მაისი 2022

ხორვატიის უმაღლესი ადმინისტრაციული სასამართლოს ისტორიული გადაწყვეტილების თანახმად, ხორვატიაში ქვიარ წყვილებს უფლება ექნებათ, ბავშვი აიყვანონ.

,,ადამიანის უფლებათა ევროპული სასამართლოს პოზიციის გათვალისწინებთ, მსგავს სიტუაციაში მყოფი პირებისადმი განსხვავებული მოპყრობა, ექსკლუზიურად მათი სექსუალურ ორიენტაციის საფუძველზე, წარმოადგენს დისკრიმინაციის ფორმას”, – ნათქვამია 26 მაისის გადაწყვეტილებაში.

სასამართლო დავა გეი წყვილმა, მლადენ კოჟიჩმა და ივო შეგოტამ მას შემდეგ დაიწყო, რაც უარი ეთქვათ შვილის აყვანაზე. წყვილი 6 წლის განმავლობაში იბრძოდა და საბოლოოდ, სასამართლო მათი გამარჯვებით დასრულდა.

ხორვატიაში ქვიარ წყვილებს 2014 წლიდან შეუძლიათ სამოქალაქო პარტნიორობის გაფორმება, თუმცა ეს პარტნიორობა არ მოიაზრებს შვილის აყვანის შესაძლებლობას, სწორედ ამიტომ უთხრეს უარი წყვილს შვილის აყვანაზე.

სასამართლო გადაწყვეტილების თანახმად, სოციალურმა ცენტრებმა უნდა მიიღონ განცხადებები ქვიარ წყვილებისგან, თუ ისინი შესაფერისი კანდიდატები აღმოჩნდებიან, უნდა შევიდნენ მომლოდინეთა სიაში და მიეცეთ შვილის აყვანის შესაძლებლობა.

ნიუ-იორკის ამჟამინდელმა გუბერნატორმა, კეთი ჰოჩულმა დაადასტურა, რომ ნიუ-იორკის შტატში მცხოვრებ ადამიანებს მალე შეეძლებათ პირადობის დამდასტურებელ დოკუმენტში მამაკაცისა და ქალის გენდერთან ერთად, X გენდერის მარკერის დამატება.

ცვლილება ძალაში 24 ივნისიდან შევა და „სახელმწიფოს გენდერული აღიარების აქტით“ განხორციელდება.

ამასთან ერთად, ნიუ-იორკელებს შესაძლებლობა ექნებათ, შეცვალონ თავიანთი სქესის დამადასტურებელი მარკერი მართვის მოწმობაში და ყველა სხვა პირადობის დამადასტურებელ დოკუმენტში.

New Yorkers: You can now choose “X” as a gender marker on your driver license.

Every person deserves to have an identity document that reflects who they are.

This is a historic change in our fight to make New York a more inclusive and just state for all. pic.twitter.com/hogp3Uj1I2

— Governor Kathy Hochul (@GovKathyHochul) May 27, 2022

გუბერნატორმა ჰოჩულმა თქვა, რომ ეს ისტორიული ცვლილება და კიდევ ერთი გამარჯვებაა ნიუ-იორკის ბრძოლაში ლგბტქ+ ადამიანების თანასწორობისა და პატივისცემის უზრუნველსაყოფად.

,,ყველა ადამიანი, განურჩევლად გენდერული იდენტობისა და გამოხატვისა, იმსახურებს, ჰქონდეს პირადობის დამადასტურებელი დოკუმენტი, რომელიც ზუსტად ასახავს, ვინ არის იგი”, – ამბობს ჰოჩული – ,,ჩემი ადმინისტრაცია ყოველთვის უზრუნველყოფს და უერთგულებს იმ იდეას, რომ ნიუ-იორკი იყოს პატივისცემისა და სიყვარულის ადგილი ლგბტქ+ საზოგადოების წევრებისთვის“.

,,ეს მნიშვნელოვანი წინგადადგმული ნაბიჯია ნიუ-იორკში ტრანსგენდერი, არაბინარული იდენტობისა და გენდერს მიღმა მყოფი ადამიანებისთვის და მათი თანასწორობისთვის”, – თქვა კარლ ჩარლსმა, Lambda Legal-ის უფროსმა ადვოკატმა, რომელიც მრავალი წლის განმავლობაში მუშაობდა, რომ ქვიარ ადამიანებს ნიუ-იორკში ეს შესაძლებლობა ჰქონოდათ.

დღეს, გამთენიისას, ჩუღურეთში 5 ტრანსგენდერ ქალს 30-მდე კაცი თავს დაესხა და ფიზიკური და სიტყვიერი შეურაცხყოფა მიაყენა. თავდამსხმელებმა სიტყვიერი შეურაცხყოფა მიაყენეს მოხუც ქალსაც, რომლისგანაც ტრანსგენდერი ქალები ბინას ქირაობენ.

როგორც ერთ-ერთი ტრანსგენდერი ქალი ფორმულასთან იხსენებს, სახლში დაბრუნებისას, კაცი დახვდა და სქესობრივი კავშირი მოსთხოვა, უარის თქმის შემდეგ კი ძალადობით დაემუქრა.

„ღამის 2 საათი იყო, სახლში დავბრუნდი და ჩემთვის უცნობი კაცი დამხვდა და სექსუალური ურთიერთობა შემომთავაზა, რაზეც, რა თქმა უნდა, უარი ვუთხარი და ბინიდან გავაგდე. ისევ დაბრუნდა და მოკვლით დამემუქრა. მითხრა, ვიცი, რომ მარტო არ ცხოვრობო“, — იხსენებს დაზარალებული ფორმულასთან საუბრისას და ამბობს, რომ მაშინვე 112-ში დარეკა და რამდენიმე გამომძიებელი ადგილზე მივიდა — „თითქოს ყველაფერმა მშვიდობიანად ჩაიარა, შემდეგ ჩემი 2 დაქალი ბრუნდებოდა სახლში და მათზე მალაკნების ხიდთან, ჯერ 3 კაცის მხრიდან მოხდა თავდასხმა. ამ კაცებს სხვებიც მოჰყვნენ, სულ 30-მდე მაინც იქნებოდნენ“.

ტრანსგენდერი ქალის თქმით, გარეთ დღისითაც ვეღარ გავა, რადგან თავდამსხმელები სახეზე ცნობენ მასაც, მის მეგობრებსაც და მათი მისამართიც იციან.

კიდევ ერთი ტრანსგენდერი ქალი ამბობს, რომ თავდამსხმელები ხიდთან იდგნენ და მათ გადაადგილებას აკვირდებოდნენ.

„ეს იყო დაგეგმილი, ჩემს ერთ მეგობარს ბლოკი ესროლეს და მოტრიალება რომ არ მოესწრო, სახეში მოხვდებოდა, იქამდე დაეჯახნენ და დაეცა“, — აღნიშნავს თავდასხმაზე საუბრისას ტრანსგენდერი ქალი.

ბინის მეპატრონემ თავდასხმა გაიხსენა და აღნიშნა, რომ შემთხვევა გარიჟრაჟზე მოხდა, ყვირილის ხმა გაიგეს, თავდამსხმელები სიტყვიერ შეურაცხყოფას აყენებდნენ და ტრანსგენდერი ქალებისთვის ბინის მიქირავების გამო პასუხს სთხოვდნენ.

„მეუბნებოდნენ — „გაწყობს შენ ეს?“ — მე ბებია ვარ, შვილთაშვილებიც მყავს. მეცოდებიან, შემოსავალი, საშუალება არ აქვთ, მე ვასადილებ ხოლმე. არავის არაფერს უშავებენ ან უფუჭებენ. მეზობელმაც დაიწყო ყვირილი [თავდამსხმელების მისამართით], „არა გრცხვენიათ, რა გინდათ მაგ ხალხისგან“. იმუქრებოდნენ, კიდევ მოვალთო“, — ამბობს ფორმულასთან ბინის მეპატრონე.

გამოძიება სიცოცხლის მოსპობით ან ჯანმრთელობის დაზიანებით ჯგუფური მუქარის მუხლით დაიწყო. დაზარალებულები დაკითხვაზე არიან გადაყვანილი, საქმეში ჩართული არიან იურისტებიც.

განახლება: დაზარალებული ქალებს სამართლებრივ დახმარებას თანასწორობის მოძრაობა უწევს. ორგანიზაციის განცხადების თანახმად, ამ ეტაპზე, ქალების სიცოცხლესა და ჯანმრთელობას საფრთხე არ ემუქრება.

ემის ოთხგზის ნომინანტი ტრანსგენდერი მსახიობის 50 წლის იუბილესთან დაკავშირებით, კომპანია Mattel-მა ლოურენს კოქსის ბარბის თოჯინა გამოუშვა.

ეს Barbie-ის ისტორიაში პირველი თოჯინაა, რომელიც ტრანსგენდერი მსახიობის პატივსაცემად შეიქმნა, კომპანია იმედოვნებს, რომ ეს დაეხმარება იმ ბავშვებს, რომლებიც ტრანსგენდერად აღიქვამენ თავს. კომპანიას ასევე სურს, რომ მხარი დაუჭიროს ტრანსგენდერ ადამიანებს და მათ, ვინც ტრანსგენდერთა უფლებებისთვის იბრძვის.

ამასთან ერთად, Barbie დონაციას გააკეთებს და ფულს გადაურიცხავს არასამთავრობო ორგანიზაცია TransFamilySOS, რომლის მისიაცაა, გააუმჯობესოს საზოგადოება და შექმნას თანაბარი პირობები ტრანსგენდერი ადამიანებისთვის.

ლავერნა კოქსის თოჯინას დამზადებით, კომპანიას სურს, ბავშვებს აჩვენონ, რომ ტრანსგენდერი ქალები ქალები არიან, რომ ტრანს ადამიანები იმსახურებენ პატივსცემას და ტრანსგენდერი გოგონების ადგილი ბარბის სამყაროშიც არის.

კომპანია Mattel და Barbie თოჯინას დამზადებისას მუშაობდნენ კოქსთან, კოქსმა ტანსაცმელი თავისი წითელი ხალიჩის ლუქებიდან შეარჩია, კომპანიამ ასევე გაითვალისწინა მსახიობის საყვარელი აქსესუარები და მაქსიმალურად ეცადა, ზუსტად გადმოეტანა თოჯინაზე მსახიობის კანის ფერი.

„წლებია, ვოცნებობ, რომ Barbie-სთან მემუშავა და ჩემი თოჯინა მქონოდა”, – თქვა კოქსმა განცხადებაში – „ერთი სული მაქვს, როდის შეძლებენ ჩემი გულშემატკივრები, თავიანთ კოლექციას ისტორიაში პირველი ტრანსგენდერი თოჯინა შემატონ. იმედი მაქვს, რომ ადამიანები ამ თოჯინას შეხედავენ და მათი ოცნებებიც ისეთივე გაბედული იქნება, როგორიც ჩემი. ოცნების და მანიფესტაციის სივრცე ძალიან მნიშვნელოვანია იმისთვის, რომ ყველა ჩვენი დასახული მიზანი ავიხდინოთ.

ამ სამყაროში ჯერ კიდევ ძალიან ბევრი ტრანსგენდერი გოგონა ცხოვრობს, რომელსაც სურს, თოჯინა ჰქონდეს – ახლა უკვე არსებობს თოჯინა, რომელიც სპეციალურად ჩვენთვის დამზადდა”.

Barbie-ის საკოლექციო, სპეციალურ სერიაში, უკვე დამზადდა ლიუსილ ბოლის და დედოფალი ელიზაბეტის თოჯინების, Orange is the New Black-ის ვარსკვლავი მესამეა, რომელიც სპეციალურ სერიას შეუერთდა.

თოჯინა უკვე ხელმისაწვდომია ონლაინ და ფიზიკურ მაღაზიებში.