მიმდინარე წლის 7 ივლისს უნგრეთში ძალაში შევიდა ახალი კანონი, რომლის თანახმად, დანაშაული გახდა გენდერული იდენტობისა და სექსუალური ორიენტაციის „პოპულარიზაცია“ საგანმანათლებლო სფეროში, ბავშვებში, ფილმებსა და რეკლამებში. კანონი საკმაოდ ბუნდოვანია, რაც ნიშნავს იმას, რომ შესაძლოა, იგი გამოყენებული იქნას სხვადასხვა კონტექსტში. ასევე, ტრანსგენდერ და არაბინარულ ადამიანებს აეკრძალათ სქესის შეცვლა. ამ ყველაფერს წინ უძღვოდა 12 თვით ადრე მიღებული ანტი-ლგბტ კანონი უნგრეთის მემარჯვენე პრემიერ მინისტრის – ვიქტორ ორბანის მიერ.
2012 წელს ILGA Europe-მა უნგრეთი მე-9 ადგილზე დაასახელა ევროპის 49 ქვეყანას შორის ლგბტ ადამიანების უფლებების მდგომარეობის მხრივ. დღეს ის 28-ე ადგილზეა.
„ვერასდროს წარმოვიდგენდი, თუ ჩემი ყოფნა ასეთი საშიში იქნებოდა“ – ამბობს მარია კრისტოფი.
მარია 71 წლის არის, ყოფილი კლასიკური მუსიკის მომღერალია. დაქორწინებული იყო კაცზე, ჰყავს ორი შვილი და შვილიშვილი. 25-წლიანი ქორწინების შემდეგ ის დაქამინგაუთდა, როგორც ლესბოსელი. „გულის სიღრმეში ბავშვობიდან ვიცოდი, რომ ლესბოსელი ვიყავი, თინეიჯერობის ასაკში ბიჭი შემიყვარდა, თუმცა გოგოებზე სულ ვფიქრობდი. ჩემთვის ეს პრობლემა არასდროს ყოფილა, მაგრამ 1970 წელს ჰომოსექსუალობა პრობლემა იყო საზოგადოებისთვის, როცა არანაირი ინფორმაცია არ არსებობდა ამის შესახებ“ – ამბობს მარია და იქვე ამატებს, რომ გუნდში, რომელშიც ის მღეროდა, არაერთი ქვიარ ადამიანი იყო, რომლებიც საკუთარ ორიენტაციას მალავდნენ. დროთა განმავლობაში ბევრმა გააკეთა ქამინგაუთი, თუმცა უნგრეთის ულტრამემარჯვენე ძალები გაძლიერდნენ. მარია მათ ანტი-ქრისტიანებს უწოდებს.
„ახლა კრიტიკული დროა“ – ამბობს უნგრელი ქვიარ აქტივისტი აკოს მოდოლო და იხსენებს ბავშვობის პერიოდს, როდესაც ჰომოსექსუალები უცხოპანეტელებთან იყვნენ გაიგივებული უნგრეთში. მან საკუთარი სექსუალობა ადრეულ ასაკში მიიღო. მას შემდეგ, რაც ბებიამ და ბაბუამ ის ტელევიზიით იხილეს უნგრეთის პრაიდზე, აკოსი მათთანაც დაქამინგაუთდა. თავიდან ქამინგაუთი რთული იყო, თუმცა ბებია-ბაბუამ შვილიშვილი მიიღო და აქტივისტი თავს იღბლიანად თვლის, რადგან ის უყვართ. „ბევრი ქვიარ თინეიჯერი თავს მარტოსულად თვლის და თითქოს ვერ პოულობენ ადგილს ამ სამყაროში. ჩვენს ორგანიზაციაში ვეხმარებით საკუთარი თავის მიღებაში, ნორმალური ცხოვრება რომ ჰქონდეთ. ასევე, ვმუშაობთ ჰეტეროსექსუალ ადამიანებთან, რომ გავაგებინოთ, რა არის ბულინგი, რა არ უნდა უთხრან ქვიარ ადამიანებს და როგორ დაუჭირონ მათ მხარი.“ – ამბობს აკოსი და იმედოვნებს, რომ უნგრეთის პრაიდი სასიკეთოდ შეცვლის ამჟამინდელ გაუარესებულ მდგომარეობას ლგბტ უფლებების მხრივ.
„ეს კანონპროექტი წარმოდგენილი იყო, როგორც ბავშვების უფლებების დასაცავად მიღებული. ჩვენი აზრით კი, პირიქით, აღნიშნული კანონი უხეშად არღვევს ბავშვების უფლებებს. დაუსაბუთებელი და არასწორი ინფორმაციის მიწოდება, ასევე, იდენტობისა და სექსუალური ორიენტაციის შესახებ ცოდნა, ბავშვების საბაზისო უფლებების ნაწილია. გარდა ამისა, ქვიარ ბავშვვებმა უნდა იცოდნენ მათი იდენტობისა და მდგომარეობის შესახებ“ -ამბობს ILGA Europe-ის წარმომადგენელი.
ბუდაპეშტის ამჟამინდელი მთავრობა შეუვალია და კომპრომისზე წასვლას არ აპირებს. ის ამბობს, რომ ბავშვების უფლებების დაცვა და მათი აღზრდა იმ კანონების შესაბამისად მოხდება, რომელსაც უნგრეთის მოსახლეობის უმრავლესობა უჭერს მხარს.
წყარო: euronews.com
