9  ქვიარ ფოტოგრაფი ინსტაგრამზე

ქვიარ ადამიანები ყოველთვის ხელოვნების წინა ფრონტზე იდგნენ. მათი წვლილი მუსიკის, კინოს, მხატვრობის, თუ ხელოვნების სხვა მიმართულების განვითარებაში ფასდაუდებელია, თუმცა, ამის მიუხედავად, ქვიარ არტისტები მაინც მარგინალიზებულები არიან.

გაიცანით 9 ქვიარ ფოტოგრაფი, რომლებიც თავიანთი ნამუშევრებით ცდილობენ, ასახონ ქვიარ გამოცდილება და ისაუბრონ ისეთ თემებზე, როგორიც სხეულის პოლიტიკა, გენდერი, სექსუალობა და იდენტობაა.

 

ჰიზერ გლაზარდი

ჩრდილოეთ ინგლისში დაბადებული და გაზრდილი კრეატიული დირექტორი და ფოტოგრაფი, ჰეზერ გლაზარდი, დღესდღეობით, ლონდონში ცხოვრობს. მისი ნამუშევრები კი აერთიანებს მოდას, ფეტიშებს და ფილმის ფოტოგრაფიას, არტისტი სხვადასხვა მედიუმის საშუალებით, ცდილობს, წარმოაჩინოს ტრანს და ქვიარ საზოგადოება. მისი ნამუშევრებით სხვადასხვა დროს ისეთი გავლენიანი გამოცემები დაინტერესებულან, როგორებიც არიან: Vice; Vogue; Hunger; Dazed და i-D. ამას გარდა, არტისტს ეკუთვნის არაერთი პროექტი ურთიერთობებისა და იდენტობების თემების გარშემო.

 

ემილ ლომბარდო

ემილ ლომბარდო წარმოშობით არგენტინელი ფოტოგრაფია, რომელიც დღეს ლონდონში ცხოვრობს. ის თვითნასწავლი ფოტოგრაფია, რომელიც, ძირითადად, პორტრეტებს იღებს. დიდ ბრიტანეთში საცხოვრებლად გადასვლამდე, არტისტი პარიზში, პიერ და მარი კიურის უნივერსიტეტში კომპიუტერულ გრაფიკას სწავლობდა. ემილის შემოქმედება სხეულის პოლიტიკის და გენდერის თემებს უკავშირდება. იგი დაინტერესებულია დისიდენტური იდენტობებით. ფოტოების გადაღებისას არტისტი ცდილობს, კავშირი დაამყაროს ადამიანებთან, რომლებსაც იღებს. ფოტოგრაფია ემილ ლომბარდოსთვის ერთგვარი საშუალებაა, აღმოაჩინოს და შეისწავლოს საკუთარი გენდერული იდენტობა.

 

ლორენს ფილომენი  

ლოურენს ფილომენი კანადელი ფოტოგრაფია, რომელიც ფოტოგრაფიის საშუალებით ექსპერიმენტებს ატარებს და იდენტობის და გენდერის თემების უკეთ შესწავლას ცდილობს. არაბინარული იდენტობის მქონე არტისტი და ფოტოგრაფი ამჟამად კანადაში საქმიანობს, მის შემოქმედებაში ასევე დიდი ადგილი ეთმობა ტრანს გამოცდილებას. სხვადასხვა დროს ლოურენს ფილომენს უთანამშრომლია ისეთ კომპანიებთან, როგორებიცაა: Apple, Netflix, Converse და VSCO.

სარა ჰინი

სარა ჰინი კიდევ ერთი კანადაში მცხოვრები არტისტია, რომელიც ცდილობს, თავისი თამამი, ძლიერი და ამასთანავე ნაზი კადრებით ასახოს მრავალფეროვნების იდეა. სარას მიზანია, მისი ფოტოები ერთგვარი ბიძგი აღმოჩნდეს, რომ საზოგადოებამ დაიწყოს საუბარი სხვადასხვა მნიშვნელოვან თემაზე. მას სჯერა, რომ არ არსებობს სწორი და არასწორი სხეული და სექსუალობა. სარა ერთ-ერთი ავტორია პროექტისა – The Womanhood Project, რომელიც სხვადასხვა არტისტის ფოტოებს აერთიანებს ქალების პრობლემებისა და ტაბუების გარშემო. პროექტის შესახებ ისეთმა გავლენიანმა გამოცემებმა დაწერეს, როგორებიც Vogue Italy, Elle Quebec და iD-Vice-ია.

 

ქრის ფილიპსი

კრის ფილიპსი ბერლინში მცხოვრები ფოტოგრაფია, რომელიც ინტიმური ავტოპორტრეტების გადაღებითაა დაინტერესებული, ამასთან ერთად, სწავლობს მამაკაცის სხეულის ფორმებს, როგორც სტუდიაში, ასევე ბუნებაში. მისი შემოქმედება ხშირად აქრობს ზღვარს მამაკაცურსა და ქალურს შორის. იგი აქტიურადაა ჩართული ერთგვარ არტისტულ მოძრაობა – Pornceptual-ში, რომელიც კრისთან ერთად სხვა არტისტებსაც აერთიანებს და მათი საერთო მიზანი ალტერნატიული nude art-ის შექმნაა. კრისი მონაწილეობას იღებს ყოველწლიურ ბერლინურ მუსიკალურ ფესტივალში – Whole, სადაც თვითგამოხატვა უმთავრესია.

 

რობ ვუდკოქსი

სახვითი ხელოვნების, ფოტოგრაფიისა და კინორეჟისურის დახმარებით, რობ ვუდკოქსი ცდილობს, საუბარი წამოიწყოს ისეთ მწვავე თემებზე, როგორიც ამერიკის მინდობით აღზრდის სისტემა, ქვიარ იდენტობა, სხეულის ნეიტრალიტეტი, რასობრივი თანასწორობა და გარემოსდაცვითი სამართლიანობაა. რობი ამერიკასა და მექსიკაში ცხოვრობს და ფოტოგრაფობა მას შემდეგ გადაწყვიტა, რაც 2013 წელს ქამინგაუთი გააკეთა. ის იმედოვნებს, რომ მისი შემოქმედების და აქტივიზმის საშუალებით, ადამიანებს უფრო მეტ ინფორმაციას მიაწვდის და მათი მიმღებლობა გაიზრდება. მისი ნამუშევრები სხვადასხვა გამოცემებშია დაბეჭდილი, 2020 წელს გამოსცა წიგნი –  “სინათლის სხეულები”.

 

 

 

ემა ვონდრა

ემა ვონდრა კიდევ ერთი არაბინარული იდენტობის ქვიარ ფოტოგრაფია, რომელიც პორტლენდში ცხოვრობს. ხშირად იღებს ქვიარ ადამიანებს საძინებელში და ცდილობს, ამ გზით გადმოსცეს მათი დაუცველი და გულწრფელი მხარე. ემა ვონდრას ნამუშევრებში ხშირად შეხვდებით კინკის და ბედუარის ესთეტიკას, მისი ფოტოები გადატვირთულია სარკეებით, სახლის მცენარებიით, სანთლებითა და ფარდებით. ქვიარ არტისტის ნამუშევრები დაბეჭდილა იტალიურ ვოგში, GirlGaze-ში, და ჟურნალ Marie Claire-ში.

 

ვიკ ლენტაინი

ვიკ ლენტაინი ფოტოგრაფიით 14 წლიდან არის გატაცებული და როგორც ერთ-ერთ ინტერვიუში ჰყვება, მას გაუმართლა, რადგან თინეიჯერობიდან წვდომა ჰქონდა დარქრუმთან, სადაც ფოტოების გამჟღავნებას და შემოქმედებით ზრდას შეძლებდა. ლონდონში მცხოვრები არტისტი თავის ფოტოებში ასახავს ქვიარ ადამიანების სილამაზეს, ძალასა და ემოციებს. სხვადასხვა დროს ვიკს უთანამშრომლია ისეთ გავლენიან ბრენდებთან, როგორებიცაა: ლუი ვიტონი, Hunger Magazine და Dickies.

ლუკას ვაიარი

„ფოტოგრაფიით გატაცება მაშინ დავიწყე, როცა ქვიარ საზოგადოების წევრი გავხდი, ეს ლონდონში მოხდა 2018 წელს. ძალიან ახალგაზრდა ვიყავი და იმ ადამიანებზე დაკვირვებამ, რომლებიც ძალიან მარტივად გამოხატავდნენ საკუთარ თავს, დიდი გავლენა მოახდინა ჩემზე. ეს გავლენა ფოტოგრაფიით გატაცებაში გადაიზარდა, ეს იყო ჩემი პასუხი იმ ყველაფერზე, რასაც ვხედავდი. ჩემთვის ქვიარობა არის ერთმანეთის დახმარება და საკუთარი თავის საზოგადოების ნაწილად აღქმა, ამ ყველაფრის აღბეჭდვა კი ძალიან მნიშვნელოვანია, რადგან მე ხშირად ვუყურებ ფოტოებს წარსულიდან, სადაც ქვიარ ადამიანები არიან ასახულები, ეს მიქმნის მიკუთვნებულობის განცდას იმ ადამიანებთან, რომლებიც არ ემორჩილებოდნენ გაბატონებულ ნორმებს. მინდა, რომ ჩემმა ფოტოებმა მომავალში იგივე ემოცია აღძრას სხვა ადამიანებში.“ – ლუკას ვაიარი.

 

წინა

ოდრე ლორდი – შავკანიანი ლესბოსელი ქალი მნიშვნელოვანი ცვლილებების სათავეში

შემდეგი

რუსეთს იმ უკრაინელების სია აქვს, რომელთა მოკვლას ან ბანაკში გაგზავნას აპირებს – აშშ-ის ელჩი გაეროში

ბოლო სიახლეები

სექსტინგი, ანუ ინტიმური სექს-მიმოწერა — რა უნდა ვიცოდეთ?

FacebookTweetLinkedInEmail ტერმინი „სექსტინგი“ არის სიტყვების „სექსი“ და „ტექსტინგი“ (ანუ „მიმოწერა“) გაერთიანება. სექსტინგი (ასევე „კიბერსექსი“ ან „ვირტუალური სექსი“) არის

რას ნიშნავს „პანსექსუალი“? — განმარტება, ისტორია და ქამინგაუთი

FacebookTweetLinkedInEmail „პანსექსუალი“ არის ტერმინი, რომელიც აღნიშნავს ადამიანს, რომელსაც რომანტიკული, სექსუალური ან ემოციური მიზიდულობა აქვს სხვა ადამიანების