ILGA-Europe

14 სექტემბერს, ILGA-Europe-ის უნარების გაუმჯობესების  ონლაინ სესიის მომდევნო შეხვედრა გაიმართება, რომელიც ლგბტქი აქტივისტებს მედია შესაძლებლობების გამოყენების შესახებ პრაქტიკულ რჩევებს გაუზიარებს.

უნარების გაუმჯობესების ინტერაქციული შეხვედრა აგებული იქნება ILGA-Europe-ის მედია ოფიცერის ჩვეული სამუშაო დღის მიხედვით, რომელიც ევროპული მედიასაშუალებებით გამოქვეყნებულ ლგბტქი ამბებს ყოველდღიურად ფარავს.

სესია დაფარავს ისეთ საკითხებს, როგორიცაა:

• როგორ მივადევნოთ თვალი სწრაფად ცვალებად მედია ამბებს ისე, რომ დრო სრულად არ დავკარგოთ;
• ჟურნალისტების საქმიანობის გაგებისა და მათთან ურთიერთობის შენარჩუნების გზები;
• უნდა გვქონდეს თუ არა რეაგირება კონკრეტულ ამბავზე და რა სახით შეგვიძლია თანამონაწილეობა;
• მედია-რეაგირების ტაქტიკები და შიდა სამუშაოს დაგეგმვის პროცესის გამარტივების გზები.

სესიის მონაწილე ლგბტქი აქტივისტები შეხვედრის ბოლოს სასარგებლო რესურსებსა და მცირე დავალებას მიიღებენ. დაინტერესების შემთხვევაში კი, მეორე თემატურ სესიაზე დასწრება შეგეძლებათ, რომელზეც პერსონალურ რჩევასა და დავალებასთან დაკავშირებით ჯგუფურ უკუკავშირს მიიღებთ.

უნარების გაუმჯობესების სესიაში მონაწილეობისთვის აღნიშნულ ლინკზე უნდა დარეგისტრირდეთ. შეხვედრა ონლაინ, Zoom-ში შედგება.

ILGA-Europe-ის განახლებული რუკის მიხედვით, რომელიც ლგბტქი უფლებების დაცვისა და თანასწორობის კუთხით ევროპაში არსებულ მდგომარეობას ასახავს, საქართველო ევროპის 49 ქვეყნიდან 34-ე ადგილზეა.

2021 წლის რუკაზე საქართველო ლგბტქი უფლებადაცვითი კუთხით არსებული 27%-იანი კოეფიციენტით, 32-ე ადგილზე იყო, ახლა კი, 25%-იანი ინდექსით, პოზიცია 2 საფეხურით გაუარესდა. საქართველოს ყველაზე მაღალი, 53%-იანი კოეფიციენტი თანასწორობისა და დისკრიმინაციისგან თავისუფალი გარემოს კუთხით აქვს, რასაც 50%-იანი შედეგით სამოქალაქო საზოგადოებისთვის თავისუფალი სივრცეებზე ხელმისაწვდომობა მოჰყვება, 26%-იანი კოეფიციენტი გვაქვს სიძულვილით მოტივირებული დანაშაულებისა და სიძულვილის ენის გამოყენების მიმართულებით, ამას მოსდევს ოჯახური მდგომარეობის მიმართულებით არსებული 11%-იანი ინდექსი და გენდერის სამართლებრივად აღიარების კუთხით არსებული 6%-იანი შედეგი.

აღსანიშნავია, რომ საქართველოს მეზობელი ქვეყნები – რუსეთი, აზერბაიჯანი, სომხეთი და თურქეთი ევროპის რუკაზე ბოლო 4 ადგილს ინაწილებენ. 2,41%-იანი კოეფიციენტით ბოლო, 49-ე ადგილზე აზერბაიჯანია, 48-ე ადგილზე 4%-იანი კოეფიციენტით თურქეთია, 47-ეზე სომხეთია 7,5%-ით, ხოლო 46-ეზე რუსეთი, რომლის ლგბტქი უფლებების კოეფიციენტი 8,45%-ს შეადგენს. 

ლგბტქი უფლებების დაცვისა და თანასწორობის მიმართულებით არსებული მდგომარეობით პირველ ათეულში მალტა (92,02%), დანია (73,78%), ბელგია (71,51%), ნორვეგია (68,3%), ლუქსემბურგი (68,03%), შვედეთი (67,97%), საფრანგეთი (64,18), მონტენეგრო (63,43%), ისლანდია (62,88%) და პორტუგალია (62,03%) არიან. 

ამასთან, ევროპის მასშტაბით, ლგბტქი უფლებების დაცვისა და თანასწორობის მიმართულებით არსებული კოეფიციენტი 38%-ს შეადგენს, ხოლო ევროკავშირში ეს ინდექსი 48%-ს აღწევს.