ბოლო რამდენიმე წლის განმავლობაში სატელევიზიო სივრცეში ძალიან ბევრი სერიალი გაჩნდა, რომელშიც ქვიარ თემატიკა წინა პლანზეა წამოწეული. თუ ადრე ქვიარ პერსონაჟების რეპრეზენტაცია სატელევიზიო პროდუქტებში არასწორი კუთხიდან, ან ცალმხრივად ხდებოდა, დღეს ეს პრობლემა ნაკლებად აქტუალურია.
გთავაზობთ სექსის 12 საუკეთესო სცენას სატელევიზიო შოუების ისტორიიდან.
იანი და მიკი — უსირცხვილო
„უსირცხვილო“ 2011 წლის ამერიკული სერიალია, რომელიც ამავე სახელწოდების ბრიტანული სერიალს ეფუძნება და გვიამბობს დისფუნქციური ოჯახის, გალაჰერების და მათი მამის, ფრენკის ისტორიას.
კომედიის, სატირის და დრამის ნაზავი სერიალი 10 წლის განმავლობაში გადიოდა მცირე ეკრანებზე და მაყურებელმა გალაჰერების ოჯახის არაერთი დაუვიწყარი ისტორია იხილა, მათ შორის, იან გალაჰერის და მიკი მალკოვიჩის სიყვარულის ისტორია, მათი სექსის შეულამაზებელი და ხშირ შემთხვევაში ბრუტალური სცენები კი მართლაც გამორჩეულია სატელევიზიო შოუების ისტორიაში.
ოდრი, აკი და მაქსი — ჭორიკანა
„ჭორიკანა“ HBO Max-ის 2021 წლის სერიალია, რომლის ერთი სეზონი მაყურებელმა უკვე იხილა. სერიალი ამავე სახელწოდების გვიანი 2000-იანების საკულტო სერიალს ეფუძნება, რომელიც მანჰეტენზე მცხოვრები მდიდარი მოზარდების ცხოვრებაზე გვიამბობს.
CW საკულტო სერიალის რიმეიქში მოქმედება თითქმის ათი წლის შემდეგ ვითარდება და მაყურებელი თვალს ადევნებს, რამდენად შეიცვალა ცხოვრება ნიუ იორკში სერიალის ფინალური ეპიზოდების შემდეგ და რამდენად შემოიჭრა სოციალური ქსელები მოზარდების ყოველდღიურობაში. სერიალში ასევე მრავლად გვხდება სექსის თამამი სცენები და ქვიარ პერსონაჟები.
ლილი და ოლა — სექსუალური განათლება
„სექსუალური განათლება“ Netflix-ის 2019 წლის ბრიტანული სერიალია, რომელიც მორდეილის უმაღლესი სკოლის მოსწავლეების ისტორიას და მათ სექსუალურ მოგზაურობაზე გვიამბობს.
სერიალმა, რომელიც გამოირჩევა გულწრფელობით, იუმორით, დივერსიული პერსონაჟებით და მწვავე თემების წამოჭრით, არაერთი დასამახსოვრებელი ქვიარ სექს სცენა შესთავაზა მაყურებელს, თუმცა გამორჩეული მაინც ოლის და ლილის ისტორიაა, რომლებიც პირველი ორი სეზონის განმავლობაში მეორეხარისხოვანი გმირები იყვნენ, თუმცა გასულ სეზონში მათი ისტორია უფრო წინა პლანზე წამოიწია.
რუ და ჯულსი — ეიფორია
„ეიფორია“ HBO-ს 2019 წლის გახმაურებული სერიალია, რომელიც ფიქციურ ქალაქში მცხოვრები მოზარდების რთულ და წინააღმდეგობრივ ცხოვრებაზე გვიამბობს. ცენტრალურ გმირებად კი ნარკოდამოკიდებული რუ და ტრანსგენდერი ჯულსი გვევლინებიან.
სერიალი, რომელიც გამოსვლის დღიდან გამოირჩევა თამამი სცენების სიუხვით, იდეალურად წარმოაჩენს ქვიარ ურთიერთობების თავისებურებებს. ამ ყველაფრის საილუსტრაციოდ კი მეორე სეზონის ერთ-ერთი სერია შეიძლება მოვიშველიოთ, სადაც ნაჩვენებია რუს და ჯულსის სექსის სცენა.
პრეიტელი და რიკი — პოუზი
„პოუზი“ რაიან მერფის 2018 წლის სერიალია, სადაც მოქმედება 80-იანი წლების ნიუ-იორკში, ბოლრუმის გარშემო ვითარდება, ცენტრალურ გმირებად კი ძირითადად ფერადკანიანი ტრანსგენდერი ადამიანები გვევლინებიან, რომლებიც შიდსის ეპიდემიის კვალდაკვალ ცდილობენ გადარჩენას.
“პოუზი”, რომლის სამი სეზონი მაყურებელმა უკვე იხილა, ერთ-ერთი გამორჩეული ქვიარ სერიალია, სადაც მაქსიმალური სიზუსტით არის ნაჩვენები დრეგ კულტურისა და ბალის ისტორია, ხოლო ერთ-ერთი მთავარი პერსონაჟის, პრეიტელის და მისი შეყვარებული კაცის სექსის სცენა კი თამამად შეგვიძლია მივიჩნიოთ სატელევიზიო ისტორიაში ქვიარ სექსის საუკეთესო სცენად.
ანდერი, ომარი და პატრიკი — ელიტა
„ელიტა“ ნეტფლიქსის 2018 წლის ესპანურენოვანი სერიალია, რომლის ხუთი სეზონი მაყურებელმა უკვე იხილა. სერიალი ესპანური ელიტარული სკოლის მოსწავლეების სისხლით, ვნებებითა და ინტრიგებით სავსე ისტორიას გვიამბობს.
ტრილერის ჟანრის სერიალი, რომელიც მსოფლიოს მრავალ ქვეყანაში დიდი პოპულარობით სარგებლობს, ქვიარ პერსონაჟების სიუხვითაც გამოირჩევა. 40 სერიისგან შემდგარი სერიალის ბოლო, მეხუთე სეზონი სტრიმინგ სერვისზე მიმდინარე წლის აპრილში გამოვიდა და ფანებმა ერთ-ერთ სცენაში, სერიალის ცენტრალური გმირების, ანდერის, ომარის და პატრიკის საშხაპის სექსის კადრებიც იხილეს, თუმცა, სამწუხაროდ, ეს ყველაფერი ანდერის წარმოსახვაში ხდებოდა.
ნაომი და ამანიტა — Sense8
Sense8 ლანა და ლილი ვაჩოვსკების 2015 წლის ამბიციური პროექტია. მაყურებელმა სერიალის ორი სეზონი იხილა. Sense8 გვიამბობს 8 ადამიანის ისტორიას, რომლებიც მსოფლიოს სხვადასხვა წერტილში ცხოვრობენ და ერთმანეთთან ზებუნებრივი ძალებით არიან დაკავშირებულები.
სხვადასხვა ინტერვიუში საუბრისას, დები ვაჩოვსკები აღნიშნავენ, რომ სერიალი ერთგვარი მცდელობა იყო, სატელევიზიო სივრცეში გაჩენილიყო გენდერზე, იდენტობაზე და სექსუალობაზე საუბრის აუცილებლობა, მათ სურდათ მაყურებლისთვის ეჩვენებინათ, რამდენად დაკავშირებულები არიან ადამიანები ერთმანეთთან, მიუხედავად მანძილისა და დროისა. სერიალი ქვიარ პერსონაჟების სწორი რეპრეზენტაციით და ქვიარ სექსის სიუხვითაც გამოირჩევა.
სალიმი და ჯინი — ამერიკელი ღმერთები
„ამერიკელი ღმერთები“ 2017 წლის სერიალია, რომელიც გახმაურებული ბრიტანელი ავტორის, ნილ გეიმანის ამავე სახელწოდების რომანს ეფუძნება. ფენტეზის ჟანრის სერიალს უძველესი მითები და ლეგენდები უდევს სათავედ და გვიამბობს შემზარავ ომზე ახალ და ძველ ღმერთებს შორის.
სერიალში ცენტრალურ გმირად შედოუ მუნი გვევლინება, რომელიც ციხიდან გამოსვლის შემდეგ აღმოაჩენს, რომ ცოლი გარდაიცვალა, სახლში დაბრუნება არც ისე მარტივია, სამყარო ძალიან შეცვლილია და გარშემო ბევრი ამოუხსნელი და მისტიკური მოვლენა ხდება. სერიალი გამოირჩევა ძალადობისა და სექსის სცენებით. ერთ-ერთი ასეთი სცენა სალიმის და ტაქსის მძღოლად მოვლენილი უძველესი მითიური არსების, ჯინის სექსის სცენაა. სპეცეფექტებით გაჯერებული სექსის სცენა ერთ-ერთი შთამბეჭდავია სატელევიზიო შოუების ისტორიაში.
ჯეისონი და ერიკი — ნამდვილი სისხლი
„ნამდვილი სისხლი“ HBO-ის 2008 წლის სერიალია, რომელიც ფიქციური სამყაროს შესახებ გვიამბობს, სადაც ვამპირები ადამიანებთან ერთად მალვის გარეშე ცხოვრობენ. სერიალის მთავარ პერსონაჟად კი სუკი გვევლინება, რომელიც ნახევრად ადამიანი და ნახევრად ფერიაა. საკულტო სერიალში მრავლად შეხვდებით სხვა მითიურ არსებებსაც.
სერიალი, რომელიც მცირე ეკრანებზე 2008-2014 წლებში გადიოდა, ვამპირების თემატიკაზე შექმნილ ნამუშევრებში ერთ-ერთი ყველაზე გამორჩეულია და სვამს კითხვას, რამდენად შეუძლიათ თანაცხოვრება სისხლისმსმელ მითიურ არსებებს და ადამიანებს. სერიალში ასევე საინტერესოდ არის წარმოჩენილი ქვიარ პერსონაჟები და ქვიარ სექსი.
პაიპერი და ალექსი — ნარინჯისფერი ახალი შავია
„ნარინჯისფერი ახალი შავია“ ნეტფლიქსის 2013 წლის სერიალია, რომელიც პაიპერ კერმანის მემუარებს ეფუძნება და გვიამბობს ქალთა საპატიმროს ისტორიებს. სერიალი, რომლის 7 სეზონი იხილა მაყურებელმა, დაუფარავად გადმოგვცემს ამერიკის ქალთა საპატიმროებში გაბატონებულ სისასტიკეს.
არაერთი პრესტიჟული პრემიის მფლობელი სერიალი 30 წელს გადაცილებული პაიპერის ისტორიას გვიამბობს, რომელიც ყოფილი შეყვარებულის დამსახურებით ლიჩფილდის საპატიმროში ამოყოფს თავს, რის შემდეგაც მაყურებელი ციხეში მყოფი ქალების ისტორიებს ეცნობა. სერიალი გამოირჩევა ლესბოსური სექსის შეულამაზებლად და გადამეტებული რომანტიზების გარეშე წარმოჩენით.
ემილი და სუ — დიკინსონი
„დიკინსონი“ Apple TV-ის 2019 წლის სერიალია, რომლის სამი სეზონი იხილა მაყურებელმა. სერიალი კლასიკოსი ამერიკელი პოეტის, ემილი დიკინსონის მოზარდობის წლებზე გვიყვება და მის პიროვნებას ახალი პერსპექტივიდან გვაჩვენებს.
სერიალში მოქმედება მეცხრამეტე საუკუნეში ვითარდება და გვიამბობს მოზარდი ემილი დიკინსონის ისტორიას, რომელსაც უჭირს საზოგადოებასთან ერთად თანაცხოვრება და უსწრებს დროს. სწორედ ამიტომ, ავტორი თავს პოეზიას აფარებს. სერიალში ასევე იდეალურად არის გადმოცემული ემილისა და მისი ძმის ცოლის, სუ გილბერტის სიყვარულის ამაღელვებელი ისტორია, რომელიც მესამე სეზონის ერთ-ერთ სერიაში სექსის სცენითაც დაგვირგვინდა.
რიჩის პირველი სექსი — It’s a Sin
It’s a Sin 2021 წლის ბრიტანული მინი სერიალია, რომელიც სულ ხუთი სერიისგან შედგება და გვიჩვენებს ბრიტანეთში განვითარებულ მოვლენებს გასული საუკუნის 80-იან წლებში, შიდსის ეპიდემიის კვალდაკვალ.
სერიალი, რომელშიც მთავარ როლში ქვიარ მსახიობი, ოლი ალექსანდერი გვევლინება, იდეალურად ასახავს, თუ როგორ გავრცელდა უცნობი ვირუსი ქვიარ საზოგადოებაში და როგორი იყო მაშინდელი საზოგადოების დამოკიდებულება ახალ ვირუსთან. სერიალში მრავლად შეხვდებით სექსის სცენებს, ერთ-ერთი გამორჩეული კი ოლი ალექსანდერის გმირის, რიჩის სექსის სცენებია.
