გთავაზობთ თებერვლის თვის ქვიარ სერიალებს, რომლებიც უკვე გამოვიდა ეკრანებზე ან თვის ბოლომდე გამოვა.
‘RuPaul’s Drag Race: UK Versus the World’ – 1 თებერვალი
რუპოლის დრეგ ქვინების შეჯიბრმა ახალი მასშტაბი შეიძინა. 1 თებერვალს ბრიტანულ ტელეარხ BBC-ზე ”UK Versus the World”-ის პრემიერა შედგა. შოუში სხვადასხვა ქვეყნის დრეგ ქვინები იღებენ მონაწილეობას. ისინი სახალისო დავალებების შესრულებით ფულადი პრემიის და მსოფლიოში საუკეთესო დრეგ ქვინის ტიტულის მოპოვებას ცდილობენ.
შოუში მონაწილეობას სხვადასხვა ქვეყნის (ინგლისი, ირლანდია, ჰოლანდია, კანადა, ამერიკა, ტაილანდი) 9 დრეგ ქვინი იღებს და როგორც ცნობილია, შოუს შემდეგი სეზონი იმ ქვეყანაში გაიმართება, რომელი ქვეყანაც მიმდინარე სეზონში გაიმარჯვებს.
Pam & Tommy – 2 თებერვალი
Pam & Tommy კიდევ ერთი ახალი სერიალია, სადაც მოქმედება 1990-იან წლების ამერიკაში ვითარდება და პამელა ანდერსონის და მისი ქმრის, ტომი ლის, სექს სკანდალის შესახებ გვიამბობს. სერიალში ცენტრალურ ფიგურად ყოფილი პორნოვარსკლავი (სეთ როგენი) გვევლინება, რომელიც ცნობილი წყვილის თაფლობისთვის ვიდეოკასეტას მოიპარავს და გაავრცელებს.
სერიალის პირველი სამი სერია უკვე გამოვიდა მცირე ეკრანებზე და მასში მთავარ როლებს ლილი ჯეიმსი, სებასტიან სტანი და სეთ როგენი ასრულებენ.
Dollface – 11 თებერვალი
Dollface ამერიკული სერიალია, რომელიც ჯულს ვაილის და მისი სამი მეგობარი ქალის ისტორიას გვიამბობს. ხანგრძლივი ურთიერთობის დასრულების შემდეგ სერიალის მთავარი პერსონაჟი ჯულსი გადაწყვეტს, ახალი ცხოვრება დაიწყოს და აღადგინოს ურთიერთობები ძველ მეგობრებთან.
სერიალი, რომელიც ქალების მეგობრობის და ქალური სოლიდარობის უპირატესობებსა და სირთულეებზე გვიამბობს, მეორე სეზონით ბრუნდება და მასში მთავარ როლებს კეტ დენინგსი, ბრენდა სონგი და შეი მიჩელი ასრულებენ.
Inventing Anna – 11 თებერვალი
Inventing Anna ნეტფლიქსისა და შონდა რაიმსის კიდევ ერთი საერთო პროექტია, რომელიც ნამდვილ ამბებს ეფუძნება და ცნობილი თაღლითის, ანნა სოროკინას ამბავს გვიამბობს, რომელიც მრავალი წლის განმავლობაში იტყუებოდა, რომ მდიდარი მემკვიდრეა და ამ გზით ნიუ-იორკის ელიტარულ საზოგადოებაში თავისი ადგილის პოვნას და თაღლითობას ცდილობდა.
სერიალი, რომელშიც ერთ-ერთ მთავარ როლს ცნობილი ტრანსგენდერი მსახიობი ლავერნ კოქსიც ასრულებს, 11 თებერვალს გამოვა ეკრანებზე.
The Marvelous Mrs. Maisel – 18 თებერვალი
გახმაურებული ამერიკული სერიალ The Marvelous Mrs. Maisel, რომლის პრემიერაც 2017 წელს შედგა, სულ მალე მეოთხე სეზონით დაბრუნდება ეკრანებზე. სერიალში მოქმედება გასული საუკუნის 50-იან 60-იან წლებში ვითარდება და გვიამბობს მირიამ მეისელის ისტორიას, რომელიც კომედიანტობას გადაწყვეტს.
ოქროს გლობუსის და ემის არაერთგზის მფლობელი სერიალის ახალი სეზონის პრემიერა 18 თებერვალს შედგება და ყოველკვირეულად ორი სერია განთავსდება Amazon Prime-ის ვებგვერდზე.
The Proud Family: Louder and Prouder – 23 თებერვალი
The Proud Family Disney Channel-ის 2001 წლის სერიალია, რომლის 2 სეზონიც უკვე იხილა მაყურებელმა. The Proud Family: Louder and Prouder ანიმაციური სერიალის ერთგვარი გაგრძელებაა, რომელშიც 16 წლის პენი პრაუდის და მისი ოჯახის ისტორიაა მოთხრობილი.
სერიალის გაგრძელებაში ახალ პერსონაჟებს, გეი მამაკაცების ოჯახსაც შევხვდებით, რომელთა როლსაც Pose-ის მსახიობი ბილი პორტერი და ზაქარი ქუინტო ახმოვანებენ.
Killing Eve – 27 თებერვალი
Killing Eve BBC გახმაურებული ამერიკული სერიალია, რომელიც სულ მალე დაბრუნდება უკანასკნელი, მეოთხე სეზონით. სერიალი დაქირავებული მკვლელის, ვილანელის და გამომძიებელი ევა პოლასტრის რთულ და კომპლექსურ ურთიერთობაზე გვიამბობს.
სერიალი, რომელსაც არაერთი მნიშვნელოვანი სატელევიზიო ჯილდო აქვს მოპოვებული, ლუკ ჯენინგსის ამავე სახელწოდების დეტექტიური ჟანრის წიგნს ეფუძნება.
Better Things – 28 თებერვალი
Better Things კიდევ ერთი სერიალია, რომელიც წელს უკანასკნელი სეზონით დაგვიბრუნდება. სერიალი მარტოხელა დედის, სემ ფოქსის და მისი სამი ქალიშვილის ისტორიას გვიამბობს, რომლებიც ლოს ანჯელესში ცხოვრობენ.
სერიალი შავი კომედიის და დრამის ჟანრს განეკუთვნება და მისი ერთ-ერთი სიუჟეტური ხაზი სემის ნაბოლარა გოგონას გარშემო ვითარდება, რომელიც სეზონების განმავლობაში საკუთარ გენდერულ და სექსუალურ იდენტობაში გარკვევას ცდილობს.
