საქართველოს ევანგელურ-ბაპტისტური ეკლესიის მიტროპოლიტი მალხაზ სონღულაშვილი ბოლო დღეებში განვითარებულ მოვლენებს ეხმაურება და სამძიმარს უცხადებს არა მარტო ლექსო ლაშქარავას ოჯახს, არამედ ყველა მის კოლეგასა და მეგობარს, რომლებმაც დაკარგეს შვილი, მეგობარი, ერთგული ადამიანი და პროფესიონალი:
“თქვე უღმერთოებო!!! როგორ მოკალით ახალგაზრდა კაცი ცემაში? – ეს არის ის, რაც ბუნებრივად მოდის ჩემი გულიდან. მაგრამ, მესმის, რომ ასეთი ტონი ოფიციალურ განცხადებას არ მიესადაგება.”
მიტროპოლიტის თქმით, ლექსო ლაშქარავას სიკვდილში ხელი ყველას აქვს გასვრილი: სახელმწიფოს, რომელმაც არ დაიცვა ის, იმ ადამიანებს, რომლებიც ჩუმად თუ ხმამაღლა ამართლებდნენ და ”გაგებით ეკიდებოდნენ” აგრესიულ თავდასხმებს.
”ლექსო ლაშქარავას სახით, მთელმა საზოგადოებამ დაკარგა საუკეთესო ადამიანი, რომელიც თავისუფლებისა და სამართლიანობის მხარეს იდგა. ის დღეს დგას იმ მსხვერპლთა გვერდით, რომელთაც საკუთარი სიცოცხლე შესწირეს საქართველოს დამოუკიდებლობასა და თავისუფლებას.“- ამბობს მიტროპოლიტი და 9 აპრილს დაღუპულ გმირებს იხსენებს, რომლებიც ასევე ქვეყნის მომავალს შეეწირნენ.
„დაე, ეს იყოს უკანასკნელი სისხლისღვრა, უკანასკნელი ძალადობა ჩვენს სამშობლოში, რომელიც არ იმსახურებს იმას, რომ მის მოქალაქეებზე რელიგიის, ღმერთის, ეკლესიის სახელით ძალადობდნენ.”- წერს მიტროპოლიტი მალხაზ სონღულაშვილი.
