ლეო ადეფი არგენტინელი რეჟისორი და ფოტოგრაფია, რომელიც რამდენიმე წელია ბარსელონაში ცხოვრობს და ბარსელონაში მცხოვრები ქვიარ საზოგადოების ცხოვრებას ასახავს.
მისი ნამუშევრების მთავარი თემები იდენტობა, სექსუალობა, სიყვარული, ახალგაზრდობა და ურთიერთობებია. არტისტი ბარსელონას მიწისქვეშეთში ეძებს ინსპირაციას და ცდილობს, რეალობისა და ფანტასტიკის შერწყმით შექმნას ბარსელონას ქვიარ საზოგადოების დაუვიწყარი ფოტოები.
ბუენოს-აირესში დაბადებული ფოტოგრაფი და ვიზუალური არტისტი სხვადასხვა საერთაშორისო გამოცემასთან თანამშრომლობს და სულ ახლახანს გამოაქვეყნა პირველი წიგნი, სახელწოდებით – WARP, რომელიც ბარსელონას ქვიარ საზოგადოების 200-ზე მეტ ფოტოს აერთიანებს. როგორც არტისტი ამბობს, ფოტოებს 4 წლის განმავლობაში იღებდა, წიგნის გმირები არტისტის მეგობრები, საყვარლები, მუზები და არტისტები არიან, რომლებიც ამ 4 წლის განმავლობაში გზად ხვდებოდნენ.
მის ფოტოებში იგრძნობა სიზმრისეული განწყობები და ფანტასტიკური ელემენტები, წიგნის გმირებს შორის შეხვდებით მამაკაცებს, რომლებიც ბარსელონას კლუბების ტუალეტში ტესტესტერონის მორიგ დოზას იკეთებენ, დრეგქვინებს, რომლებიც წვეულებაზე ტელეფონებს სქროლავენ და ქვიარ მამაკაცებს, რომლებიც ქვიშიან სანაპიროზე მზეს არიან მიფიცხებულები.
არტისტის სურვილი ბავშვობიდან სამყაროს უკეთ გაცნობა იყო, მასზე ყველაზე დიდი შთაბეჭდილება პირველმა მოგზაურობამ მოახდინა, როცა ბუენოს-აირესი დატოვა და სხვა კულტურას ეზიარა – მას შემდეგ ყველაფერი შეიცვალა და ახალ-ახალი ადამიანების, ადგილებისა და ემოციების აღმოჩენა მისი მთავარი საზრუნავი გახდა.
გარდა იმისა, რომ წიგნი WARP ბარსელონას ქვიარ საზოგადოების ერთგვარი ილუსტრაციაა, ამასთან ერთად, ავტორის მცდელობაა, გაიმარჯვოს თავის ტკივილებზე. როგორც ერთ-ერთ გამოცემასთან ამბობს, ადამიანებმა, რომელთა ფოტოებიც წიგნშია თავმოყრილია, ძალიან მნიშვნელოვანი როლი ითამაშეს მის ცხოვრებაში. ფოტოგრაფი მრავალი წლის განმავლობაში დადიოდა ფოტოაპარატით სხვადასხვა წვეულებაზე, ხვდებოდა ადამიანებს და მათ გადაღებას სთავაზობდა, ამ პროცესში ის არაერთ საინტერესო ადამიანს შეხვდა, რომლებთან მუშაობის დროსაც მისი ცოდნა სექსუალობაზე, გენდერსა და სიყვარულზე მნიშნელოვნად გაიზარდა.
არტისტისთვის ყველაზე საინტერესო არა კადრები, არამედ იმ ადამიანების ისტორიებია, რომლებიც მისი წიგნის გმირები არიან, მას აინტერესებს, როგორ უმკლავდებიან ქვიარ ადამიანები დამცირებას, ჩაგვრას, უთანასწორობას და როგორ აისახება ეს მათ მომავალ ცხოვრებაზე, ამ დამცირების მიუხედავად, როგორ ქმნიან ისინი საკუთარ თავს.
დამატებითი ინფორმაციისთვის ეწვიეთ არტისტის ვებ-გვერდს ან ინსტაგრამის გვერდს
