დეკანოზი ილია ჭიღლაძე სოციალურ ქსელში მიმდინარე პრაიდის კვირეულსა და დაგეგმილ ღირსების მარშს ეხმიანება. ის ამბობს, რომ ”საქართველოში ერთხელ და სამუდამოდ უნდა დასრულდეს ძალადობრივი ჰომოფობია და აზრის და სიტყვის მშვიდობიანი გამოხატვის უფლება მიეცეს ყველას, თუ ეს კანონით აკრძალული არაა და სისხლის სამართლის დანაშაული არაა.”
დეკანოზი ასევე საუბრობს პრაიდის მოწინააღმდეგეთა გამოხატვის თავისუფლებაზეც, რომ ყველა ჯგუფს აქვს უფლება გამოხატოს თვისი პოზიცია, მაგრამ ხაზს უსვამს მის ფორმებსა და კანონთან შესაბამისობას – ”ყველა მორწმუნეს და ტრადიციონალისტს აქვს უფლება, მშვიდობიანი და ლოცვითი აქციით გააპროტესტოს პრაიდი და პრაიდის იდეები, მაგრამ რაც გუშინ ვიხილეთ, პროტესტანტების მხრიდან, ეს არაა ქრისტიანობა და სულიერება, ესაა სიველურე და სამართლის დარღვევა.”
ილია ჭიღლაძე ყურადღებას ამახვილებს ულტრამემარჯვეენებისა და ჰომოფობიური ჯგუფების მიერ ხშირად გამოყენებულ გზავნილზე, რომ თითქოს, პრაიდის გავლენით შესაძლებელია ადამიანს ორიენტაცია შეეცვალოს და ბავშვებზე გავლენა მოახდინოს – ”იყო დრო, როდესაც მეც ისევე ვფიქრობდი, როგორც ეს ქსენოფობიური ჯგუფები და მიმაჩნდა, რომ პრაიდის მოწყობა ქვეყნის და ერის დაქცევას უდრის, მაგრამ დღეს ვაანალიზებ, რომ ასეთი მიდგომა არის უკიდურესად პრიმიტიული და უაზრო რამ: გამოხატვის მშვიდობიანი ფორმები არავითარ საშიშროებას არ წარმოადგენს ტრადიციული ფასეულობებისათვის და ქრისტიანობისათვის, ყველა მიმდინარეობას აქვს ქადაგების და პროპაგანდის სამართლებრივი უფლება, თუ კონკრეტული რამ კანონით აკრძალული არაა. ქრისტე თავის ფასეულობებს ქადაგებით ავრცელებდა და არა ძალადობით, ან ვინმეს რეპრესირებით. შეუძლებელია, პრაიდის გამო ვინმე ჰომოსექსუალი გახდეს. მოწოდებები, რომ “ლგბტეები პრაიდით შვილებს გვიპიდარასტებენ” არის უკიდურესად პრიმიტიული გონებაჩლუნგობა, რაც მხოლოდ საკუთარ მორალურ სიმხდალეს და არამდგრადობას ავლენს და შეურაცხყოფას აყენებს საკუთარ და სხვის შვილებს. ვერავინ ვერ “გააპიდარასტებს” ჩვენს შვილებს, თუ ეს მათი პირადი სურვილი და არჩევანი არაა, ეს უნდა შეუშვას ტვინში ყველამ და გაანალიზოს. ვერც ძალით აიძულებს ვერავინ შვილს ჰეტეროსექსუალობას, ესეც უნდა გაიაზროთ და გამოხვედით პუტინისტური იდეოლოგიზირებული მარგინალური პოლიტიკური ჯგუფების ტვინების რეცხვის გავლენებიდან.”
დეკანოზი, აგრესიული ჯგუფების სამართლებრივ პასუხისმგებლობასთან ერთად, ყურადღებას ამახვილებს მათი დაფინასების წარმომავლობაზე და მნიშვნელოვნად მიიჩნევს ამ დაფინანსების წყაროების შეჩერებას.
