გუშინ საღამოს გახდა ცნობილი რომ აქონდროპლაციის დიაგნოზის მქონე ბავშვებისთვის წამალი უკვე საქართველოშია. წამლის მოთხოვნით გამართული საპროტესრო აქციების ერთ-ერთი ორგანიზატორი მაკუნა გოჩიაშვილი საკუთარი ფეისბუკის გვერდზე წერს:
“რამდენიმე წუთის წინ გავიგე, რომ წამალი ჩამოვიდა და უკვე იაშვილის კლინიკაშია. ზეგ ჩვენი თინეიჯერები პირველ დოზას გაიკეთებენ.”
„ვოსორიდიტი“ VOXZOGO სამედიცინო პრეპარატია, რომლის ეფექტურობა და უსაფრთხოება აქონდროპლაზიის მქონე ბავშვების მკურნალობისთვის დადასტურებულია ევროპის წამლის სააგენტოს EMA და ასევე აშშ-ის სურსათისა და წამლის სააგენტოს FDA მიერ.
„დედების პროტესტად“ ცნობილი უწყვეტი საჯარო აქცია საქართველოს მთავრობის კანცელარიის მიმდებარედ დედებმა მას შემდეგ დაიწყეს, რაც მიმდინარე წლის 19 აპრილს აქონდროპლაზიის დიაგნოზის მქონე ბავშვების მშობლებს ჯანდაცვის მინისტრი ზურაბ აზარაშვილი შეხვდა, თუმცა პრეპარატზე ხელმისაწვდომობის უზრუნველყოფის პირობა არ მისცა, ხოლო შეხვედრის შემდეგ ჟურნალისტებთან განაცხადა, რომ არც ერთ ქვეყანაში მედიკამენტი “ვოზორიტიდის” სახელმწიფო ბიუჯეტიდან დაფინანსება არ ხდება.
კვირების და თვეების განმავლობაში, ხანგრძლივი სამოქალაქო პროტესტის, პერმანენტული აქციების, სხვადასხვა სფეროს წარმომადგენლების და პირველ რიგში დედების შეუპოვარი ბრძოლის შედეგად, სახელმწიფომ შეასრულა საკუთარი მოქალაქეების მიმართ პოზიტიური ვალდებულება იზრუნოს მათ ჯანმრთელობის უფლებაზე სათანადოდ – შექმნა მკურნალობის პროტოკოლი და შეისყიდა პრეპარატი.
