ანალური სექსი

რას ნიშნავს „აქტი“, „პასი“, „უნი“ და „საიდი“?

ალბათ, Tinder-ზე, Grindr-ზე ან ონლაინ გაცნობის სხვა აპლიკაციებში ხშირად შეგიმჩნევიათ პროფილში მითითებული ფრაზა „აქტი ვარ“ ან „პასი ვარ“. შესაძლოა, იცოდეთ, რომ ეს რაღაცნაირად სექსუალურ პრეფერენციებს უკავშირდება, თუმცა ზუსტად რას ნიშნავს, იყო „აქტი“,

როგორ გვქონდეს ანალური სექსი პასიურ როლში — რჩევები დამწყებებს

გეი სექსზე საუბრისას, „პასი“ („პასიური“, იგივე „ბოთომი“; ინგლ. Bottom) არის ის, ვისაც, ჩვეულებრივ, სექსში ძალაუფლების და კონტროლის გაცემა სურს. როგორც წესი, პასები ანალურ სექსში „მიმღების“ როლს ასრულებენ. თუმცა, ეს მხოლოდ გამარტივებული განმარტებაა. „პასი“, „აქტი“ თუ გეი სექსის როლებთან ასოცირებული სხვა

სექსუალური განათლების 8 ფაქტი ქვიარ მოზარდებისთვის

სექსუალური განათლება, განსაკუთრებით კი ლგბტქი სექსუალური განათლება, თითქმის არ არის ხელმისაწვდომი მოზარდებისთვის საქართველოში, სადაც სექსიც და ქვიარობაც ტაბუდადებული თემებია. კვლევები აჩვენებს, რომ ლგბტქი მოზარდები

როგორ გვქონდეს ანალური სექსი პასიურ როლში — რჩევები დამწყებებს

გეი სექსზე საუბრისას, „პასი“ („პასიური“, იგივე „ბოთომი“; ინგლ. Bottom) არის ის, ვისაც, ჩვეულებრივ, სექსში ძალაუფლების და კონტროლის გაცემა სურს. როგორც წესი, პასები ანალურ სექსში „მიმღების“ როლს ასრულებენ.

თუმცა, ეს მხოლოდ გამარტივებული განმარტებაა. „პასი“, „აქტი“ თუ გეი სექსის როლებთან ასოცირებული სხვა ტერმინები, უბრალოდ, სექს-პარტნიორების პოვნის გასამარტივებლად გამოიყენება. ისინი არ განსაზღვრავს ადამიანს ბუნებას ან რაიმე პიროვნულ მახასიათებლებს, თუკი ადამიანი თავად არ ისურვებს ამას.

ამ და სხვა როლებზე მეტი ინფორმაციის მისაღებად იხილეთ სტატია: რას ნიშნავს „აქტი“, „პასი“, „უნი“ და „საიდი“?

როგორ გავიგო, მომეწონება თუ არა „პასობა“?

ბევრისთვის „პასობა“ თავიდან საკმაოდ არაკომფორტულია. ყველა ტიპის სექსი ასეთია, როდესაც ჯერ კარგად არ იცი, რას აკეთებ. თუმცა, იმედს ნუ გადაიწურავთ. გამოცდილებასთან ერთად სიამოვნებაც მოდის — როდესაც მიხვდებით, ზუსტად რა და როგორ მოგწონთ, „პასობამ“ შეიძლება ძალიანაც მოგხიბლოთ.

რატომ მრცხვენია „პასობის“?

ალბათ, ხშირად გსმენიათ, რომ „პასობა“ ადამიანს „ქალად“ ან „უფრო მეტად გეიდ“ აქცევს. ჩვენ ქალთმოძულე, პატრიარქალურ კულტურაში ვცხოვრობთ, რომელშიც კაცის ფემინურობა ან მისი რაიმე ფორმით ფემინურ როლში წარმოჩენა საზოგადოების მხრიდან სამარცხვინო რამედ მიიჩნევა და ბევრისთვის სექსში კაცის „პასიურობა“ ყველაზე ფემინურ აქტადაა მიჩნეული.

ასეთ გარემოში ყოფნის გათვალისწინებით, ზოგჯერ რთულია, საკუთარ თავს თავისუფლება მისცე და ისეთად მიიღო, როგორიც არის. პირველ ყოვლისა: აბსოლუტურად არაფერია სამარცხვინო ან არასწორი იმაში, რომ იყო ფემინური. ასევე, არაფერი სამარცხვინო და არასწორი არ არის გეობასა თუ ქვიარობაში. თუნდაც ამის ახლა არ გჯეროდეთ, მიეცით საკუთარ თავს მეტი დრო, მეტი იფიქრეთ იმაზე, თუ ვინ ხართ დამოუკიდებლად, საზოგადოების აზრებისგან განურჩევლად და მეტი დრო გაატარეთ ლგბტქი ადამიანებთან — ისინი აუცილებლად დაგეხმარებიან.

ის, თუ რა გიზიდავთ სექსში, საერთოდ არაფერს ამბობს თქვენს სოციალურ მნიშვნელობაზე, ძალაუფლებაზე, მასკულინურობასა და ფემინურობაზე, გენდერულ იდენტობაზე, მიმზიდველობასა თუ სასურველობაზე ან თქვენს ღირსებაზე. სექსი, უბრალოდ, სექსია. აკეთეთ ის, რაც მოგწონთ, და ისიამოვნეთ. ეს მხოლოდ და მხოლოდ თქვენი პირადი გადაწყვეტილები და საქმეა.

როგორ მოვემზადო ანალური სექსისთვის, როცა „პასი“ ვარ?

ბევრი ადამიანი პასიურ როლში ანალურ სექსამდე გამორეცხვას იკეთებს. გამორეცხვა გულისხმობს სწორი ნაწლავის ქვედა ნაწილის — ანუსის ხვრელის შიგნით არსებული სივრცის გამოსუფთავებას წყლის მეშვეობით, რათა სექსამდე ის განავლისგან დაიცალოს. ამის გაკეთების ყველაზე მარტივი გზა ოყნის გამოყენებაა, რომლის შეძენაც აფთიაქებში შეგიძლიათ.

თუკი გამორეცხვაში ახალბედა ხართ, დაიწყეთ ნელა. დაწყებამდე ოყნა ნელ-თბილი წყლით გაავსეთ (და არა — ცხელით), ოყნის თავზე წაუსვით სხეულისთვის უსაფრთხო ლუბრიკანტი (მაგალითად, სილიკონის საფუძველზე დამზადებული) და ოყნის თავი ნელა მოათავსეთ თქვენს ანალურ ხვრელში. ნაზად მოუჭირეთ ოყნას, რა დროსაც თქვენი სწორი ნაწლავი ნელ-ნელა გაივსება წყლით.

გაითვალისწინეთ: აუცილებელი არაა, შიგნით დიდი რაოდენობით წყალი შეისხათ. ყოველ შემთხვევაში, მაშინ, როცა დამწყები ხართ. ამ დროს ბევრი არ გჭირდებათ და ოყნის მთლიანად ჩაცლა არ არის საჭირო.

ამის გაკეთების შემდეგ შეიძლება იგრძნოთ, რომ თქვენი უკანალი რაღაც უცნაურადაა, თითქოს „სავსეა“. წყალი რამდენიმე წამის განმავლობაში გაიჩერეთ, შემდეგ კი ნელა გამოათავისუფლეთ უნიტაზში. ეს პროცესი გაიმეორეთ მანამ, სანამ გამოთავისუფლებული წყალი სუფთა არ იქნება.

რამდენიმე რჩევა უსაფრთხოებისთვის:

  • გამორეცხვა გააკეთეთ ნელა.
  • ხვრელში ოყნის თავი ბოლომდე არ შეყოთ — ამის საჭიროება არ არის და თუკი ფრთხილად არ იქნებით, შეიძლება რაიმე დაიზიანოთ.
  • დარწმუნდით, რომ წყალს ბოლომდე გამოათავისუფლებთ უნიტაზში — ანალურ ხვრელში დარჩენილმა წყალმა შეიძლება მოგვიანებით დისკომფორტი შექმნას.

თუკი ბოლომდე გასუფთავებას ვერ ახერხებთ, ნუ შეშინდებით. ანალური სექსი ყოველთვის მოიცავს იმის ალბათობას, რომ შეიძლება განავალთან მოგიწიოთ რაიმე ფორმით შეხება. კი, საკმაოდ გამოსუფთავება შესაძლებელია, თუმცა პასიური ანალური სექსისთვის სრულყოფილი სისუფთავე საჭირო არ არის. ბევრ ადამიანს, მათ შორის სამედიცინო პროფესიონალს, მიაჩნია, რომ გამორეცხვა საერთოდ არ არის საჭირო და საკმარისია ანუსის მობანა საპნითა და წყლით, სექსის დროს ძირს პირსახოცის დაფენა და აქტის შემდეგ მოსუფთავება. განურჩევლად იმისა, თუ რას იზამთ, საკუთარი სხეულის ბოლომდე მართვა არ შეგიძლიათ. უბრალოდ, დატკბით პროცესით.

რაც უფრო მეტად გაიწაფებით, სავარაუდოდ, თქვენი გამორეცხვის რეჟიმი შეიცვლება. შეიძლება, ისწავლოთ ახალი მეთოდები, იპოვოთ ახალი მასალები ან, საერთოდაც, აღმოაჩინოთ, რომ გამორეცხვა საერთოდ არ გჭირდებათ (ან არ გინდათ). ბევრი ადამიანი ანალურ სექსამდე ამას საერთოდ არ აკეთებს და გამორეცხვა ყოველთვის არ არის საჭირო პასიურ როლში სასიამოვნო გამოცდილების მისაღებად.

რა მოხდება, თუკი „სუფთა“ არ ვარ?

მაშინ, უბრალოდ, არ ხართ „სუფთა“, მეტი არაფერი. ნუ ჩავარდებით პანიკაში. ნუ დაუძახებთ საკუთარ თავს ან თქვენს სექსს „წარუმატებელს“. ცხოვრებაში ბევრი სექსუალური გამოცდილება გექნებათ, როდესაც გეგონებათ, რომ სუფთა ხართ, სანამ აღმოაჩენთ, რომ თქვენს სხეულს სხვა გეგმები ჰქონდა. ეს „წარუმატებლობა“ არ არის. თქვენი სხეული, უბრალოდ, თავის საქმეს აკეთებს.

შესაძლოა, საათობით აკეთოთ გამორეცხვა და მაინც არ იყოთ ბოლომდე „სუფთა“. თუმცა, პირველ ყოვლისა, გამორეცხვა საათობით საერთოდ არ უნდა აკეთოთ. ანალური ხვრელის გამორეცხვამ შეიძლება დაარღვიოს მიკროფლორა და გამოაშროს ნაწლავში არსებული კარგი ბაქტერიები, რომლებიც საკვების ნარჩენების გადასამუშავებლადაა საჭირო. სწორედ ამიტომ, დიდი ხნის განმავლობაში გამორეცხვა ჯანმრთელობისთვის არ არის რეკომენდებული. ამავე მიზეზით, უმჯობესია, თუკი გამორეცხვას ყოველდღიურად არ გაიკეთებთ.

ერთადერთი, რაც შეგიძლიათ მართოთ, არის თქვენი კვების რაციონი. ჯანსაღი საკვების მიღება, რომელიც მდიდარია ბოჭკოვანი ნივთიერებებით და ნაკლებად შეიცავს წითელ ხორცს, ბევრად გაამარტივებს გამორეცხვის პროცესს.

ანალური სექსი მტკივნეულია?

პირველ ცდაზე, შესაძლოა, ასეც იყოს. საწყის ეტაპზე „პასობა“ იშვიათადაა სასიამოვნო გამოცდილება, რადგან ამ დროს არ იცით, რას აკეთებთ. „რატომ მტკივა?“ — იმიტომ, რომ ანალური ხვრელის კედლებს უწევს გაფართოება, რათა მოერგოს პენისს, დილდოსა თუ სხვა ნივთს. ეს შეიძლება მტკივნეული იყოს — განსაკუთრებით მაშინ, როცა დამწყები ხართ. მაგრამ არ ინერვიულოთ: როცა ამაში უფრო მეტად გაიწაფებით, შეგრძნებაც ბევრად უფრო სასიამოვნო გახდება.

გახსოვდეთ, რომ ანალური სექსის დროს ძალიან მნიშვნელოვანია ლუბრიკანტის დიდი რაოდენობით გამოყენება. ლუბრიკანტი ამარტივებს პენეტრაციას, ამცირებს ანალური ხვრელის კედლების დაზიანების ალბათობას და აუმჯობესებს შეგრძნებას.

არცერთი სექსი არაა იდეალური, როდესაც ახალბედა ხართ. საკუთარი სექსუალური უნარ-ჩვევების გაუმჯობესებას დრო, გამოცდილება და ვარჯიში სჭირდება. შეგიძლიათ, ანალურ სექსამდე წინასწარ ივარჯიშოთ ანალური ხვრელის გაფართოებაზე. ეს აუცილებელი არ არის, თუმცა ბევრად უფრო გაგიმარტივებთ სექსის პროცესს. შეგიძლიათ, დაიწყოთ თითით, შეაჩვიოთ ანუსი გაფართოებას და ამ შეგრძნებასთან თქვენც უფრო კომფორტულად იგრძნოთ თავი.

ასევე შეგიძლიათ შეიძინოთ ანალური საცობები, ე.წ. „ბატ-პლაგები“ (ინგლ. Butt-plug), სხვადასხვა დიამეტრით, სასურველია გლუვი, რბილი სილიკონისგან დამზადებული. წაუსვით დიდი რაოდენობით ლუბრიკანტი (სილიკონის სექს-სათამაშოების შემთხვევაში გამოიყენეთ წყლის ლუბრიკანტი) და ნელა შეაცურეთ ანალურ ხვრელში. ყურადღება გაამახვილეთ შეგრძნებაზე და ნელ-ნელა შეეჩვიეთ მას. თუკი ტკივილს იგრძნობთ, გაჩერდით, ღრმად ჩაისუნთქ-ამოისუნთქეთ, მოდუნდით და როცა მზად იქნებით, განაგრძეთ. რამდენიმე კვირის განმავლობაში (ან იმდენი ხნის, რამდენიც საჭიროა საიმისოდ, რომ კომფორტულად იგრძნოთ თავი) პატარა საცობის გამოყენების შემდეგ შეგიძლიათ გადახვიდეთ ოდნავ უფრო დიდი ზომის საცობზე, ნელ-ნელა გაზარდოთ ზომა და სისწრაფე — თუმცა, გახსოვდეთ, რომ მთავარია, შეგრძნებით დატკბეთ. თუკი ეს აქტივობა სასიამოვნო არ არის, შეწყვიტეთ.

ასეთი ვარჯიშების დროს თქვენ თქვენს ანალურ ხვრელს ასწავლით, როგორ გაფართოვდეს, საკუთარ თავს კი მოდუნებასა და სიამოვნებით დატკბობაში ავარჯიშებთ. სხეული ბუნებრივად იწყებს კუნთების შეკუმშვას, თუკი არაკომფორტულად გრძნობს თავს. საკუთარი გონებისა და სხეულის მოდუნებაში ვარჯიში, რომ ენდოთ თქვენს პარტნიორს და მიიღოთ სიამოვნება, ამ „მოგზაურობის“ მნიშვნელოვანი ნაწილია.

ანალური სექსის ანატომია

ანალური სექსის უფრო სიღრმისეულად გასააზრებლად მნიშვნელოვანია ჯერ იმის გაგება, სხეულის რომელი ნაწილები მონაწილეობს ამ პრაქტიკაში, რათა გაიგოთ მათი ფუნქციები და მახასიათებლები. სხეულის ეს ნაწილებია:

  • ანუსი: საჭმლის მომნელებელი ტრაქტის ბოლოში არსებული ხვრელი, რომლითაც ხდება სხეულიდან განავლის გამოსვლა. ის შედგება კანის შრეებისგან, რამდენიმე ნერვული დაბოლოებით, რის გამოც ანუსი განსაკუთრებით მგრძნობიარეა.
  • სწორი ნაწლავი: საჭმლის მომნელებელი სისტემის ბოლო ნაწილი, ლორწოვანი გარსით დაფარული მილი, რომელიც ანუსის ზემოთ მდებარეობს. ის უფრო ნაკლებად მგრძნობიარე უბანია.
  • ანალური სფინქტერი (მომჭერი კუნთი): კუნთოვანი რგოლი, რომელიც ანუსს დახურულ მდგომარეობაში ამყოფებს. მას ავტონომური ნერვული სისტემა მართავს, თუმცა ასევე შესაძლებელია მისი სურვილისამებრ მოდუნება და შეკუმშვა.

თუ პარტნიორის ანუსის სტიმულაცია გსურთ ხელით

თუკი პარტნიორი ღიაა ხელით ანალური სტიმულაციის მიმართ და სურს ამის ცდა, შეგიძლიათ, სცადოთ:

  • ანუსის ირგვლივ კანზე შეხება და ნაზი მასაჟის გაკეთება.
  • ანუსის პენეტრაცია (შეღწევა) თითებით. გაითვალისწინეთ, რომ ანუსის პენეტრაციისას უმჯობესია, ფრჩხილები დაჭრილი გქონდეთ, რადგან დაუჭრელი ფრჩხილები ზრდის იმის ალბათობას, რომ ანუსის თხელი და ფაქიზი კანი დაზიანდება და ბაქტერიების გავრცელების შანსი გაიზრდება.
  • თუ თქვენს პარტნიორს პენისი აქვს, ანუსის პენეტრაციისას ასევე შეგიძლიათ მისი პროსტატის სტიმულაცია, რომელიც ანალურ ხვრელში დაახლოებით 5 სმ-ის სიღრმეზეა, წინა კედელზე, და შეგრძნებითად პატარა ბურთულას წააგავს. შეგიძლიათ სცადოთ წრიული მოძრაობა, დაჭერა/მიწოლა (სცადეთ სხვადასხვა ინტერვალი და იპოვეთ ისეთი, რომელიც პარტნიორს მოსწონს) ან მორკალული თითებით ნაზი „მოქაჩვითი“ მოძრაობა.

თუ პარტნიორს რიმინგი სურს

ხშირად დასმული კითხვები

რა არის რიმინგი? რიმინგი (ინგლ. Rimming), იგივე ანილინგუსი, არის პირითა და ენით ანუსის სტიმულაცია (ორალურ-ანალური სექსი).

პირში განავალი არ მოხვდება? არ მოგატყუებთ — ამის ალბათობა არსებობს. რბილი ნაჭრით და საპნითა და წყლით ჩამობანა, როგორც წესი, საკმარისია ანუსიდან ფეკალური მასის ნარჩენების მოსაშორებლად.

როგორ მოვიქცე, თუ იქ თმა დამხვდა? დიდი არაფერი, ეს უბრალოდ თმაა. თუ პარტნიორს საჯდომისა და ანუსის გაპარსვა არ სურს, ეს მისი საქმეა, თუმცა თუ ეს თქვენთვის მაინც არაკომფორტულია, არ ხართ ვალდებული, გააკეთოთ რიმინგი.

ენით შეღწევა საჭიროა თუ პენეტრაციის გარეშე სჯობს? ყველაფერი თქვენი და პარტნიორის კომფორტსა და სურვილებზეა დამოკიდებული. ენა არავითარ შემთხვევაში არ უნდა შეყოთ იქ, სადაც არ გსურთ ან თქვენს პარტნიორს არ სურს. თუ პარტნიორს ამის სურვილი აქვს, ენის ნაცვლად ანუსში პენეტრაცია შეგიძლიათ თითებით ან ანალური საცობით.

ტექნიკა

სცადეთ შემდეგი მოძრაობები:

  • დაიწყეთ პარტნიორის დუნდულების ალოკვითა და კოცნით.
  • ენა ბრტყლად, მოდუნებულ მდგომარეობაში დადეთ ანუსის ხვრელის ქვემოთ და ნელა აუსვით ზემოთ და ქვემოთ.
  • ენა გაამყარეთ და ენის წვერით წრეები შემოხაზეთ ხვრელის ირგვლივ. თავიდან სულ ოდნავ დააწექით, შემდეგ კი, სიამოვნების ზრდასთან ერთად, ნელ-ნელა უფრო ძლიერად და სწრაფად გააგრძელეთ.
  • თუკი პარტნიორს პენეტრაციაზე შეუთანხმდით, სწორედ ახლაა იმის დრო, რომ ნაზად შეყოთ ანუსში ენა, თითი ან სექს-სათამაშო.
  • გააგრძელეთ ენის გამოყენება დუნდულებზე, დუნდულებს შორის ან შორისზე (უბანი ანუსსა და გენიტალიას შორის), სანამ პარტნიორი არ დაკმაყოფილდება.

პოზა ანალური სექსისთვის

სექსის ასობით სხვადასხვა პოზა არსებობს, თუმცა როდესაც სექსით პირველად კავდებით, ეროტიკული ტანვარჯიშისთვის შესაფერისი დრო არ არის. ამიტომ, უმჯობესია, თუკი კარგად ნაცადი და მარტივი პოზით დაიწყებთ, როგორიცაა, მაგალითად, „დოგი-სთაილი“ (ინგლ. Doggy-style). საამისოდ ის, ვინც პენეტრაციის მიმღებია, დგება ოთხზე და მუხლებს ოდნავ განზე შლის. მას შეუძლია, ხელები ბოლომდე გაშალოს, დაეყრდნოს მათ და უკანა ტანი უფრო სწორად დაიჭიროს, ან წინ გადაწვეს, თავი ჩამოდოს ხელებზე ან ბალიშზე და ზურგი უფრო მეტად „ჩატეხოს“. პენეტრაციის გამცემს შეუძლია პარტნიორის უკან მუხლებზე დადგეს და ანუსის პენეტრაცია მოახდინოს თითებით, პენისით ან სექს-სათამაშოთი. ეს პოზა ასევე მოსახერხებელია ანუსის ორალური სტიმულაციისთვისაც.

თანხმობა აუცილებელია

სექსზე თანხმობაში იგულისხმება მიმდინარე, ენთუზიაზმითა და საკუთარი სურვილით გაცხადებული თანხმობა სქესობრივ აქტში მონაწილეობაზე, რომელიც გაიცემა აქტამდე.

თანხმობა საჭიროა:

  • ნებისმიერ სქესობრივ აქტივობამდე (მათ შორის კოცნამდე)
  • ნებისმიერ ახალ სქესობრივ აქტივობამდე (რადგან ერთ რამეზე დათანხმება არ ნიშნავს, რომ თანხმდებით/გთანხმდებიან სხვა რამეზეც)

გარდა იმისა, რომ ეს სამართლებრივად და ეთიკურადაა საჭირო, სექსუალურ პარტნიორთან სექსამდე და სექსის დროს გადამოწმება დაგეხმარებათ, შექმნათ უფრო უსაფრთხო გარემო, რომელშიც სექსი ყველა მონაწილისთვის სასიამოვნო და დადებითი გამოცდილებაა, რომელსაც საფუძვლად პატივისცემა და ურთიერთგაგება უდევს.

თანხმობის მისაღებად შეგიძლიათ რამდენიმე შეკითხვა დასვათ:

  • „შეიძლება, გაკოცო?“
  • „შეგვიძლია, [სექსუალური აქტივობა] ვქნათ?“
  • „შეიძლება, ტანზე გაგხადო?“
  • „მინდა, რომ [სექსუალური აქტივობა] ვცადო(თ). რას იტყვი?“
  • „შეიძლება, [სხეულის ნაწილი]-ზე შეგეხო?“
  • „თავს როგორ გრძნობ?“
  • „კომფორტულად ხარ?“
  • „ეს გსიამოვნებს/მოგწონს?“
  • „ხომ არ გავჩერდე?“
  • „შეიძლება, შიშველი ფოტო (ე.წ. „ნუდი“) გამოგიგზავნო?“

ალბათ, ფიქრობთ, შეიძლება თუ არა თანხმობა იყოს უსიტყვო. ნაგულისხმევი თანხმობა ცოტა ჩახლართული რამაა, რადგან ადამიანმა შეიძლება არასწორად გაიგოს სხვისი ქცევები თუ მინიშნებები, ამიტომ უმჯობესია, თუ თანხმობას სიტყვიერად მიიღებთ.

კომუნიკაცია კარგი სექსის წინაპირობაა

ყველაზე სასიამოვნო გამოცდილებისთვის საჭიროა, რომ პარტნიორთან კომუნიკაცია გასცდეს მხოლოდ თანხმობის მიღების ფარგლებს. ეს ნიშნავს, რომ:

  • უთხრათ თქვენს პარტნიორს, სად და როგორ მოგწონთ შეხება
  • ჰკითხოთ თქვენს პარტნიორს, სად და როგორ მოსწონს შეხება
  • ჰკითხოთ/იცოდეთ/გამოიყენოთ ის სიტყვები, რომლებიც თქვენს პარტნიორს სექსის დროს მოსწონს
  • თქვენ და თქვენი პარტნიორი ერთსა და იმავე აზრზე იყოთ დაცულ სექსთან დაკავშირებით

რამდენად უსაფრთხოა ანალური სექსი და როგორ დავიცვათ თავი?

ანალურ სექსს ისეთივე რისკები ახლავს თან, როგორიც ვაგინალურ სექსს, თუკი სქესობრივი გზით გადამდებ ისეთ ინფექციებზეა (სგგი-ებზე) საუბარი, როგორებიცაა, მაგალითად, ქლამიდია და გონორეა.

აივ-ის შემთხვევაში, ანალური სექსი ცოტა უფრო სარისკოა სექსის სხვა ფორმებთან შედარებით, განსაკუთრებით მიმღები პარტნიორისთვის, თუმცა სგგი-ებით დაინფიცირების რისკის შემცირება უამრავი გზითაა შესაძლებელი. ამისთვის:

  • ყოველ ჯერზე გამოიყენეთ პრეზერვატივი და სხვა ბარიერული მეთოდები, მათ შორის:
    • სტომატოლოგიური კაშხლები. ეს არის ლატექსის ან პოლიურეთანის ნაჭერი, რომლის გამოყენებაც შეგიძლიათ კუნილინგუსის ან რიმინგის (ინგლ. Rimming — ანუსის სტიმულაცია პირისა და ენის მეშვეობით) დროს.
Healthline
    • გარე პრეზერვატივი. ის ფარავს პენისის თავსა და ტანს და გამოიყენება „პენისი ვაგინაში“ ან „პენისი ანუსში“ ტიპის სექსის დროს, ასევე, მინეტის გაკეთებისას.
Healthline
    • შიდა პრეზერვატივი. იდგმება ვაგინის ან ანუსის შიგნით და გამოიყენება „პენისი ვაგინაში“ ან „პენისი ანუსში“ ტიპის სექსის დროს.
Healthline
    • ხელთათმანები ან თითის პრეზერვატივები. მათ შეუძლიათ დაგიცვან სასქესო ორგანოების ხელით სტიმულაციის დროს, მაგალითად, ანალური „ფინგერინგის“ (ინგლ. Fingering), „ჰენდჯობის“ (ინგლ. Handjob) ან ანუსის თითით სტიმულაციისას. მათი გამოყენება უფრო კომფორტულია ლუბრიკანტთან ერთად.
  • გამოიყენეთ ლუბრიკანტი — ბევრი, ბევრი და ბევრი. ინტიმური ლუბრიკანტი ძალიან გამოსადეგია ნებისმიერი ტიპის პენეტრაციული სექსის დროს, რადგან ის ამცირებს ვაგინისა თუ ანუსის შიდა კედლების დაზიანებისა და გაღიზიანებს რისკს. ის განსაკუთრებით მნიშვნელოვანია ანალური სექსის დროს, რადგან ანუსს, ვაგინისგან განსხვავებით, არ აქვს ბუნებრივი სისველე.
  • დაიცავით ხელის ჰიგიენა. როდესაც საქმე სასქესო ორგანოების ხელით სტიმულაციას ეხება, ხელის ჰიგიენა ძალიან მნიშვნელოვანია. ყოველთვის დაიბანეთ ხელები სექსამდე, რათა ხელი არ შეუწყოთ მიკრობების გავრცელებას. ასევე, მიზანშეწონილია ფრჩხილების დაჭრა, თუკი თითებით აპირებთ პარტნიორის პენეტრაციას. ეს ამცირებს შიდა ქსოვილების დაზიანების რისკს, რაც ხშირად მტკივნეულია და ხელს უწყობს ინფექციების გავრცელებას.
  • ხშირად შეემოწმეთ სგგი-ებზე.
  • ესაუბრეთ პარტნიორს მისი სგგი-ების სტატუსისა და ტესტირების შესახებ.
  • აივ-ინფექციის პრევენციის მიზნით, დაფიქრდით პრეექსპოზიციური პროფილაქტიკის (ე.წ. „პრეპის“; ინგლ. PrEP) გამოყენებაზე. „პრეპის“ პროგრამაზე მეტი ინფორმაციის მისაღებად იხილეთ ჩვენი სტატია ამ თემაზე.

ანალური სექსის დროს მარტივად შეიძლება გაჩნდეს პატარა ნახეთქები (ნაპრალები) ანალური ხვრელის კედლებზე, შიგნით, რადგან ისინი საკმაოდ ფაქიზია. თუკი „პასობაში“ ახალბედა ხართ ან თუ ჯერ არ გაგივარჯიშებიათ ანალური ხვრელი, ტკივილისა და ნახეთქების გაჩენის რისკი უფრო მაღალია. მართალია, პატარა ნახეთქები დამოუკიდებლად და სწრაფად ხორცდება, თუმცა უფრო დიდმა ნახეთქებმა შეიძლება წვის ან ქავილის შეგრძნება გაგიჩინოთ. ასეთ დროს, უმჯობესია, მიმართოთ ექიმს.

მართალია, ანალური სექსის დროს გაჩენილი ნახეთქები იშვიათადაა მტკივნეული, თუმცა ისინი ინფექციების გავრცელების რისკს ზრდის. დაუცველი ანალური სექსი ძალიან სარისკოა სგგი-ების გავრცელების თვალსაზრისით, ამიტომაც მნიშვნელოვანია, გამოიყენოთ კონტრაცეფცია, მაგალითად, პრეზერვატივი ან „პრეპი“ (ან, სულაც, ორივე ერთად).

ზოგადი რჩევაა, რომ რეგულარულად შეემოწმოთ სგგი-ებზე. ბევრს სგგი-ს სიმპტომები შეიძლება საერთოდ არ გამოუვლინდეს, რაც იმას ნიშნავს, რომ ვერ მიხვდებით, თუ ინფიცირებული ხართ, ამიტომაც მნიშვნელოვანია, ხშირად გაიაროთ ტესტირება და პარტნიორ(ებ)საც ამისკენ მოუწოდოთ.

წყაროები:

რას ნიშნავს „აქტი“, „პასი“, „უნი“ და „საიდი“?

ალბათ, Tinder-ზე, Grindr-ზე ან ონლაინ გაცნობის სხვა აპლიკაციებში ხშირად შეგიმჩნევიათ პროფილში მითითებული ფრაზა „აქტი ვარ“ ან „პასი ვარ“. შესაძლოა, იცოდეთ, რომ ეს რაღაცნაირად სექსუალურ პრეფერენციებს უკავშირდება, თუმცა ზუსტად რას ნიშნავს, იყო „აქტი“, „პასი“ ან „უნი“ სექსის დროს?

„აქტი“, „პასი“ და „უნი“ არის ტერმინები, რომლებითაც ადამიანის სექსუალური პრეფერენციები აღიწერება. ყველაზე პირდაპირი და მარტივი განმარტებაა, რომ „აქტს“, ანუ „ტოპს“, მოსწონს, როდესაც თვითონ აკონტროლებს სიტუაციას, რაც ხშირად გულისხმობს პენეტრაციულ (შემღწევ) სექსში აქტიურობას და გამცემობას, ხოლო „პასს“, ანუ „ბოთომს“, უნდა, რომ კონტროლის სადავეები რაღაც დონეზე სხვას დაუთმოს, რაც ხშირად გულისხმობს პენეტრაციულ სექსში პასიურობას და მიმღებობას. მათთვის, ვინც „უნი“, ანუ „ვერსია“, ორივე პოზიცია და ძალაუფლების დინამიკა თანაბრად სასურველია. ცხადია, ეს მხოლოდ გამარტივებული (და ცოტა მოძველებული) პასუხია, რადგან ყველა ადამიანს თავისი პირადი საზღვრები და პრეფერენციები აქვს.

ზოგი თეორიის თანახმად, ქვიარ თემმა სექსუალური პრეფერენციების აღსაწერად „ტოპისა“ და „ბოთომის“ გამოყენება 1960-იან და 1970-იან წლებში დაიწყო, როდესაც ქვიარებმა შეიმუშავეს „საიდუმლო ენა“ — ერთგვარი მანიშნებლები, მაგალითად, სხვადასხვა ფერის ცხვირსახოცები და ბენდენები — საკუთარი სექსუალური პრეფერენციების გასამჟღავნებლად ყველა დაინტერესებული პირისთვის. ეს დაახლოებით იმავე დროს მოხდა, როდესაც ტერმინი „ვერსი“ ქვიარ-ლექსიკონის ნაწილი გახდა.

გავრცელებული მოსაზრების მიუხედავად, ტერმინები „ტოპი“, „ბოთომი“ და „ვერსი“ ექსკლუზიურად ქვიარ კაცებისთვის არ არის და ისინი შეიძლება ნებისმიერ სექსუალურ ურთიერთობაში გამოიყენოთ — ზოგჯერ სისგენდერ ჰეტეროსექსუალ კაცებსაც მოსწონთ სტრაპონი. გახსოვდეთ, რომ ბევრი ადამიანი „აქტობს“ და „პასობს“ პენეტრაციის გარეშე და არცერთი კატეგორიზაცია თუ ტერმინი არ არის ყოვლისმომცველიიმ ადამიანების აღსანიშნავად, ვისაც პენეტრაცია საერთოდ არ მოსწონს ან არ უნდა, ასევე გამოიყენება ტერმინი „საიდი“, რომელზეც ამ სტატიაში მოგვიანებით ვისაუბრებთ.

ამ ყველაფრის გათვალისწინებით, ამ სტატიაში წარმოგიდგენთ საბაზისო ინფორმაციას, თუ რას ნიშნავს, იყო „აქტი“, „პასი“, „უნი“ და „საიდი“.

რას ნიშნავს „აქტი“, ანუ „ტოპი“?

„აქტით“ („აქტიური“, იგივე „ტოპი“; ინგლ. Top), როგორც წესი, აღიწერება ის ადამიანი, რომელსაც სექსის დროს სურს, თვითონ აკონტროლებდეს სიტუაციას.

Carly S.-ის, Spectrum Boutique-ის სიამოვნების პედაგოგის თანახმად, აქტობას შეიძლება ბევრი სხვადასხვა ფორმა ჰქონდეს, მათ შორის, ე.წ. „თითაობა“ („ფინგერინგი“; ინგლ. Fingering), ორალური სექსის გაცემა ან მიღება, პენისით ან სტრაპონით პენეტრაცია (შეღწევა) პარტნიორის სხეულში და სხვა აქტები, რომლებშიც ადამიანი ფლობს კონტროლს პარტნიორის სიამოვნებაზე.

„აქტობა აუცილებლად იმის მექანიკას არ გულისხმობს, თუ როგორ აქვს ვიღაცას სექსი, არამედ ძალაუფლების ისეთ დინამიკას, სადაც ერთი ადამიანი „უძღვება“ სექსს და უფრო მეტად განსაზღვრავს იმას, თუ რა აქტივობები მოხდება სექსში“, — ამბობს Carly S.

მართალია, სექსში კონტროლის ქონის იდეა „აქტობის“ ზოგადი გააზრებისთვის ხელშემწყობია, მაგრამ Spectrum Boutique-ის დამაარსებელი, ზოი ლიგონი ამბობს, რომ „აქტობის“ სტანდარტული განმარტებები არასაკმარისია სექსუალური იდენტობების ნიუანსების აღსაწერად.

ასეთ განმარტებებს, მისი თქმით, „აკლია ისეთი ნიუანსები, როგორიცაა, მაგალითად, ე.წ. „Power bottom“, რომელიც სექსუალური აქტების მიმღებია, მაგრამ სიტუაციას აკონტროლებს, ან ე.წ. „Service top“, რომელიც ასრულებს ამ აქტებს, მაგრამ იღებს ბრძანებებს. ზოგჯერ, სულაც არ ხდება არავითარი „ძალაუფლების მიმოცვლა“ და სექსი, უბრალოდ, სექსია, ან ზოგჯერ სქესობრივი აქტი არ ხდება და არის მხოლოდ ძალაუფლების მიმოცვლა“.

საბოლოოდ, „აქტობა“ არის სპექტრი, რომელიც სექსუალური იდენტობების დიდ დიაპაზონს მოიცავს. მაგალითად, „Stone top“ არის ისეთი აქტი, რომელიც ასრულებს მოქმედებებს და „გასცემს“, მაგრამ არ სურს საპასუხოდ რაიმეს მიღება. განურჩევლად იმისა, თუ რა არის თქვენი პარტნიორის როლი და პრეფერენცია, მნიშვნელოვანია, რომ ნებისმიერი ფორმის სექსამდე ისაუბროთ და განსაზღვროთ ზუსტი საზღვრები.

როგორ ვიყოთ „აქტი“ სექსის დროს

არ არსებობს „აქტობის“ სწორი გზა — ყველას განსხვავებული სურვილები აქვს და მთავარი, რის გაკეთებაც შეგიძლიათ, არის პარტნიორთან კომუნიკაცია. თუკი სექსში კონტროლის ქონა გსურთ, ჰკითხეთ პარტნიორს, რა აინტერესებს და რა არის მისი საზღვრები.

მნიშვნელოვანია, რომ სექსში „აქტად“ ყოფნის დროს ხშირად გადაამოწმოთ პარტნიორთან, როგორ გრძნობს თავს, რადგან პენეტრაცია შეიძლება მტკივნეული იყოს. დაიწყეთ ნელა და პატივი ეცით პარტნიორის ტკივილის ამტანობას, მოდუნებულობისა და კომფორტის დონეს.

„მხოლოდ იმის თქმა, რომ „აქტი ვარ“, საკმარის ინფორმაციას არ იძლევა საიმისოდ, რომ გაიგო, რა მოსწონს და არ მოსწონს ადამიანს სექსში. სწორედ ამაშია კარგი სექსის საიდუმლო — საუბარში“, — ამბობს ლიგონი.

კიდევ ერთი რამ, რაც უნდა გახსოვდეთ, ისაა, რომ არსებობს „აქტობის“ უამრავი სხვადასხვა გზა. პერფორმანსზე შფოთვა და დარდი აბსოლუტურად ბუნებრივია, მაგრამ გახსოვდეთ, რომ ერექციის ქონა ან დომინანტობა „აქტობისთვის“ აუცილებელი არ არის.

რას ნიშნავს „პასი“, ანუ „ბოთომი“?

აქტობის საპირისპიროდ, „პასი“ („პასიური“, იგივე „ბოთომი“; ინგლ. Bottom) არის ის, ვისაც, ჩვეულებრივ, სექსში ძალაუფლების და კონტროლის გაცემა სურს. როგორც წესი, პასები სექსში „მიმღების“ როლს ასრულებენ. ეს საკმაოდ ზოგადი დეფინიციაა და ბუნდოვანია, მაგალითად, ორალურის დროს, ვინ შეიძლება იყოს „პასი“ და ვინ „აქტი“.

„როდესაც პასზე ვფიქრობ, უფრო ისეთ ადამიანს წარმოვიდგენ, რომელსაც სურს, იყოს მეტად მორჩილი და/ან მიიღოს მითითებები“, — ამბობს ჯიმანეკია ებორნი, ტრავმების სპეციალისტი და სექსუალობის პედაგოგი.

მიუხედავად ამისა, Carly S. განმარტავს, რომ ზოგი „პასი“ მაინც შეიძლება იყოს უფრო დომინანტური და ჰქონდეს კონტროლი სექსში. აქტობის მსგავსად, პასობაც სპექტრია. მაგალითად, ე.წ. „Power bottom“ არის ისეთი „პასი“, რომელიც სექსის დროს პარტნიორს ეუბნება, რა გააკეთოს. ე.წ. „Bratty bottom-ებს“, როგორც წესი, მოსწონთ სექსის დროს აქტების „წვალება“ და მათი დაკნინება. პასობის სხვა ქვეკატეგორიებს შორისაა ე.წ. „Stone bottom-ები“, იგივე „ბალიშის პრინცესები“ (ინგლ. Pillow Princess), რომლებსაც, როგორც წესი, სექსის დროს მხოლოდ სიამოვნების მიღება სურთ და გაცემით არ არიან დაინტერესებულები.

მიუხედავად ამისა, როგორც ყოველთვის, ადამიანის სექსუალური იდენტობისგან განურჩევლად, საკვანძო ასპექტია კომუნიკაცია და იმაში გარკვევა, თუ რა მოსწონს და რა არ მოსწონს პარტნიორს სექსის დროს, რაც იმის წინაპირობაა, რომ სექსში ყველამ დაცულად და კომფორტულად იგრძნოს თავი.

როგორ ვიყოთ „პასი“ სექსის დროს

ლიგონის თქმით, ისევე, როგორც ყველა სხვა ფორმის სექსის შემთხვევაში, პარტნიორთან სექსამდე და სექსის დროს კომუნიკაცია აუცილებელია. დარწმუნდით, რომ ყველა საჭირო საზღვარი დაადგინეთ და ესაუბრეთ პარტნიორს იმაზე, თუ რა გსიამოვნებთ და პროცესის დროსაც გააგრძელეთ ამაზე კომუნიკაცია. იმისთვის, რომ კომფორტულად იგრძნოთ თავი და სიამოვნება მიიღოთ, აუცილებელი არაა, სექსში კონტროლს თქვენ ფლობდეთ.

ლიგონის თქმით, არცერთ კატეგორიასა თუ „იარლიყს“ არ შეუძლია ადამიანის იდეალურად აღწერა და სწორედ ამიტომაა კომუნიკაცია საკვანძო, განურჩევლად სექსუალური იდენტობისგან.

„ადამიანებს ვურჩევ, თავად განსაზღვრონ, რას ნიშნავს ეს ტერმინები მათთვის, რათა პარტნიორებს უფრო დაწვრილებით მიაწოდონ ინფორმაცია საკუთარი საჭიროებებისა და სურვილების შესახებ, რადგან ფიქრების წაკითხვა არავის შეუძლია. ეს ტერმინები კარგი საწყისი წერტილია დისკუსიის დასაწყებად, მაგრამ არასწორია რაღაც დასკვნების გამოტანა იმაზე, თუ რას ნიშნავს ეს ტერმინი ვიღაცისთვის, თუკი ამას არ კითხავთ“, — ამბობს ის.

თუკი ჯერ კარგად არ იცით, რა საზღვრები გაქვთ სექსში, კარლი გთავაზობთ, გამოიკვლიოთ საკუთარი სხეული მასტურბაციის მეშვეობით. პენეტრაცია, შესაძლოა, თავიდან მტკივნეული იყოს, ამიტომაც თუკი ეს ისეთი რამაა, რაც გინდათ სცადოთ, როგორც პასმა, შეიძლება წინასწარ სექს-სათამაშოების გამოყენება და ვარჯიში დაგეხმაროთ.

„თავიდან მარტომ გამოიკვლიეთ საკუთარი სხეული, იქნება ეს თითებისა თუ სექს-სათამაშოების დახმარებით, ან, უბრალოდ, ამ თემაზე წიგნების კითხვით. სექსამდე გარკვეული ცოდნის ქონა საშუალებას მოგცემთ, უფრო თავდაჯერებული იყოთ და უკეთ გამოთქვათ თქვენი საზღვრები, სურვილები, საჭიროებები“ — ამბობს კარლი.

რას ნიშნავს „უნი“, ანუ „ვერსი“?

„უნი“ („უნივერსალი“), იგივე „ვერსი“ (ინგლ. Verse/Versatile) ან „სვიჩი“ (ინგლ. Switch), არის ადამიანი, რომელსაც აქტობაც მოსწონს და პასობაც. „უნის“ ასევე შეიძლება მოსწონდეს აქტობის კონკრეტული ნაწილები და პასობის კონკრეტული ნაწილები, მაგრამ არ სურდეს „აქტის“ ან „პასის“ როლის სრულად შესრულება.

„უნი არის ადამიანი, რომელსაც ორივე როლს შორის მონაცვლეობა შეუძლია, რადგან ის უნივერსალურია. უნივერსალები ბევრი მიზეზით ცვლიან თავიანთ როლს, იქნება ეს აქტივობა, პარტნიორი, კვირის დღე თუ თავიანთი საცვლის ფერი. მათთვის, შესაძლოა, მოტივაცია იყო საკუთარი თავისა და პარტნიორისთვის ყველაზე დიდი სიამოვნების მინიჭება“, — ამბობს შანაი ადამსი, სექსუალობის პროფესიონალი.

როგორ ვიყოთ „უნი“ სექსის დროს

ადამსის რეკომენდაციაა, რომ იფიქროთ იმაზე, თუ როგორ განასახიერებთ აქტობისა და პასობის ენერგიას სექსს მიღმა და ეს სექსში შემოიტანოთ უნივერსალობის დროს.

„თუკი გინდათ, რომ „აქტი“ იყოთ, და ყველაზე დომინანტური რამ, რასაც აკეთებთ, Starbuck-ის შეკვეთაა, ეს ენერგია სექსში შემოიტანეთ. ესაუბრეთ პარტნიორს ბრძანებების მიცემაზე ან იმის თქმაზე, თუ რა გააკეთოს. თუკი გინდათ, რომ უფრო მორჩილი იყოთ და გიყვართ ის შეგრძნება, როდესაც სხვების სიამოვნებაზე ფოკუსირდებით და არა — თქვენსაზე, შემოიტანეთ ეს ენერგია სექსში. ფოკუსირდით თქვენს პარტნიორზე“, — ამბობს ადამსი.

Carly S.-ის თქმით, სექსის დროს უნივერსალობისთვის ფლუიდურობა და კომუნიკაცია საკვანძოა.

„იყავით მოქნილი და ღია იმის მიხედვით, თუ როგორ გრძნობთ თავს და როგორია დინამიკა სხვა ადამიანთან“, — ამბობს ის.

საბოლოოდ, „აქტი“, „პასი“ და „უნი“ არის სპექტრი, რომლის ზუსტი დეფინიციებიც ყველასთვის სხვადასხვაგვარია. თუკი არ მიგაჩნიათ, რომ რომელიმე ტერმინი შეგეფერებათ, ნუ იფიქრებთ, რომ აუცილებლად მათგან რომელიმეს უნდა მოერგოთ, რათა სრულფასოვანი სექსი გქონდეთ.

„ზედმეტად ნუ მიეჯაჭვებით სახელსა თუ იარლიყს. საერთოდაც არ არის საჭირო, ის გქონდეთ, ამიტომ ჩამოაშორეთ ეს ტვირთი საკუთარ თავს. ეს ტერმინები შეიძლება გამოგადგეთ, როდესაც გამოხატავთ, თუ როგორ გსურთ სექსუალურ აქტივობაში ჩართვა, მაგრამ თუკი არცერთი ტერმინი არ მოგწონთ, არ ხართ ვალდებული, ისინი გამოიყენოთ“, — ამბობს ებორნი.

რას ნიშნავს „საიდი“?

რა ხდება, თუკი ადამიანი არც „აქტია“, არც „პასი“ და არც „უნი“ — თუკი მას საერთოდ არ სურს ანალური სექსით დაკავება? სწორედ ამიტომ, ზემოთ ჩამოთვლილი როლების გარდა, 2013 წელს ასევე შეიქმნა ტერმინი „საიდი“ (ინგლ. Side — „გვერდი(თი)“), რომელიც 2022 წლის მაისში ოფიციალურად დაემატა Grindr-ის როლების სიას.

Urban Dictionary-ს განმარტებით, „საიდი“ აღნიშნავს ისეთ ადამიანს, რომელსაც საერთოდ არ მოსწონს ან არ უნდა ანალური პენეტრაცია — არც მიღება და არც გაცემა — და რომელიც უპირატესობას ანიჭებს სხვა სექსუალურ აქტივობებს, მაგალითად, ორალურ სექსს, ორმხრივ მასტურბაციას ან ე.წ. „მშრალად ხახუნს“ (ინგლ. Frottage ან Dry humping).

„საიდებს“, როგორც წესი, სექსის დროს ურჩევნიათ კოცნა, ჩახუტება, ორალური სექსი (მინეტი და ე.წ. „რიმინგი“), ორმხრივი მასტურბაცია და მშრალად ხახუნი — ერთი სიტყვით, ისინი უპირატესობას ანიჭებენ სხვა სექსუალურ აქტივობებს, გარდა ანალური პენეტრაციისა. შესაძლოა, მათ გამოცდილი ჰქონდეთ ანალური სექსი, მაგრამ აღმოაჩინეს, რომ ეს მათთვის არ არის ეროტიკული ან სასურველი. ზოგს ასევე შეიძლება მოსწონდეს ანალური სტიმულაციის მიღება ან გაცემა თითით, მაგრამ არა — ამაზე მეტი.

გახსოვდეთ, რომ პენეტრაციული სექსი არ არის ვალდებულება და აუცილებლობა. სექსი პენეტრაციის გარეშე ისეთივე სრულყოფილი სექსია, როგორიც ნებისმიერი სხვა. ყველა ადამიანი განსხვავებულია და სექსში ყველას თავისი ფანტაზიები, სურვილები და პრეფერენციები აქვს, რაც აბსოლუტურად ნორმალურია.

წყარო: Them.usPride.com, Huffpost

სექსუალური განათლების 8 ფაქტი ქვიარ მოზარდებისთვის

სექსუალური განათლება, განსაკუთრებით კი ლგბტქი სექსუალური განათლება, თითქმის არ არის ხელმისაწვდომი მოზარდებისთვის საქართველოში, სადაც სექსიც და ქვიარობაც ტაბუდადებული თემებია.

კვლევები აჩვენებს, რომ ლგბტქი მოზარდები განსაკუთრებით მოწყვლადები არიან პარტნიორის მხრიდან ძალადობის, სქესობრივი გზით გადამდები ინფექციებისა (სგგი-ებისა) და თინეიჯერობისას ორსულობის მიმართ, როდესაც მათ არ აქვთ წვდომა მრავალმხრივ სექსუალურ განათლებასთან. ასევე, უფრო მაღალია ალბათობა, რომ მათ დაიწყონ ინფორმაციის ძიებას არასანდო წყაროებში.

მრავალმხრივ და დაწვრილებით სექსუალურ განათლებასთან წვდომას ყველა იმსახურებს და საჭიროებს. არავის უნდა უწევდეს საკუთარი ცხოვრების ისე გავლა, რომ საკუთარი სხეულის, სექსუალური ჯანმრთელობისა და იდენტობის საბაზისო ასპექტებზე არ ჰქონდეს ცოდნა. სწორედ ამიტომ, ამ სტატიაში თავმოყრილია სექსუალური განათლების 8 ფაქტი ქვიარ მოზარდებისთვის.

#1. მასტურბაცია შეიძლება პირველი ნაბიჯი იყოს იმის გასაგებად, თუ რა სიამოვნებს თქვენს სხეულს

სექსის გააზრება ხშირ შემთხვევაში იმის გააზრებით იწყება, თუ რა ანიჭებს თქვენს სხეულს სიამოვნებას. ეს, როგორც წესი, ჯერ კიდევ მაშინ იწყება, სანამ თქვენს პირად ცხოვრებაში ვინმე სხვა ადამიანი შემოვა. დოქტორ ევან გოლდშტაინი, გეი კაცების სექსუალური ჯანმრთელობის სამედიცინო ცენტრის დამფუძნებელი, ამბობს, რომ მასტურბაცია შეიძლება მნიშვნელოვანი საშუალება იყოს იმის გასაგებად, თუ რა მოგწონთ და რა არ მოგწონთ, თანაც ისე, რომ ამას სხვა ადამიანთან ერთად ყოფნის წნეხი არ ემატება.

„როდესაც საკუთარ თავთან განმარტოებასა და თვითსიამოვნებას უთმობთ დროს, არ გიწევთ დარდი პერფორმანსზე და თქვენი პარტნიორის დაკმაყოფილებაზე“, — ამბობს გოლდშტაინი.

#2. პორნოგრაფია ყოველთვის არ ასახავს რეალურ ცხოვრებას და ის სექსუალური განათლების მთავარ წყაროდ არ უნდა გამოიყენოთ

ბევრი ადამიანისთვის პორნოგრაფია პირველი „შესავალია“ სექსში. მართალია, პორნოს ყურება და კითხვა კარგი ხელშემწყობია მასტურბაციისთვის, მაგრამ მნიშვნელოვანია, გახსოვდეთ, რომ პორნოგრაფიის უდიდესი ნაწილი არ ასახავს იმას, თუ როგორ და როგორი სექსი აქვთ ადამიანებს რეალურ ცხოვრებაში. პორნომსახიობები უბრალოდ სცენაში მონაწილეობენ და ასრულებენ როლებს იმ საზღვრებზე დაყრდნობით, რომლებიც კამერის მიღმა დადგინდა.

„როდესაც ქვიარ ახალგაზრდებს (და, ზოგადად, ახალგაზრდებს) არ აქვთ წვდომა სანდო სექსუალურ განათლებასთან, რომელიც ფარავს ყველა თემას და არა მხოლოდ ვაგინალურ სექსს, ისინი მიმართავენ პორნოგრაფიას, Google-სა და Reddit-ს, ან ტიკტოკის „ინფლუენსერებს“, რომლებსაც არ აქვთ სამედიცინო კვალიფიკაცია ამ თემაზე ზუსტი რჩევის გასაცემად. მართალია, პორნოგრაფია ნამდვილად შეიძლება დაეხმაროს ადამიანს იმის გაგებაში, თუ რა არსებობს, მაგრამ ის საუკეთესო გზა არაა სხეულზე რეალისტური წარმოდგენების შესაქმნელად ან იმის სასწავლად, თუ როგორ გქონდეთ სექსი. თქვენ კამერის მიღმა ვერ ხედავთ მთელ რიგ მოსამზადებელ სამუშაოებს, მაგალითად, დილატაციას (გაგანიერებას, გაფართოებას) ან ლუბრიკაციას (ლუბრიკანტით დასველებას), ვერც იმას იგებთ, რომ ყველა პენისი თქვენს ხელზე უფრო განიერი არ არის და ვერც იმას, რომ სექსში ძალაუფლების სხვანაირი დინამიკებიც არსებობს“, — ამბობს დოქტორი გოლდშტაინი.

თუ გსურთ, მეტი გაიგოთ სექსის, თანხმობისა და საზღვრების შესახებ, პორნოგრაფიის ნაცვლად შეგიძლიათ გაეცნოთ ისეთ ონლაინ რესურსებს, როგორებიცაა Sex, etc., Amaze და The Trevor Project. ეს წყაროები ინგლისურენოვანია, ამ თემაზე სტატიებს ქართულად კი შეგიძლიათ გაეცნოთ ვებგვერდებზე allaboutyou.ge და ფემეა.

#3. კომუნიკაცია და თანხმობა აუცილებელია

თუკი გგონიათ, რომ მზად ხართ, შემდეგი ნაბიჯი გადადგათ და სექსი სხვა ადამიანთან ერთად გამოიკვლიოთ, პირველი საკვანძო საფეხურებია კომუნიკაცია და თანხმობა. ესაუბრეთ მას და შეთანხმდით ერთმანეთის საზღვრებზე.

რამდენიმე მნიშვნელოვანი კითხვა, რომელზე პასუხიც უნდა იცოდეთ, არის:

  • გაქვს თუ არა სექსი სხვა ადამიანებთან? თუკი ასეა, შემოწმებული ხარ თუ არა სქესობრივი გზით გადამდებ ინფექციებზე?
  • შენ ან ჩვენ ვაპირებთ თუ არა რაიმე სახის კონტრაცეფციის გამოყენებას?
  • რომელი აქტებია შენთვის კომფორტული?
  • რამდენად სწრაფად ან ნელა გინდა პროცესის წარმართვა?
  • რა არის შენი საზღვრები? ხომ არ არის სხეულის ისეთი ნაწილი, რომელსაც არ გინდა, რომ შევეხო?
  • ტანსაცმელი გვეცვას თუ არა?

მართალია, ამ კითხვების წინასწარ დასმა მნიშვნელოვანია, მაგრამ სხვადასხვა საკითხის გადამოწმება პროცესის დროსაც საჭიროა. ისეთი პატარა კითხვები, როგორებიცაა „შეიძლება, აქ შეგეხო?“, „გსიამოვნებს, როდესაც აქ გეხები?“ და „შეიძლება, [ტანსაცმლის რომელიმე ნაწილი] გაგხადო?“, ძალიან კარგი გზაა საიმისოდ, რომ გაიგოთ, რასთანაა კომფორტულად თქვენი პარტნიორი და თან ინტიმური განწყობაც შენარჩუნდეს.

გახსოვდეთ, რომ თანხმობა იმაზე მეტია, ვიდრე კონკრეტულ მომენტში სექსზე დათანხმება. ეს ნიშნავს, რომ თუკი თქვენ ან თქვენს პარტნიორს თანხმობის გაცემის შემდეგ მოგინდებათ, რომ სექსი შეწყდეს, ამის გაკეთება თავისუფლად შეგიძლიათ.

„თანხმობა უფრო მეტია, ვიდრე უბრალოდ „კი“ ან „არა“. თანხმობა უნდა გამოითქვას ზეწოლის გარეშე, ის უნდა იყოს გულწრფელი და სურვილისმიერი, თანხმობის გამცემი უნდა იყოს სრულად ინფორმირებული (მაგალითად, თუ ადამიანი თანახმაა სექსზე იმ პირობით, რომ პარტნიორი გამოიყენებს თავდაცვის საშუალებას, ხოლო პარტნიორი ამას არ გააკეთებს, ესე იგი, მას არ აქვს მეორე მხარის თანხმობა), ის არ არის სამუდამო — გადაწყვეტილების შეცვლა ნებისმიერ დროს შეიძლება და ერთ ქმედებაზე თანხმობის გაცემა არ ნიშნავს, რომ პარტნიორი სხვა რამეზეც ავტომატურად თანახმაა”, — ამბობს რეიჩელ ვრაითი, ქვიარ სექსისა და ურთიერთობების თერაპევტი.

თანხმობის გარდა, თქვენ და თქვენმა პარტნიორმა უნდა დაამყაროთ კომუნიკაცია იმაზე, თუ რა გსიამოვნებთ და რა არ გსიამოვნებთ. პარტნიორისთვის იმის თქმა, რომ რაიმე შეცვალოს ან სხვანაირად გააკეთოს, სამარცხვინო არ არის — ეს სექსის ნაწილია.

„პარტნიორისთვის იმის თქმა, თუ რა მოგწონთ/არ მოგწონთ, რა გაინტერესებთ/არ გაინტერესებთ და რას ცდიდით/არ ცდიდით, არამხოლოდ ნორმალურია, არამედ სასურველიც კი. სექსის მიზანი სიამოვნებაა და როგორც თქვენი, ისე თქვენი პარტნიორის სიამოვნების მისაღწევად მნიშვნელოვანია, რომ ყველას საჭიროებები დაკმაყოფილდეს“,— ამბობს გოლდშტაინი.

#4. უსაფრთხო სექსი მხოლოდ პრეზერვატივის გამოყენებას არ გულისხმობს

მართალია, პრეზერვატივები თავდაცვის მნიშვნელოვანი ნაწილია, მაგრამ უსაფრთხო სექსი ბევრად უფრო მეტ რამეს მოიცავს.

„ხშირად უსაფრთხო სექსზე საუბრისას პრეზერვატივები გვახსენდება ხოლმე და, მართალია, პრეზერვატივები აუცილებელია პენეტრაციული (შემღწევი) სექსისთვის (პენისებით ან დილდოებით), მაგრამ სგგი-ები მაინც შეიძლება გავრცელდეს ვულვებიდან ორალური და სხვა ტიპის სექსის დროს“, — ამბობს დანიელა კრამერი, ქვიარ ურთიერთობების კლინიკური სექსოლოგი.

უსაფრთხო სექსისთვის მნიშვნელოვანია, ყველა ტიპის გენიტალია (სასქესო ორგანო) გაითვალისწინოთ.

„სტომატოლოგიურ კაშხლებს შეუძლიათ დაგიცვათ ვულვაზე ან ანუსზე ორალური სექსის დროს. ეროგენული უბნების დასაცავად ასევე შეგიძლიათ თავად დაამზადოთ პატარა ნაჭრები ლატექსის ხელთათმანებისგან ან პრეზერვატივებისგან“, — ამბობს იელ გონსალესი, ქვიარ სექსოლოგი და იდენტობის ტრენერი.

#5. არ არსებობს სექსის ქონის „სწორი“ გზა

„უამრავი აქტივობა არსებობს, რომელიც შეგიძლიათ პარტნიორთან ერთად სცადოთ. ნუ შეიზღუდავთ თავს საზოგადოების დაშვებებითა თუ სტერეოტიპებით ე.წ. „სიზორინგისა“ (ინგლ. Scissoring) და ანალური სექსის შესახებ — შეგიძლიათ, ეს აქტები სრულად უგულებელყოთ და მაინც ფანტასტიკური და სრულყოფილი სექსუალური ცხოვრება გქონდეთ“ — ამბობს გონსალესი.

გახსოვდეთ, რომ ქვიარ სექსი იმდენადვე მრავალფეროვანი და მრავლისმომცველია, რამდენადაც თვითონ LGBTQ+ აკრონიმი. აუცილებელი არ არის, ის რაღაც ერთი ფორმით ვლინდებოდეს. სექსი შეიძლება იყოს ზუსტად ის, რადაც მას თქვენ და თქვენი პარტნიორი აქცევთ და რაც გინდათ, რომ იყოს.

„იმ აქტივობებს შორის, რომლებიც შეიძლება სექსად განვიხილოთ, არის: ვაგინალური, ორალური და ანალური სექსი, კოცნა, სექსუალური შეხება, როლური თამაშები, ეროტიკის კითხვა, ფანტაზიების გაზიარება, საკუთარი სხეულის ჩვენება სხვა ადამიანისთვის (თანხმობით), ე.წ. „სექსტინგი“, ვინმესთან ერთად აბაზანის მიღება, ერთმანეთისთვის მასაჟის გაკეთება, სუნთქვითი ვარჯიშების ერთად კეთება, შიშველზე ჩახუტება და ა.შ. სექსი შეიძლება იყოს სიამოვნებისთვის და/ან გამრავლებისთვის — და როდესაც ის სიამოვნებისთვისაა, სექსის მიზანი მხოლოდ ორგაზმი არ არის“, — ამბობს ვრაითი.

#6. ანალურ სექსს მოთმინება და დრო სჭირდება

„კუზიანი მთის“ იმ საკულტო სცენამ კი შეიძლება სხვაგვარად გაფიქრებინოთ, მაგრამ ანალურ სექსს ბევრად მეტი მომზადება სჭირდება, ვიდრე ხელზე დაფურთხებაა.

„ანალური სექსი ის არ არის, რასაც ფილმებსა და სერიალებში ხედავთ — წინასწარი პრაქტიკის გარეშე პირდაპირ ე.წ. „ბოთომობა“ (ან „პასობა“) არ შეგიძლიათ“, — ამბობს გოლდშტაინი.

თუკი ანალური სექსის ცდა გსურთ, გოლდშტაინი გირჩევთ, ნელა დაიწყოთ და წინასწარ მოემზადოთ. ნებისმიერი ტიპის ანალური სექსუალური აქტივობა, იქნება ეს უბრალოდ ე.წ. „ფინგერინგი“ („თითაობა“), სექს-სათამაშოების გამოყენება თუ პენისით პენეტრაცია, საჭიროებს ბევრ ლუბრიკანტს (სასურველია, სილიკონის საფუძველზე დამზადებულს) და, იდეალურ შემთხვევაში, რამდენიმეკვირიან შემზადებას.

ამისთვის საჭიროა ანალური ვარჯიშები, რისთვისაც შეიძლება გამოგადგეთ სპეციალური დილატაციის (გაფართოების) ნაკრები, რომელიც, ჩვეულებრივ, სხვადასხვა ზომის ანალური საცობებისგან, ე.წ. „ბატ-პლაგებისგან“ (ინგლ. Butt-plug), შედგება, თუმცა თუ მასზე ხელი არ მიგიწვდებათ, შეგიძლიათ, დაიწყოთ ექსპერიმენტირება და ვარჯიში ერთი თითით და ნელ-ნელა გაზარდოთ რაოდენობა.

მათთვის, ვისაც პირველად სურს ანალური სექსის ცდა, ხშირი სადარდებელია ხოლმე არსებული მოსაზრება პროცესში განავლის შესაძლო შეუკავებლობის შესახებ. დიდი ალბათობით, ეს პრობლემა არ გექნებათ, თუნდაც წინასწარ არ გაიკეთოთ გამორეცხვა, მაგრამ თუკი ეს მაინც გადარდებთ, შეგიძლიათ თბილი წყლისა და ოყნის გამოყენებით წინასწარ გამოირეცხოთ ანუსი.

#7. ორსულობა შეიძლება დადგეს გენდერისგან განურჩევლად. დაიცავით თავი

მნიშვნელოვანია, სანამ სექსი გექნებათ, კარგად გაერკვეთ, როგორ დგება ორსულობა. თუკი ორ ადამიანს, რომელთაგანაც ერთის სხეული სპერმას აწარმოებს, მეორის კი — კვერცხუჯრედებს, ექნება სექსი, მნიშვნელოვანია, დაუგეგმავი ორსულობის თავიდან ასაცილებლად უსაფრთხოების ზომები დაიცვათ. ეს შეიძლება მოიცავდეს პრეზერვატივების გამოყენებას, ჰორმონალურ კონტრაცეფციას ან კონტრაცეფციის რამე სხვა ფორმას.

„იმის ცოდნა, თუ როგორ დგება ორსულობა და როგორ მუშაობს ის, აუცილებელია ყველა ლგბტქი თინეიჯერისთვის“, — ამბობს შერონ სანდერსი, კლინიკური სექსოლოგი და სექსუალური განათლების სპეციალისტი.

#8. იდენტობა ფლუიდურია. ნორმალურია ახალი რაღაცების ცდა და შემდეგ მათზე უარის თქმა, თუკი არ მოგეწონათ

მოზარდობის დიდი ნაწილი იმის გარკვევაა, თუ ვინ ხართ თქვენ. ეს შეიძლება ნიშნავდეს იმის გააზრებას, ვინ გიზიდავთ და რა დამოკიდებულება გაქვთ საკუთარი გენდერის მიმართ. ექსპერიმენტირება აბსოლუტურად ნორმალურია. სხვადასხვა სახელის, ნაცვალსახელისა თუ სექსუალობის გამოცდა თვითგამორკვევის პროცესის ნაწილია.

„გამოცდილებებისა და იდენტობების გამოკვლევა და მათში ექსპერიმენტირება სრულიად ნორმალურია. ზოგჯერ რაღაცები უნდა გამოვცადოთ, სანამ სიმართლეს დავადგენთ. გარდა ამისა, იდენტობები შეიძლება დროთა განმავლობაში შეიცვალოს, ამიტომაც მიჰყევით იმის დინებას, რაც თქვენთვის უფრო შესაფერისია“, — ამბობს გონსალესი.

წყარო: Them.us