Yahoo! News-ის ცნობით, ბრიტანელი მსახიობი და კომედიანტი სტივენ ფრაი ახალ პროექტზე იწყებს მუშაობას. პროექტი, რომელიც ბრიტანული არხისთვის, Channel 4-ისთვის მზადდება, გვიამბობს ორი ქვიარ არტისტის ისტორიას და ბრძოლას ნაცისტების წინააღმდეგ მეორე მსოფლიო ომის დროს.
„მანამ, სანამ რიკ კარმიქაელი და ჯონ ჰეი გამომიგზავნიდნენ ამ არაჩვეულებრივ კვლევას, მე არაფერი მსმენოდა ვილემ არონდეუსისა და ფრიდა ბელინფანტეს – მეორე მსოფლიო ომის ნამდვილი გმირების შესახებ“, – ამბობს 64 წლის მსახიობი.
ახალ დოკუმენტურ ფილმს „ვილემი და ფრიდა: წინააღმდეგობის ისტორია“ ერქმევა და მოგვიყვება არტისტი ვილემისა და ჩელისტი ფრიდას ისტორიას, რომლებიც ჰოლანდიაში ცხოვრობდნენ და მოღვაწეობდნენ, თუმცა მეორე მსოფლიო ომმა და ნაცისტების აღზევებამ მათი ცხოვრება რადიკალურად შეცვალა და არტისტებმა გადაწყვიტეს, კარიერა მიეტოვებინათ და ებრაელებს დახმარებოდნენ.
ქვიარ არტისტები ერთად მუშაობდნენ, აყალბებდნენ დოკუმენტებს ებრაელებისთვის და სახელმწიფო უწყებების შენობებს აფეთქებდნენ, რათა ნაცისტებს ებრაელების გაყალბებული პასპორტები ვერ გადაემოწმებინათ.
,,მარტო ის ფაქტი, რომ არტისტები ღიად ქვიარები იყვნენ 1930-იან წლებში, უკვე საკმარისზე მეტია, თუმცა ჩემთვის კიდევ უფრო გასაოცარი აღმოჩნდა მათი ძალა და გამბედაობა, როცა ნაცისტებმა ებრაელების დევნა დაიწყეს”, – ამბობს ფრაი Yahoo! News-თან – ,,ამ კითხვას ხშირად ვუსვამთ საკუთარ თავს – რას ვიზამთ, თუ ჩვენს ქვეყანას მტერი დაიპყრობს? ვიბრძოლებ თავისუფლებისთვის თუ დავნებდები და თავს ავარიდებ უბედურებას? მე ვფიქრობ, მსოფლიოს სჭირდება ვილემისა და ფრიდას, უბრალო ადამიანების მაგალითი, რომლებმაც იპოვეს არაჩვეულებრივი შინაგანი რესურსები”.
ჯერჯერობით უცნობია, თუ როდის გამოვა ახალი დოკუმენტური ფილმი, თუმცა ცნობილია, რომ სტივენ ფრაი, ახალი ფილმის ნარატორი, იმ პრობლემებსა თუ გამოწვევებზეც ისაუბრებს, რომლებიც დღეს ლგბტქი ადამიანებს აქვთ.
