2023 წლის 22-24 სექტემბერს თბილისში ტარდება, ქალთა ინიციატივების მხარდამჭერი ჯგუფის (WISG) მიერ ორგანიზებული, ფემინისტური ფორუმი.
წლევანდელი ფემინისტური ფორუმის წამყვანი თემაა ცოდნა. ცოდნა, რომელიც, ორგანიზატორთა განმარტებით, არ დაიყვანება დასავლურ ფილოსოფიამდე, არამედ ლოკალურია, იქმნება კონკრეტული სოციალური პოზიციიდან, წარმოადგენს სოციალურ პრაქტიკასა და პოლიტიკურ პროცესს.
“ფემინისტური ფორუმის 3 დღის განმავლობაში, ვორქშოპ-სახელოსნოებით, პანელური დისკუსიებით, ფილმის ჩვენებებით და მოხსენებებით ჩავეფლობით ფემინისტურ, ქვიარ და დეკოლონიურ კრიტიკასა და რეფლექსიაში; ვიმსჯელებთ ცოდნის გაბატონებულ სისტემებსა და ინსტიტუტებში ჩვენი რეალური გამოცდილებების მარგინალიზების, გაუფასურების ან ინსტრუმენტალიზების მექანიზმებზე; ცოდნის ინსტრუმენტალიზებაზე იმპერიული რეჟიმების მიერ; მოვხაზავთ წინააღმდეგობის სტრატეგიებს და ერთად წარმოვიდგენთ, როგორი უნდა იყოს და როგორ უნდა იქმნებოდეს ცოდნა, რომელიც ძალას მოგვცემდა მრავალხმიანი, მრავალფეროვანი და სამართლიანი სამყაროს შექმნისთვის.” – მითითებულია ღონისძიების ორგანიზატორის განცხადებაში.
ფორუმში მონაწილეობისთვის, რეგისტრაციის გავლა შესაძლებელია 2023 წლის 18 სექტემბრამდე, შემდეგი ბმულის მეშვეობით: https://wisg.org/ka/events/detail/307
