ტერიმ დილით გაიღვიძა შეგრძნებით, რომ რაღაც ხდება, ყველაფერი კარგად არ არის. არადა წამლებს სვამს, თავს კარგად გრძნობს, ცხოვრებაშიც ყველაფერი კარგად მიდის, თითქოს ისეთი არაფერი ხდება. თუმცა აქვს შეგრძნება, რომ რაღაც ხდება…
ტერის მსგავსი დღეები ადრეც ჰქონია და ასეთ დროს უენერგიობა ახასიათებს, გუნება-განწყობილება დაქვეითებული აქვს და ყველაფერი რთულად ეჩვენება. „ასეთ დროს ავად ყოფნის შეგრძნება არ გაქვს, თითქოს ფუნქციური ხარ და აკეთებ რუტინულ საქმეებს, მაგრამ ვერ ხვდები, რა გჭირს. საკუთარ თავს ეკითხები – რამე მჭირს? იქნებ მენტალური ჯანმრთელობის პრობლემა მაქვს? ან ფიზიკურად ვარ ავად?“ – ამბობს ტერი.
თუ თქვენც გაქვთ მსგავსი გამოცდილება და იგივე ემოციები ან ფიქრები გქონიათ, რთული დღეების დასაძლევად, რამდენიმე რჩევას გთავაზობთ:
- საკუთარ თავთან დიალოგი
ყველაზე ნაკლებად რაც გჭირდებათ რთულ დღეებში – თვითკრიტიკაა. მეტად კეთილგანწყობილი იყავით საკუთარი თავის მიმართ. შეახსენეთ, რომ ადრეც გქონიათ რთული დღეები, მაგრამ აკეთებდით მაქსიმუმს, ზრუნავდით საკუთარ თავზე, რომ უკეთ ყოფილიყავით. თქვენ გყავთ მხარდამჭერები და მეგობრები, რომლებიც დაგეხმარებიან. მსგავსი დიალოგი ნეგატიური აზრების გაჩენას აგარიდებთ.
- თავი აარიდეთ კატასტროფიზაციას
რთული დღე არის რთული დღე და ნუ განაზოგადებთ მას მთელ დარჩენილ ცხოვრებაზე. ყველაფერი კატასტროფულადაა და რა ცუდია ყველა და ყველაფერი – არის მაგალითი იმისა, რომ თქვენი ფიქრები რაციონალურობას სცდება. ეცადეთ, შეინარჩუნოთ საღი აზრი.
- ”ნორმალურობა” და ნორმალურად ყოფნა ცვალებადია
თქვენ შეიძლება თავს გრძნობდეთ კარგად იმ ნორმალურობის მიღმა, რაც დადგენილი ან მიღებულია, ამიტომ ნუ დაიძაბებით ამის გამო. არის ცუდი და კარგი დღეები, ცუდი დღე არ ნიშნავს ცუდ ცხოვრებას.
- ისაუბრე ხმამაღლა შენი ემოციების შესახებ
რთული დღეების გადასაგორებლად, ერთ-ერთი საუკეთესო საშუალება საკუთარი შეგრძნებების იმისთვის განდობაა, ვინც შენთვის მნიშვნელოვანია, ვისაც ენდობი და შეუძლია, მხარში დგომა და დახმარება. ზოგჯერ მხოლოდ ახლობელთან საუბარი არ არის საკმარისი და სპეციალისტთან მისვლა აუცილებელია, თუმცა მიუხედავად ყველაფრისა, მარტო არ დარჩე საკუთარ პრობლემებთან, ისაუბრე.
- გადართვა
ზოგჯერ საჭიროა რუტინიდან ამოვარდნა და სხვა აქტივობებში ჩართვა. დაკავდი იმით, რაც მოგწონს, გეხალისება და კომფორტულია.
- ენდე საკუთარ ინსტინქტებს
სინამდვილეში ჩვენ კარგად ვიცნობთ საკუთარ თავს და თუ მოვუსმენთ, სხეული და გონება აუცილებლად მიგვანიშნებს, რა გვჭირდება მოცემულ მომენტში. თუ გრძნობ, რომ რაღაც რიგზე არ არის, დაურეკე ექიმს. დღეს რაღაც კარგად ვერ ხარ? ე.ი. შეიძლება, ცუდი დღეა და ეს არ გაგრძელდება დარჩენილი ცხოვრების მანძილზე. იზრუნე საკუთარ თავზე ყველგან და ყოველთვის.
წყარო: hivplusmag.com
