უკრაინაში ბოლო ერთ კვირაში განვითარებული მოვლენების გამო ჰოლივუდის მსხვილი კინოსტუდიები წყვეტენ ფილმების გაქირავებას რუსეთში.
პირველი, ვინც ეს გადაწყვეტილება მიიღო, The Walt Disney-ია, რომელმაც ოფიციალური განცხადება ორშაბათს გააკეთა და თქვა, რომ Disney-ისა და Pixar-ის ანიმაციური ფილმის Turning Red-ის პრემიერა რუსეთში აღარ გაიმართება.
Disney-ის ამ განცხადებიდან მალევე Warner Brothers-მა და Sony-მაც შეწყვიტა ფილმების ჩვენება რუსეთის ტერიტორიაზე. სამშაბათს კი ზემოთ ჩამოთვლილ კინოკომპანიებს Paramount Pictures და Universal-იც შეუერთდნენ.
„სამომავლო ბიზნესგადაწყვეტილებები დამოკიდებული იქნება იმაზე, თუ როგორ განვითარდება მოვლენები“, – განაცხადა დისნეიმ – „ამასთან, ჩვენს პარტნიორ არასამთავრობო ორგანიზაციებთან ერთად ჩავერთვებით ჰუმანიტარულ დახმარებაში.”
Warner Bros-მა რუსეთში „ბეტმენის“ პრემიერა გააუქმა, ხოლო Sony-იმ – Morbius-ის.
Comscore-ის მონაცემების მიხედვით, რუსეთის ბაზრიდან ჰოლივუდის კინოკომპანიების მოგების 3% მოდის.
