გთავაზობთ იანვრის თვის ქვიარ სერიალებს, რომლებიც უკვე გამოვიდა ეკრანებზე ან თვის ბოლომდე გამოვა.
სერიალების უმეტესობა ეკრანებს ახალი სეზონით უბრუნდება.
9-1-1: Lone Star – 3 იანვარი
რაიან მერფის კომედიური ჟანრის სერიალი მესამე სეზონით 3 იანვარს დაუბრუნდა ეკრანებს. სერიალი 9-1-1-ის სპინოფია და მეხანძრე ოუენ სტრანდის ისტორიას გვიამბობს, რომელიც მანჰეტენიდან ოსტინში, ტეხასში გადავა საცხოვრებლად.
კომედიური ჟანრის სერიალის მორიგ სეზონში ოუენმა უნდა სცადოს და იპოვოს ბალანსი სამსახურსა და პირად ცხოვრებას შორის. სერიალში ასევე მრავლად შეხვდებით ქვიარ პერსონაჟებს.
RuPaul’s Drag Race – 7 იანვარი
რუპოლის დრეგ შეჯიბრება ახალი, მეთოთხმეტე სეზონით დაბრუნდა და ამ შოუს ისტორიაში მასში პირველად გამოჩნდა სისგენდერი მამაკაცი დრეგ ქვინი.
შოუს ახალი სეზონის პრემიერა VH1-ზე 7 იანვარს შედგა და პრიზი კვლავაც უცვლელია, სეზონის გამარჯვებული 100 000 ამერიკულ დოლარს მიიღებს და „დრეგ შეჯიბრების“ ვარსკვლავი გახდება.
Search Party – 7 იანვარი
Search Party HBO Max-ის სერიალია, რომელიც 7 იანვარს ახალი და უკანასკნელი მეხუთე სეზონით დაუბრუნდა მცირე ეკრანებს. სერიალში მოქმედება ნიუ-იორკში ვითარდება და ოთხი მეგობრის ისტორიას მოგვითხრობს, რომლებიც დაკარგული მეგობრის პოვნას ცდილობენ.
სერიალი, რომელშიც ქვიარ თემებიც არის წარმოჩენილი, შავი კომედიის ჟანრს მიეკუთვნება. ის იმითაა გამორჩეული, რომ გარდა შავი კომედიისა, სერიალი სხვა ჟანრებსაც აერთიანებს და ექსპერიმენტებს არ ერიდება. ასე, მაგალითად – სერიალის პირველ სეზონში მაყურებელი დეტექტივის ელემენტებს ამოიცნობს, ხოლო მეორე სეზონი უკვე ფსიქოლოგიური ტრილერია. რაც შეეხება სერიალის მესამე სეზონს, მასში ყველაფერი რადიკალურად იცვლება და სასამართლო სხდომებს შეხვდებით.
Euphoria – 9 იანვარი
HBO-ს საკულტო სერიალი, რომელმაც 9 იანვარს ზენდეიას Emmy-ის პრიზი მოუტანა, 2-წლიანი შესვენების შემდეგ, ახალი, მეორე სეზონით დაბრუნდა ეკრანებს.
როგორც სერიალის შემქნელები და მსახიობები ამბობენ, მეორე სეზონი იმაზე უფრო ემოციური და დაძაბული იქნება, ვიდრე წინა სეზონი. ზენდეიამ სულ რამდენიმე კვირის წინ სოციალური ქსელის საშუალებით განაცხადა, რომ სერიალი არასრულწლოვანი მაყურებლისთვის არ არის, რადგან მასში შეხვდებით ძალადობის სცენებს, სიშიშვლესა და ნარკოტიკების მოხმარებას.
Somebody Somewhere – 16 იანვარი
Somebody Somewhere HBO ახალი სერიალია, რომლის პრემიერაც 16 იანვარს შედგა. კომედიური ჟანრის სერიალი სემ მილერის ისტორიას გვიამბობს, რომელიც დის გარდაცვალების შემდეგ მშობლიურ კანზასში დაბრუნებას, ახალი ცხოვრების დაწყებას და ახალ ადამიანებთან ერთგვარი გაერთიანების ჩამოყალიბებას გადაწყვეტს.
მთავარ როლში კომედიანტი, მომღერალი და მსახიობი ბრიჯიტ ევერეტი გვევლინება, რომელსაც კომედიის მოყვარულები კარგად იცნობენ თავისი შთამბეჭდავი სასცენო შოუებით.
Single Drunk Female – 21 იანვარი
Single Drunk Female HULU-ს ახალი სერიალია, რომელიც 21 იანვარს გამოვა ეკრანებზე. სერიალი, 20 წელს გადაცილებული ალკოჰოლიკი გოგოს ისტორიას გვიამბობს, რომელიც მავნე ჩვევისგან გათავისუფლებას გადაწყვეტს და დედასთან ბრუნდება საცხოვრებლად.
სერიალის რეჟისორი სელსი ჰიდლანდია, რომელსაც ასევე წარმატებული სერიალი Russian Doll ეკუთვნის.
The Gilded Age – 24 იანვარი
„დაუნთაუნის სააბატოს“ შექმნელებისგან კიდევ ერთი ისტორიული ჟანრის სერიალი გამოვა HBO-ს ეკრანებზე, რომელიც მეცხრამეტე საუკუნის მიწურულის ნიუ-იორკში გვამოგზაურებს და ახალგაზრდა გოგონას, მერიენ ბრუკის ისტორიას მოგვიყვება.
მამის გარდაცვალების შემდეგ მერიენს პენსილვანიიდან ნიუ-იორკში, მდიდარ დეიდასთან გადაცხოვრება მოუწევს. სერიალში მერიენის დეიდის როლს „სექსი დიდ ქალაქშის“ მსახიობი, სინტია ნიქსონი შეასრულებს.
ახალი სერიალის პრემიერა 24 იანვარს შედგება.
Getting Curious With Jonathan Van Ness – 27 იანვარი
Queer Eye-ს ერთ-ერთი წამყვანი ჯონათან ვან ნესი ნეტფლიქსის პლატფორმისთვის კიდევ ერთ სერიალს შემოგვთავაზებს, რომელიც წამყვანის ამავე სახელწოდების პოპულარულ პოდკასტს ეფუძნება.
პოდკასტებში პოპულარული წამყვანის თემები არ არის შეზღუდული, ჯონათან ვან ნესი სტუმრებთან ერთად წლების განმავლობაში სხვადასხვა თემას განიხილავს, მთავარ ფოკუსში კი გენდერი, სექსუალობა და იდენტობაა მოქცეული.
