ევროპარლამენტის LBGT+ უფლელებზე მომუშავე ჯგუფი ძალადობრივი და პრორუსული ალტ-ინფოსა და მისი ერთ-ერთი ლიდერის, კონსტანტინე მორგოშიას დასანქცირებას ითხოვს. შესაბამისი წერილით 157 ევროპარლამენტარისგან შემდგარი ჯგუფი ევროკომისიისა და ევროსაბჭოს პრეზიდენტებს, საქართველოში ევროკავშირის ელჩსა და თანასწორობის საკითხებში ევროკომისარს მიმართავენ.
ისინი 8 ივლისს განვითარებულ მოვლენებს აღწერენ და ხელისუფლების პასუხისმგებლობაზე უთითებენ, ასევე, ხაზს უსვამენ, რომ თბილისი პრაიდის ფესტივალი ჩაშალა და დაარბია ძალადობრივმა ალტ-ინფომ.
ევროპარლამენტარების განცხადებით, ქვეყნა, რომელსაც ევროკავშირში გაწევრიანება სურს, ვალდებულია, დაიცვას ადამიანის ფუნდამენტური უფლებები, მათ შორის შეკრებისა და გამოხატვის თავისუფლება.
“მტკიცედ მოვუწოდებთ ალტ-ინფოსა და ამ ჯგუფის უკან მდგომი ოლიგაქრის, კონსტანტინე მორგოშიას სანქცირებისკენ. ცნობილია, რომ ალტ-ინფო ავრცელებს LGBTIQ-ფობიურ სიძულვილის ენას თავის მედიაარხებზე და აქტიურად იყო ჩართული 8 ივლისის თავდასხმებში. ჩვენ მოვუწოდებთ შესაბამის ორგანოებს, ებრძოლონ საქართველოში LGBTIQ-ფობიურ ძალადობას და რიტორიკას და იყვნენ ვალდებულები, უზრუნველყონ, განსაკუთრებით LGBTIQ ადამიანების უსაფრთხოება”, – აღნიშნულია წერილში.
8 ივლისს უსაფრთხოების რისკების გამო თბილისი პრაიდის ფესტივალი გაუქმდა. ლისის მიმდებარე ტერიტორიიდან პრაიდის წევრების ევაკუაცია განხორციელდა.
პრაიდის განცხადებით, “განვითარებული მოვლენები მიანიშნებს, რომ თავდასხმა წინასწარ იყო კოორდინირებული და შეთანხმებული შინაგან საქმეთა სამინისტროსა და ძალადობრივ დაჯგუფება ალტ-ინფოს შორის”.
მოძალადეები თავდაპირველად ვაჟა-ფშაველას ძეგლთან შეიკრიბნენ და მსვლელობით ფესტივალის ტერიტორიამდე ავიდნენ. შინაგან საქმეთა სამინისტროს, პრევენციის მიზნით, აქციის არც ერთი მონაწილე არ დაუკავებია. პოლიციასა და მოძალადეებს შორის ვითარება უშუალოდ ფესტივალის ტერიტორიასთან დაიძაბა. თბილისი პრაიდის წევრების გარიდების შემდეგ კი ისინი ტერიტორიაზე შეიჭრნენ.
იურისტები ამბობენ, რომ შინაგან საქმეთა სამინისტრომ მიზანმიმართულად არ დაიცვა ფესტივალის ტერიტორია.
