ქართველი ვიცე-პოლკოვნიკი, ომის ვეტერანი სნაიპერი ქალი, 63 წლის დარეჯან მაისურაძე უკრაინაში რუსეთის წინააღმდეგ იბრძვის.
დარეჯან მაისურაძე Prime Time-თან ინტერვიუში ამბობს, რომ 2008 წლის აგვისტოს ომშიც იბრძოდა, უკრაინის დაცვის პირობა კი ბევრად ადრე, აფხაზეთის ომის დროს დადო.
მისი უსაფრთხოებიდან გამომდინარე, დარეჯან მაისურაძის ზუსტ ადგილმდებარეობას, სადაც ახლა ის უკრაინისთვის რუსეთის წინააღმდეგ იარაღით იბრძვის, არ ვაკონკრეტებთ… ამბობს, რომ მან უკრაინისთვის ბრძოლის პირობა ჯერ კიდევ აფხაზეთის ომის დროს დადო. მერე ბრძოლის ჟინი 2008 წელს, აგვისტოს ომის დროს, კიდევ უფრო გაუღრმავდა და ახლა ის მსოფლიოს ყველაზე ცხელ წერტილშია.
,,ჩვენი ბიჭების დაღვრილი სისხლისთვის და იმ უკრაინელებისთვის, ვინც ჩვენს მხარდამხარ აფხაზეთში იომა, რუსებზე შური უნდა ვიძიოო”, – ამბობს ქართველი მებრძოლი.
„სოხუმის დასაცავად დნეპროპეტროვსკის ოლქიდან, სხვა უამრავ უკრაინელთან ერთად, საბრძოლველად ერთი კაცი – სერგეი, ორ შვილთან ერთად იყო ჩამოსული. რუსებმა მაშინ მას ერთი ბიჭი მოუკლეს, აფხაზეთის ბრძოლის ველზე დაეცა… სერგეიმ შვილის ცხედარი უკრაინაში გადაასვენა და აფხაზეთში საომრად დაბრუნდა.
როცა ვკითხე, ამხელა ტრაგედიის შემდეგ, როგორ შეძელი უკან დბრუნება და საბრძოლო მოქმედებებში ჩართვა-მეთქი, მიპასუხა: თუ ახლა რუსეთს აქ, აფხაზეთში არ შევაჩერებთ, აუცილებლად მოვა დნეპრშიცო. ახლა, როცა რუსული საოკუპაციო ძალები ხარკოვს ანადგურებენ, როცა კიევს უტევენ და დნეპრს უახლოვდებიან, სულ ამ უკრაინელი კაცის სიტყვები ჩამესმის… რუსეთი ახლა დნეპრთან უნდა შევაჩეროთ! მაშინ ფიცი დავდე, რომ თუ რუსეთი უკრაინაში შეიჭრებოდა, მე აუცილებლად ვიომებდი იმ უკრაინელებისთვის, რომლებმაც აფხაზეთის ომის დროს ბრძოლის ველზე არ მიგვატოვეს და ჩვენს მხარდამხარ იბრძოდნენ. ჩვენ, ქართველებს, მათი ვალი გვაქვს და მე ახლა აქ სწორედ ამ ვალს ვიხდი“, – აღნიშნავს დარეჯან მაისურაძე Prime Time-თან საუბარში და იმასაც ამბობს, რომ საქართველოს გადარჩენისთვის უკრაინის გვერდით ბრძოლაა აუცილებელი.
წყარო: Prime Time
