ბევრისთვის ცნობილმა და საყვარელმა დრეგ ქუინმა, ადორ დელონოსმა ქამინგ აუთი გააკეთა, როგორც ტრანსგენდერმა ქალმა და განაცხადა, რომ ტრანზიციის ეტაპზეა.
ადორმა ინსტაგრამზე ვიდეო ატვირთა, სადაც იგი ინტერნეტში გავრცელებულ ჭორებს პასუხობდა. ბოლო დროს სოციალურ ქსელებში ხშირად იყო კითხვები ადორის სხეულსა და სქესთან დაკავშირებით. მან დაადასტურა, რომ ტრანზიციის პერიოდი აქვს და თქვა, რომ თავდაპირველად ამ საკითხების გასაჯაროვება არ სურდა.
„აღმოვაჩინე, რომ ეს პროცესი იყო ძალიან შემეცნებითი და ბედნიერების განცდის მომტანი“, – ამბობს ადორი.
დელანომ განმარტა, რომ ორი წლის წინ, პირველად აღიარა თავისი იდენტობა, რომელიც ბავშვობიდან ჰქონდა.
„ეს არის განცდა დისფორიიდან ეიფორიამდე“, – თქვა მან.
ადორს 12 წლის ასაკში ჰქონდა ქამინგ აუთი, როგორც ბისექსუალს, შემდეგ კი გეის. საშუალო სკოლის პერიოდში ადორი, როგორც გოგონა ისე ცხოვრობდა. მიუხედავად იმისა, რომ მაშინ არც კი იცოდა სიტყვა ტრანსგენდერი, დედას უთხრა: „მე ბიჭი არ ვარ, მე გოგო ვარ. მინდა ვიცხოვრო, როგორც გოგომ“.
საბედნიეროდ, დედამ მხარი დაუჭირა და მაკიაჟის და საკუთარი სურვილისამებრ სამოსის ჩაცმის უფლება მისცა, რაზეც ადორი დედას მადლობას უხდის. თუმცა ყველაფერი შეიცვალა, როცა 2008 წელს, 16 წლის ასაკში, American Idol-ში გადაიღეს.
„ჩემი “მე” გადავაგდე, დავწვი. შევეცადე საკუთარი თავის ხელახლა გამოგონება. რაღაც არასასიამოვნო იყო, ეს თითქმის მსხვერპლს ჰგავდა იმისთვის, რომ მიმეღო ის, რაც კარიერაში მინდოდა“, – იხსენებს ადორი.
ახლა დელანო მზად არის მიიღოს მისი გენდერული იდენტობა. „საკუთარ თავზე ვზრუნავ და თავს მშვენივრად ვგრძნობ“,- ამბობს ის.
დელანომ ასევე თქვა, რომ ნოემბერში გაიკეთა სქესის დადასტურების ოპერაცია, ნაბიჯი, რომელიც მან აღწერა, როგორც „წიგნის ეიფორიულ თავში გადასვლა“.
„ჩვენ მხოლოდ ერთი სხეული გვაქვს, იმისდა მიუხედავად, თუ რისი გვჯერა. მაგრამ ამ დედამიწაზე მე ვაპირებ ცხოვრებისგან მაქსიმუმი მივიღო.“, – თქვა ადორმა.
ადორს სოციალურ ქსელებში სიყვარულით გამოეხმაურნენ.
კიდევ ერთი Drag Race სუპერსტარი კორტნი აქტი წერს: „მე შენთან ერთად ვარ ნებისმიერ მოგზაურობაში. მიყვარხარ სამუდამოდ. My ride or die“!
კიდევ ერთი ტრანსგენდერი ქალი პეპერმენტი წერს: „მე ძალიან ვამაყობ შენით. კეთილი იყოს შენი მობრძანება სახლში“.
კორნბრედმა ასევე გამოხატა თავისი ბედნიერება და მსუბუქი რჩევა მისცა: „გააფრთხილეთ მეგობრები, რომ განწყობის ცვალებადობა ნორმალურია. ყველას აქვს უფლება სხვადასხვა ემოციები განიცადოს.”
