დღეს ოზურგეთელმა სამოქალაქო აქტივისტებმა ოზურგეთის რაიონულ პროკურატურას განცხადებით მიმართეს. მოქალაქეები პროკურატურას სთხოვენ, დაინტერესდნენ და სამართლებრივი რეაგირება მოახდინონ ძალადობრივი დაჯგუფება ,,ალტ-ინფოს’’ მიერ შექმნილი პრორუსული პარტიის, ,,კონსერვატიული მოძრაობის’’ ერთ-ერთი ადგილობრივი წევრის მუქარასთან დაკავშირებით.
აღნიშნულმა პიროვნებამ 2022 წლის 14 მარტს, მაშინ, როცა მოქალაქეები გეგმავდნენ მშვიდობიან აქციას და აპროტესტებდნენ ოზურგეთში ,,კონსერვატიული მოძრაობის’’ ოფისის გახსნას, სოციალურ ქსელში გამოაქვეყნა იარაღის ფოტო წარწერით – ,,სამკურნალოს ვუმკურნალებთ’’, რაც პროტესტის მონაწილეებმა მუქარად აღიქვეს.
,,აქციის ორგანიზატორებს და მონაწილეებს გაუჩნდათ მუქარის განხორციელების საფუძვლიანი შიში. ძალიან მნიშნელოვანია, რომ სამართალდამცავი უწყებები დაინტერესდნენ აღნიშნული ფაქტით და მოახდინონ შესაბამისი სამართლებრივი რეაგირება, რათა მომავალში ასეთი ძალადობრივი მოწოდება და მუქარა არ იყოს წახალისებული. დაუშვებელია სამართლებრივ სახელმწიფოში ასეთი ტიპის მუქარა პასუხისმგებელი უწყებების მხრიდან რჩებოდეს რეაგირების გარეშე. აქვე მნიშვნელოვანია გავითვალისწინოთ, რომ ალტ-ინფოს საქმიანობა დაკავშირებულია ახლო წარსულში ადამიანის უფლებების ძალიან მძიმე დარღვევებთან, სავარაუდო სისხლის სამართლის დანაშაულების ჩადენასთან, რაც კიდევ უფრო ამძიმებს ვითარებას. ზემოაღნიშნულიდან გამომდინარე, გთხოვთ, დაუყოვნებლივ შეისწავლოთ განცხადებაში აღწერილი გარემოებები და მოახდინოთ შესაბამისი სამართლებრივი რეაგირება.” – ვკითხულობთ გაცხადების ტექსტში.
ფოტო მთავარზე: გურია ნიუსი
