სტივ და რობ ანდერსონ-მაქლინებმა, გეი წყვილმა პენსილვანიიდან, 2019 წლის 23 მაისს შვილად ექვსი დედმამიშვილი აიყვანა, რათა ისინი ერთმანეთისგან არ დაეშორებინათ.
წყვილი 2013 წელს დაქორწინდა, წინა ქორწინებიდან მათ უკვე ჰყავდათ ორი შვილი – პარკერი და ნოა, თუმცა ორივეს დიდი ოჯახის ყოლა სურდა, ამიტომ ბავშვების შვილად აყვანა გადაწყვიტეს. კვლევის დროს აღმოაჩინეს, რომ მინდობით აღზრდის სისტემაში და-ძმებს ხშირად აშორებენ ერთმანეთს.
თავიდან წყვილი ორი-სამი მოზარდის შვილად აყვანას ფიქრობდა, თუმცა როდესაც ვებგვერდზე ექვსი და-ძმა – კარლოსი, გვადალუპე, მარია, სელენა, ნასა და მაქსი – იპოვეს, სტივმა და რობმა იცოდნენ, რომ მათთვის კარგი აღზრდისა და უკეთესი ცხოვრების მიცემა შეეძლოთ.
„ჩვენ მაშინვე შეგვიყვარდა ისინი.“ – იხსენებს სტივი.
„ვიტყოდი, რომ ჩვენმა შვილებმა დიდი სიგიჟე შემოიტანეს ჩვენს ცხოვრებაში.“ – ამბობს რობი.
წყვილმა ბავშვები 2018 წლის ივნისში გაიცნო და მომდევნო თვეში უკვე ერთად ცხოვრებაც დაიწყეს. მათ შორის კავშირი თავიდანვე გაჩნდა და და-ძმებს დიდი დრო არ დასჭირდათ, ეკითხათ, შეეძლოთ თუ არა სამუდამოდ დარჩენა. მიუხედავად ბევრი დაბრკოლებისა, სტივმა და რობმა შეასრულეს პირობა და მომდევნო წელს ექვსივე მოზარდი იშვილეს.
წყარო: advocate.com
