ინსტიტუციისგან განდგომისთვი. ვუყუროთ ვინ ახვევია მათ გარს, რა სურვილებით, როგორი ლექსიკით, რა არგუმენტებით ამაგრებენ თავიანთ “სულიერ ტაძარს” და მოვლენათა ჯაჭვის მარტივი, მიზეზ-შედეგობრივი ანალიზიც დაალაგებს ჩვენს მიმართებებს მათთან.

რამ გამაკეთებინა ეს ინსტალაცია, ამის შესახებ პირად სენტიმენტებს არ მოვყვები, ჩემი თანაგანცდა და წარმოდგენა არ ჭირდება მათი ბინძური, სასტიკი ძალის აღქმას სამწუხაროდ. ვიცი, რომ ყველას თქვენი წილი ჩაგვრა და ძალადობა გაქვთ განცდილი პირდაპირ თუ ირიბად ამათგან.

ამ ინსტალაციის და ჩემი მიზანი სრულიად მარტივი იყო, – კიდევ ერთხელ, ცოტა ხნით გვეფიქრა ამ უსინდისოთა უსინდისობებზე, გაგვემტკიცებინა ჩვენს ცზოვრებაში მათი ამ ფორმით საჭიროების არარსებობა და გაგვეგრძელებია ცხოვრება”, – აღნიშნავს დადიანი.

17 მაისთან დაკავშირებით არტისტმა ანდრო დადიანმა საპატრიარქოსთან პროტესტის ნიშნად ხორცის კალათბურთის ფარი დადგა. დადიანის განცხადებით, ეს დღე ქართული მართლმადიდებლური ეკლესიისგან ქვეყნის სულიერი, ეროვნული, კულტურული, ქრისტიანული, სოციალური, სახელმწიფოებრივი დამარცხების დღეა.

ქალთა ინიციატივების მხარდამჭერი ჯგუფის (WISG) განცადებით, 2013 წლის 17 მაისიდან 10 წლის შემდეგაც ძალადობაზე პასუხისმგებელი არავინაა, 28 ადამიანი კი ამ დრომდე ელოდება დაზარალებულის სტატუსს.

WISG-ის თქმით, 10-წლიანი დაკვირვება აჩვენებს, რომ ქართული ოცნების ხელისუფლების რეალური პრიორიტეტი არასოდეს ყოფილა ხანგრძლივი მემკვიდრეობით მიღებული პოლიტიკური მიზოგინიისა და ჰომო/ბი/ტრანსფობიის წინააღმდეგ ქმედითი პოლიტიკის გატარება.

“2013 წლის 17 მაისის მოვლენებიდან 10 წელი გავიდა. ამ დღის გამოცდილებასთან დაკავშირებული კოლექტიური ტრავმული მეხსიერება, რომელსაც ჰომოფობიასთან ბრძოლის საერთაშორისო დღისადმი მიძღვნილი ღონისძიების მონაწილე აქტივისტები, ისევე როგორც, ზოგადად ქვიარ თემის წევრები 10 წელია ინახავენ, დღემდე საზოგადობრივად გაუზიარებელი და სახელმწიფოს მხრიდან არაღიარებულია.

დღეს, 17 მაისის მოვლენებიდან 10 წლის შემდეგ 28 ადამიანი, რომელთაც WISG-ი უკანასკნელი თვეების განმავლობაში გამოძიების წინაშე წარმოადგენდა, კვლავ ელოდება დაზარალებულის სტატუსს.
სტრასბურგის სასამართლოს გადაწყვეტილების შემდეგ ორი წელი გავიდა და ამ დრომდე სისხლისსამართლებრივი დევნა არცერთი პირის მიმართ არ დაწყებულა.

ბოლო 10 წლის განმავლობაში ხელისუფლების პოლიტიკასა და რიტორიკაზე დაკვირვება უფრო ნათლად გვაჩვენებს ფართო სურათს: ქართული ოცნების ხელისუფლების რეალური პრიორიტეტი არასოდეს ყოფილა ხანგრძლივი მემკვიდრეობით მიღებული პოლიტიკური მიზოგინიისა და ჰომო/ბი/ტრანსფობიის წინააღმდეგ ქმედითი პოლიტიკის გატარება.

ამას აჩვენებს 2022-2023 წლებში „საქართველოს ადამიანის უფლებათა დაცვის ეროვნული სტრატეგიაზე (2022−2030 წლებისთვის)“ მუშაობის პროცესიც, რომელიც სამოქალაქო საზოგადოების ორგანიზაციების, მათ შორის ლგბტქი სათემო ორგანიზაციების მტკიცებულებებზე დაფუძნებული რეკომენდაციების სრული უგულებელყოფით წარიმართა. საბოლოოდ აღმოჩნდა, რომ სტრატეგიის დოკუმენტში ლგბტქი ჯგუფი ნახსენებიც კი არ არის. აღნიშნულს ცხადია მოჰყვა სამოქალაქო საზოგადოების მწვავე კრიტიკა, მაგრამ საქართველოს მთავრობამ და პარლამენტმა ლგბტქი ადამიანების წინაშე მდგარი უფლებრივი საჭიროებები უგულებელყო და სტრატეგიის არაინკლუზიური დოკუმენტი დაამტკიცა”, – ნათქვამია განცხადებაში.

17 მაისთან დაკავშირებით არტისტმა ანდრო დადიანმა საპატრიარქოსთან პროტესტის ნიშნად ხორცის კალათბურთის ფარი დადგა.

დადიანის განცხადებით, ეს დღე ქართული მართლმადიდებლური ეკლესიისგან ქვეყნის სულიერი, ეროვნული, კულტურული, ქრისტიანული, სოციალური, სახელმწიფოებრივი დამარცხების დღეა.

“10 წელი გავიდა 2013 წლის 17 მაისიდან. ტრაგიკულ მოვლენებს სახელებს ვერ ვარქმევთ ხოლმე და ასეთი უსახელო დღეა ჩვენს უახლეს ისტორიაში 17 მაისი, როგორც 9 აპრილი, 7 ნოემბერი, 20 ივნისი, 13 ივნისი და ა.შ. ეს დღე ქართული მართლმადიდებლური ეკლესიისგან ქვეყნის სულიერი, ეროვნული, კულტურული, ქრისტიანული, სოციალური, სახელმწიფოებრივი დამარცხების დღეა. იმ დღით სასოწარკვეთამ დამაკარგინა მეც სახე და მაქცია ნიღბიან, ფსევდონიმიან ადამიანად.

ადამიანებს მენტალურად, ეკონომიკურად, სოციალურად გატყავება და გამოშიგვნაა ამ ინსტიტუციის საქმე, ამიტომ საპატრიარქოს ჭიშკართან, მეგობართან ერთად დავდგი ხორცის კალათბურთის ფარი, როგორც მათი მეტაფორული პორტრეტი.

ჰომოფობია ქართველი ადამიანის კულტურული საჭიროება კი არა, ქვეყნის გეოპოლიტიკური ორიენტაციის გამოკვეთის საშუალებაა. აქ თანასწორობა დასავლური, ხოლო ანტი-ლგბტ მოძრაობები რუსული, იმპერიალისტური პოლიტიკის ნიშანია, ამ დაპირისპირებაში ქართულმა მართლმადიდებლურმა ეკლესიამ ადამიანის მხარდაჭერის ნაცვლად პოლიტიკური პოზიცია დაიკავა და საკუთარი ერის მოწინააღმდეგე სტრუქტურულ მოძალადედ ჩამოყალიბდა.

ჩვენ უნდა გამოვათრიოთ დუმილით ძალმოსილი ეს დღის წესრიგი საჯარო სივრცეში, ხშირი დისკუსიით თავიდან უნდა მივანიჭოთ მნიშვნელობები საზოგადოებრივი საჭიროების მიხედვით მას მაშინ, როცა სასულიერო პირები ზემოთ და ზემოთ ხტებიან, ახალ სიმაღლეებს იპყრობენ ადამიანისა და სიცოცხლის მნიშვნელობის მოსპობაში”, – განმარტავს არტისტი.

ის ნამუშევრის შესრულებაში გაწეული თანამშრომლობისთვის ქალთა ინიციატივების მხარდამჭერ ჯგუფს (WISG) მადლობას უხდის.