ევროპის საბჭოს ოფისმა საქართველოში დღეს წარმოადგინა 2018-2021 წლებში განხორციელებული პროექტის „დისკრიმინაციის, სიძულვილით მოტივირებული დანაშაულისა და სიძულვილის ენის წინააღმდეგ ბრძოლა საქართველოში“ შედეგები და კვლევის „სიძულვილით მოტივირებული დანაშაული, სიძულვილის ენა და დისკრიმინაცია საქართველოში: ცოდნა და დამოკიდებულება“ ძირითადი მიგნებები, რომელიც ასევე მოიცავს მრავალფეროვნების მიმართ საზოგადოების დამოკიდებულების ცვლილებებს ბოლო სამი წლის განმავლობაში.
კვლევის ანგარიშში წარმოდგენილია საზოგადოების აღქმისა და ინფორმირებულობის შეფასება ისეთ საკითხებთან დაკავშირებით, როგორიცაა მრავალფეროვნება ქართულ საზოგადოებაში; უმცირესობებისა და მოწყვლადი ჯგუფების უფლებები; დისკრიმინაციის, სიძულვილით მოტივირებული დანაშაულისა და სიძულვილის ენის გავრცელების მასშტაბები ქართულ საზოგადოებაში და მათი გავლენა კონკრეტულ ჯგუფებზე; დისკრიმინაციის, სიძულვილით მოტივირებული დანაშაულისა და სიძულვილის ენის წინააღმდეგ არსებული ეროვნული კანონმდებლობა; სამართლებრივი დაცვის მექანიზმები და მათი ეფექტიანობა; აღნიშნულ საკითხებზე სხვადასხვა აქტორის მუშაობა.
კვლევა აჩვენებს, რომ ქართულ საზოგადოებაში არსებული მრავალფეროვნების შესახებ ინფორმირებულობის დონე და ამ საკითხის მიმართ დადებითი დამოკიდებულება 2018-2021 წლამდე პერიოდში გაზრდილია. 2018 წელთან შედარებით, საზოგადოება უფრო მეტად გათვითცნობიერებულია და მეტი მიმღებლობა აქვს უმცირესობების უფლებების მიმართ. 2018 წელს 33 %-დან 2021 წელს 47 %-მდე გაიზარდა იმ ადამიანების წილი, რომლებიც ლგბტქი თემის უფლებების დაცვას მნიშვნელოვნად მიიჩნევენ. ასევე, იმ პირთა რაოდენობა, რომლებიც თვლიდა, რომ ლგბტქი უფლებების დაცვა უმნიშვნელო იყო, შემცირდა 44%-დან 2018 წელს 29%-მდე 2021 წელს.
გამოკითხვა უმცირესობათა კონკრეტული ჯგუფების მიმართ დამოკიდებულებასაც იკვლევდა. ამასთან დაკავშირებით დასმული იყო კითხვა, მოუწონებდა თუ არა რესპონდენტი მისნაირ ადამიანს საქმიან ურთიერთობას კონკრეტული ჯგუფის წარმომადგენელთან. საერთო ჯამში, მონაცემები ამ დონეზე მიმღებლობასთან დაკავშირებით დადებით ტენდენციაზე მიუთითებს. მონაცემების მიხედვით, ამ ინდიკატორით 2018 წლიდან ტოლერანტობა 10%-ით გაიზარდა ლგბტქი ადამიანების მიმართ. რესპონდენტებს ასევე ჰკითხეს, ვის არ ისურვებდნენ მეზობლად. მონაცემები აჩვენებს, რომ მოსახლეობის წილი, რომელიც ყველაზე მეტად ლგბტქი თემის წარმომადგენლებთან მეზობლობას არ ისურვებდა, 7%-ით შემცირდა.
კვლევა ასევე მოიცავდა შეხედულებებს ლგბტქი ადამიანებისთვის მნიშვნელოვანი პრობლემების შესახებ. გამოკითხვების შედეგების მიხედვით, დამოკიდებულებებში შედარებით მცირე ცვლილება შეინიშნება. გამონაკლისია იმ რესპონდენტთა წილის კლება (8%-ით), რომლებიც მიიჩნევენ, რომ ლგბტქი ადამიანებს საქართველოში პრობლემები არ აქვთ. კვლევის ფარგლებში რესპონდენტებს ასევე ჰკითხეს ცალკეული ჯგუფების შესახებ, თუ რამდენად ხშირად იყენებენ მათ მიმართ სიძულვილის ენას საქართველოში. მონაცემები მიუთითებს, რომ, მოსახლეობის აღქმით, სიძულვილის ენის სამიზნეები ყველაზე ხშირად ლგბტქი ადამიანები ხდებიან. რესპონდენტთა თქმით, საქართველოში სიძულვილით მოტივირებული დანაშაულის მსხვერპლებიც ყველაზე ხშირად ლგბტქი ადამიანები არიან. ზოგადად, ამ მხრივ მონაცემები არსებითად არ შეცვლილა.
,,მიუხედავად იმისა, რომ საზოგადოების დამოკიდებულება მრავალფეროვნების მიმართ სულ უფრო პოზიტიური ხდება, დისკრიმინაციის, სიძულვილით მოტივირებული დანაშაულისა და სიძულვილის ენის წინააღმდეგ საქართველოს კანონმდებლობის ინფორმირებულობის კუთხით მცირე თუ რაიმე ცვლილება შეინიშნება. ასევე უცვლელი რჩება რეაგირების მექანიზმებისა და მათი ეფექტიანობის შესახებ ინფორმირებულობა და შეხედულებები.” – ვკითხულობთ ევროპის საბჭოს საქართველოს ოფისის გვერდზე გამოქვეყნებულ განცხადებაში.
კვლევის სრული ანგარიში „სიძულვილის ენა, სიძულვილის დანაშაულები და დისკრიმინაცია საქართველოში: დამოკიდებულებები და ცნობიერება 2021 წელს“ ხელმისაწვდომია აქ ინგლისურ და ქართულ ენებზე.
წყარო: ევროპის საბჭოს ოფისი საქართველოში
ფოტო: ტბელ აბუსერიძე
