საქართველოს პარლამენტს გუშინ უნდა ემსჯელა 5-6 ივლისს პრაიდის წევრებსა და მათ მხარდამჭერებზე, ასევე, ჟურნალისტებზე ორგანიზებული თავდასხმისა და დევნის ფაქტებთან დაკავშირებით საგამოძიებო კომისიის შექმნის თაობაზე, თუმცა გადაწყვეტილების მიღება სექტემბრამდე გადაიდო.
პარლამენტის ოპოზიციური დეპუტატი, ხათუნა სამნიძე, ამასთან დაკავშირებით სოციალურ ქსელში წერს:
“ძალიან გული მწყდება და ვბრაზობ კიდეც, ბოდიშს ვუხდით მე და ჩემი კოლეგები ყველა ჟურნალისტს, ვინც ამ კომისიას ელოდება.
მაგრამ გადადება ჯობდა, ვიდრე არასაკმარისი ხმების გამო ამ ინიციატივის დასრულება სრულიად (თუ ჩავარდება, შემდეგი 6 თვე ვეღარ დავაინიცირებთ) ან ჩავარდნის გამო დამნაშავისკენ თითის გაშვერა.
მაინც შევქმნით და გამოვიძიებთ, სექტემბერში იქნება შემდეგი სხდომა. იმედი მაქვს, უკვე საკმარისი ხმებიც მოგროვდება. დღეს ბოიკოტის გამო ბევრი არ ესწრებოდა სხდომას და რისკი იყო კენჭისყრაზე გატანა. სამწუხაროდ, რეალობა ასეთია, მაგრამ 5-6 ივლისის გამოძიება იმდენად მნიშვნელოვანია, აუცილებლად უნდა გამოვიყენოთ ეს შესაძლებლობა, დღეს თუ არა, ხვალ მაინც ვამხილოთ ეს მოძალადე ხელისუფლება!”
ლგბტქი აქტივისტმა, ნინო ბოლქვაძემ, საგამოძიებო კომისიის შექმნის გადადებასთან დაკავშირებით ”ქვიართან” კომენტარი გააკეთა:
“სამწუხაროა, როდესაც 5-6 ივლისს განვითარებული მოვლენები ვიწრო ჭრილში, ძირითადად, როგორც ჟურნალისტური საქმიანობის ხელშეშლა, ისე განიხილება და ამავდროულად, არ არის ნახსენები, რომ ამ დღეებში ლგბტქი თემის წარმომადგენლების მიმართაც იყო განხორციელებული დანაშაულები და სწორედ ამ ჯგუფის უფლებების ინსტრუმენტალიზება მოხდა ხელისუფლების მხრიდან ყველაზე საშიში გზით, რამაც მასობრივ არეულობებამდე, 50-ზე მეტი ჟურნალისტის დაზიანებამდე და ლექსო ლაშქარავას მკვლელობამდე მიგვიყვანა.
საპარლამენტო საგამოძიებო კომისიის დროულად შექმნა კრიტიკულად მნიშვნელოვანი იყო და მე პირადად, ძალიან მიკვირს, რომ არ მოიძებნა 50 ოპოზიციური პარლამენტარი, რომლებიც კომისიის შექმნისთვის მივიდოდნენ დღეს პარლამენტში და ღილაკს ხელს დააჭერდნენ. ამაზე მნიშვნელოვანი რა უნდა ყოფილიყო დღეს?! გამოძიებას მაშინ აქვს აზრი, როდესაც ის მომხდარი მოვლენებიდან მალევე იწყება. სექტემბერში ჩატარებული გამოძიება ეფექტური ვეღარ იქნება. ძალიან ფრუსტრირებული ვარ იმით, რაც მოხდა. ოპოზიციურ პარლამენტარებს მეტი პასუხისმგებლობა მართებთ.”
