დღეს სახალხო დამცველმა ბრიფინგი გამართა და 5 ივლისს მომხდარი ძალადობის ფაქტების გამოძიების ხარვეზებზე ისაუბრა.
,,5 ივლისის ძალადობრივი მოვლენებიდან გავიდა 2 თვე. პროკურატურის მიერ მოწოდებული ინფორმაციის მიხედვით, დაზარალებულად არის ცნობილი 53 პირი, სისხლის სამართლებრივი დევნაა დაწყებული 27 პირის მიმართ, მათ შორის, ჯგუფურ ძალადობაში მონაწილეობის ბრალდებით, თუმცა, სამწუხაროდ, პროკურატურას ჯგუფური ძალადობის ორგანიზების ბრალდებით სისხლის სამართლებრივი დევნა არც ერთი პირის მიმართ არ დაუწყია. სახალხო დამცველმა შეისწავლა მედიასაშუალებების მიერ გავრცელებული მასალები და ჩვენ მივიჩნევთ, რომ საჯაროდ გავრცელებული მტკიცებულებები აღწევს დასაბუთებული ვარაუდის, ანუ ბრალის წარდგენის სტანდარტს, რათა ორი პირის მიმართ დაწყებულ იქნას სისხლის სამართლებრივი დევნა. ერთ შემთხვევაში, ჯგუფური ძალადობის ორგანიზების, მეორე შემთხვევაში კი – ძალადობრივი ქმედების საჯაროდ მოწოდების ფაქტზე. სახალხო დამცველი არის უფლებამოსილი მოითხოვოს სისხლის სამართლებრივი დევნის დაწყება, თუკი საქმის შესწავლის შემდეგ მივა დასკვნამდე, რომ არსებობს დანაშაულის ნიშნები. შესაბამისად, მე ეს უფლებამოსილება გამოვიყენე და უკვე მივმართე პროკურატურას, რომ ზურაბ მახარაძის და დეკანოზ სპირიდონ ცქიფურიშვილის მიმართ დაიწყოს სიხლის სამართლებრივი დევნა.” – ამბობს ნინო ლომჯარია.
