რამდენიმე დღის წინ, სოციალურ ქსელში გამოჩნდა ახლი ინიციატივა – „მოძრაობა“, რომლის ორგანიზატორებმა ფეისბუკ გვერდზე გამოაქვეყნეს შემდეგი განცხადება:
„ჩვენ, კულტურის სხვადასხვა სფეროს წარმომადგენლები ვერთიანდებით ერთმანეთისთვის,უსამართლობის, ცენზურის, არაპროფესიონალიზმის, რეპრესიების, და დიქტატის წინააღმდეგ!
ჩვენ ვიცავთ და დავიცავთ კონსტიტუციით უზრუნველყოფილი სიტყვის, შემოქმედებითი გამოხატვის თავისუფლებას.
ჩვენ ვიზიარებთ თავისუფალი შემოქმედების, თანასწორობის და სამართლიანობის ფასეულობებს.
ჩვენ ვიცავთ და ვქმნით ჩვენი ქვეყნის იდენტობას, და ჩვენ ვამაყობთ ჩვენი იდენტობით, შესაბამისად ჩვენი კულტურით!
ეს არის – თავისუფალ შემოქმედთა თავისუფალი პლატფორმა!“
1 ნოემბერს 16:00 საათზე „მოძრაობა“, საქართველოს პარლამენტთან, გეგმავს საპროტესტო აქციას სახელწოდებით „პროტესტი“. აქცია წარმოადგენს ჯგუფ ბულიონის ტრილოგიის „სოციალური აერობიკის“ მეორე ნაწილს, რომელშიც მონაწილეობა ყველა მსურველს შეეძლება.
ჯგუფი ბულიონის და გაერთიანებული სახელოვნებო სექტეორის მოძრაობის „მოძრაობა“ წევრმა ნატალია ვაწაძემ ქვიართან კომენტარი გააკეთა, დაგეგმილ ღონისძიებასთან დაკავშირებით:
„ეს არის ჩვენი პერფორმანსი, რომელიც გვინდა გავაკეთოთ საქართველოს მოქალაქეებთან ერთად. შეუძლია შემოგვიერთდეს ყველა, ვისაც აქვს სათქმელი და არ უსმენენ. ვინც წინააღმდეგობაშია უსამართლობასთან.
„მოძრაობა“ სახელოვნებო სფეროში დასაქმებული , ხელოვნების გულშემატკივარი ადამიანების გაერთიანებაა. მოძრაობა არის ყველას მოძრაობა ვინც თანასწორობის, სამართლიანობის და დემოკრატიული საზოგადოების პრინციპებს იზიარებს.“
