თანასწორობის მოძრაობა არის ლგბტქი ადამიანების მხარდამჭერი ორგანიზაცია, რომლის მიზანია, ხელი შეუწყოს ლგბტქი თემისა და ქალების სრულფასოვან ინტეგრაციას საზოგადოებაში. თანასწორობის მოძრაობა იბრძვის საზოგადოებაში არსებული ჰომოფობიისა და სექსიზმის აღმოსაფხვრელად. შესაბამისად, ორგანიზაცია უზრუნველყოფს საჭიროებებზე დაფუძნებულ სოციალური თუ სამართლებრივი სერვისებისა მიწოდებასა და თემის მობილიზაციას, ასევე, მუშაობს საზოგადოების ცნობიერების შეცვლისა და პოლიტიკის ადვოკატირებისთვის.
წარმოგიდგენთ თანასწორობის მოძრაობის აქტივობებს 2023 წლის თებერვლის თვეში:
- 2023 წლის თებერვლის თვეში თანასწორობის მოძრაობამ სოციალური, იურიდიული და ფსიქიკური ჯანმრთელობის მომსახურება მიაწოდა ლგბტქ+ თემის 104 წარმომადგენელს.
- ჯანდაცვისა და შიდსის პრევენციის პროგრამის ფარგლებში, თანასწორობის მოძრაობამ თებერვლის თვის განმავლობაში გასცა პრევენციული საშუალებები 533 ადამიანზე, ხოლო სგგი დაავადებებზე ტესტირება გაიკეთა 326 ბენეფიციარმა. გარდა ამისა, საქართველოს სხვადასხვა ქალაქში Selftest.ge-ის მეშვეობით 294 ადამიანმა გამოიწერა პრევენციული ნაკრები და შიდსის თვით-ტესტი. ამასთანავე, PrEP პროგრამაში ჩაერთო 28 ახალი ბენეფიციარი და „ქიმიური სექსის პაკეტი“ მიიღო 24-მა ადამიანმა.
- 2023 წლის 6 თებერვალს გაეროს ქალთა მიმართ დისკრიმინაციის აღმოფხვრის კომიტეტმა (CEDAW) რიგით 84-ე სესია გახსნა. სესიის ფარგლებში, თანასწორობის მოძრაობამ „მამაკაცთა ჯანმრთელობის ევრაზიულ კოალიციასა“ და ასოციაცია თემიდასთან ერთად კომიტეტს „საქართველოში სექსუალური ორიენტაციისა და გენდერული იდენტობის ნიშნით ადამიანის უფლებების დარღვევის შესახებ“ ანგარიში წარუდგინა.
