გერმანიაში სექსუალური და გენდერული მრავალფეროვნების მიმღებლობის საკითხებზე სამუშაოდ კომისარი აირჩიეს. ახალი თანამდებობა მწვანეთა პარტიის წევრმა, სვენ ლეჰმანმა ჩაიბარა. ცენტრალური ხელისუფლების კომისარი სექსუალური და გენდერული მრავალფეროვნების მიმღებლობის საკითხებში სახელმწიფო უწყებებთან ერთად იმუშავებს იმ
ადამიანის უფლებათა ევროპულმა სასამართლომ 2013 წლის 17 მაისის საქმეზე საქართველოს პასუხისმგებლობა დააკისრა. სარჩელში 2 LGBT ორგანიზაცია და 35 კერძო პირი მონაწილეობდა. ადამიანის უფლებათა სასამართლოს გადაწყვეტილებით, 2013 წელს ევროპული კონვენციის მე-3, მე-11 და მე-14 მუხლები დაირღვა, რაც დისკრიმინაციის აღმოფხვრას გულისხმობს. გამამტყუნებელი
საფრანგეთში გარდაქმნის თერაპია კანონის ძალით აიკრძალა. იმ ადამიანებს, რომლებიც ქვიარ ადამიანების გარდაქმნის პროცესში არიან ჩართული პატიმრობა და ფულადი ჯარიმის გადახდა დაეკისრებათ. კანონის ძალით უფლებადამცველებსაც
Human Rights Watch-ისა და OutRight Action International-ის ანგარიშის მიხედვით, ლესბოსელი, გეი და ტრანსგენდერი ავღანელები, ასევე ის ადამიანები, რომლებიც დაწესებულ გენდერულ ნორმებთან წინააღმდეგობაში მოდიან, უფრო
კამპანიის მონაწილეები იმედოვნებენ, რომ ახალი კანონპროექტი აჩვენებს ლგბტქი მებრძოლებს, რომ ქვეყენა, რომლისთვისაც ისინი სიცოცხლეს რისკავენ, მათზე ზრუნავს.
ანდრიი კოჟემიაკინს, უკრაინის პარლამენტის წევრსა და ყოფილ ჯაშუშს, უყვარს საკუთარი ქრისტიანული რწმენისა და ოჯახის სიდიდეზე ხაზგასმა. ნაკლებად სავარაუდო იყო, რომ კოჟემიაკინი უკრაინაში ლგბტქი უფლებების ახალი დამცველი გახდებოდა.
სამოქალაქო კავშირმა კანონპროექტი, ერთსქესიანთა ურთიერთობებისთვის ლეგალური სტატუსის მიანიჭების შესახებ, წელს წარადგინა პარლამენტში. ომის მოუხედავად, კანონპროექტი დღესაც ფუნქციონირებს.
კოჟემიაკინის კომიტეტი პირველი იყო, ვინც ეს კანონპროექტი განიხილა. კოჟემიაკინმა განაცხადიც მოამზადა, რომელშიც პარლამენტის წევრი იმ ტრენინგზე ყვება, რომელშიც იღებდა მონაწილეობას საბჭოთა კავშირის არსებობის დროს. ხაზი გაუსვა საკუთარ რელიგიურ შეხედულებებსა და პირად მოსაზრებებს ლგბტქი ადამიანების შესახებ.
ამის შემდეგ, კოჟემიაკინმა გამოაცხადა, რომ მთელი გულით უჭერს მხარს კანონპროექტს. ასევე ახსენა ვლადიმირ პუტინის ჰომოფობიური განცხადება, რომ რუსეთში გეი ადამიანები არ არსებობენ.
“ყველაფერს დავუჭერ მხარს, რაც ჩვენს მტერს სძულს”, – განაცხადა კოჟემიაკინმა. “თუ ის არასდროს იარსებებს რუსეთში, უნდა იარსებოს და იყოს მხარდაჭერილი აქ, რათა დავანახოთ რუსებს, რომ ჩვენ განსხვავებულები ვართ. ეს კანონპროექტი არის გაღიმება ევროპისკენ და შუა თითის აწევა რუსეთისკენ. ამიტომ, მხარს ვუჭერ”.
ინა სოვსუნმა, დეპუტატმა, რომელმაც კანონპროექტი შეიმუშავა და ახლა ცდილობს მის დაცვას პარლამენტში, თქვა, რომ კოჟემიაკინის გამოსვლა იყო “ყველაზე მოულოდნელი რამ ჩემს პოლიტიკურ კარიერაში”. სოვსუნი ამატებს: “არსებობენ ადამიანები, რომლებსაც შეუძლიათ მხარი დაუჭირონ კანონპროექტს სხვადასხვა მიზეზის გამო”.
სოვსუნმა კანონპროექტზე მუშაობა მას შემდეგ დაიწყო, რაც მოსკოვმა თავისი ჯარები საზღვარზე გაგზავნა. ომმა ლგბტქი უბლებებისთვის ბრძოლა კიდევ უფრო გადაუდებელი გახადა, მაშინ როცა უკრაინელი მებრძოლები სამშობლოსთვის თავს სწირავდნენ.
მისი ჯგუფი აგროვებდა ფინანსებს აღჭურვილობისთვის, რათა თავიანთ გეი მეგობარს დახმარებოდნენ, რომელმაც ჯარში მსახურობა გადაწყვიტა. სწორედ ამ დროს მიხვდა სოვსუნი, რომ პარლამენტში საკუთარი პოზიციის გამოყენება სხვანაირადაც შეეძლო, რათა თავის მეგობარს სხვადასხვა გზით დახმარებოდა.
უკრაინამ დიდი პროგრესი განიცადა ლგბტქი უფლებების მხარდასაჭერად, თუმცა ჰომოფობია ჯერ კიდევ მწვავე პრობლემაა, გეი მებრძოლებს ხშირად აბულინგებენ ფრონტის ხაზზეც კი, კონსტიტუცია კი ქორწინებას განმარტავს, როგორც ქალსა და კაცს შორის კავშირს ოჯახის შექმნის მიზნით.
მაქსიმ პოტაპოვიჩი კამპანია “სამხედრო ლგბტქი” – ს წევრია, რომელიც გეი სამხედროების ფოტო და ვიდეომასალებს გვიზიარებს ბრძოლის ველიდან.
“ეს კანონი უნდა მივიღოთ ომის მიმდინარეობისას, რათა ჩვენმა ჯარისკაცებმა ბრძოლის ველზე უფრო თავდაჯერებულად იგრძნონ თავი და როდესაც ისინი სამოქალაქო ცხოვრებას დაუბრუნდებიან, იცოდნენ, რომ სანამ ისინი ჩვენთვის სანგრებში იბრძოდნენ, ჩვენ აქ მათთვის ვიბრძოდით”, – ამბობს პოტაპოვიჩი.
სამოქალაქო გაერთიანებები გარდაცვლილი მებრძოლების პარტნიორებს აძლევს ფინანსურ მხარდაჭერასა და ოფიციალურ აღიარებას, ასევე უფლებას, რომ მიიღონ სამედიცინო გადაწყვეტილებები მათი ახლობლების დაშავების შემთხვევაში.
ბევრი გეი უკრაინელი მებრძოლის ოჯახმა არ იცის თავიანთი ახლობლის სექსუალური რიენტაციის შესახებ. თუ გეი მებრძოლები ლეგალურად დაუქორწინებლები არიან, მათ ოჯახებს აქვთ უფლება, რომ ყველა მნიშვნელოვანი გადაწყვეტილება თავად მიიღონ. ამის გამო, ზოგი შიშობს, რომ პარტნიორებს აუკრძალავენ მებრძოლთა დაკრძალვაზე მისვლას და მეტიც, სიკვდილის შესახებ არ შეატყობინებენ.
2022 წლის ნოემბერში ლედა კოსმაჩევსკას ფეისბუქ პოსტი ვირუსულად გავრცელდა, რომელშიც ნათქვამი იყო, რომ კოსმაჩევსკა თავის საუკეთესო მეგობარზე დაქორწინდა, რათა მისი მებრძოლი მეგობრის არჩევანი პატივცემული და დაფასებული ყოფილიყო: “რთული დრო რთულ ქორწინებებთანაა დაკავშირებული”, – ამბობს კოსმაჩევსკა.
პრაქტიკული რეალობის მიღმა, ომმა მოიტანა ეგზისტენციალური აქტუალობა თანაბარი უფლებებისთვის და ჰომოფობიის წინააღმდეგ ბრძოლაში ბევრი ლგბტ უკრაინელისთვის, თქვა პოტაპოვიჩმა, ლგბტ სამხედრო აქტივისტთა ჯგუფიდან.
”ისინი ნამდვილად გრძნობენ, რომ ომის დროს მათი ცხოვრება შეიძლება სწრაფად დასრულდეს, ამიტომ სურთ იცხოვრონ თავისუფალი ცხოვრებით, რამდენადაც შეუძლიათ,” – თქვა მან.
ბოლო ათწლეულის განმავლობაში უკრაინელმა აქტივისტებმა შესამჩნევად გააძლიერეს დემოკრატია, ქვეყანამ კი ევროპული ღირებულებები მიიღო, ამის გამო, ლგბტქი თემის უფლებებისადმი დამოკიდებულება სწრაფად შეიცვალა.
ბოლო გამოკითხვამ აჩვენა, რომ უკრაინელების 58% დადებითად ან ნეიტრალურად არის განწყობილი ლგბტქი მოქალაქეების მიმართ. მიუხედავად იმისა, რომ ეს მაჩვენებელი მნიშვნელოვნად დაბალია დიდ ბრიტანეთსა და დასავლეთ ევროპის სხვა ქვეყნებთან შედარებით, ის მნიშვნელოვანი და სწრაფი გაუმჯობესების მომასწავლებელია.
„2016 წელს იგივე მაჩვენებელი მხოლოდ 30% იყო, ასე რომ, ჩვენ გავაორმაგეთ მიმღებლობა ხუთ ან ექვს წელიწადში, რასაც სხვა პრაიდ მოძრაობებმა მიაღწიეს 10 ან 20 წელიწადში“, – თქვა პოტაპოვიჩმა. უკრაინელების აბსოლუტური უმრავლესობა – 80%-ზე მეტი – მხარს უჭერდა ჯარში მომსახურე გეი ჯარისკაცებს.
სოვსუნის მსგავსად, პოტაპოვიჩი ამ პროგრესს უყურებს, როგორც სახელმწიფოს სურვილს, მეტად მიიღოს ევროპული ღირებულებები. „ეს გავლენას ახდენს ჩვენს პოზიციაზე ევროპელი პარტნიორების წინაშე. ჩვენ ნამდვილად გვინდა ვაჩვენოთ, რომ უკრაინა დემოკრატიული ქვეყანაა“.
ჯერ კიდევ დიდი გზაა გასავლელი. ინსტიტუციური ჰომოფობია უკრაინის ნაწილებში, განსაკუთრებით სოციალურად უფრო კონსერვატიულ დასავლეთში, რელიგიური ჰომოფობიით არის გამყარებული. ომამდე პრაიდ მარშები ჩატარდა ხარკოვში, კიევსა და ოდესაში, მაგრამ არასოდეს ლვოვში.
თავდაცვის სამინისტრომ კანონპროექტს მხარი არ დაუჭირა და ამის ნაცვლად, საჯაროდ ეჭვქვეშ დააყენა მისი დებულებები. თავდაცვის სამინისტრომ თავისი პოზიციის დასაფიქსირებლად გამოგზავნა პასუხი.
წერილში საერთოდ არ იყო ლაპარაკი სექსუალური ორიენტაცია, თუმცა ნახსენები იყო რასა, კანის ფერი, პოლიტიკური და რელიგიური შეხედულებები, გენდერი, ეთნიკური და სოციალური წარმომავლობა, ფინანსური სტატუსი და ენა.
მაგრამ ლგბტ კამპანიის მონაწილეები და მათი ელაები დარწმუნებულნი არიან, რომ შეუძლიათ დაარწმუნონ სამინისტრო, მხარი დაუჭიროს ჯარისკაცებს.
”ჩვენ ვაიძულებთ მათ გადახედონ კანონპროექტს”, – ამბობს ოლგა კოლომიეცი, სნაიპერი. „თუ იბრძვი, იბრძოლე ბოლომდე, ეს ჩემი დევიზია ცხოვრებაში”.
თითქმის ათი წლის წინ, ორმა უკრაინელმა მამაკაცმა, რომლებიც ერთად ცხოვრობდნენ 10 წლის განმავლობაში, უჩივლა მთავრობას იმის გამო, რომ უარი თქვა მათ უფლებაზე, რომლითაც სარგებლობენ ჰეტეროსექსუალური წყვილები. ”ჩვენ ვიზიარებთ ყველა ჩვენს სიხარულს და უბედურებას, როგორც ნებისმიერი ოჯახი, მაგრამ სახელმწიფოს თვალში ჩვენ ორი ცალკეული კაცი ვართ”, – თქვა ანდრია მაიმულახინმა.
უკრაინის საქმეზე გადაწყვეტილება რამდენიმე თვეშია მოსალოდნელი. სოვსუნი ამბობს: ”უბრალოდ ვისურვებდი, რომ ეს უფრო ადრე მოხდეს, ვიდრე გვიან”.
საკუთარი სექსუალობის ეჭვქვეშ დაყენება და სექსუალური თვითგამორკვევა, ხშირ შემთხვევაში, თინეიჯერობის წლებში ხდება, როდესაც ადამიანის იდენტობა ფორმირდება, თუმცა სექსუალურ ორიენტაციაზე დაფიქრება ადამიანმა შეიძლება ნებისმიერ ასაკში დაიწყოს. ზრდასრულები, როგორც წესი, უკეთ არიან საიმისოდ „აღჭურვილები“, რომ უფრო სრულყოფილად გამოიკვლიონ და გაიაზრონ საკუთარი სექსუალური იდენტობები.
საკუთარ სექსუალობაში დაეჭვება შეიძლება ახალი აღმოჩენებით სავსე თავგადასავალი იყოს, თუმცა მას ასევე შეიძლება თან ახლდეს დიდი სტრესი და შიში. საკუთარ თავზე უფრო მეტის გაგება დაგეხმარებათ, მეტი ბედნიერება დაინახოთ ჯანსაღ სექსუალურ ურთიერთობებში და მეტად მიიღოთ საკუთარი სექსუალობა.
საკუთარი თავისთვის კითხვების დასმა, მხარდამჭერ ადამიანებთან საუბარი და ონლაინ-რესურსების კითხვა თუ ყურება მხოლოდ რამდენიმე ნაბიჯია, რომელიც სექსუალობის გამოკვლევაში დაგეხმარებათ. ამ სტატიაში განხილულია რამდენიმე ლგბტქი იდენტობა, ასევე სტრატეგიები, რომლებიც სექსუალურ თვითგამორკვევაში შეგიწყობთ ხელს.
განურჩევლად იმისა, თუ რა ასაკის ხართ, რა ურთიერთობა ან როგორი სექსუალური გამოცდილება გაქვთ, საკუთარი სექსუალური ორიენტაციის უფრო საფუძვლიანად გააზრებაზე ფიქრი ან მისი ეჭვქვეშ დაყენება აბსოლუტურად ნორმალურია. ერთ-ერთმა კვლევამ, რომელიც მოზარდობის ასაკიდან ზრდასრულობის ადრეულ ეტაპამდე ადამიანების სექსუალურ ორიენტაციებს შეისწავლიდა, აჩვენა, რომ სექსუალური ორიენტაციის განვითარება გრძელდება ზრდასრულობის მთელი ადრეული ეტაპის (18-29) განმავლობაში.
იმის უკეთ გასააზრებლად, თუ რას შეიძლება გრძნობდეთ სექსუალური თვითგამორკვევის პროცესში, ქვემოთ ჩამოთვლილია ყველაზე ცნობილი სექსუალური იდენტობები.
გენდერულ იდენტობასა და სექსუალურ ორიენტაციას ხშირად ერთად აჯგუფებენ, თუმცა ისინი ერთმანეთისგან განსხვავებული ცნებებია. თქვენი სექსუალობა დამოკიდებულია იმაზე, თუ ვინ გიზიდავთ, ხოლო გენდერული იდენტობა არის ის, თუ როგორ აღიქვამთ საკუთარ თავს, სხვებისგან დამოუკიდებლად.
იხილეთ აგრეთვე ქვიარ ლექსიკონი — ლგბტქი ტერმინების განმარტებები
თუკი საკუთარ სექსუალობაში დაეჭვდით, არსებობს რამდენიმე მარტივი ემოციური სავარჯიშო, რომელიც დაგეხმარებათ, უფრო სიღრმისეულად გაიაზროთ საკუთარი თავი და თქვენი მიზიდულობა. დაუსვით საკუთარ თავს ეს შეკითხვები:
როდესაც საკუთარი სექსუალობის მიღების პროცესს გადიხართ, ერთგვარი იდენტობის კრიზისის ქონა აბსოლუტურად ნორმალურია. ბევრი ადამიანი ამ დროს საკუთარ თავს ეკითხება:
ყველა ეს ფიქრი ნორმალურია და ზოგი ლგბტქი ადამიანი, რომელიც უკვე „დაქამინგაუთებულია“ (ღიად აქვს გაცხადებული საკუთარი სექსუალური ორიენტაცია), ჯერ კიდევ გრძნობს ასე თავს. გაიაზრეთ და მიიღეთ ეს გრძნობები და ეცადეთ, არ განსაჯოთ საკუთარი თავი.
გადაამოწმეთ საკუთარ თავთან — რას გკარნახობთ გული? თუკი თავად იცით, რა არის თქვენი სექსუალობა, მხოლოდ ესაა მნიშვნელოვანი. ვერავინ გეტყვით, რომ მართალი ხართ ან ცდებით, რადგან არავინ იცის, რას გრძნობთ თქვენ.
თუკი ეს დაგეხმარებათ, ჩაიწერეთ თქვენი შეგრძნებები. ზოგჯერ მნიშვნელოვანია საკუთარ თავთან რეფლექსია და გრძნობებთან მარტო დარჩენა. ჰკითხეთ საკუთარ თავს:
გახსოვდეთ, რომ სექსუალობის ცვლილება ნორმალურია. ეს არ ნიშნავს, რომ ის, რასაც ცხოვრებაში მანამდე გრძნობდით, არასწორი იყო. თქვენ, უბრალოდ, იცვლებით და არავის მისცეთ უფლება, გითხრათ, რომ ეს არ შეგიძლიათ.
განურჩევლად იმისა, თუ რას განიცდით საკუთარ სექსუალობასთან დაკავშირებით, საჭირო არ არის, ეს მარტომ გაიაროთ.
საკუთარი სექსუალობის ეჭვქვეშ დაყენება აბსოლუტურად ნორმალური და ჯანსაღი რამაა და სხვა, სანდო ადამიანებთან მასზე საუბარი ამ პროცესის უფრო ეფექტურად გავლაში დაგეხმარებათ.
ძალიან მნიშვნელოვანია, ხედავდეთ და იცნობდეთ იმას, რასაც გრძნობთ. უკეთ გაეცანით ქვიარ თემებსა და ადამიანებს. ისწავლეთ უფრო მეტი სექსუალური ორიენტაციებისა და ქვიარობის შესახებ, გაიგეთ ქვიარ-ისტორია, იკითხეთ წიგნები ამ თემაზე, გაეცანით ქვიარ სიახლეებსა და სხვა ქვიარების ისტორიებს Queer.ge-ზე, უყურეთ ქვიარ ფილმებს, ქვიარ კონტენტ-კრეატორებს (მაგალითად, TikTok-ზე ან YouTube-ზე), წადით ქვიარ ღონისძიებებსა და ქვიარ სივრცეებში. ამ ყველაფერზე მეტის გაგებამ და დანახვამ შეიძლება უკეთ გაგარკვიოთ საკუთარ იდენტობაში და მეტი თავდაჯერებულობა მოგცეთ მის გამოსახატად.
თუკი კომფორტულად გრძნობთ თავს საიმისოდ, რომ ეს საკითხი თქვენთვის ძვირფას ადამიანთან განიხილოთ, დაიწყეთ ამ თემაზე საუბარი მასთან. შეარჩიეთ მეგობარი ან ოჯახის წევრი, რომელსაც იცით, რომ შეგიძლიათ, ენდოთ, რომელსაც არ აქვს ჰომოფობიური განწყობები და რომელიც, პირველ ყოვლისა, თქვენი ინტერესების დაცვას შეეცდება. გაუზიარეთ თქვენი გრძნობები მათ და უთხარით, რომ არ ხართ დარწმუნებული საკუთარ ორიენტაციაში.
არ გეგონოთ, რომ ვალდებული ხართ, ამ თემაზე ფიქრისას თუ საუბრისას რამე იარლიყი მიაკეროთ საკუთარ თავს — ამის გასააზრებლად იმდენი დრო გაქვთ, რამდენიც გსურთ და გჭირდებათ, თუკი საერთოდ ოდესმე მოგინდებათ ასეთი იარლიყი. ზოგჯერ ამდენი ტერმინის არსებობა შემაშინებელიც კია — უბრალოდ, გახსოვდეთ, რომ „არჩევანის გაკეთება“ არაა საჭირო, არც მყისიერად და არც ოდესმე. თქვენი სექსუალობა მაინც რეალურია, განურჩევლად ტერმინისა, რომელსაც იყენებთ საკუთარი თავის აღსაწერად.
შესაძლოა, ძალიან კარგი და შვებისმომგვრელი გამოცდილება აღმოჩნდეს სხვა ისეთ ადამიანთან საუბარი, რომელმაც თვითგამორკვევის გზა უკვე გაიარა. სავარაუდოდ, ამ გზაზე მათაც ჰქონიათ მსგავსი ფიქრები და შეგრძნებები და შეუძლიათ, გითხრან, რა დაეხმარათ ამის გადალახვაში, უკეთ გააზრებასა და მიღებაში.
სხვა ქვიარ ადამიანებთან საუბარი ასევე შეგიქმნით ისეთ უსაფრთხო გარემოს, რომელშიც შეგეძლებათ, იყოთ გულწრფელი საკუთარი სექსუალობის შესახებ.
დაფიქრდით რამე ონლაინ-ჯგუფში გაწევრიანებაზე (ისეთზე, სადაც შეგეძლებათ ანონიმურად კომუნიკაცია) ან ესაუბრეთ მეგობრებს, რომლებიც უკვე არიან ქვიარ თემის წევრები. საკუთარ სექსუალურ იდენტობაზე საუბარი ისეთ ადამიანებთან, რომლებმაც უკვე აღმოაჩინეს საკუთარი სექსუალობა, შეიძლება გასაოცარი გამოცდილება აღმოჩნდეს. უსაფრთხო გარემოში ამის პირველად თქმა ან პირველად დაწერა განმათავისუფლებელი შეგრძნებაა.
ამ და სხვა ქვიარ თემებზე ონლაინ და ანონიმურად სასაუბროდ ასევე შეგიძლიათ გამოიყენოთ ჩვენი ქვიარ მეგობრული ჯგუფი A Very Queer Hub • ძალიან ქვიარ ჰაბი
თუკი ძვირფას ადამიანებთან საუბარი საკმარისი არ არის, დაფიქრდით პროფესიონალ ფსიქოლოგთან საუბარზე. შეგიძლიათ, საამისოდ თავად მოძებნოთ ლგბტქი მეგობრული ფსიქოლოგი ან მიმართოთ საქართველოში მოქმედ ქვიარ ორგანიზაციებს, მაგალითად, თანასწორობის მოძრაობას ან თემიდას:
ასევე იხილეთ ქვიარ მეგობრული ორგანიზაციები საქართველოში — სია
ბოლოს გეტყვით, რომ ონლაინ გაცნობის აპლიკაციები დაგეხმარებათ, იპოვოთ სხვა ქვიარ თუ სექსუალური თვითგამორკვევის პროცესში მყოფი ადამიანები. ამისთვის შეგიძლიათ გამოიყენოთ აპლიკაციები: Tinder, Bumble, Grindr (ქვიარ კაცების გაცნობის აპლიკაცია), Her (ქვიარ ქალების გაცნობის აპლიკაცია) და სხვები. თუმცა, დარწმუნდით, რომ გულწრფელი ხართ პოტენციურ პარტნიორებთან და ღიად ესაუბრეთ მათ თქვენს გამოცდილებაზე, ფიქრებსა თუ სურვილებზე. ასევე, გაითვალისწინეთ ინტერნეტის გამოყენებისას საჭირო უსაფრთხოების წესები, მათ შორის, პერსონალურ მონაცემებთან დაკავშირებით.
მეტი ინფორმაციისთვის იხილეთ ჩვენი სტატია: გაცნობის 10 აპლიკაცია ქვიარებისთვის და არამხოლოდ
თუმცა, ექსპერიმენტირება ყოველთვის არ არის შესაძლებელი. მაგალითად, თუკი უკვე ხართ ურთიერთობაში საპირისპირო გენდერის ადამიანთან და ამ დროს იაზრებთ, რომ შეიძლება ბისექსუალი იყოთ. ასეთ შემთხვევაში, ესაუბრეთ პარტნიორს. შესაძლოა, ის თანახმა იყოს ურთიერთობის ისეთ ფორმაზე, რომლის დროსაც შეგეძლებათ თქვენი გენდერის სხვა ადამიანთან ექსპერიმენტირება და გამოცდილების მიღება. ან, თუკი ასეთი რამ არ არის თქვენთვის კომფორტული, საკუთარ სექსუალობაზე პარტნიორთან საუბარი და გულწრფელობა ძალიან კარგი პირველი ნაბიჯია.
გარდა ამისა, თუკი ქვიარ ურთიერთობის გამოცდილება არასდროს გქონიათ, გახსოვდეთ, რომ თქვენი გრძნობები მაინც რეალური და ვალიდურია! სექსუალური ორიენტაცია მიზიდულობაა და არა — გამოცდილება. ბევრ ქვიარ ადამიანს, რომელიც ახლა იწყებს საკუთარი სექსუალობის გამოკვლევას ან ვინც უკვე მრავალი წელია იცის საკუთარი სექსუალობა, არ ჰქონია სექსი ქვიართან. შესაძლოა, ასე იმიტომ იყოს, რომ სხვა ურთიერთობაში ვართ, მსგავსი შესაძლებლობა არ მოგვეცა ან, უბრალოდ, ამ ნაბიჯის გადადგმა გვიჭირს — ეს აბსოლუტურად ნორმალურია და თქვენ მარტო არ ხართ. საკუთარი სექსუალობის ეჭვქვეშ დაყენების შემდეგ, საჭიროა ძალიან ბევრი ფიქრი და მუშაობა საკუთარ თავზე, საკუთარ შიშებზე, მათ მიღებასა და დაძლევაზე.
სექსუალურ ორიენტაციაზე საუბრისას ზოგჯერ საქმეში ერთვება განსხვავება რომანტიკულ და სექსუალურ მიზიდულობას შორის.
მათ შორის განსხვავებების ცოდნა კარგია, რადგან, მიუხედავად იმისა, რომ ხშირად ისინი ერთდროულად ხდება და ერთმანეთს ემთხვევა — ანუ, როგორც წესი, ადამიანებს რომანტიკული ურთიერთობები იმავე გენდერის ან გენდერების ადამიანების მიმართ აქვთ, ვინც სექსუალურად იზიდავთ — არსებობენ ადამიანები, რომელთათვისაც ეს ორი ერთმანეთისგან განსხვავდება.
მაგალითად, ადამიანს შეიძლება სექსუალურად იზიდავდეს ერთი გენდერი, მაგრამ არ უნდოდეს მასთან რომანტიკული ურთიერთობა ან არ მოსწონდეს, ან შეიძლება ადამიანს მოსწონდეს ურთიერთობის დინამიკა კონკრეტულ გენდერთან, მაგრამ ეს გენდერი არ იზიდავდეს სექსუალურად.
იხილეთ აგრეთვე 7 რამ, რაც არომანტიკული ადამიანების შესახებ უნდა ვიცოდეთ
თუკი თქვენს მიზიდულობებში ცვლილებას ამჩნევთ, ამაში არაფერი უჩვეულო ან არასწორი არ არის. პირველ ყოვლისა, ასაკის მატებასთან ერთად, ჩვენ უკეთ ვეცნობით საკუთარ თავს და შეიძლება გავიაზროთ საკუთარი თავის ის შრეები, რომლებსაც მანამდე არ ვიცნობდით.
გარდა ამისა, ასაკის მატებასთან ერთად, იცვლება ჩვენი პრიორიტეტები. ის, რაც ერთ დროს თქვენთვის მიმზიდველი იყო სხვებში, ახლა შეიძლება პირიქით, სურვილის გამქრობი იყოს. ზოგი ადამიანი სექსუალურად ფლუიდურია და მათი სექსუალობა მუდმივად იცვლება.
საკუთარი სექსუალობა შეიძლება ნებისმიერ ასაკში დააყენოთ ეჭვქვეშ. ბევრი სხვადასხვა სექსუალური იდენტობა არსებობს და შეიძლება დრო დასჭირდეს ისეთის პოვნას, რომელიც ყველაზე მეტად შეგეფერებათ. გარდა ამისა, თქვენი სექსუალური იდენტობა შეიძლება შეიცვალოს ცხოვრების განმავლობაში.
არსებობს ბევრი რესურსი, რომელიც თქვენი ორიენტაციის უკეთ გაგებაში დაგეხმარებათ, დაწყებული ინტერნეტ-რესურსებით, რომლებიც უკეთ გაგარკვევთ სხვადასხვა ცნებასა და იდენტობაში, დამთავრებული ქვიარ მეგობრული ორგანიზაციებით, რომლებიც პირდაპირი კონსულტაციების გზით დაგეხმარებიან თვითგამორკვევაში.
თუკი საკუთარ სექსუალობას ეჭვქვეშ აყენებთ, აუცილებელი არ არის, ეს პროცესი სტრესული იყოს — თქვენს ხელთაა მთელი ის დრო, რომელიც ამ პროცესის გასავლელად გჭირდებათ; უამრავი უფასო საინფორმაციო რესურსი, რომელიც თვითგამორკვევაში შეგიწყობთ ხელს; ასევე, ქვიარ და ქვიარ მეგობრული ადამიანები, რომლებიც მთელი ამ გზის განმავლობაში თქვენ გვერდით იქნებიან და მხარს დაგიჭერენ.
წყაროები: Verywell Mind, UWM.edu, Divethru
აკრონიმი ლგბტქი ლესბოსელ, გეი, ბისექსუალ, ტრანსგენდერ, ქვიარ და ინტერსექს ადამიანებს აღნიშნავს. აღნიშნული აბრევიატურის დამკვიდრებამდე, ლგბტქი თემის აღმნიშვნელ ტერმინად გამოიყენებდნენ სიტყვას გეი, მოგვიანებით კი ლგბ-ს. ლგბტქი კი გამოყენებაში 1990-იანებიდან ჩნდება.
ტერმინების დამკვიდრების მცირე ისტორიის შემდეგ, აბრევიატურის შემადგენელი თითოეული სიტყვა განვიხილოთ.
ლესბოსელი — ქალი, რომელსაც რომანტიკულად და სექსუალურად იზიდავს ქალები.
გეი — კაცი, რომელსაც რომანტიკულად და სექსუალურად იზიდავს კაცები.
ბისექსუალი — ადამიანი, რომელსაც რომანტიკული და სექსუალური ლტოლვა აქვს როგორც ქალების, ისე კაცების მიმართ.
ტრანსგენდერი — ქოლგა, კრებითი ტერმინი. ნიშნავს ადამიანს, რომლის გენდერული იდენტობა, გამოხატვა და ქცევა არ ემთხვევა მისი ბიოლოგიური სქესის მახასიათებლებისა და სქესთან მიბმული გენდერული როლის მოლოდინებს.
ქვიარი — აერთიანებს ყველა ადამიანს, რომელიც არაჰეტერონორმატიულია. ტერმინი მოიცავს ადამიანებს, რომლებიც, როგორც სექსუალური პრეფერენციის, ასევე — გენდერული იდენტობის მიხედვით, არაკონფორმულები არიან არსებული ჰეტერონორმატიული გარემოს მიმართ.
ინტერსექსი — ადამიანი, რომელიც სექსუალურ-რეპროდუქციული ანატომიის ვარიაციებით დაიბადა, რაც შეიძლება გამოიხატოს ქრომოსომულ, ჰორმონალურ და ფიზიოლოგიურ დონეზე.
საუკუნეების განმავლობაში ლესბოსელი ასოცირებული იყო ბერძნულ კუნძულ ლესბოსის სახელწოდებასთან. ამავე კუნძულზე დაიბადა პოეტი საფო, რომელიც ლექსებს ერთი და იმავე სქესის ადამიანების სიყვარულს უძღვნიდა.
სიტყვა ლესბოსელი პირველად მე-16 საუკუნეში გამოიყენეს, თუმცა მისი მნიშვნელობა მხოლოდ კუნძულ ლესბოსს უკავშირდებოდა. ლესბოსელის მნიშვნელობაში მისი თანამედროვე გამოყენება მე-19 საუკუნიდან დამკვიდრდა, როცა საფოს პოეზია ქალების სიყვარულთან გახდა ასოცირებული.
იმის გამო, რომ მეოცე საუკუნეში ერთი და იმავე სქესის მქონე ადამიანების სიყვარული აკრძალული იყო, ტერმინს გეი შეურაცხმყოფელი მნიშვნელობა ჰქონდა. ამ სიტყვის ლგბტქი ადამიანების მიერ გამოყენებას 1960-იანებში ვაწყდებით, როცა აქტივისტებმა დეკადების განმავლობაში შეურაცხმყოფელ სიტყვად აღქმული ტერმინის დაბრუნება განიზრახეს. ამ ქმედებით ისინი ერთი და იმავე სქესი მქონე ადამიანების ურთიერთობის წინააღმდეგ არსებულ დისკრიმინაციულ კანონმდებლობას აპროტესტებდნენ.
მოგვიანებით, 1980 წელს, ესეისტმა ედმუნდ ვაითმა განაცხადა, რომ ტერმინმა გეი დაიკავა და გადაფარა სხვა შესატყვისი სიტყვები, რომლებიც იმ კაცების აღსაწერად გამოიყენებოდა, რომლებსაც ემოციურად და ფიზიკურად კაცები იზიდავდნენ.
1859 წელს, ანატომისტმა რობერტ ბენტლიმ სიტყვა ბისექსუალი პირველად გამოიყენა. სიტყვის ახლანდელი გაგება თავდაპირველ გამოყენებას მნიშვნელოვნად სცდებოდა და აღწერდა ერთსა და იმავე სხეულში მდედრისა და მამრის მახასიათებლებს.
ტერმინის ახლანდელი მნიშვნელობის დამკვიდრებაში მეცხრამეტე საუკუნის მეცნიერებსა და ფსიქოლოგებს მიუძღვით წვლილი. მათ შორის იყვნენ ევოლუციის მკვლევრები, ჰენრი ჰეველოკ ელისი და რიჩარდ ფონ კრაფტ-ებინგი, რომელთა განცხადებით, თითოეულ სქესში ლატენტური ბისექსუალობა არსებობს.
1990-იანებიდან ტერმინებმა ლესბოსელი, გეი და ბისექსუალი (ლგბ) ფეხი მოიკიდა, როგორც ყოველდღიურ საზოგადოებრივ ცხოვრებაში, ასევე, განმათავისუფლებელ აქტივიზმში. მიუხედავად ამისა, ტერმინ ტრანსგენდერის აკრონიმში გაერთიანებას მეტი დრო დასჭირდა. სიტყვის გამოყენების პრეცედენტებს 1960-იანი წლებიდან ვაწყდებით. მაგალითად, 1965 წელს გამოცემულ ფსიქოლოგიის სახელმძღვანელოში, რომელიც პოპულარული გახდა აქტივისტის, ვირჯინია პრინცის გამო. ვირჯინია სქესსა და გენდერს ერთმანეთისგან განასხვავებდა და აცხადებდა, რომ ისინი განცალკევებული ცნებებია.
2000-იანი წლებიდან საზოგადოებამ ტერმინის ფართო გამოყენება დაიწყო. სიტყვამ ტრანსგენდერმა ლგბტქი აკრონიმში დაიმკვიდრა თავი და ნელ-ნელა ჩაანაცვლა სხვა, შეურაცხმყოფელი სიტყვები, რომლებიც ტრანსგენდერი ადამიანებისთვის დამამცირებელი იყო.
აკრონიმში ქ-ც შედარებით მოგვიანებით გაჩნდა. 1910-იან წლებში ქვიარი გამოიყენებოდა იმ ადამიანთა შეურაცხყოფისთვის, რომლებიც განცალკევებულები იყვნენ ჰეტერონორმატიული საზოგადოებისგან. 1990-იან წლებში აქტივისტებმა სიტყვა ქვიარის დაბრუნება განიზრახეს, როგორც ეს სიტყვა გეის შემთხვევაში წარმატებით მოხდა. ამის განსახორციელებლად მათ აქტიურად დაიწყეს ქვიარის გამოყენება.
ტერმინის ინტერსექსი გამოყენება ექიმებმა მეოცე საუკუნის დასაწყისში იმ ადამიანების აღსაწერად დაიწყეს, ვისი ანატომიაც განსხვავებული იყო სქესის ტრადიციული ბინარული გაგებისგან.
1970-იანებში აქტივისტებმა და ინტერსექსი თემის წევრებმა საჯაროდ დაიწყეს ტერმინის დამკვიდრების საჭიროებაზე საუბარი. ინტერსექსი ადამიანების პირველი საჯარო დემონსტრაცია 1996 წლის 2 ოქტომბერს გაიმართა. აქტივისტებმა გამოიყენეს ისეთი ტერმინები, როგორიცაა ჰერმაფროდიტი, ინტერსექსი. აქტივისტების მოთხოვნით, ექიმებს პაციენტებთან შეუთანხმებელი ქირურგიული ოპერაციები უნდა შეეწყვიტათ. სწორედ ამ დღის პროტესტის შედეგად ჩაეყარა საფუძველი ინტერსექსი ადამიანის უფლებებისთვის ბრძოლის დღეს.
წყაროები:
სანამ უკრაინა რუსეთის ომისგან თავის დაცვას ცდილობს, ქვეყნის ლგბტქი ლიდერები ახალი გამოწვევების წინაშე არიან. „ომი ყველას ათანაბრებს“ – აღნიშნავს Kyiv Pride-ის დირექტორი, ლენი ენსომი PinkNews-თან საუბრისას – „ბომბი ჩამოვარდნისას ადამიანის იდენტობას არ არჩევს, ის უბრალოდ ვარდება. ეს რუსულ რულეტს ჰგავს. ისინი უბრალოდ თავს გვესხმიან და არ ვიცით, ბომბი სად დაეცემა“.
ლგბტქი ორგანიზაციის დირექტორმა ცხოვრების დიდი ნაწილი უკრაინელი ქვიარ ადამიანებისთვის უკეთესობის მოტანას შესწირა, მაგრამ ბოლო კვირებში მისი ძალისხმევა სხვა მიმართულებით იხარჯება: ცდილობს, რომ თემის წევრები საკვებით და უსაფრთხო თავშესაფრებით უზრუნველყოს.
ამჟამად, უკრაინაში მცხოვრები ქვიარ ადამიანების უმეტესობა გადარჩენაზე და საკუთარი თავისუფლების დაცვაზეა გადართული, მაგრამ დისკრიმინაცია კვლავ არსებობს – მედიაში გავრცელდა ინფორმაცია რასისტული დამოკიდებულების, ტრანსგენდერი ლტოლვილების წინაშე არსებული სირთულეების შესახებ.
ლენის თქმით, ომის მიუხედავადაც კი არიან ულტრამემარჯვენე ჯგუფები, რომელთაც ლგბტქი ადამიანებზე თავდასხმისთვის სცალიათ.
„ომის დროს კვლავ თავს ესხმიან ლგბტქი ადამიანებს, რაც საშინელებაა. მხოლოდ პუტინს კი არა – შიდა ჰომოფობიურ ძალებსაც ვებრძვით“, – აღნიშნავს ლენი.
Kyiv Pride-მა ბოლო კვირებში შექმნა დაცული ჩატი ქვიარ უკრაინელებისთვის, ასევე მოამზადა მონაცემთა ბაზა, რომელშიც საზღვრებს მიღმა დაცული ადგილებია მოცემული, ავრცელებს მარტივად შესავსებ დოკუმენტს, რომლითაც იმის დადგენა ხდება, ვის სჭირდება დახმარება. ორგანიზაცია უკრაინის გეი ალიანსთანაც გაერთიანდა, რათა ლგბტქი ადამიანებს ევაკუაციაში და დროებითი საცხოვრისებით უზრუნველყოფაში დაეხმაროს. Kyiv Pride ადგილობრივ ლგბტქი ადამიანებს ომის დროს ფსიქოლოგიური მხარდაჭერის სერვისსაც სთავაზობს, რომელშიც მოხალისე ფსიქოლოგები არიან ჩართული.
საერთაშორისო მედია ხშირად ბევრად დიდ აქცენტს აკეთებს ლტოლვილებზე, მაგრამ ლენის თქმით, მისი კოლეგები და მეგობრები აქტიურად არიან ქვეყნის დაცვისკენ მიმართული, არმიის და სასაზღვრო დაცვის დანაყოფებში რეგისტრირდებიან.
„ვაფასებ, მათ აქტიურობას. ჩვენს ქვეყნას ვჭირდებით და გავიმარჯვებთ, თუ დავრჩებით და რუსულ აგრესიას შევებრძოლებით. თუ ომს უბრალოდ გავექცევით, რუსეთს ვერაფერი შეაჩერებს“, – ამბობს ლენი და ამატებს – „ხალხი ახალ ამბებს აღარ კითხულობს თავდაცვის ადგილებისკენ მიდიან. კიდევ ვერ ვიჯერებთ, როგორ უნდა დაიჯერო ამ მასშტაბის ომი 21-ე საუკუნეში? ეს იგივეა, დაიჯერო, რომ უცხოპლანეტელები დედამიწას ეწვევიან. ეს ბარბაროსული ომია“.
ლენი ფიქრობს, რომ ეს რუსეთის უკრაინის წინააღმდეგ მოქმედება კი არა – მთელი მსოფლიოს წინააღმდეგ წასვლაა: „ის არ ფიქრობდა, რომ უკრაინა მტკიცე წინააღმდეგობას გაუწევდა, მაგრამ ახლა ნათელია, რომ უკრაინას მეტი დახმარება სჭირდება და გამარჯვებაც შეგვიძლია“.
ლესბოსური ორგანიზაცია WA Sphere-ის ხელმძღვანელი, ვერა ჩერნიგინა რუსული თავდასხმისას ხარკოვში ცხოვრობდა, ომის საშინელებამ ქალაქს დიდი ზიანი მიაყენა.
ვერამ 10 დღე ხარკოვში დაჰყო, სანამ ლვოვში გადასვლას გადაწყვეტდა. ხარკოვიდან მუშაობა სცადა, მაგრამ უსაფრთხოებაზე გამუდმებული ფიქრი ენერგიას არ უტოვებდა.
„გონება არ მუშაობს, როცა ირგვლივ აფეთქებებია, 10 დღე ვცდილობდი, მაგრამ ეს შეუძლებელია“, აღნიშნავს Pink News-თან საუბრისას.
უკრაინაში დარჩენა საფრთხისშემცველია, მაგრამ ვერამ გადაწყვიტა, ქვეყანაში დარჩენილიყო და ადამიანთა უფლებების დაცვისთვის შრომა განეგრძო.
„აქტივისტური საქმიანობა საშიშია. ომის დაწყების მეორე დღესვე მივიღეთ გადაწყვეტილება, რომ უკრაინაში დავრჩენილიყავით და ლგბტქი უფლებები პრიორიტეტად გვექცია, ომი დასრულდება.. და არ აქვს მნიშვნელობა ადამიანის ორიენტაციას, ქვეყანა ყველამ ერთად უნდა დავიცვათ. ყველას ერთი მიზანი გვაქვს – უნდა გავიმარჯვოთ“, – ამბობს ვერა.
აქტივისტის თქმით, რეალური მუშაობა ომის შემდეგ დაიწყება, როცა ქალაქების ხელახლა შენებას დაიწყებენ, უკრაინელებს ფსიქოლოგიური მხარდაჭერა დასჭირდებათ, რათა ომის ტრავმას გაუმკლავდნენ. ამბობს, რომ მზადაა ბრძოლაში ჩაერთოს, თუ უკრაინის თავისუფლების დასაცავად საჭირო იქნება.
„თუ აუცილებლობა იქნება, ყველაფერს გავიღებ – შევიარაღდები და ვიბრძოლებ. არ გვაქვს უკან დახევის ან გაქცევის უფლება, ერთადერთი გზა გვაქვს – გამარჯვება. ასეთია უკრაინული შემართება“, აღნიშნავს ვერა და იმასაც ამბობს, რომ ომის დასრულების შემდეგ ლგბტქი ადამიანების მდგომარეობა გაუმჯობესდება და ევროპის მასშტაბით ყველაზე დიდ Pride მოძრაობას შექმნიან, ამისთვის კი სამომავლოდ მხარდაჭერა დასჭირდებათ.
წყარო: Pink News
პოპულარული ირლანდიური ღამის კლუბი – კრემლი, რომელიც 22 წლის წინ ბელფასტში გაიხსნა, რუსეთის მიერ უკრაინაში დაწყებული ომის დროს სახელის შეცვლას არ აპირებს. თემის წევრების ნაწილმა ომის დაწყების შემდეგ კლუბს სახელის შეცვლისკენ მოუწოდა, მაგრამ ბარის მფლობელების თქმით, ლგბტქი კლუბის სახელი „პუტინისთვის აწეული შუა თითია“, ამიტომ სახელის შეცვლას არ აპირებენ.
„კრემლი უკრაინის გვერდით დგას. კლუბის გახსნისას ინსპირაცია რუსული მუშათა რევოლუციიდან და მეფე ნიკოლოზის სასახლეებისგან ავიღეთ. როცა რუსეთში ლგბტქი სიმბოლიკა აიკრძალა, ბევრმა ადამიანმა სახელის შეცვლისკენ მოგვიწოდა, მაგრამ ვთვლით, რომ სახელის შენარჩუნება ბევრად დიდი პოლიტიკური განაცხადია. კლუბის მფლობელი გეია, დასაქმებული პერსონალიც და ეს ადგილი ქვიარ თემის გულია. ის წარმოადგენს ყველაფერს, რასაც პუტინი ეწინააღმდეგება“, – ვკითხულობთ ბარის ფეისბუკ გვერდზე.
საქართველოს შემეცნებითი ცენტრი და GrlzWave, ევროკავშირისა და გაეროს განვითარების პროგრამის მხარდაჭერით პროექტს – Queer Resilience – ახორციელებს, რომელიც სამოქალაქო აქტივისტებისთვის, სამოქალაქო ორგანიზაციების წარმომადგენლებისთვის, ქვიარ თემის წევრებისა და სხვა დაინტერესებული პირებისთვის ჩატარდება.
„მაშინ, როდესაც გარშემო ამდენი სტიგმაა, აუცილებელი ხდება ცნობიერების ამაღლება და თანამოაზრეების გაძლიერება, რასაც ემსახურება ეს კურსი“, -ვკითხულობთ ღონისძიების აღწერაში, რომელიც 19 მარტს იწყება და 2 აპრილამდე გასტანს. შეხვედრები Zoom პლატფორმაზე, შაბათ-კვირას გაიმართება.
კურსის განმავლობაში შეხვედრები და დისკუსიები გაიმართება საქართველოში მოქმედი სამოქალაქო ორგანიზაციების წარმომადგენლებთან, დამსწრეები მათ საქმიანობას გაეცნობიან და სურვილის შემთხვევაში, სამომავლო თანამშრომლობის დაგეგმვასაც შეძლებენ.
ონლაინ შეხვედრები დაფარავს ისეთ თემებს, როგორიცაა ფემინიზმი, ინფორმირებული თანხმობა, დისკრიმინაცია, სექსუალური ორიენტაცია და გენდერული იდენტობა, ანატომია, სექსუალური გზით გადამდები ინფექციები, კონტრაცეფცია და არასასურველი ორსულობის შეწყვეტა, სექსუალური და რეპროდუქციული უფლებები, პერსონალურ მონაცემთა დაცვა და სექსტინგი.
კურსზე რეგისტრაციისთვის შეავსეთ სარეგისტრაციო ფორმა.
10 მარტს, თბილი ორგიის კოლექტივმა და ქვიარ არტისტებმა მუსიკალური ქვიარ ღონისძიება გამართეს, რომელზე შემოსული თანხა სრულად გადაირიცხება უკრაინის დასახმარებლად. Queers for Ukraine-ის ორგანიზატორების თქმით, ღონისძიებების სერიას კარგი მუსიკა და მეგობრული გარემო გამოარჩევს, გაიმართა დრეგ შოუც.
ქვიარ ღონისძიებების სერია ახლახან დაიწყო და ყოველთვიური იქნება. ორგანიზატორების თქმით, ქვიარ საღამოები „ქვიარ არტისტებს საშუალებას მისცემს, რომ აღნიშნულ სივრცეში მუშაობა და საკუთარი თავის ხელოვნების ენით გამოხატვა.
უკრაინის დასახმარებლად თანხა რამდენიმე გზით შეგროვდა: ღონისძიებაზე დასწრების საფასური, ბარში გადახდისას შეგროვებული თანხა და დონაციის ყუთებში შეგროვებული თანხა სრულად მოხმარდება უკრაინელ ხალხს.
მოგზაურობის და ახალი ქალაქების დათვალიერების ერთ-ერთი ყველაზე სასიამოვნო ნაწილი მუზეუმებისა და კულტურული ადგილების დათვალიერებაა. მართალია, ლგბტქი არტისტების ნამუშევრები მსოფლიოს მრავალ მუზეუმშია წარმოდგენილი, თუმცა, ამასთან ერთად, არსებობს ისეთი მუზეუმებიც, რომლებიც მთლიანად ლგბტ+ ისტორიისა და კულტურის წარმოჩენაზეა ორიენტირებული.
ამ სტატიაში მსოფლიოში ყველაზე გამორჩეული ლგბტქი მუზეუმების შესახებ მოგიყვებით.
ლესლი+ლოჰმანის მუზეუმი ერთ-ერთი ყველაზე ძველი და ცნობილი ლგბტქი მუზეუმია ამერიკაში. მუზეუმის ფუძემდებლები ჩარლზ ლესლი და ფრითზ ლოჰმანი არიან, ნიუ-იორკელი გეი წყვილი, რომელმაც დიდი წვლილი შეიტანა ქვიარ კულტურის პოპულარიზაციაში. ისინი 1969 წლიდან თავიანთ ბინაში აწყობდნენ ქვიარ არტისტების გამოფენებს და წლების განმავლობაში აგროვებდნენ მათ ნამუშევრებს.
მუზეუმი, რომელიც მანჰეტენზე მდებარეობს, გასული სამი საუკუნის 30 000-მდე ნამუშევარს ინახავს. მუზეუმის შენობაში ასევე არის წიგნების მაღაზია და სივრცე საჯარო თუ დახურული შეხვედრებისთვის.
მიიჩნევა, რომ შვულეს მუზეუმი ერთ-ერთი პირველი ლგბტქი მუზეუმია მთელს მსოფლიოში. 1984 წელს, ბერლინის მუზეუმში გაკეთებული პატარა გამოფენის წარმატების შემდეგ, ოთხმა მეგობარმა გადაწყვიტა, რომ ახალი მუზეუმი დაეარსებინათ, სადაც მხოლოდ ქვიარ არტისტების ნამუშევრები იქნებოდა წარმოდგენილი.
მუზეუმი 2013 წლიდან Tiergarten-ის უბანში მდებარეობს და მისი შენობა აერთიანებს ოთხ საგამოფენო დარბაზს, სამუშაო ოთახებს, კაფეს და შეხვედრებისთვის განკუთვნილ სივრცეებს.
ენდი ვორჰოლმა დიდი კვალი დატოვა, როგორც, ზოგადად, ხელოვნებაზე, ასევე, ქვიარ კულტურაზე. პიტსბურგი კი ერთ-ერთი ყველაზე იღბლიანი ქალაქი აღმოჩნდა ამერიკაში, რომელიც ლეგენდარული ენდი ვორჰოლის 900 ნახატს, 2 000 ფურცელზე ნამუშევარს, 1 000 უნიკალურ პრინტს, 77 სკულპტურას, 4 000 ფოტოს და 4 350 ვიდეოჩანაწერს ინახავს. ეს ერთ-ერთი ყველაზე დიდი მუზეუმია მთელს მსოფლიოში, სადაც მხოლოდ ერთი არტისტის ნამუშევრებია შენახული.
ONE კიდევ ერთი სივრცეა, რომელიც ლოს-ანჯელესში მდებარეობს და ლგბტქი საკითხების მიმართ საზოგადოების ცნობიერების ამაღლების მიზნით შეიქმნა. არქივში შენახულია პერიოდული ლგბტქი გამოცემები, ფილმები, ფოტოგრაფია, აუდიოჩანაწერები და პერსონალური ქაღალდები. ამასთან ერთად, არქივი პერიოდულად მასპინძლობს გამოფენებს, სადაც ისეთ ხელოვნების ნიმუშებს ან ისტორიულ არტეფაქტებს შეხვდებით, რომელთა ნახვაც სხვაგან შეუძლებელია.
GLBT ისტორიული საზოგადოება და მუზეუმი კიდევ ერთი უნიკალური სივრცეა სან-ფრანცისკოში, რომელიც ისტორიულ არტეფაქტებს და ამერიკის ქვიარ კულტურის ნამდვილ საგანძურს ინახავს. მუზეუმი კასტროს უბანში მდებარეობს, რომელიც სან-ფრანცისკოს გეი მექად არის აღიარებული. GLBT მუზეუმის დამთვალიერებლებს შესაძლებლობა აქვთ, სან-ფრანცისკოს და, ზოგადად, კალიფორნიის ქვიარ ლეგენდების და პოლიტიკური ფიგურების, მაგალითად, ჰარვი მილკის საარქივო მასალებს გაეცნონ. მუზეუმის შენობაში ხშირად იმართება გამოფენები, სადაც ქვიარ არტისტების ნამუშევრებია გამოფენილი.
მართალია, ფლორიდა არ არის ის შტატი, სადაც ცნობილი სტოუნვოლის აჯანყება მოხდა, თუმცა ერთ-ერთი ყველაზე ცნობილი მუზეუმი, რომელიც ამ მოვლენის არტეფაქტებს ინახავს, ფლორიდაში მდებარეობს. მუზეუმი 1984 წლიდან ფუნქციონირებს, თუმცა თავდაპირველად მხოლოდ ბიბლიოთეკა იყო. მუზეუმის შენობაში დღეს 30.000-ზე მეტი ხელოვნების ნიმუში, ისტორიული არტეფაქტი და ჩანაწერი ინახება, რომელიც მთლიანად სტოუნვოლის აჯანყებას უკავშირდება. მუზეუმის შენობა ხშირად უმასპინძლდება გამოფენებს, ფილმის ჩვენებებს, საჯარო კითხვას და საქველმოქმედო საღამოებს.
გეი და ლესბოსური სპორტის ეროვნული დიდების დარბაზი ნამდვილი სამოთხეა სპორტით დაინტერესებული ქვიარ ადამიანებისთვის. მუზეუმის მიზანია, პატივი მიაგონ იმ სპორტსმენებს, რომლებმაც დიდი წვლილი შეიტანეს სპორტის სხვადასხვა სახეობაში, ამასთან ერთად, არ შეუშინდნენ საზოგადოების წნეხს და ქამინგაუთი გააკეთეს.
The arQuives კიდევ ერთი ქვიარ არქივია, რომელიც კანადაში მდებარეობს და 1973 წლიდან ფუნქციონირებს. არქივს შექმნის დღიდან მხარს უჭერს კანადის მთავრობა და ითვლება ერთ-ერთ ყველაზე მნიშვნელოვან კულტურულ ინსტიტუციად. არქივის შენობაში შეხვდებით ერთ-ერთ ყველაზე მდიდარ და მრავალფეროვან მასალებს ლგბტქი კანადის ისტორიიდან. არქივის შენობა ასევე მასპინძლობს ტურებს ქალაქში, სეზონურ გამოფენებსა და პრეზენტაციებს.
ავსტრალიის ლესბოსური და გეი არქივი 40 წლის წინ შეიქმნა და მთელი ამ დროის განმავლობაში მოხალისეები მართავდნენ. არქივის შენობაში შეხვდებით 150 000 ლგბტქი არტეფაქტს ავსტრალიის დასაბამიდან დღემდე. მუზეუმის შენობა დამთვალიერებლებს ასევე სთავაზობს აკადემიურ კონფერენციებს, თემატურ და ისტორიულ ტურებს. მუზეუმი ხშირად თანამშრომლობს ქვეყნის სხვა, უფრო მსხვილ მუზეუმებთან და გამოფენებთან.
IHLIA LGBT მემკვიდრეობა კიდევ ერთი კულტურული სივრცეა, რომელიც ევროპის ერთ-ერთ ყველაზე გეი-მეგობრულ ქალაქში, ამსტერდამში მდებარეობს. მუზეუმის შენობა, რომელიც 1999 წლიდან ფუნქციონირებს, დღესდღეობით, ერთ-ერთი ყველაზე მდიდარია თავისი კოლექციით მთელს ევროპაში. მუზეუმში დაცულია 113 000 საარქივო მასალა და ხელოვნების ნიმუში.
ავსტრალიელი მომღერალი, ტროი სივანი Paramount+-ის ახალ ფილმში მთავარ როლს შეასრულებს. Three Months (სამი თვე) 23 თებერვალს გამოვა და ფლორიდაში მცხოვრები ახალგაზრდა გეი ბიჭის შესახებ იქნება, რომელიც გაიგებს, რომ აივ-დადებით ადამიანთან სარისკო სქესობრივი კავშირი ჰქონდა.
ტესტის გაკეთებამდე 3-თვიან პერიოდზე გადაღებული ფილმი სასიყვარულო ისტორიაა, რომელიც კომედიისა და დრამის ნაზავი იქნება.
სივანმა ფილმისთვის 2 ახალი სიმღერაც დაწერა. ფილმის სცენარის ავტორი, რეჟისორი და აღმასრულებელი პროდიუსერი ჯერედ ფრიდერია. სამსახიობო გუნდი კი ვივეკ კალრას, ბრაიენ ტიუს, ელენ ბერსტინის და სხვა მსახიობებისგან შედგება.
26 წლის მომღერლისთვის, რომელმაც 2013 წელს ღიად თქვა, რომ გეია ეს პირველი როლი არ იქნება. სივანი 2018 წელს გამოსულ ფილმში – Boy Erased – მონაწილეობს და საუკეთესო საუნდტრეკისთვის ოქროს გლობუსის ნომინაციაც აქვს მოპოვებული.
Human Rights Watch-ისა და OutRight Action International-ის ანგარიშის მიხედვით, ლესბოსელი, გეი და ტრანსგენდერი ავღანელები, ასევე ის ადამიანები, რომლებიც დაწესებულ გენდერულ ნორმებთან წინააღმდეგობაში მოდიან, უფრო და უფრო უიმედო მდგომარეობაში ვარდებიან და თალიბანის ავღანეთში სასიკვდილო საფრთხის ქვეშ უწევთ ცხოვრება.
43-გვერდიანი ანგარიში – „ცად რომ ამაღლდეთ, მაინც გიპოვით: ავღანეთში მცხოვრები LGBT ადამიანები თალიბანის რეჟიმის ხელისუფლებაში მოსვლის შემდეგ“ 60 ქვიარ ავღანელთან ინტერვიუს ემყარება. მათი დიდი ნაწილი აღნიშნავს, რომ თალიბანის წევრები სექსუალური ორიენტაციის გამო თავს დაესხნენ ან დაემუქრნენ. სხვები ოჯახის წევრებისგან, მეზობლებისგან თუ იმ პარტნიორებისგან ძალადობის ფაქტებზე საუბრობენ, რომლებიც თალიბანს უჭერენ მხარს ან თვლიან, რომ LGBT ადამიანებზე თავდასხმა მათი პირადი უსაფრთხოებისთვის სასიკეთო იქნება. გამოკითხულთა ნაწილს, თალიბანის წევრების ან მათი მხარდამჭერების მხრიდან თავდასხმების გამო, სახლიდან გაქცევა მოუწია. სხვებს კი წლების განმავლობაში ნაშენები ცხოვრება ერთ ღამეში თვალწინ დაენგრათ და სამიზნედ იქცნენ სექსუალური ორიენტაციისა და გენდერული იდენტობის გამო.
„ჯგუფური გაუპატიურების, თავდასხმის, ოჯახური ძალადობის მსხვერპლ LGBT ავღანელებს ვესაუბრეთ, რომელთაც იმედი არ აქვთ, რომ სახელმწიფო უწყებები დაიცავენ. ქვეყნის დატოვების მსურველი LGBT ადამიანებს შეზღუდული შესაძლებლობები აქვთ, რადგან ერთი და იმავე სქესის ადამიანების ურთიერთობა მეზობელ სახელმწიფოებშიც კრიმინალიზებულია. ძნელია თქმა, რამდენად სამწუხარო და თავზარდამცემია LGBT ადამიანებისთვის თალიბანის რეჟიმის დაბრუნება“, – აღნიშნა ჯ. ლესტერ ფედერმა, OutRight Action International-ის საგანგებო კვლევების ხელმძღვანელმა.
რესპონდენტთა უმეტესობა ავღანეთში ცხოვრობს, ნაწილმა კი თავი მეზობელ ქვეყნებს შეაფარა. ამ ქვეყნების ანტი-LGBT კანონებზე დარდის გარდა, ემიგრანტების საზრუნავი ემიგრანტის სტატუსის მოპოვებაა, რაც დეპორტაციის რისკის წინაშე აყენებთ.
LGBT ადამიანებისთვის ავღანეთი თალიბანის რეჟიმის მიერ სრული კონტროლის მოპოვებამდეც საშიში ქვეყანა იყო. 2018 წელს, იმდროინდელმა პრეზიდენტმა, აშრაფ განიმ დაამტკიცა კანონი, რომელიც ერთი და იმავე სქესის ადამიანებს შორის სექსუალურ კავშირს კრძალავდა და კრიმინალურ აქტად მიიჩნევდა. გამოკითხულ LGBT ადამიანებს თალიბანის დაბრუნებამდეც უწევდათ არაადამიანური მოპყრობის ატანა, მათ შორის, სექსუალური ძალადობის, ბავშვთა და იძულებითი ქორწინების, ფიზიკური ძალადობის, სკოლიდან გარიცხვის, მუქარისა და იძულებითი ქამინგაუთის. უმეტესობას საკუთარი იდენტობის მნიშვნელოვანი ნაწილის ოჯახისგან, მეგობრებისგან თუ კოლეგებისგან დამალვა უწევდა
თუმცა, თალიბანის რეჟიმის ხელისუფლებაში დაბრუნების შემდეგ მდგომარეობა რადიკალურად გაუარესდა. თალიბანმა იქამდე არსებულ ანტი-LGBT კანონებს გადახედა და ლიდერების ნაწილმა ფიცი დადო, რომ LGBT ადამიანების წინააღმდეგ მკაცრ ზომებს მიიღებდნენ. გასულ წელს, თალიბანის პრესსამსახურის უფროსმა Reuters-ის ჟურნალისტს უთხრა: „LGBT… ეს შარიათის კანონებს ეწინააღმდეგება“.
თალიბანის წევრმა მოსამართლემ კი ქაბულის დაცემამდე, გერმანულ გამოცემა Bild-ს განუცხადა, რომ „ჰომოსექსუალებისთვის მხოლოდ 2 ტიპის სასჯელი შეიძლება არსებობდეს: ჩაქოლვა ან კედელთან მიყენება, რომელიც ზედ დაექცევათ“. თალიბანის ღირსებისა და მანკიერების 2020 წლის გზამკვლევის მიხედვით, რელიგიურმა ლიდერებმა ერთი და იმავე სქესის ურთიერთობებზე სათანადო რეაგირება უნდა მოახდინონ, ჰომოსექსუალობის მტკიცებულებები კი სამინისტროს რაიონულ ხელმძღვანელს შემდგომი შესწავლისა და სასჯელის დაკისრების მიზნით უნდა წარუდგინონ.
თალიბანის რეჟიმმა არაერთხელ გააჟღერა, რომ ადამიანების უფლებებს პატივს სცემენ, თუმცა, ხელისუფლებაში მოსვლის შემდეგ უფლებების შელახვის არაერთი ფაქტი მოხდა, მათ შორის, შურისძიების მიზნით მკვლელობების, ქალთა მიმართ სისტემური დისკრიმინაციის, თავისუფალი გამოხატვისა და მედიის მუშაობაზე დაწესებული ცენზურის, ასევე მიწის მიტაცების. თალიბანის წევრებმა და მხარდამჭერებმა ძალაუფლების ბოროტად გამოყენებით LGBT ადამიანების წინააღმდეგ ძალადობრივი ქმედებები წამოიწყეს.
გეი კაცის თქმით, თალიბანის წევრებმა საკონტროლო პუნქტთან დააკავეს, სცემეს და ჯგუფურად გააუპატიურეს, რა დროსაც მიმართავდნენ – „ამიერიდან, როცა შენი პოვნა მოგვინდება, ამას შევძლებთ და იმას დაგმართებთ, რაც მოგვესურვება“. ლესბოსელმა ქალმა კი აღნიშნა, რომ თალიბანის მოსვლის შემდეგ მისი ნაცნობები დაჯგუფებას შეუერთდნენ და სექსუალური ორიენტაციის გამო მოკვლით დაემუქრნენ.
გამოკითხულთა უმეტესობა თვლის, რომ უსაფრთხოების ერთადერთი გარანტია თავშესაფრის ისეთ ქვეყანაში ძიება იქნება, რომელიც LGBT ადამიანების უფლებებს სათანადოდ იცავს, მაგრამ ქვიარ ავღანელების მხოლოდ მცირე ნაწილი ახერხებს დაცულ ქვეყნებამდე მიღწევას. გაერთიანებული სამეფო ერთადერთია, რომელმაც საჯაროდ განაცხადა, რომ LGBT ავღანელთა მცირე ნაწილი შეიფარა. LGBT ავღანელებთან მომუშავე ორგანიზაციები აღნიშნავენ, რომ ასობით ადამიანი უკავშირდება და საერთაშორისო დაცვასა და თავშესაფარს ითხოვს.
„თალიბანმა ფაქტობრივად პირობა დადო, რომ LGBT ავღანელების უფლებებს არ დაიცავს. აუცილებელია, სხვადასხვა ქვეყნების ხელისუფლებამ თალიბანზე ზეწოლის გაძლიერებით LGBT ადამიანების უფლებებზე იზრუნოს და თავშესაფრის მსურველი ავღანელები შეიფაროს, რადგან მათ თალიბანის ავღანეთში და მეზობელ ქვეყნებში სერიოზული საფრთხე ემუქრებათ“, – განაცხადა ჰითერ ბარმა, HRW-ს ქალთა უფლებების ხელმძღვანელმა.
(ყველა სახელი შეცვლილია)
თალიბანის ხელისუფლებაში მოსვლიდან რამდენიმე კვირაში, რამიზ ს. ხელფასის ასაღებად იმდროინდელ სამსახურში მივიდა. 20 წლის რამიზი ოფისში უკვე აღარ დადიოდა, რადგან მისი სამსახური თალიბანის პოტენციური სამიზნე იყო. საკონტროლო პუნქტის გავლისას შეიარაღებულმა კაცმა სექსუალურ ორიენტაციასთან დაკავშირებული შეურაცხმყოფელი ტერმინით მიმართა. ერთმა კაცმა კისერში და მუცელში, შემდეგ კი ზურგში დაარტყა. რამიზი მანქანაში ჩატენეს და სხვა ადგილას გადაიყვანეს, სადაც ოთხმა კაცმა სცემა და 8 საათის განმავლობაში ჯგუფურად აუპატიურებდნენ. გათავისუფლების შემდეგ ერთ-ერთმა კაცმა უთხრა, რომ ისევ იპოვიდნენ.
ცოტა ხნის შემდეგ, რამიზს აცნობეს, რომ მის ძველ სამსახურში 2 კაცი იყო მისული, რომლებიც მის პერსონალურ ინფორმაციას ითხოვდნენ. რამიზი მიიმალა, თალიბანის წევრები კი მის საცხოვრებელ სახლში მივიდნენ და რამიზის სახლში 3 დღე გაატარეს, ოჯახის წევრებს დაკითხვა მოუწყვეს და სცემეს. რამიზი სამალავ ადგილს თითქმის არ ტოვებდა, ერთადერთხელ მივიდა ექიმთან, რა დროსაც თალიბანის წევრმა სცემა, რომელმაც სავარაუდოდ წინა თავდასხმაზეც იცოდა.
თალიბანის მიერ ქაბულის აღებიდან 2 კვირის შემდეგ, ჰამიდს შეყვარებული ბიჭის მშობლები ესტუმრნენ. წყვილი ერთმანეთს უნივერსიტეტში შეხვდა და თითქმის ერთი წელი ურთიერთობაში იყვნენ, თუმცა, მშობლებს უბრალოდ მეგობრები ეგონათ. მშობლებმა განუცხადეს, რომ მათი ვაჟი 2-3 დღის განმავლობაში გაუჩინარებული იყო, თუმცა, შეყვარებული არც ჰამიდს ჰყავდა ნანახი. მომდევნო დღეს ბიჭის სხეული მშობლებმა იპოვეს და ჰამიდს უთხრეს, რომ შესაძლოა მათი შვილი გეი ურთიერთობის გამო მოეკლათ. „ეს ჩემთვისაც გაფრთხილებასავით იყო“, – აღნიშნა ჰამიდმა, რომელმაც ქვეყნის სასწრაფოდ დატოვების გადაწყვეტილება მიიღო.
ბუშნა პატარა სოფელში, ბიძის ოჯახში ცხოვრობდა. გასული წლის ივლისში, ქაბულის აღებამდე 6 კვირით ადრე, ბრუშნას ნათესავებმა გოგო შეყვარებულთან ერთად შეამჩნიეს და ბრუშნას ბიძას აცნობეს. ბიძას მისი მოკვლა სურდა, რათა „რათა ოჯახი სირცხვილისგან ეხსნა“. ბრუშნამ გაქცევა შეძლო და ქალაქში, მშობლების სახლში დაბრუნდა, მისი ნათესავები და ბიძა კი ბრუშნას მოკვლას ითხოვდნენ, რაზეც მშობლებმა უარი განაცხადეს და გოგო კაცზე დანიშნეს, რომელმაც მისი სექსუალური ორიენტაციის შესახებ არ იცოდა. ბიძა და ნათესავები არც ამან დააკმაყოფილა. წინა ხელისუფლების დროს ბრუშნა ისე არ წუხდა – „იმ დროს თალიბანი კი არა, პოლიცია იყო და ასე მარტივად ვერ მომკლავდნენ“, – აღნიშნა ბრუშნამ. თალიბანის ხელისუფლებაში მოსვლის შემდეგ ბრუშნას ბიძა და ნათესავები დაჯგუფებას შეუერთდნენ და განაცხადეს, რომ გოგოს მოკვლის უფლება ჰქონდათ, თუ ამას მამამისი არ გააკეთებდა. მშობლებმა ქორწინება დააჩქარეს და ბრუშნა უარის გამო სცემეს, შემდეგ ქმარს ფული გადაუხადეს, რათა მეზობელ ქვეყანაში გადასულიყვნენ. ერთ-ერთმა ნათესავმა ბრუშნას ქმარს გოგოს ორიენტაციის შესახებ უთხრა. ბრუშნას თქმით, ამჟამად ქმარი თითქმის ყოველდღიურად სცემს და სახლიდან გასვლის უფლებას არ აძლევს. „ვშიშობ, რომ ქმარი ან ბიძაშვილი მომკლავს“, – აღნიშნა ბურშნამ მცირე სატელეფონო საუბრისას.
20 წელს გადაცილებული ფარიდის თქმით, აგვისტოში მეზობელს გამოუტყდა, რომ მოსწონდა. მეზობლისგან უარყოფა არ უგრძნია, ამიტომ ჩათვალა, რომ შეიძლებოდა ურთიერთობა გაეგრძელებინათ. „თალიბანის მოსვლის შემდეგ ვწერდი და შევნიშნე, რომ თალიბანის წევრების ფოტო ედო. მივწერე და ვკითხე, რატომ შეუერთდა თალიბანს, რაზეც მიპასუხა, რომ მე კარგი ადამიანი არ ვიყავი, რადგან გეი ვარ. მუქარისშემცველ შეტყობინებებს მწერდა. მითხრა, ცაშიც რომ ამაღლდე, მაინც გიპოვით. დაგაპატიმრებთ, რადგან თალიბანის წევრებს შენს შესახებ ინფორმაცია მივაწოდე“, – იხსენებს ფარიდი, რომლის სახლშიც თალიბანის წევრები არაერთხელ მივიდნენ, თუმცა, ბიჭს ოჯახი მალავდა, სანამ ქვეყნიდან გაღწევას შეძლებდა.
როცა თალიბანმა ქალაქი აიღო, აიმალ ვ. და არიან დ. 2 სხვა ტრანსგენდერ ქალთან ერთად მიტოვებული ჰოსტელის ტერიტორიაზე დაიმალნენ და მეზობლების შეურაცხყოფის ატანა უწევდათ. მათი მეგობარი რეზა კაცივით ინიღბებოდა და მეგობრებს საკვებით ამარაგებდა. „ყოველ წუთს გვემუქრებოდნენ, გვირეკავდნენ. ბავშვებიც კი გვეუბნებოდნენ, ისევ აქ ხართ? თალიბანმა კიდევ არ დაგაკავათ?“, – ჰყვება აიმალი.
თალიბანის მმართველობის მე-6 კვირას მეზობლებმა მოქმედება გადაწყვიტეს და ოქტომბრის ერთ დილას, ვიღაცამ რეზას კარზე კაკუნი ატეხა, როცა კარი გააღო 20-ზე მეტი მეზობელი რეზას თავს დაესხა, სცემა და ტანსაცმელი შემოახია. არიანი ჩარევას შეეცადა და ერთ-ერთ ქალს ჰკითხა, ასე რატომ იქცეოდნენ. მან კი უპასუხა, რომ საზოგადოებას აბინძურებდნენ, რასაც თალიბანს შეატყობინებდნენ და ისინი გააქრობდნენ.
რეზას მეგობრები გაიქცნენ, კუთვნილი ნივთებიც არ წაუღიათ. აიმალმა გაქცევისას პოლიციის მანქანა დაინახა და თვალი მოჰკრა, როგორ დააბეს რეზა უცნობმა კაცებმა. მოგვიანებით, აიმალი სამეზობლოში მალულად მივიდა, რათა რეზას შესახებ რაიმე გაეგო, ერთ-ერთი მაღაზიის მეპატრონემ უთხრა, რომ შიშველი რეზა პოლიციის მანქანაში ჩასვეს. არიანმა და აიმალმა რეზას შესახებ 10 დღეზე მეტი არაფერი იცოდნენ, მეგობრები რეზამ მოძებნა, მას შემდეგ, რაც თალიბანის წევრებმა ქუჩაში კაცის ტანსაცმლით და უტელეფონოდ დააგდეს. რეზას სხეული დალურჯებებით იყო სავსე, ცხვირი გატეხილი, თავი გადაპარსული და დასერილი ჰქონდა, თალიბანის წევრებმა წარბებიც გადაპარსეს.
„საზოგადოებისთვის და ტრანსგენდერი ადამიანებისთვის ნიშანი იქნები. ეს გაკვეთილია, რომელიც გართობაზე და სექს-სამუშაოზე უარს გათქმევინებს“, – უთხრეს რეზას თალიბანის წევრებმა, რომლებსაც რეზა პოლიციის შენობაში ჰყავდათ გამომწყვდეული და ყოველდღე სცემდნენ. არიანის თქმით, რეზა იხსენებდა, რომ ერთ-ერთი კაცი მოკვლით დაემუქრა, თუ ქალაქში თვალს მოჰკრავდა. არიანმა რეზას საკვები და ავტობუსის ბილეთი უყიდა, რათა ოჯახში დაბრუნებულიყო, მაგრამ მათ რეზა უარყვეს და სახლში დარჩენის უფლება არ მისცეს. არიანს რეზას შესახებ მას მერე არ სმენია.
