ალტ-ინფო

გაიცანი უფლებადამცველი: სამირა ბაირამოვას ბრძოლა ინტეგრაციისთვის, თანასწორობისთვის და ნაადრევი ქორწინების წინააღმდეგ

„მინდა, ყველას ვუთხრა, რომ შეუძლებელია ცვლილებების მოტანა და თანასწორობის მიღწევა ადამიანთა აქტიურობის გარეშე, თანაც მაშინ, როცა სახელმწიფოს ამის ნება არ აქვს“, – მეუბნება სამირა ბაირამოვა, ეთნიკურად აზერბაიჯანელი უფლებადამცველი, რომელმაც 2022 წლის თებერვალში,

ოზურგეთში პრორუსული ალტ-ინფოს ოფისის გახსნას მოქალაქეთა პროტესტი მოჰყვა

ოზურგეთში პრორუსული და ძალადობრივი ორგანიზაცია ალტ-ინფოს ოფისის გახსნას მოქალაქეთა პროტესტი მოჰყვა. ალტ-ინფოს მიერ დაარსებული პარტია კონსერვატიული მოძრაობის ოფისი ქართული ოცნების ოფისის გვერდით გაიხსნა, თუმცა ადგილზე ბანერი არ არის გაკრული, ოფისი კი ამჟამად დაკეტილია. აქციის ერთ-ერთი ორგანიზატორის, ნინო ურუშაძის თქმით, ალტ-ინფომ

პრორუსულ ალტ-ინფოს ოფისი შუახევშიც გახსნამდე დაახურინეს

აჭარაში, შუახევის მუნიციპალიტეტში, პრორუსულ და ძალადობრივ პარტია ალტ-ინფოს ოფისი გახსნამდე დაახურინეს. ბანერის ჩამოხსნის ამსახველი ვიდეო სოსო ზოიძემ საკუთარი ფეისბუკის გვერდზე გაავრცელა. შუახევამდე ძალადობრივ პარტიას

GDI კომუნიკაციების ეროვნულ კომისიას ალტ-ინფოსთვის ადმინისტრაციული პასუხისმგებლობისკენ მოუწოდებს

საქართველოს დემოკრატიული ინიციატივა კომუნიკაციების ეროვნულ კომისიას მოუწოდებს, რომ ტელეკომპანია – ალტ-ინფო სამართალდამრღვევად სცნოს და ადმინისტრაციული პასუხისმგებლობა დააკისროს, რის მიზეზადაც რუსეთის უკრაინაში თავდასხმის შემდეგ ტელეკომპანიის

ალტ-ინფოს ცნობით, შოთა მარტინენკო და ზურაბ მახარაძე დააკავეს

2 ივლისს, პოლიციამ ულტრა-მემარჯვენე ჯგუფის აქციის მონაწილეები, მათ შორის, ჰომოფობიური, პრორუსული დაჯგუფება ალტ-ინფოს ლიდერები, შოთა მარტინენკო და ზურაბ მახარაძე დააკავა. აღნიშნულის შესახებ ინფორმაციას ალტ-ინფო და დაჯგუფება ქართული იდეა ავრცელებენ.

დღეს პრაიდ კვირეულის ბოლო დახურული ღონისძიება იმართება, რომლის გასაპროტესტებლად ალტ-ინფოს მიერ ორგანიზებული აქცია 1 ივლისს, საღამოს დაიწყო.

განახლება: რადიო თავისუფლების ცნობით, პოლიციამ 26 პირი, მათ შორის, შოთა მარტინენკო, ზურაბ მახარაძე, ასევე გურამ და ალექსანდრე ფალავანდიშვილები წვრილმანი ხულიგნობისა და პოლიციის კანონიერი მოთხოვნის დაუმორჩილებლობისთვის დააკავა. გარდა ამისა, დაკავებულია ძალადობრივი დაჯგუფების კიდევ ერთი ლიდერი, ბექა ვარდოსანიძე.

ალტ-ინფოს საკანონმდებლო ცვლილების მიზნით შექმნილი საინიციატივო ჯგუფი რეგისტრაციაში არ გაატარეს

საპროცედურო საკითხთა და წესების კომიტეტმა საკანონმდებლო ცვლილებების განხორციელების მიზნით შექმნილი პრორუსული, ძალადობრივი ალტ-ინფოს წევრებისგან შემდგარი ჯგუფი არ დაარეგისტრირა.

გიორგი ქარდავას, ზურაბ მახარაძის, ირაკლი მორგოშიას, შოთა მარტინენკოსა და კონსტანტინე მორგოშიას საინიციატივო ჯგუფი შეკრებისა და მანიფესტაციის შესახებ კანონში, ადმინისტრაციულ სამართალდარღვევათა კოდექსში და სისხლის სამართლის კოდექსში ცვლილებებისა და დამატებების შეტანის მიზნით შეიქმნა.

კომიტეტის თავმჯდომარის, ირაკლი ქადაგიშვილის თქმით, საინიციატივო ჯგუფს რეგისტრაციაში გატარებაზე უარი პროცედურული დარღვევების გამო ეთქვა, კერძოდ, თითოეულ კანონპროექტს განმარტებითი ბარათი უნდა ერთვოდეს, ძალადობრივი ჯგუფის მიერ წარდგენილ სამ კანონპროექტს კი მხოლოდ ერთი განმარტებითი ბარათი ახლდა. ამასთან, „კანონპროექტს უნდა დაერთოს პროექტი იმ საკანონმდებლო აქტში ცვლილების შეტანის შესახებ, რომელშიც ცვლილების შეტანასაც იწვევს კანონპროექტი და ისინი წარმოდგენილი უნდა იყოს საკანონმდებლო პაკეტის სახით. აღნიშნული პაკეტი კი ამ მოთხოვნების დარღვევითაა წარმოდგენილი“.

საინიციატივო ჯგუფის მიერ წარდგენილი ჰომოფობიური კანონპროექტი ლგბტქი თემის წევრებისთვის შეკრებისა და მანიფესტაციის უფლების შეზღუდვას, რომელიმე რელიგიის საწინააღმდეგო დემონსტარციის ჩატარებასა და ისეთი შეკრების ჩატარების აკრძალვას ითვალისწინებდა, რომელიც, შესაძლოა, ომისა და ძალადობის პროპაგანდას, ეროვნული, კუთხური, რელიგიური ან სოციალური შუღლის გაღვივების მცდელობის ნიშნებს შეიცავდეს.

კომიტეტის წევრმა ნაციონალური მოძრაობიდან, ლევან ბეჟაშვილმა განხილვისას აღნიშნა, რომ საინიციატივო ჯგუფი პროცედურულ დარღვევებს კი გამოასწორებს, მაგრამ წარდგენილი კანონპროექტი კონსტიტუციასთან წინააღმდეგობაში მოდის და მისი ინიცირება არ შედგება, ამიტომ კანონპროექტის არსებითი განხილვა მოითხოვა.

ერთიანი ნაციონალური მოძრაობის წევრმა, თამარ კორძაიამ კი აღნიშნა, რომ „პარლამენტში იმისთვის ვართ, რომ რაღაც სტანდარტზე ვისაუბროთ და ეს [საინიციატივო ჯგუფის მიერ წარდგენილი კანონპროექტი] არის სტანდარტი, რომელიც არაფრად აგდებს არათუ საქართველოს კონსტიტუციას, არამედ ჩვენს მისწრაფებას, რომ ვიყოთ უფრო დემოკრატიული, ადამიანის უფლებებზე ორიენტირებული სახელმწიფო… არ შეიძლება პარლამენტში მშვიდად ვხედავდეთ საკითხებს, რომლითაც მიდის პირდაპირ იმის პედალირება, რომ უთანასწორობა დამკვიდრდეს ამ ქვეყანაში“.

ძალადობრივი დაჯგუფება ალტ-ინფოს ლიდერები შსს-ში გამოკითხვაზე დაიბარეს

პრაიდ კვირეულის საწინააღმდეგო აქციის გეგმებთან დაკავშირებით პრორუსული, ძალადობრივი დაჯგუფება ალტ-ინფოს ლიდერები, კონსტანტინე მორგოშია და ზურაბ მახარაძე შსს-ში გამოკითხვაზე დაიბარეს.

ზურაბ მახარაძემ TV Pirveli-ს ეთერში განაცხადა, რომ შსს-ს განუცხადეს ის, რასაც საჯაროდ ისედაც წერდნენ, დაჯგუფება ხალხის ორგანიზებას და პროტესტის გამოხატვას აპირებენ. ალტ-ინფოს ლიდერმა ჟურნალისტის კითხვაზე საპასუხოდ აღნიშნა, რომ „თქვენ თუ პროვოკაციებს მოაწყობთ და კიდევ რაღაც სისულელეებს გააკეთებთ. იმედია, არ მოხდება, ჩვენ ვეცდებით, რომ ექსცესებში არ გადაიზარდოს“, თუმცა მხარაძემ ისიც თქვა, რომ 100%-იანი გარანტია არ არსებობს.

დღეს შსს-ს განცხადებაც გამოქვეყნდა, რომელშიც ნათქვამია, რომ მიიღებენ „ყველა ზომას, რათა უზრუნველყოფილ იქნას თბილისი პრაიდის მიერ დაგეგმილი დახურული ღონისძიებების უსაფრთხო ფორმატში ჩატარება, მართლწესრიგის დაცვა, აგრეთვე, კვირეულის ფარგლებში, თითოეული ადამიანის გამოხატვისა და შეკრების თავისუფლებების დაცვა, რომელიც არ გასცდება კანონით დასაშვებ ფარგლებს“.

განახლება: შსს-ში აცხადებენ, რომ ალტ-ინფოს ეთერში გაკეთებულ განცხადებებთან დაკავშირებით ძალადობრივი ქმედებისკენ საჯაროდ მოწოდებისა და მუქარის მუხლებით გამოძიება დაიწყეს.

შეგახსენებთ, რომ თბილისი პრაიდმა მთავრობის მისამართით მოთხოვნები გაავრცელა, რომლითაც მთავრობას პოზიციის მკაფიოდ დაფიქსირებისკენ, პრაიდ კვირეულის ფარგლებში დაგეგმილი სამივე ღონისძიების მშვიდობიანად ჩატარების უზრუნველყოფისკენ, ღონისძიებების მიმდებარე ტერიტორიებსა და ქალაქში წესრიგის დაცვისკენ, ასევე 2021 წლის 5 ივლისის ძალადობრივი ქმედებების ორგანიზატორების დასჯისკენ მოუწოდებენ.

Tbilisi Pride მთავრობისგან კვირეულის უსაფრთხოდ ჩატარების გარანტიებსა და პოზიციის მკაფიოდ დაფიქსირებას ითხოვს

28 ივნისს პრაიდ კვირეული 2022 იწყება, რომელიც 3 დახურულ ღონისძიებას აერთიანებს — ქართული ქვიარ ფილმის ჩვენებას, რეგიონულ კონფერენციასა და პრაიდ ფესტივალს. აღნიშნულთან დაკავშირებით Tbilisi Pride-მა საგანგებო ბრიფინგი გამართა, რომლითაც მთავრობისგან კვირეულის მონაწილეთა უსაფრთხოების დაცვა, კვირეულის დღეებში ღონისძიებების ტერიტორიებზე და მთელ ქალაქში წესრიგის დაცვა, საკუთარი პოზიციის მკაფიოდ დაფიქსირება, ასევე გასული წლის 5 ივლისის ძალადობრივი ქმედებების ორგანიზატორთა დასჯა მოითხოვა.

Tbilisi Pride-ის თანადირექტორმა ბრიფინგზე გააჟღერა, რომ დაძაბულობის კერების თავიდან არიდების მიზნით, წელს საჯაროდ შეკრებისა და მანისფესტაციის უფლებაზე უარი თქვეს და დახურული ღონისძიებების გამართვა გადაწყვიტეს, თუმცა ულტრა-მემარჯვენე ჯგუფები ძალადობრივი შინაარსის გეგმების შესახებ იფორმაციას მაინც აჟღერებენ.

„ჩვენ ორი თვეა აქტიურ კოორდინაციაში ვართ შინაგან საქმეთა სამინისტროსთან, ვაწვდით სრულ და ზუსტ ინფორმაციას კვირეულის ღონისძიებებთან დაკავშირებულ დეტალებზე. ასევე, ძალოვან სტრუქტურებს ვაწვდით ფაქტებს გაჟღერებული მუქარების და ძალადობის ორგანიზების შესახებ. შსს-სთან შეხვედრები მიმდინარეობს საერთაშორისო ორგანიზაციების, დიპლომატიური კორპუსისა და სახალხო დამცველის ოფისის მონაწილეობით. ხაზგასმით გვინდა ვთქვათ, რომ შინაგან საქმეთა სამინისტრო გვაძლევს სამივე ღონისძიების დაცვის გარანტიებს და როგორც მათ მიერ გაჟღერდა, ამ საკითხთან დაკავშირებით, უახლოეს მომავალში თავადაც გააკეთებენ განცხადებას. ასევე, მუქარისა და ძალადობრივი ქმედებისკენ მოწოდების ფაქტებზე დაწყებულია გამოძიება“, — აღნიშნულია Tbilisi Pride-ის განცხადებაში.

შსს-სთან აქტიური თანამშრომლობის მიუხედავად, ორგანიზაციის წევრებს უსაფრთხოების გარანტიებთან დაკავშირებით ეჭვები აქვთ, რადგან „მაღალი თანამდებობის პირების მხრიდან, ბოლო დღეებში აქტიურად ჟღერდება თბილისი პრაიდისა და ლგბტ თემის დამაზიანებელი, მადისკრედიტებელი და ძალადობის წამახალისებელი განცხადებები“.

პრორუსული, ძალადობრივი გაერთიანება კონსერვატიული მოძრაობის წევრები დაჯგუფების ტელევიზიის, ალტ-ინფოს ეთერში მუდმივად ცდილობენ ლგბტქი ორგანიზაციის დისკრედიტაციას. დაჯგუფების ერთ-ერთმა ლიდერმა, ზურაბ მახარაძემ კი 22 ივნისს განაცხადა, რომ პრაიდ კვირეულის საწინააღმდეგოდ ხალხის მობილიზაციას იწყებენ.

გარდა იმისა, რომ მახარაძის განცხადება ძალადობრივ ნიშნებს შეიცავდა —  „ამათ ჩვენ საბოლოოდ გადავამტვრევთ“, პრორუსული დაჯგუფების ლიდერმა შესაძლო ანტისახელმწიფოებრივი გზავნილიც გააკეთა — „საქართველოში არა ერთი ხელისუფლება მეორით, არამედ წყობა, სისტემა და მიზანი შეიცვლება“. 

მახარაძის განცხადების პარალელურად პარლამენტში პრემიერ მინისტრის, ირაკლი ღარიბაშვილის გამოსვლა შედგა, რომლემაც, გასული წლის 5 ივლისის მოვლენები თბილისი პრაიდის პასუხისმგებლობად მოიხსენია და აღნიშნა, რომ „ლგბტ ორგანიზაციის დირექტორი და სირცხვილია — ეს ერთი ორგანიზმია, ამათ უკან სააკაშვილი და ნაციონალური მოძრაობა დგას. მათი წახალისებული იყო ეს ვითომ ღირსების მარში თუ რაღაც რომ უნდა  ჩაეტარებინათ. პირდაპირი პროვოკაცია, პირდაპირი ანტიეროვნული, ანტისახელმწიფოებრივი პროვოკაცია, უნდოდათ, ქვეყანაში დესტაბილიზაცია გამოეწვიათ, მასობრივი არეულობა, შეტაკებები, პოლიციას ძალა გამოეყენებინა. ეს ამ ადამიანებმა დაგეგმეს“. 

პრემიერ ღარიბაშვილის თქმით, 5 ივლისის ძალადობრივ ქმედებებზე პასუხისმგებელი პირები დაიჭირეს და გაასამართლეს, თუმცა აღსანიშნავია, რომ ძალადობრივი აქციის ორგანიზატორები დღემდე არ არიან გასამართლებული, მეტიც, დაჯგუფების ლიდერმა, ზურაბ მახარაძემ ტელევიზიის ეთერით ახალი თავდასხმისთვის ხალხის მობილიზაციის დაწყების შესახებ განაცხადა.

ქართული ოცნების თავმჯდომარემ, ირაკლი კობახიძემ კი ძალადობრივი დაჯგუფების ლიდერები ოპოზიციური პარტიების წარმომადგენლებთან გაათანაბრა და აღნიშნა, რომ მორგოშიას და მახარაძის დაკავების სტანდარტს თუ გავითვალისწინებთ, ნახევარი ოპოზიცია დასაჭერია, „არსებობს სისხლის სამართალი და სისხლის სამართალს აქვს თავისი მტკიცებულების სტანდარტი — უნდა დგინდებოდეს, რომ ვიღაცის გამონათქვამს აქვს მიზეზ-შედეგობრივი კავშირი კონკრეტულ ძალადობასთან“.

ალტ-ინფომ პრაიდ კვირეულისთვის ხალხის მობილიზაცია დაიწყო, ქვეყნის პრემიერმა კი წინა წლის მოვლენებზე პასუხისმგებლობა თბილისი პრაიდს დააკისრა

22 ივნისს, პრორუსული, ძალადობრივი დაჯგუფება კონსერვატიული მოძრაობის ერთ-ერთმა ლიდერმა, ზურაბ მახარაძემ დაჯგუფების ტელევიზიის, ალტ-ინფოს ეთერში პრაიდ კვირეულის საწინააღმდეგოდ ხალხის მობილიზება გამოაცხადა.

ზურაბ მახარაძემ აღნიშნა, რომ „ამათ ჩვენ საბოლოოდ გადავამტვრევთ“, ამასთან, ძალადობრივი დაჯგუფების ლიდერის თქმით, „საქართველოში არა ერთი ხელისუფლება მეორით, არამედ წყობა, სისტემა და მიზანი შეიცვლება“ იმის, რასაც აკეთებენ.

მახარაძის განცხადების პარალელურად პარლამენტში პრემიერ მინისტრის, ირაკლი ღარიბაშვილის გამოსვლა შედგა, რომლემაც, გასული წლის 5 ივლისის მოვლენები თბილისი პრაიდის პასუხისმგებლობად მოიხსენია და აღნიშნა, რომ „ლგბტ ორგანიზაციის დირექტორი და სირცხვილია — ეს ერთი ორგანიზმია, ამათ უკან სააკაშვილი და ნაციონალური მოძრაობა დგას. მათი წახალისებული იყო ეს ვითომ ღირსების მარში თუ რაღაც რომ უნდა  ჩაეტარებინათ. პირდაპირი პროვოკაცია, პირდაპირი ანტიეროვნული, ანტისახელმწიფოებრივი პროვოკაცია, უნდოდათ, ქვეყანაში დესტაბილიზაცია გამოეწვიათ, მასობრივი არეულობა, შეტაკებები, პოლიციას ძალა გამოეყენებინა. ეს ამ ადამიანებმა დაგეგმეს“. 

პრემიერ ღარიბაშვილის თქმით, 5 ივლისის ძალადობრივ ქმედებებზე პასუხისმგებელი პირები დაიჭირეს და გაასამართლეს, თუმცა აღსანიშნავია, რომ ძალადობრივი აქციის ორგანიზატორები დღემდე არ არიან გასამართლებული, მეტიც, დაჯგუფების ლიდერი, ზურაბ მახარაძემ ტელევიზიის ეთერით ახალი თავდასხმისთვის ხალხის მობილიზაციის დაწყების შესახებ განაცხადა.

პრორუსულ დაჯგუფება ალტ-ინფოს 216 ათასი ლარის ჯარიმა დაეკისრა

აუდიტის სამსახურის მიმართვის საფუძველზე, პრორუსულ, ძალადობრივ დაჯგუფება ალტ-ინფოს სასამართლომ 216 ათასი ლარის გადახდა დააკისრა.

ალტ-ინფოს ბრალად 2021 წლის დეკლარაციის არასწორად შევსება და არაფულადი შემოწირულებების დამალვა ედება. ალტ-ინფო გასული წლის დეკლარაციაში აღნიშნავდა, რომ 2021 წლის დეკემბერში ფულადი ბრუნვა არ ჰქონიათ. გარდა ამისა, დაჯგუფებამ დეკლარაციაში არ აღნიშნა ის არაფულადი შემოწირულება, რაც ბრენდირებული მასალის ბეჭდვის, საოფისე და სხვა ინვენტარის სახით მიიღეს. 

დაჯგუფების არადეკლარირებულმა თანხებმა 72 ათასი ლარი შეადგინა, ამიტომ ალტ-ინფოს ამ თანხის ოდენობის ორმაგი ჯარიმა და დამატებით, არადეკლარირებული თანხის ბიუჯეტში გადარიცხვა დაეკისრა.

ალტ-ინფოს ერთ-ერთმა ლიდერმა, კოკა მორგოშიამ TV პირველთან საუბარში აღნიშნა, რომ გადაწყვეტილების გასაჩივრებას აპირებენ.

მივიღებთ ყველა იმ ზომას, რაც კანონითაა განსაზღვრული — შს მინისტრის მოადგილე პრაიდ კვირეულის შესახებ

შინაგან საქმეთა მინისტრის მოადგილე ალექსანდრე დარახველიძემ პრაიდ კვირეულის შესახებ ჟურნალისტების კითხვის საპასუხოდ განაცხადა, რომ შსს დაიცავს „ყველა იმ პირის უფლებას, ვისაც აქვს კანონით გარანტირებული შეკრებისა და გამოხატვის თავისუფლება“.

მისი თქმით, აღნიშნული ღონისძიების შესახებ შსს-ს ინფორმაცია აქვს და „სამინისტრო მიიღებს ყველა იმ ზომას, რაც კანონითაა განსაზღვრული”.

Tbilisi Pride-ის თანადირექტორის, ანა სუბელიანის თქმით, ხელისუფლებასთან მუდმივი კომუნიკაცია აქვთ და მათი მხრიდან ღონისძიების დაცვის მზაობასაც ხედავენ.

„ნებისმიერი ღონისძიების უსაფრთხოდ ჩატარება პოლიტიკურ ნებაზეა დამოკიდებული, რაც, ვფიქრობ, არ არსებობს, თუმცა ხელისუფლებას დახურულ ღონისძიებებთან დაკავშირებით განსხვავებული მიდგომა აქვს. წინა წელს ხელისუფლებამ უკეთ დაიცვა დახურული ღონისძიებები და წელსაც მუდმივი კომუნიკაცია გვაქვს, მათთან თანამშრომლობას ვაპირებთ და ვხედავთ, რომ უსაფრთხოების დაცვისთვის მზაობაც აქვთ. გავაგრძელებთ მუდმივ ჩართულობას, რათა დაცვის გარანტიები შევქმნათ“, — აღნიშნა ანა სუბელიანმა. 

Tbilisi Pride-მა პრაიდ კვირეული 31 მაისს დააანონსა. ორგანიზაციის განცხადებაში ნათქვამია, რომ კვირეული 28 ივნისიდან 2 ივლისის ჩათვლით გაიმართება და 3 ღონისძიებას გააერთიანებს — ქვიარ ფილმის ჩვენებას, რეგიონულ კონფერენციას და მუსიკალურ პრაიდ ფესტივალს. 

პრაიდ კვირეულის დაანონსებას ალტ-ინფოს წევრების კომენტარები მოჰყვა, რომელთაც აღნიშნეს, რომ ღონისძიებების ჩატარებას არ დაუშვებენ და აქციის ორგანიზებას გეგმავენ.

2021 წლის 5 ივლისს პრაიდ კვირეულის ფარგლებში დაგეგმილი ღირსების მარში ალტ-ინფოს ორგანიზებული ძალადობრივი აქციის გამო ჩაიშალა, რომლის დროსაც სხვადასხვა ორგანიზაციის ოფისი დაარბიეს და მედიის 50-ზე მეტ წარმომადგენელს ფიზიკურად გაუსწორდნენ.

ზურა მახარაძე „ალტ-ინფოს“ პარტიის თავმჯდომარეობიდან გაათავისუფლეს

ულტრამემარჯვენე პრორუსული „ალტ-ინფოს“ სახე ზურა მახარაძე პარტიის თავმჯდომარე აღარ იქნება. როგორც დოკუმენტებიდან ირკვევა, პარტიამ ამის შესახებ განცხადება 28 მარტს შეიტანა.

11 აპრილს საქართველოს საჯარო რეესტრმა ზურა მახარაძის შემცვლელად, კონსერვატიული მოძრაობის თავმჯდომარედ, გიორგი ქარდავა დაამტკიცა. მანამდე ქარდავა გენერალური მდივნის პოზიციას იკავებდა. ამ ეტაპზე მისი ადგილი შოთა მარტინენკოს ერგო. 11 აპრილის ცვლილებების მიხედვით, შეიცვალა პარტიის სახელიც. მას „კონსერვატიული მოძრაობა/ალტ-ინფო“ დაარქვეს.

„ალტ-ინფოს“ ერთ-ერთმა დამფუძნებელმა კონსტანტინე მორგოშიამ უარყო ჭორები იმის შესახებ, რომ მახარაძე რუსეთში უკრაინაში რუსეთის შეჭრის ფონზე გაემგზავრა, მაგრამ დამატებით განმარტებაზე უარი განაცხადა. 13 მარტს, მორგოშიამ საინფორმაციო გამოცემა „პუბლიკას“ განუცხადა, რომ ზურასთან დაკავშირებით პარტიას სხვა გეგმები აქვს, ის რჩება პარტიაში და არანაირი მნიშვნელობა არ აქვს, ვინ იქნება თავმჯდომარე.

„ალტ-ინფომ“ თავისი პოლიტიკური პარტია „კონსერვატიული მოძრაობა“ გასული წლის ნოემბერში წარადგინა. საზოგადოებამ ხელისუფლებას მოუწოდა უარი ეთქვა მათ რეგისტრაციაზე, რადგან პარტიის ლიდერები 2021 წლის ივლისში, მასობრივი ძალადობის ორგანიზებაში მონაწილეობდნენ და ყოველთვის გამოირჩევიან აგრესიით, ძალადობრივი ქმედებებითა და პრორუსული განცხადებების გავრცელებით.

თებერვალსა და მარტში იყო მცდელობები, რომ „ალტ-ინფოს“ რეგიონული ოფისები ვერ გაეხსნა. ზოგიერთ შემთხვევაში ჯგუფის მხარდამჭერებმა საპროტესტოდ გამოსულ ადამიანებს ძალადობით უპასუხეს, მათ შორის, ქობულეთსა და ზუგდიდში.

ფლანგვის დეტექტორმა ალტ-ინფოს ფინანსები და ქართულ ოცნებასთან კავშირები შეისწავლა

ფლანგვის დეტექტორმა პრორუსული და ძალადობრივი დაჯგუფება ალტ-ინფოს მიერ დაფუძნებული პარტიის ფინანსები და მთავრობასთან ურთიერთობა შეისწავლა, რომლითაც ქართულ ოცნებასთან სავარაუდო კავშირები იკვეთება. 

კონსერვატიული პარტიის ოფისების გახსნას პროტესტი არაერთ ქალაქში მოჰყვა, თუმცა ფლანგვის დეტექტორის თანახმად, ზოგიერთ ქალაქში პარტიამ საოფისე ფართის ქირაობა ქართულ ოცნებასთან დაკავშირებული პირების დახმარებით შეძლო.

წყალტუბოს რეგიონული ოფისი ალტ-ინფომ ქართული ოცნების მაჟორიტარი დეპუტატის, ავთანდილ მხეიძის შვილისგან, რეზო მხეიძისგან იქირავა. აღსანიშნავია, რომ ფართის თანამესაკუთრე რუსეთის მოქალაქე, აკაკი ლორთქიფანიძეა. გარდა ამისა, კონსერვატიული მოძრაობის რეგიონული ოფისების რამდენიმე ხელმძღვანელი და პარტიის წევრი ადგილობრივი მერიის ა(ა)იპ-ებშიც არიან დასაქმებული.

ფლანგვის დეტექტორმა კონსერვატიული მოძრაობის ფინანსებიც შეისწავლა და დაადგინა, რომ დაჯგუფების თქმით, პარტიის ერთ-ერთი დამფინანსებელი ალტ-ინფოს ლიდერი კონსტანტინე მორგოშია ორჯერ არის ნასამართლევი. პირველად წინა ხელისუფლების პერიოდში სახელმწიფო ქონების მითვისებისა და თაღლითობის ბრალდებით, რა დროსაც მისი ადვოკატი ქართული ოცნების ამჟამინდელი ლიდერი მამუკა მდინარაძე იყო. მორგოშია მართლსაწინააღმდეგო ქმედებაში მეორედ 2016 წელს არის შემჩნეული, როცა პატრიოტთა ალიანსს კანონით გათვალისიწნებულ წლიურ შემოწირულობაზე, 60 ათას ლარზე მეტი თანხა შესწირა. მორგოშიას 180 ათასი ლარის გადახდა დაეკისრა, რაზეც უარი განაცხადა და ამის გამო 2017 წლიდან მოვალეთა რეესტრშია რეგისტრირებული.

მორგოშიას ქონება ვერ დაუყადაღეს, რადგან საკუთარ სახელზე არც აქტივები და არც უძრავი ქონება აქვს გაფორმებული. ალტ-ინფოს ლიდერი მამიდის, ციალა მორგოშიას და ძმის, გიორგი მორგოშიას დახმარებით წარმართავს ფინანსურ ოპერაციებს.

გარდა ამისა, ფლანგვის დეტექტორის მიგნებით, მორგოშიების ოჯახი მერიასთან კავშირებშია შემჩნეული. გიორგი მორგოშია მერიასთან დეველოპერული კომპანიის შუამავალი იყო და ამ გარიგების წყალობით 800 კვ.მ საცხოვრებელი ფართი და $110 ათასი გადაეცა. ალტ-ინფოს ლიდერის ძმამ მშენებლობის ნებართვის მოსაპოვებლად 3 თვე მოითხოვა, რაც აღნიშნული გარიგებისთვის მცირე დროა, ამასთან ის არქიტექტურის სამსახურის ჩანაწერებში არ იძებნება. გიორგი მორგოშია მერიასთან შუამავლის როლში კიდევ ერთ ეპიზოდში გვევლინება, რომლისთვისაც 400 კვ.მ საცხოვრებელი ფართი მიიღო.

ფლანგვის დეტექტორის მტკიცებით, აღნიშნული ფაქტი განსაკუთრებით საეჭვოა, რადგან 2021 წელს გავრცელებულ სუს-ის ჩანაწერებს ჰგავს, რომელშიც ქართული მარშის ლიდერი სანდრო ბრეგაძე და სხვა პრორუსული დაჯგუფების, პრიმაკოვის ცენტრის ხელმძღვანელი, დიმიტრი ლორთქიფანიძე საუბრობენ, როგორ მისცა კახა კალაძემ კონსტანტინე მორგოშიას უკანონო მშენებლობის უფლება ორჯერ.

ფლანგვის დეტექტორის მიერ მომზადებული სრული მასალის ნახვას აღნიშნულ ლინკზე შეძლებთ.

 

ალტ-ინფოს ონის ოფისი უკრაინის დროშის ფერებში შეღებეს

მთის ამბების ცნობით, ალტ-ინფოს რაჭაში, ქალაქ ონში მდებარე ოფისი მოქალაქეებმა უკრაინის დროშის ფერებში შეღებეს და ოფისის კარზე წარწერა – Z დატოვეს, რომელიც რუსული სამხედრო სიმბოლოა.

ქვიარი

მთის ამბებისთვის მიცემულ ინტერვიუში აღნიშნული პროტესტის ორგანიზატორებმა აღნიშნეს, რომ ეს იყო ღიად პრორუსული ორგანიზაციის წინააღმდეგ მიმართული პროტესტი, რადგან თვლიან, რომ ალტ-ინფოს გავლენის განმტკიცება სახელმწიფოს ინტერესებს ეწინააღმდეგება.

პრორუსული, ძალადობრივი დაჯგუფება ალტ-ინფო საქართველოს სხვადასხვა ქალაქში ოფისებს ხსნის, რასაც არაერთ ქალაქში საპროტესტო აქციების გამართვა მოჰყვა — მესტიაში ალტ-ინფოს ოფისის გახსნის წინააღმდეგ ახალგაზრდები გამოვიდნენ, რასაც პრორუსულმა ძალამ აგრესიით უპასუხა და 10-მდე ადამიანი სცემეს, იგივე განმეორდა ქობულეთშიც, სადაც სკოლის მოსწავლეებისა და სტუდენტების მიერ ორგანიზებულ აქციაზე კონსერვატიული მოძრაობის 12 წევრი და მხარდამჭერი დააკავეს, მოქალაქეთა ორგანიზებით მოეწყო აქცია ოზურგეთსა და ზუგდიდშიც. ალტ-ინფოს ოფისის გახსნა ამბროლაურშიც გააპროტესტეს, გორში ოფისის შენობას წითელი საღებავი შეასხეს, ახალციხეში ადგილობრივებმა ოფისის ბანერზე საბჭოთა ნოსტალგიების საწინააღმდეგო წარწერები გააკეთეს, ხულოსა და შუახევში კი პრორუსულ ძალას ოფისები გახსნის დღესვე დაატოვებინეს.