2018 წლის 17 მაისს ნიქო საქართველოს მთვრობის კანცელარიის წინ გამართულ აქციაზე გამოვიდა სიტყვით, რომელიც დაასრულა ფრაზით “სიყვარული არის სიყვარული, ყოველთვის და ყველგან”. ამის შემდეგ ბევრი რამ შიცვალა მის ცხოვრებაში, თუმცა დღეს ის ისეთივე მიმტევებელია მათ მიმართ ვინც მას თავს ესხმის, როგორიც 5 წლის წინ იყო. ინტერნალიზებული ჰომოფობების მიმართ ზრუნვას და სიყვარულს ამოიკითხავთ მის მიმართვაში, რომელიც ნიქომ ჰომოფობიისა და ტრანსფობიის წინააღმდეგ ბრძოლის საერთაშორისო დღესთან დაკავშირებით, გამოაქვეყნა:
“ახლოვდება 17 მაისი და იწყება მოძალადე ჯგუფების აგრესიული გამოსვლებიც. ყველამ კარგად ვიცით, რომ მათ რიგებში, არცთუ იშვიათად, სწორედაც რომ ლატენტური გეები არიან.
საბედნიეროდ, ინტერნეტის ეპოქაში, ჩემი მოწოდებები აღარ სჭირდება Gen Z თაობას, მათ ჩემზე უკეთ იციან ყველაფერი, ამიტომ სწორედ ამ აგრესორებს მინდა მივმართო, ბოლო თვეებში, ჩემს გამომწერებშიც რომ დაიდეს ბინა:
არ ღირს თქვენთვის ბოძებული ერთადერთი სიცოცხლე საიმისოდ, რომ ის იყოთ, ვინც არ ხართ, რომ ვერასდროს გაიგოთ: ვინც თქვენი მეგობარია, არის კი ნამდვილად მეგობარი? ვისაც უყვარხართ, უყვარხართ, კი, სინამდვილეში? რა ფასი აქვს ეგეთ ცხოვრებას? — ცხოვრებას გამუდმებულ მალვასა და შიშში, ტყუილსა და თამაშში, საბოლოოდ, ხასიათში რომ გაგიჯდებათ და იტანჯებით — საკუთარი თავის ზიზღით. სჯობს, დაკარგოთ ყველა, ვისაც არ უყვარხართ და სანაცვლოდ იპოვოთ საკუთარი თავი და ისინი, ვისაც რეალურად ეყვარებით.
ეს არ არის მხოლოდ სიტყვები, ჩემი გამოცდილებაა. კი, ძალიან რთულია, მაგრამ არ უნდა დაგავიწყდეთ, რომ თქვენი პიროვნება იმსახურებს პატივისცემასა და აღიარებას, არა მხოლოდ სხვებისგან, თქვენივე თავისგანაც, ამიტომ არ უნდა დაუშვათ, რომ მთელი ცხოვრების განმავლობაში, მალვასა და წნეხში ამყოფოთ იგი. არ უნდა შეურაცხყოთ თქვენი რაობა, თქვენი სული.
ღირსება და ვაჟკაცობა სწორედ ისაა, როცა არ ეპუები უმრავლესობის მცდარ აზრს, ამის მაჩვენებელია კაცობრიობის ისტორია და ამის მაუწყებელია სახარებაც, სადაც ნათლად ჩანს, როგორ ებრძოდა უმრავლესობის აზრს, უმცირესობაში მყოფი სახარებისეული ქრისტე, რომელიც “თავისიანებთან მოვიდა და თავისიანებმა არ მიიღეს”. (იოანე 1:11)
გაბედე მიიღო შენი თავი და არ დაუწყო დევნა შენნაირს! ჯანდაბამდე გზა ჰქონია ყველა ადამიანს, ყველა მოგონებას, ყველა რელიგიას, ყველა ღმერთს, რომლის სახელითაც გაიძულებენ, უარი თქვა ცხოვრების ფუნდამენტურ უფლებაზე — იყო ბედნიერი! რომ გიყვარდეს! — რადგან სიყვარული არის სიყვარული, ყოველთვის და ყველგან!”
