გარდა თვალისმომჭრელი ნახატებისა და დაუვიწყარი ამბებისა, ანიმეს სამყარო მაყურებელს სექსუალური უმცირესობების საინტერესო თავგადასავლებსაც სთავაზობს. იაპონური მანგას შექმნელები და ილუსტრატორები მრავალი წელია თავიანთ ნამუშევრებში წარმოაჩენენ ქვიარ პერსონაჟებს, მათ ცხოვრებასა და გამოცდილებას.
გთავაზობთ 9 ანიმეს, რომელიც ძალიან საინტერესო შეიძლება აღმოჩნდეს, როგორც ანიმეს ერთგული მაყურებლისთვის, ასევე იმ მაყურებლებისთვისაც, რომლებსაც აქამდე შეხება არ ჰქონიათ ანიმეს ძალიან მრავალფეროვან და თვალისმომჭრელ სამყაროსთან:
იური ყინულზე (ユーリ!!! on ICE)
„იური ყინულზე“ მიცურო კუბოს 2016 წლის მანგას სერიას ეფუძნება და სპორტული ანიმეს ჟანრს განეკუთვნება. ანიმეში მოთხრობილია 23 წლის ფიგურული მოციგურავის, იური კაცუკის ისტორია, რომელიც ჩემპიონატში განცდილი მარცხის შემდეგ თავის მშობლიურ ქალაქში იმედგაცრუებული ბრუნდება. ყველაფერი კი მას შემდეგ იცვლება, როცა იურის მწვრთნელობას ცნობილი რუსი მოციგურავე, ვიქტორი გადაწყვეტს.
ყვავილობა შენში (やがて君になる)
„ყვავილობა შენში“ იური მანგას ჟანრს განეკუთვნება და 2015-2019 წლებში იბეჭდებოდა იაპონიაში. ანიმეში მოქმედება ტოომი ჰიგაშის საჯარო სკოლაში ვითარდება და გვიამბობს ორი მეგობრის ისტორიას, რომლებსაც რომანტიკული გრძნობები უჩნდებათ ერთმანეთის მიმართ. იუუს და ტოუკოს უჭირთ სიყვარულის გამოხატვა მანამ, სანამ ისინი ერთმანეთს არ შეხვდებიან.
ნომერი 6 (NO.6)
„NO.6“ კიდევ ერთი ქვიარ ანიმეა, რომელშიც მოთხრობილია პრივილეგირებული, მაღალი საზოგადოების წევრის, შიონის ისტორია, რომელსაც ყველა დიდ მომავალს უწინასწარმეტყველებს. თუმცა დისტოპიურ Sci-fi ანიმეში ყველაფერი მას შემდეგ იცვლება, რაც შიონი სახელმწიფოს მტერს, ნეზუმის გაუწევს დახმარებას. ბიჭის დახმარების შემდეგ შიონს დასჯიან და ჩამოაშორებენ ელიტარულ საზოგადოებას. წლების შემდეგ ბიჭები კვლავ ხვდებიან ერთმანეთს და მათ შორის რომანტიკული გრძნობები ჩნდება.
მოხეტიალე ვაჟი (放浪息子)
„მოხეტიალე ვაჟი“ კიდევ ერთი ანიმეა, რომელიც 2002-2013 წლის მანგას ეფუძნება. ანიმე ერთ-ერთი იშვიათია, სადაც წარმოჩენილია ტრანსგენდერი ადამიანების ცხოვრება და გვიყვება ორი ბავშვის, ტრანსგენდერი გოგონას, შიუჩის და ტრანსგენდერი ბიჭის, იოშინოს ისტორიას. ანიმეში კარგად არის წარმოჩენილი ტრანსგენდერი ადამიანების ყოველდღიური გამოწვევები სკოლაში და ნაჩვენებია მეგობრების ისტორია დაწყებითი კლასებიდან მაღალ კლასებამდე.
რევოლუციური გოგონა უტენა (少女革命ウテナ)
„რევოლუციური გოგონა უტენა“ 90-იანი წლების საკულტო ანიმეა, რომელიც be-papas კოლექტივს ეკუთვნის. ანიმეს მიხედვით სხვადასხვა დროს შეიქმნა სიქველი, ვიდეო თამაში, გრაფიკული რომანი და მიუზიკლი. ანიმეში მოთხრობილია პრინცესა უტენას ისტორია, რომელსაც გადაწყვეტილი აქვს პრინცი გახდეს და საკუთარი თავის დაცვა ისწავლოს. ანიმეში მოქმედება ელიტარულ სასწავლებელში ვითარდება და მას მრავალი ერთგული მაყურებელი ჰყავს. საკულტო ანიმემ დიდი გავლენა მოახდინა ისეთ ამერიკულ ანიმაციებზე, როგორებიცაა: Steven Universe და She-ra: Princess of Power.
კლასელები (同級生)
„კლასელები“ 2006 წლის მანგაზე დაფუძნებული ანიმეა, რომელიც მრავალი წლის განმავლობაში დიდი პოპულარობით სარგებლობს იაოის ჟანრის მკითხველებში. მანგას მიხედვით არაერთი სიქველი გაკეთდა. ანიმეში მოქმედება ბიჭების სკოლაში ვითარდება და გვიამბობს რიჰიტოს და ჰიკარუს შესახებ, რომლებსაც ერთმანეთის მიმართ რომანტიკული გრძნობები უჩნდებათ. ცხოვრებისეული ანიმე არ გამოირჩევა დაძაბული სცენებით, თუმცა ის მაინც გამორჩეულად საინტერესოა ქვიარ ადამიანებისთვის.
საჩუქარი (ギヴン)
„საჩუქარი“ კიდევ ერთი საკულტო ჟანრის ანიმეა, რომლის მიხედვით არაერთი სიქველი იხილა მაყურებელმა. მანგას მიხედვით ცნობილი იაპონური ფილმიც გადაიღეს. ანიმეში მოქმედება ერთ-ერთ იაპონურ სკოლაში ვითარდება და გვიამბობს გიტარისტის, რიცუკას ისტორიას, რომელსაც დაკარგული აქვს მუსიკის მიმართ ინტერესი და რთული პერიოდი უდგას, თუმცა ყველაფერი მას შემდეგ იცვლება, რაც მაფუიუ გიტარისტ ბიჭს სკოლის როკ ბენდში გაწევრიანებას შესთავაზებს. ბიჭებს შორის მალევე ჩნდება რომანტიკული გრძნობები.
პრინცესა რაინდი (リボンの騎士)
„პრინცესა რაინდი“ 1950-იანი წლების კლასიკურ მანგას ეფუძნება, რომლის ავტორიც ლეგენდარული ოსამუ ტეზუკაა. ანიმეში მოთხრობილია პრინცესას ისტორია, რომელიც ორი გულით იბადება, ვარდისფერი გულით, რომელიც გოგოსია, ხოლო ცისფერი – ბიჭის. გოგონას უწევს მოიტყუოს რომ ბიჭია, იმისთვის, რომ მოიპოვოს სამეფო ტახტი. მიუხედავად იმისა, რომ უამრავი თემა დღეს უკვე მოძველებულია, ზღაპრულმა ანიმემ არაერთ სხვა ანიმეს დაუდო სათავე, რომელიც გენდერის საკითხებს უღრმავდება.
უცნობები სანაპიროზე (海辺のエトランゼ)
„უცნობები სანაპიროზე“ კიდევ ერთი ქვიარ ანიმეა, რომელიც გვიამბობს შუნი ჰაშიმოტოს ისტორიას, შუნი გეი მწერალია, რომელიც შემთხვევით ხვდება ობოლ მიოს, შეხვედრის შემდეგ შუნს უწევს თავისი მძიმე წარსულისა და ოჯახის წევრების გახსენება, რომლებმაც ქამინგაუთის შემდეგ შუნი სახლიდან გამოაგდეს. ბიჭებს შორის რომანტიკული გრძნობები ჩნდება, თუმცა ყველაფერი მას შემდეგ იცვლება, რაც შუნი გაიგებს, რომ მისი მამა მძიმედ არის ავად და სასწრაფოდ უნდა დაბრუნდეს მშობლიურ ქალაქში.
წყარო: Den of Geek
