გასულ ღამეს ლას-ვეგასში გრემის 64-ე დაჯილდოვება გაიმართა. დაჯილდოვების ყოველწლიურ ცერემონიას ვიდეო მიმართვით უკრაინის პრეზიდენტი, ვოლოდიმირ ზელენსკიც შეუერთდა. ემოციურ მიმართვაში ის მსოფლიო მოსახლეობას კიდევ ერთხელ მოუწოდებს უკრაინის მხარდაჭერისკენ
„ომი. რა არის მუსიკის საპირისპირო? მოკლული ადამიანებისა და განადგურებული ქალაქების სიჩუმე. ჩვენი ბავშვები ციდან მოწყვეტილი ვარსკვლავების ნაცვლად, ციდან ჩამოვარდნილ ბომბებს ხატავენ. 400-მდე ბავშვი მძიმედ დაზიანდა, 153 გარდაიცვალა. ჩვენ ვეღარასდროს ვნახავთ მათ, როგორ ხატავენ. ჩვენი მშობლები ბედნიერები არიან, დილაობით ბომბებისგან დამცავ თავშესაფრებში რომ იღვიძებენ და ცოცხლები არიან. ჩვენმა საყვარელმა ადამიანებმა არ იციან, ისევ ერთად ვიქნებით თუ არა. ომი არ გვაძლევს საშუალებას, ავირჩიოთ, ვინ გადარჩება და ვინ დარჩება მარადიულ სიჩუმეში. ჩვენს მუსიკოსებს სმოკინგების ნაცვლად დამცავი ჯავშნები აცვიათ და დაშავებულებს უმღერიან საავადმყოფოებში. მათაც კი, ვისაც არ ესმით, რადგან მუსიკას შეუძლია გარღვევა. ჩვენ ვიცავთ ჩვენს თავისუფლებას – რომ ვიცხოვროთ, რომ გვიყვარდეს, რომ ისმოდეს ჩვენი ხმა. ჩვენს მიწაზე ჩვენ ვებრძვით რუსეთს, რომელსაც მოაქვს საშინელი სიჩუმე თავისი ბომბებით, მომაკვიდენებელი სიჩუმე. შეავსეთ სიჩუმე თქვენი მუსიკით, შეავსეთ დღესვე, მოჰყევით ჩვენს ისტორიას. მოჰყევით ისტორიას ამ ომზე თქვენს სოციალურ ქსელებში, ტელევიზორში. მხარი დაგვიჭირეთ ნებისმიერი ფორმით. ნებისმიერით – მაგრამ არა სიჩუმით. და მერე მშვიდობა მოვა. ყველა ქალაქში, რომელსაც ომი ანადგურებს. ჩენნიჰივი, ხარკივი, ვოლნოვახა, მარიუპოლი და სხვები. ისინი უკვე ლეგენდები არიან. მაგრამ მე მაქვს ოცნება, რომ ამ ქალაქებმა იცოცხლონ და იყვნენ თავისუფლები. ისეთი თავისუფლები, როგორიც თქვენ ხართ გრემის სცენაზე.’’
გრემის დაჯილდოვებაზე უკრაინის მხარდასაჭერად ახალი სიმღერა შეასრულა ამერიკელმა არტისტმა, ჯონ ლეგენდმა, „ძალიან მტკივნეულია იმის ნახვა, რომ დიდი სახელმწიფოები ძვირადღირებული იარაღით აწარმოებენ ომს“ – თქვა ჯონ ლეგენდმა პერფორმანსის შემდეგ. „FREE მას შემდეგ დავწერე, რაც ვნახე რუსეთის მორალურად გაუმართლებელი, ბრუტალური და უაზრო შეჭრის კადრები უკრაინაში“.
