ტიკტოკის ვარსკვლავი ემირა დი’სფეინი, რომელსაც სოციალურ ქსელებში XOXOEMIRA-ს სახელით იცნობენ, Victoria’s Secret-ის პირველი შავკანიანი ტრანსგენდერი მოდელი გახდა. 25 წლის მოდელი ქალის საცვლების კომპანიის ვალენტინობის დღის ტიკტოკ ვიდეოში გამოჩნდა და მარტოხელა მომხმარებლებს ვალენტინობის დღის სასიამოვნოდ გატარების გზები შესთავაზა.
„ჩემი პლატფორმა თავდაჯერებასა და საკუთარი თავის სიყვარულზეა დაფუძნებული. მსურს, ახალგაზრდა ტრანსგენდერი გოგოები და ბიჭები გავაძლიერო და დავანახო მათ, რომ სილამაზის და მოდის ინდუსტრია იცვლება, განსაკუთრებით ფერადკანიანი ადამიანებისთვის. ამაყი ვარ, რომ Victoria’s Secret-ისთვის ვმუშაობ და იმედი მაქვს, ეს სხვა ადამიანებისთვისაც შექმნის შესაძლებლობებს“, – აღნიშნა ემირა დი’სფეინმა.
2018 წელს, Victoria’s Secret სკანდალში გაეხვა, რადგან კომპანიის მარკეტინგის ხელმძღვანელმა, ედ რაზეკმა ტრანსფობიური კომენტარები გაავრცელა, ასევე წონის ნიშნით მადისკრიმინირებელი განცხადებები. კომპანია შელახული იმიჯის აღდგენას დღემდე ცდილობს და მეტად ინკლუზიური გახდა. 2019 წელს, ბრაზილიელი მოდელი, ვალენტინა სამპაიო პირველი ტრანსგენდერი ქალი გახდა, რომელთანაც ბრენდმა ითანამშრომლა, დი’სფეინი კი პირველი შავკანიანი ტრანსგენდერი ქალია, რომელმაც ბრენდთან კონტრაქტი გააფორმა.
