ისტორიაში პირველად, გერმანიის პარლამენტში ადგილი ორმა ტრანსგენდერმა ქალმა მოიპოვა.
მწვანეები, მემარცხენე-ცენტრისტული პოლიტიკური პარტია, რომელიც გარემოს დაცვაზეა ორიენტირებული, გერმანიის ბუნდესტაგის არჩევნებში მესამე ადგილზე გავიდა და ხმების 14,8% მოიპოვა. ეს გამარჯვება 42 წლის პარტიის საუკეთესო შედეგია გერმანიაში – საპარლამენტო ადგილებს 44 წლის ტესა განსერერი და 27 წლის ნიკე სლავიკი დაიკავებენ.
ტესა განსერერი
ნიკე სლავიკი
“ეს არის ისტორიული გამარჯვება არა მხოლოდ მწვანეთა პარტიის, არამედ ტრანს-ემანსიპაციური მოძრაობისა და მთელი ქვიარ საზოგადოების” – განაცხადა განსერერმა, რომელიც ბავარიის პარლამენტში 2013 წლიდან მუშაობს.
”ჯერ კიდევ არ მჯერა, არჩევნების ამ ისტორიული შედეგით მე აუცილებლად ვიქნები მომავალი ბუნდესტაგის წევრი” – წერს სლავიკი თავის ინსტაგრამ გვერდზე.
გერმანიის ახალი კანონმდებლების პრიორიტეტებში ლგბტქ+ მოქალაქეებისთვის ცხოვრების ხარისხის გაუმჯობესებაც შედის. განსერერი იმედოვნებს, რომ გაამარტივებს დოკუმენტაციაში სქესის აღმნიშვნელ გრაფაში ცვლილების შეტანის პროცესს. მიმდინარე კანონმდებლობით, ტრანს ადამიანებმა, რომლებსაც სქესის შეცვლა სურთ, უნდა შეიტანონ შუამდგომლობის განაცხადი ადგილობრივ სასამართლოში, რომელიც ორ ექსპერტს ავალდებულებს, 3 წლის დაკვირვების შემდეგ, დაადასტურონ, რომ განმცხადებელი არ მიეკუთვნება მიმდინარე სქესს და მათი სქესის მიხედვით, სულ მცირე, სამი წლის განმავლობაში, მიიღებს გადაწყვეტილებას საბუთბში სქესის შეცვლის შესახებ.
ხოლო სლავიკი, გარდა იმისა, რომ მხარს უჭერს კანონს, რომელიც საშუალებას მისცემს ტრანს ადამიანებს თვითიდენტიფიცირდნენ მარტივად, ასევე, გეგმავს ქვეყნის მასშტაბით მიიღოს „სამოქმედო გეგმა ჰომოფობიისა და ტრანს მტრობის წინააღმდეგ“. მისი კამპანია ასევე მოიცავს გერმანიაში “სტრატეგიას რასიზმის წინააღმდეგ” და ,,ფედერალურ ანტიდისკრიმინაციულ კანონს”.
მიუხედავად იმისა, რომ გერმანიის ზოგადი ,,თანაბარუფლებიანი მოპყრობის აქტი” გენდერული იდენტობისა და სექსუალური ორიენტაციის საფუძველზე დისკრიმინაციასაც მოიცავს , ის მხოლოდ დასაქმებისა და საცხოვრებელით უზრუნველყოფის საკითხებზე ვრცელდება. ფედერალური კანონი არ იცავს ლგბტქ+ გერმანელებს სიძულვილის ენისა და ფიზიკური ძალადობისგან. 2020 წელს ქვიარ და ტრანსგენდერი ადამიანების მიმართ ძალადობა 36%-ით გაიზარდა, ხოლო ლგბტქ+ დამცველები ამტკიცებენ, რომ ეს მაჩვენებელი არ არის ზუსტი და კიდევ უფრო მაღალია, რადგან სამართალდამცავ ორგანოებთან ამ თემაზე ანგარიშგების სისტემა არ არსებობს.
წყარო: them.us
