თამთა მელაშვილის რომანის – „შაშვი, შაშვი მაყვალის“ მიხედვით, ფილმს გადაიღებენ, ინფორმაციას ყოველკვირეული ამერიკული ჟუნრალი Variety ავრცელებს.
ფილმზე ქართველი რეჟისორი, ელენე ნავერიანი იმუშავებს, რომელსაც ორი სრულმეტრაჟიანი ფილმი „სველი ქვიშა“ და „მე მზის წვეთი ვარ დედამიწაზე“ ეკუთვნის. მის სცენარზე კი, ელენე ნავერიანთან ერთად, ნიკოლოზ მდივანმა იმუშავა.
როგორც ელენე ნავერიანი Variety-სთან საუბარში ჰყვება, თამთა მელაშვილის წიგნის წაკითხვის შემდეგ, ის მიხვდა, რამდენად ძლიერი იქნებოდა წიგნის ნახვა ეკრანზე. რეჟისორი ასევე ამბობს, რომ „ეთერო თავის სხეულში ატარებს რევოლუციურ მესიჯს, რომ ყველა სხეული იმსახურებს სიყვარულს და არის ლამაზი, როგორიც არ უნდა იყოს ის… ეთერო თავისებურად ფემინისტია, ისე რომ მან ამის შესახებ არაფერი იცის“.
თამთა მელაშვილის მესამე რომანი 2021 წელს გამოიცა და მის ანოტაციაში ვკითხულობთ: „შუახნის, მარტოხელა ქალი ეთერო პატარა ქალაქის მკვიდრია და თავისსავე მაღაზიაში მუშაობს. მის ერთფეროვან, უშფოთველ ცხოვრებას თითქოს არაფერი ემუქრება, მაგრამ ერთ დღეს, მოულოდნელი ინციდენტი შეემთხვევა და მისი დალაგებული ცხოვრება თავდაყირა დგება. სიკვდილის შიშით შეძრული ქალი ისეთ გადაწყვეტილებას იღებს, სხვა დროს რომ ვერაფრით გაბედავდა და მოულოდნელ სასიყვარულო თავგადასავალში ეხვევა“.
თამთა მელაშვილი თანამედროვე ქართველი ავტორია, რომელსაც ეკუთვნის სამი რომანი, „გათვლა“, „აღმოსავლეთი“ და „შაშვი შაშვი მაყვალი“. მისი წიგნები თარგმნილია გერმანულ, რუსულ, ხორვატიულ, ალბანურ და მაკედონიურ ენებზე.
