გასული კვირის ბოლოს, ქვიარს დაუკავშირდა ანასტასია ალექსეევა, სცენარისტი და პროდიუსერი უკრაინიდან. ის წარმოადგენს საინიციატივო ჯგუფს, რომელმაც, ევროკავშირის მხარდაჭერით, გადაიღო დოკუმეტური ფილმი ქორწინების თანასწორობაზე უკრაინაში. ფილმში მონაწილეობენ ლგბტქი წყვილები, მათ შორის სამხედრო მოსამსახურეები.
სამოქალაქო პარტნიორობის შესახებ კანონპროექტი უკრაინის უმაღლეს რადაში დარეგისტრირდა 2023 წლის მარტში. კანონპროექტმა მიიღო უმაღლესი რადას პირველი კომიტეტის მხარდაჭერა. თავდაცვის სამინისტროს მხრიდან წარდგენილი იყო არგუმენტი, რომლის მიხედვით კანონპროექტი ეწინააღმდეგებოდა უკრაინის კონსტიტუციის 51-ე მუხლს, რომლის თანახმად ქორწინება ეფუძნება ქალისა და კაცის თავისუფალ ნებას. თუმცა რამდენიმე დღის წინ, ცნობილი გახდა, რომ უკრაინის თავდაცვის და იუსტიციის სამინისტრომაც დაუჭირა მხარი კანონპროექტს. კანონპროექტის მიღებისთვის საჭიროა უმაღლესმა რადამ დაუჭიროს ინიციატივას მხარი პირველი მოსმენის დროს.
სამოქალაქო (რეგისტრირებული) პარტნიორობა – ადამიანებს შორის არსებული პარტნიორული ურთიერთობის, და აქედან გამომდინარე, უფლებებისა და ვალდებულებების აღიარების ფორმაა. პარტნიორული ურთიერთობების რეგისტრაცია შეუძლიათ როგორც ქვიარ, ასევე ჰეტერო წყვილებს (რედ.).
“ცხადია, ჩვენთვის მეტად მისაღები იქნებოდა თანასწორი ქორწინების შემოღება, თუმცა უკრაინის კონსტიტუციაში მითითებულია რომ ქორწინება არის ქალისა და კაცის ერთობა და შესაბამისად, ამ ეტაპზე უფრო მარტივი და სწრაფი იქნება სამოქალაქო პარტნიორობის შესახებ კანონის მიღება” – განმარტავს ანასტასია.
მისივე თქმით, მიმდინარე მომენტში, დაახლოებით 10 000 ლგბტქი ადამიანი უკრაინის სამხედრო სამსახურშია. ბევრ მათგანს ჰყავს პარტნიორი. „ხალხი იღუპება, არიან მძიმედ დაჭრილები, საჭიროა სამედიცინო მიზნებიდან გამომდინარე გადაწყვეტილებების მიღება, ასევე პარტნიორების მონახულება საავადმყოფოებში, ადამიანების დაკრძალვასთან დაკავშირებით გადაწყვეტილებების მიღება. სწორედ ამ მწვავე საჭიროებებს პასუხებს ინიცირებული კანონპროექტი. ჩვენ ვიცით, რომ მას ძალიან მალე მიიღებენ. საზოგადოებაში რაიმე მძაფრი პროტესტი ამასთან დაკავშირებით არ არსებობს, ულტრამემარჯვენე რადიკალების მხრიდან იშვიათი გამოსვლებია და ისიც სოციალური ქსელების დონეზე.
რა თქმა უნდა ძალიან საწყენია, რომ კანონპროექტი არ იძლევა ბავშვზე მეურვეობის მინიჭების შესაძლებლობას და ეს საშინელებაა. წარმოიდგინეთ, ადამიანები იღუპებიან, ხოლო მათი შვილები ხანდახან ჰომოფობიურად განწყობილ ნათესავებთან ან სულაც სახელმწიფო ზრუნვაში რჩებიან იმის მაგივრად, რომ მათზე ზრუნვა მშობელმა გააგრძელოს, რომელმაც გაზარდა.
მიუხედავად, ამისა, მაინც პოზიტიურად ვუყურებ ამ პირველ ნაბიჯს და დიდი იმედი მაქვს სამომავლოდ ეს კანონიც დაიხვეწება.“
დამატებით გამოყენებული წყარო:
https://visitukraine.today/blog/2780/draft-law-on-civil-partnerships-what-it-is-and-what-it-will-regulate#:~:text=The%20draft%20law%20on%20civil%20partnerships%20was%20registered%20in%20the,not%20want%20to%20get%20married.
https://panoramic-gorgonzola-700.notion.site/THE-STRUGGLE-FOR-MARRIAGE-EQUALITY-IN-UKRAINE-EXPLORED-IN-NEW-DOCUMENTARY-SHOT-BY-UKRAINIAN-LGBTQ-A-661acd72facb4984ac872fe86e065a08
