ღია სივრცის თეატრალური სეზონი 27 ნოემბერს, დავით ხორბალაძის ახალი სპექტაკლით, UNMEMORY, გაიხსნება. წარმოდგენა მეხსიერების უწყვეტ გარდაქმნაზეა. დროთა განმავლობაში მეხსიერება იშლება და საბოლოოდ, მოვლენები და ფაქტები იმდენად ზიანდება, რომ, ფაქტობრივად, მათგან ხელჩასაჭიდი არაფერი რჩება. მუდმივი მხოლოდ ცვლილებაა. საინტერესოა, რამდენად ეგუება ადამიანის წარმავალი სხეული ცვალებადობას.
წარმოდგენის მთავარი სამიზნე მაყურებლის მეხსიერებაა, რომელზეც სპექტაკლი მუსიკის საშუალებით მანიპულირებს. მუსიკა, რომელიც დაუსრულებლობის შეგრძნებას ნერგავს, UNMEMORY-ის ყველაზე მნიშვნელოვანი ელემენტია. ხმებით, ალუზიური და ასოციაციებით სავსე ვიზუალური თხრობით, ჯგუფი შეეცდება, შექმნას სამყაროს მოდელი, რომელიც სტატიკურ წარსულს თავს აღწევს და თავგანწირვით ცდილობს მომავლის ფლუიდურობას შეუერთდეს.
„ღია სივრცე“ დამოუკიდებელი სახელოვნებო კომპანიაა, რომელიც მიზნად ისახავს საქართველოში ვიზუალური და საშემსრულებლო ხელოვნების განვითარებას. კომპანიის მიზანია, აღმოაჩინოს არტისტები და მისცეს მათ პროფესიული უნარ-ჩვევების განვითარების, თვითგამოხატვისა და ერთმანეთთან დაკავშირების შესაძლებლობა, შექმნას გარემო სრული შემოქმედებითი თავისუფლებისა და თვითრეალიზების მეთოდების შეუზღუდავობისთვის.
სპექტაკლის სამუშაო ჯგუფი
ამავე თემაზე: დავით ხორბალაძე ქვიარ ეგზოტიზაციის წინააღმდეგ
