ტრანსგენდერი მსახიობი ლავერნ კოქსი ნეტფლიქსის ახალ სერიალში მიიღებს მონაწილეობას.
სერიალი, რომლის ტრეილერიც ახლახანს გავრცელდა ინტერნეტში, ნამდვილ ისტორიას ეფუძნება და რუსი თაღლითის, ანა სოროკინას ისტორიას გვიამბობს.
ანა სოროკინა 1991 წელს დაიბადა რუსეთში და 2013 წელს ნიუ-იორკში გადავიდა საცხოვრებლად, ახალ ქალაქში გადასვლიდან მალევე, ანა სოროკინამ ახალი იდენტობა შეიქმნა და ყველას მოატყუა, რომ ის მდიდარი გერმანელის მემკვიდრე იყო. ამ გზით, მან არაერთი საბანკო ოპერაცია განახორციელა, გამოიყენა სხვადასხვა სასტუმროს მდიდრული ნომრები და მოატყუა ნიუ-იორკის საზოგადოება.
ანა სოროკინას თაღლითური გეგმა 2019 წელს გამომჟღავნდა და 4-12 წლამდე თავისუფლების აღკვეთა მიუსაჯეს. სწორედ ეს ისტორია იქცა ახალ ინსპირაციად შონდა რაიმსისთვის, რომელიც სერიალის შემქმნელად გვევლინება.
ლავერნ კოქსი ახალ სერიალში ერთ-ერთ მთავარ, ცნობილი ადამიანების პერსონალური ტრენერის როლს ასრულებს.
ახალი სერიალი ნეტფლიქსის ეკრანებზე 11 თებერვალს გამოვა.
ლავერნ კოქსი ამერიკელი ტრანსგენდერი მსახიობია, რომელიც მაყურებელმა გახმაურებული სერიალიდან, Orange is the New Black-იდან გაიცნო, სერიალში შესრულებულმა როლმა მსახიობს ემის ნომინაციაც მოუტანა. ლავერნ კოქსი პირველი ტრანსგენდერი მსახიობია, რომელიც Emmy-ზე იყო ნომინირებული.
