ვალენტინობის დღესთან დაკავშირებით, პოპულარული ვიდეო თამაშის, The Sims 4-ის ახალ ვერსია, My Wedding Stories გამოჩნდება
ვიდეო თამაშების კომპანია EA-მ (Electronic Arts) ინტერნეტში ახალი ტრეილერი გაავრცელა, რომელშიც ლესბოსელი წყვილის ქორწინების ისტორიაა მოთხრობილი.
მოქმედება სიმსურ სამყაროში ვითარდება და ფონად ეტა ჯეიმსის სიმღერის, At Last-ის სიმსური ვერსია ადევს. ტრეილერი ორი ქალის ისტორიას გვიამბობს, რომლებიც დაქორწინებას და ოჯახის შექმნას გადაწყვეტენ.
პოპულარული ვიდეო თამაშის ფანებს ეს ფაქტი არ გამორჩენიათ და ინტერნეტში უკვე გაჩნდა უამრავი კომენტარი.
ვიდეოთამაშის ახალ ვერსიაში გეიმერებს, განახლებული ფუნქციების საშუალებით, შეეძლებათ, შექმნან სიყვარულის დაუვიწყარი ისტორია, შეახვედრონ სიმსები ერთმანეთს, დაგეგმონ იდეალური ქორწილი და თაფლობისთვე.
როგორც EA-ს წარმომადგენელი ამბობს, კომპანიამ ძალიან ბევრი კონსულტაცია გაიარა სხვადასხვა ჯგუფთან და ეცადნენ, თამაშის ახალი ვერსია უფრო მეტად მორგებული ყოფილიყო მრავალფეროვანი საზოგადოების საჭიროებებსა და მოთხოვნებს.
My Wedding Stories 17 თებერვლიდან იქნება ხელმისაწვდომი სხვადასხვა ელექტრონული მოწყობილობისთვის. (PC, Mac, Xbox one, Xbox Series X, PS4, PS5)
Sims სოციალური, სიმულაციური ვიდეოთამაშია, რომელიც პირველად 2000 წელს გამოვიდა და დღემდე თამაშის 200 მილიონზე მეტი დისკია გაყიდული. ვიდეოთამაშის საშუალებით მომხმარებელს შეუძლია, შექმნას სიმსი და აკონტროლოს მისი ცხოვრება ვირტუალურ სამყაროში.
