კომედიური სერიალები სხვადასხვა სექსუალური ორიენტაციისა და გენდერული იდენტობების მქონე ადამიანების რეპრეზენტაციით ნამდვილად არ გამოირჩევა. მთავარი თუ მეორეხარისხოვანი ქვიარ პერსონაჟები უმეტესად გეები ან ლესბოსელები არიან და იშვიათად თუ გაიელვებენ სხვა პერსონაჟები, რომელთა გამოცდილებების
2022 წელი განსაკუთრებით დატვირთული აღმოჩნდა ქვიარ სერიალების თვალსაზრისით, რაზეც GLAAD-ის 2022 წლის კვლევაც მოწმობს. კვლევის მიხედვით, ლგბტქი პერსონაჟების სატელევიზიო რეპრეზენტაციამ წელს მაქსიმუმს მიაღწია. გთავაზობთ 2022 წლის საუკეთესო ქვიარ სერიალებს: High School 90-იანი წლების მიწურულს კანადაში იდენტურმა ტყუპმა დებმა, ტეგან რეინ
7 ოქტომბერს, ბევრისთვის საყვარელი სერიალი გრეის ანატომია მე-19 სეზონით დაბრუნდა. სანამ გულშემატკივრები ახალი სერიების სანახავად თბილად მოკალათდებით, მანამდე საუკეთესო ლგბტქი ეპიზოდები გავიხსენოთ, რომლის ნაკლებობასაც
GLAAD-ის ახალი კვლევის მიხედვით, რომელიც სატელევიზიო სივრცეში ლესბოსელი, გეი, ბისექსუალი, ტრანსგენდერი და ქვიარ პერსონაჟების რეპრეზენტაციას ეხება, ლგბტქი პერსონაჟების გამოცდილებების ასახვამ რეკორდულ ნიშნულს (11.9%) მიაღწია.
ბოლო წლებში შოუ-ბიზნესის ინდუსტრიაში შესამჩნევი ცვლილებები ხდება: სატელევიზიო შოუებსა და ფილმებში ქვიარ თემებისა და პერსონაჟების ღრმა კვლევა დაიწყო. რეპრეზენტაციის გაზრდა დიდი წინგადადგმული ნაბიჯია ლგბტქი თემის ხილვადობისა და მიმღებლობის საქმეში. მეინსტრიმის გაქვიარებით, ეს პროდუქცია გამოწვევების წინაშე აყენებს სოციალურ ნორმებს და ქმნის პლატფორმას ავთენტური ქვიარ თხრობისთვის.
ამ სტატიაში განვიხილავთ იმ გავლენას, რასაც ქვიარ თემების განხილვა ახდენს სატელევიზიო შოუებში და ხაზს გავუსვამთ რეპრეზენტაციის მნიშვნელობას უფრო ინკლუზიური მედია გარემოს შესაქმნელად.
მეინსტრიმ მედიაში ერთ-ერთი ყველაზე შესამჩნევი ცვლილება იყო ლგბტქი პერსონაჟების ჩართვა წამყვან როლებში. ემის მფლობელ სერიალში “Pose” ქვიარ პერსონაჟები აღარ არიან მხოლოდ მეორეხარისხოვან როლში და აღარ არიან სოციალური ნორმებისა და სტერეოტიპებს მორგებულნი. სერიალში ლგბტქი პერსონაჟები განხილულნი არიან, როგორც სრულად რეალიზებული პიროვნებები, რომელთაც უდიდესი გავლენა აქვთ მაყურებელზე, რაც, საბოლოო ჯამში, ცვლის ჰოლივუდის ძველებურ მიდგომას რეპრეზენტაციისადმი.
ქვიარ თემატიკის მქონე სატელევიზიო შოუები ხშირად გამოიყენება მნიშვნელოვანი სოციალური საკითხების შესახებ დებატების დაწყებასა და მოგვარებისთვის. ქვიარ სერიალებში წამოჭრილი საკითხები შეიძლება იყოს: ჰომოფობია, ტრანსფობია, რასისა და ქვიარობის კვეთა. ამ სახის პროდაქშენები მძლავრი პლატფორმაა საუბრების წამოწყებისა და ემპათიის გასაღვიძებლად. რაიან მერფის სერიალი „Glee“ უპირისპირდება მნიშვნელოვან თემებს და ხელს უწყობს სოციალურ პროგრესს. სერიალის პოპულარულობა კი იძლევა საშუალებას გვქონდეს საინტერესო და მრავლის მომცემი დიალოგები ამ თემების შესახებ.
სატელევიზიო შოუებმა ქვიარ ურთიერთობების სიღრმისეული და ნიუანსური შესწავლა დაიწყეს. ისეთი ქვიარ ურთიერთობების დრო, რომლებიც მხოლოდ შოკისმომგვრელი ღირებულებისა და კომიკური სიტუაციის შესქმნელად გამოიყენებოდა, დიდი ხანია გავიდა. 2013 წლის ნეტფლიქსის დრამა „Orange Is the New Black“ ლგბტქი ურთიერთობებს ისეთივე სიღრმისეულად და ავთენტურად ასახავს, როგორც ჰეტეროსექსუალურ ურთიერთობებს.
სერიალის ერთ-ერთი ყველაზე შთამბეჭდავი მიღწევა იყო ლავერნ კოქსის კარიერის დაწყება სოფია ბურსეტის როლში. 2014 წელს კოქსი გახდა პირველი ღიად ტრანსგენდერი ქალი, რომელმაც მიიღო ნომინაცია სატელევიზიო აკადემიისგან. 2022 წლისთვის მისი კარიერა ცამდე გაიზარდა. ის პირველი ტრანსგენდერი ქალიც გახდა, რომელმაც საკუთარი ბარბის თოჯინა შექმნა.
ქვიარ თემების რეპრეზენტაციამ მეინსტრიმ სატელევიზიო შოუებში აჩვენა, რომ მას მაყურებელზე დიდი გავლენა აქვს. ქვიარ გამოცდილების ნორმალიზებითა და მრავალფეროვანი ლგბტქი პერსონაჟების წარმოჩენით ეს სერიალები ცვლის საზოგადოების მიერ ქვიარ თემის აღქმასა და ხელს უწყობს სტერეოტიპების დამსხვრევას.
სერიალ „Sex Education“ – ში წარმოდგენილმა პოზიტიურმა რეპრეზენტაციამ ხელი შეუწყო მიმღებლობის გაზრდას ახალგაზრდებში და ქვიარ ახალგაზრდებისთვის მისაბაძი მაგალითების აღმოჩენას.
ეს შოუ სავსეა ტინეიჯერობის ასაკში საკუთარი სექსუალური ორიენტაციის აღმოჩენის გზაზე გამოცდილი დამაბნეველი და გულთბილი მომენტებით და ამასთან, ახერხებს, განიხილოს კომპლექსური საუბრები იმის შესახებ, თუ რას ნიშნავს იყო ახლაგზარდა და შეყვარებული. სერიალში გვხვდება ლგბტქი თემის წარმომადგენელი მრავალი ადამიანი და ქვიარ სთორილაინები, რომლებიც არ არის დაფუძნებული კლიშეებზე.
რამდენადაც ქვიარ თემატიკა აგრძელებს პოპულარულ სატელევიზიო შოუებში ადგილის დამკვიდრებას, შოუ-ბიზნესის ინდუსტრია ტრანსფორმაციულ ცვლილებას განიცდის. მეინსტრიმის გაქვიარებით ეს პროდუქცია არღვევს ბარიერებს, კითხვის ნიშნის ქვეშ აყენებს სოციალურ ნორმებსა და სტერეოტიპებს და ზრდის მიმღებლობას. ავთენტური ქვიარ თხრობისა და რეპრეზენტაციის ჩართვა გრძელვადიან გავლენას ახდენს აუდიტორიაზე, ქმნის უფრო ინკლუზიურ და მიმღებ საზოგადოებას. მნიშვნელოვანია, რომ ეს იმპულსი გაგრძელდეს, რაც მომავალში კიდევ უფრო დიდი მრავალფეროვნებისა და რეპრეზენტაციის საშუალებას იძლევა.
ანიმაციურ სერიალებს აქვთ უნიკალური უნარი გაარღვიონ საზღვრები და დაიპყრონ აუდიტორია. ბოლო წლების განმავლობაში, ქვიარ საზოგადოებამ ანიმაციაში აღიარება მოიპოვა. ახალ ანიმაციებში არა მარტო სტერეოტიპებს ამსხვრევენ, არამედ ხელს უწყობენ ინკლუზიურობას და ხილვადობას. სტატიაში მოგიყვებით ქვიარ თემის წარმოჩენის მნიშვნელობაზე ანიმაციურ სერიალებში, მის პოზიტიურ გავლენაზე მაყურებლისთვის და ინკლუზიური თხრობის შესანიშნავ მაგალითებზე.
ტრადიციულად, ანიმაციური სერიალები მიჰყვებოდა სტერეოტიპებს, გენდერსა და სექსუალობას შეზღუდულად ასახავდა. თუმცა, რამდენიმე ინოვაციურმა შოუმ დაარღვია ეს ყველაფერი. “სტივენ სამყაროში” მრავალფეროვანი ქვიარ პერსონაჟები გვხვდებიან, როგორებიცაა რუბი და საფირი, ქვიარ წყვილი. გარდა ამისა, გვხვდება არაბინალური პერსონაჟი სტივონი. ეს ანიმაციური სერიალი ანგრევს ორობითი გენდერული როლების ცნებას და ხაზს უსვამს მრავალფეროვანი იდენტობის სილამაზეს.
ქვიარ თემის წარმოჩენას ანიმაციებში განსაკუთრებით დიდი მნიშვნელობა აქვს ახალგაზრდა მაყურებლისთვის, რომლებიც ეჭვქვეშ აყენებენ მათ ვინაობას. “შე-რა და ძალაუფლების პრინცესები” გვთავაზობს მრავალფეროვან პერსონაჟებს, მათ შორის ადირასა და კატრას, რომლებსაც სერიალის განმავლობაში ღრმა და რთული ურთიერთობა უყალიბდებათ. მათი ისტორიის ნახვით, ახალგაზრდა მაყურებლებს შეუძლიათ იგრძნონ მხარდაჭერა და დაინახონ, რომ ისინი მიღებულნი არიან.
ანიმაციებს აქვთ პოტენციალი, გამოიკვლიონ ქვიარ გამოცდილების ინტერსექციურობა. „კორას ლეგენდა“, „ავატარი: უკანასკნელი მფრინავის“ გაგრძელებაა, რომელშიც გვხვდება ბისექსუალი პერსონაჟი კორა. სერიალი გვთავაზობს კორას ავატარად მოგზაურობას და მის რომანტიკულ ურთიერთობებს. ინტერსექციურობის გათვალისწინებით, ეს შოუები აღნიშნავენ მრავალფეროვან კულტურას, წარმომავლობასა და ცოცხალ გამოცდილებას ლგბტქი საზოგადოებაში.
ანიმაციურ შოუებსა და ფილმებს აქვთ საზოგადოებრივი აზრის ჩამოყალიბებისა და პოზიტიური ცვლილებების ძალა. „თავგადასავლების დრომ“ მაყურებელს გააცნო პრინცესა ბაბლგამის პერსონაჟი, რომელიც ღიად ქვიარია, რაც ანგრევს სტერეოტიპს, რომ ქვიარად ყოფნა ტაბუდადებული თემაა. ქვიარ წარმომადგენლობის ჩართვისა და მიმღებლობის ხელშეწყობით, ანიმაციები გზას უხსნის საუბრებს განათლებისკენ და მავნე სტერეოტიპების განადგურებისკენ.
მიუხედავად იმისა, რომ მნიშვნელოვანი ნაბიჯები უკვე გადადგმულია ანიმაციურ სერიალებში ქვიარ თემის წარმოსაჩენად, ეს ჯერ კიდევ დასაწყისია. უფრო და უფრო დიდ წინსვლას ვხედავთ. „ბუების სახლი“ გამოირჩევა მრავალფეროვანი შემადგენლობით, მათ შორის მთავარი გმირია ბისექსუალი ლათინო, სახელად ლუზი. ავთენტური ისტორიების შექმნით და ლგბტქი შემქმნელებთან თანამშრომლობით, ანიმაციის ინდუსტრიას შეუძლია გააგრძელოს ინკლუზიური ნარატივების შექმნა, რომელიც რეზონანსდება ქვიარ აუდიტორიასთან და ხელს უწყობს უფრო მიმღებ საზოგადოებას.
ქვიარ თემის წარმოჩენა ანიმაციურ სერიალებში არის ძლიერი ინსტრუმენტი სტერეოტიპების დასანგრევად, ინკლუზიურობის გასაძლიერებლად და გაგების ხელშესაწყობად. მრავალფეროვანი და ავთენტური სიუჟეტის საშუალებით, ზემოთ ნახსენებმა შოუებმა, შეძლეს და დაუპირისპირდნენ სტატუს კვოს. ანიმაციის ინდუსტრიას შეუძლია გააგრძელოს მომავალი თაობებისთვის უფრო ინკლუზიური და გამდიდრებული ანიმაციების შექმნა.
კარგი სერიალი ეკრანს გვაჯაჭვავს და რთულია სერიიდან სერიამდე, სეზონიდან სეზონამდე განვითარებულ ამბებს თვალი მოსწყვიტო. სერიალის მიმართ სიყვარული კიდევ უფრო მძაფრია, როცა პერსონაჟების გამოცდილებების თანაზიარი ხდები, როცა საკუთარ გამოცდილებასა და სიუჟეტს შორის თანხვედრას პოულობ.
კომედიური სერიალების საუკეთესო წყვილების შესახებ სტატიაში როგორც ვახსენეთ, ქვიარ რეპრეზენტაცია ხშირად მოიკოჭლებს. ასეთივე მდგომარეობაა დრამატული სერიალების შემთხვევაში. თუმცა, მაინც შეიძლება არაერთი პერსონაჟისა და წყვილის გამორჩევა, რომელთა პიროვნული ზრდის თუ ურთიერთობის ამბავი მრავალშრიანი, კარგად დაწერილი და განვითარებულია.
სტატიაში 13 საუკეთესო ქვიარ წყვილს ნახავთ, რომელთა ამბავი დრამატულ სერიალებში სიუჟეტის მნიშვნელოვანი ნაწილია.
Six Feet Under HBO-ს შესანიშნავი ოჯახური ანთოლოგიაა, რომელიც 5 მთავარი პერსონაჟის ირგვლივ ვითარდება. ფიშერების ოჯახის ისტორია მრავალფეროვანი გამოცდილებების ასახვით გამოირჩევა და სიუჟეტურ ხაზში ორგანულად შემოდის, მათ შორის, სექსუალური თვითგამორკვევისა და ქვიარ ურთიერთობების თემა.
სერიალის ერთ-ერთი ცენტრალური პერსონაჟი, დეივიდ ფიშერი გეია და ურთიერთობა აქვს კიტ ჩარლზთან, რომელიც პოლიციელია. როგორც დეივიდისა და კიტის ინდივიდუალური განვითარება, ისე მათი ურთიერთობის გზა შესანიშნავად არის დაწერილი და მრავალშრიან გამოცდილებებს სიღრმისეულად ასახავს. დეივიდი და კიტი 5 სეზონის განმავლობაში პერსონალურ ტრავმებს უმკლავდებიან, ხშირად დანგრევის პირას მისულ ურთიერთობას, მათ შორის, პროფესიონალური დახმარების საშუალებით ხელახლა აგებენ და ახერხებენ, რომ საკმაოდ დიდი ხნის განმავლობაში ბედნიერად იცხოვრონ. თუმცა, თუ სერიალი არ გინახავთ, Six Feet Under მრავალჯერ გატკენთ გულს და. ბედნიერ მომენტებთან ერთად, არაერთ გულისმომკვლელ დეტალსაც ნახავთ.
Grey’s Anatomy ყველაზე წარმატებული სამედიცინო დრამაა, რომელშიც ქვიარ რეპრეზენტაციაც ხშირია. სერიალიდან მრავალი პერსონაჟის გამორჩევა შეიძლება, თუმცა ფანებისთვის განსაკუთრებით საყვარელი არიზონასა და კალის წყვილია.
ექიმებს პროფესიულ თუ პირად ცხოვრებაში არაერთი მძიმე გამოცდილების გამოვლა მოუწიათ და ურთიერთობის დაწყების შემდეგაც ისეთ სირთულეებს უმკლავდებოდნენ, როგორიც ჰომოფობიურად განწყობილ მშობლებთან დავა, შვილის ყოლასთან დაკავშირებული უთანხმოება, დანაკარგით გამოწვეული ტკივილის გადალახვა, ფიზიკური და მენტალურ ჯანმრთელობის პრობლემებია. არაერთხელ დაშორების შემდეგ, კალი და არიზონა ერთმანეთთან ბრუნდებოდნენ და სერიალში მათ სიუჟეტურ ხაზს მაინც ბედნიერი დასასრული ჰქონდა.
Pose ერთ-ერთი ყველაზე გამორჩეული ქვიარ სერიალია, რომელიც ტრანსგენდერი მსახიობების და პერსონაჟების რეპრეზენტაციით ყველა სხვა სერიალს აღემატება და 90-იანი წლების ნიუ-იორკის ანდერგრაუნდ სივრცის, უკიდურეს გაჭირვებაში მცხოვრები ქვიარ პერსონაჟების, მათი მეგობრობის, აივ/შიდსის ადრეული წლების გამოწვევების შესახებ ამბავს შესანიშნავად გადმოსცემს.
სერიალში არაერთი გამორჩეული ურთიერთობა ვითარდება, თუმცა მათ შორის ყველაზე ამაღელვებელი და ურყევი ეინჯელისა და პაპის სიყვარულის ისტორიაა. გამოუცდელი წყვილი ერთობლივად ვითარდება და ერთმანეთს მრავალი გამოწვევის გადალახვაში ეხმარება. მათ დაბრკოლებები კიდევ უფრო აახლოებთ. სერიალის დასაწყისიდან ბოლომდე ეინჯელმა და პაპიმ ყველაზე დიდი განვითარების გზა გაიარეს და შემდგარ ინდივიდებად და პარტნიორებად იქცნენ.
How to Get Away with Murder ჩამთრევი კრიმინალური დრამა და დეტექტივია, რომელიც არაერთი სახასიათო პერსონაჟით გამოირჩევა. მათ შორის ფანებისთვის განსაკუთრებით საყვარელი კონორი და ოლივერი არიან.
სერიალებსა და ფილმებში აივ-ინფექციაზე საუბრისას ძირითადად 80-იან წლებს, განსაკუთრებით მძიმე მომენტს უბრუნდებიან. აღნიშნულ შოუში კი საკმაოდ კარგად გაიშალა აივ-დადებითის სტატუსით ცხოვრების თემა თანამედროვე სამყაროში.
კონორი და ოლივერი რამდენიმე სეზონის განმავლობაში გულისტკენას, პირადი შიშებითა და დაბნეულობით გამოწვეულ დაბრკოლებებს, არაერთ სასიკვდილო საფრთხეს გადალახავენ და მყარი ურთიერთობის შენარჩუნებას მაინც ახერხებენ.
იმავე სახელწოდების ბრიტანული შოუს ამერიკული ვერსია, Queer as Folk პირველი 1-საათიანი დრამატული სერიალი იყო, რომელიც სრულად ქვიარ ადამიანების ცხოვრებას ასახავდა. 5 სეზონის განმავლობაში არაერთი დრამატული, ამაღელვებელი თუ კომიკური ისტორია ვიხილეთ, რომელიც გეი და ლესბოსელი სამეგობროს თავს დატრიალდა.
სერიალის ზოგიერთი დეტალი შესაძლოა დღეს მოძველებულად მოგვეჩვენოს, თუმცა უნდა ითქვას, რომ 2000 წელს, როცა სერიალის პირველი სეზონი გამოვიდა, მიმღებლობის, ოჯახის მხრიდან უარყოფის თუ უწყვეტი მხარდაჭერის, სიძულვილით მოტივირებული დანაშაულების, შვილად აყვანის, სამოქალაქო პარტნიორობის და რიგი საკითხების შესახებ მეინსტრიმულ მედიაში საუბარი ცვლილებების მომტანი იყო.
Queer as Folk-ის ერთ-ერთი გამორჩეული წყვილი ლინდსი და მელანი არიან, რომლებსაც ურთიერთობაში არაერთი სირთულის გადალახვა უწევთ, მათ შორის, თანასწორი უფლებების არქონისგან გამოწვეული დაბრკოლებების. მცირე გაურკვევლობების მიუხედავად, ლინდსის და მელანის წყვილი სერიალში ერთ-ერთი ყველაზე მტკიცეა.
უნდა აღინიშნოს, რომ ხშირად ლესბოსელი წყვილის რეპრეზენტაციას აკრიტიკებენ, რადგან ლინდსისა და მელანის ხაზში ერთ-ერთი უმთავრესი ბავშვების გაჩენა და აღზრდაა, რასაც ძველმოდურ გადაწყვეტილებად მიიჩნევენ. თანაც, ლინდსიც და მელანიც შემდგარი, წარმატებული ქალები არიან, თუმცა ეს ნაწილი სათანადოდ არ არის გაშლილი.
ბრაიანი და ჯასტინი სერიალის კიდევ ერთი დაუვიწყარი წყვილია, რომლებიც ურთიერთობაში არაერთ სირთულეს გამოცდიან. ახალგაზრდა ჯასტინი ბრაიანთან ერთად გადის ცხოვრებისეულ სირთულეებს, მშობლებისგან უარყოფის გამოცდილებას თუ ჯანმრთელობის პრობლემებს.
სერიალის მსვლელობისას იმასაც მიხვდებით, რომ რიგ შემთხვევებში ჯასტინი და ბრაიანი, განსაკუთრებით ეს უკანასკნელი, ერთმანეთზე ტოქსიკურად ზემოქმედებენ, თუმცა ნელ-ნელა უკეთესი ურთიერთობის განვითარებას ახერხებენ. სერიალის დასასრულს კი ერთმანეთის წარმატებისა და პიროვნული განვითარებისთვის მსხვერპლის გასაღებადაც მზად არიან.
დები ვაჩოვსკების სამეცნიერო ფანტასტიკის ჟანრის სერიალი, Sense8 ამაღელვებელ მომენტებს, სახასიათო პერსონაჟებსა და ინკლუზიურ გამოცდილებებს ნამდვილად არ უჩივის. სერიალში სექსის გრაფიკული სცენები, ექსპერიმენტები, რომანტიკული მომენტები თუ თავბრუდამხვევი საბრძოლო სცენები ენაცვლება ერთმანეთს და მაყურებელი მუდმივად დაძაბულია. თანაც, პერსონაჟები იმდენად გიყვარდება, არ გინდა უეცრად მათ თავს რაიმე ცუდი დატრიალდეს.
სერიალის გამორჩეულად კომიკური, სენსიტიური და ფანების საყვარელი პერსონაჟი ლიტოა — მექსიკელი მსახიობი, რომელიც უეცრად 7 სხვადასხვა ქვეყანაში მცხოვრებ პერსონაჟთან მენტალურად ხდება გადაჯაჭვული. ამასთან, ლიტოს სტაბილური ურთიერთობა აქვს ჰერნანდოსთან, რომელიც სერიალის დასაწყისიდან ბოლომდე შეყვარებულის ირგვლივ განვითარებული გიჟური ამბების მომსწრეა და ერთგული მხარდამჭერი. 3 სეზონის განმავლობაში ეს შესანიშნავი წყვილი აუცილებლად შეგაყვარებთ თავს.
ნომი და ამანიტა სერიალის კიდევ ერთი გამორჩეული წყვილია, რომელთა ურღვევი კავშირი ფიზიკური თუ ემოციური საფრთხის არაერთი მომენტის მიუხედავად ვითარდება და კიდევ უფრო მტკიცდება.
ორი ქალის სიყვარულის ამბავი ურთიერთ რწმენის, ნდობის, საყვარელი ადამიანისთვის მსხვერპლის გაღებისთვის მუდმივი მზაობის დადასტურებაა, რომელიც გულგრილს არავის დატოვებს.
The Last of Us HBO-ს ახალი, პოსტ-აპოკალიფსური სერიალია, რომელიც უკანასკნელი გადარჩენილი ადამიანების ისტორიას ჰყვება. როგორია ცხოვრება მას შემდეგ, რაც საყვარელი ადამიანების დიდი ნაწილი დაკარგე და მარტო ხარ დარჩენილი სამყაროში, რომელშიც ყოველი ფეხის ნაბიჯზე სასიკვდილო საფრთხე გელის; როგორ ყალიბდება ახალი ურთიერთობები; როგორ სწავლობ ადამიანების ნდობას ხელახლა; რაზე ხარ წამსვლელი, რომ გადარჩე და გზადაგზა გაცნობილი ახალი ადამიანებიც დაიცვა.
ჯერ სერიალის 5 ეპიზოდი გამოვიდა, თუმცა უკვე არაერთი ამაღელვებელი მომენტი ვიხილეთ. განსაკუთრებით სულისშემძვრელი კი სერიალის მე-3 ეპიზოდი იყო, რომელშიც მარტოხელა გადარჩენილი პერსონაჟი, ბილი გავიცანით — ცივი, საზრიანი, პოსტ-აპოკალიფსურ გაერთიანებებს მიღმა მცხოვრები კაცი, რომელიც არავის ენდობა. ბილის ცხოვრებაში მოხეტიალე გადარჩენილის, ფრენკის გამოჩენა შემთხვევითია და ნელ-ნელა მათი ურთიერთობა ახალ სიღრმეებს აღწევს. პერსონაჟები, რომელთა გზები ალბათ არც გადაიკვეთებოდა, რომ არა უკაცრიელი სამყარო, ერთმანეთს ცვლიან, მარტოობას უმსუბუქებენ, ურთიერთობის მრავალ წელს ერთად გადიან, უყვართ, ჩხუბობენ, მეგობრებს იჩენენ და ერთი სერიის განმავლობაში მარტოხელა გადარჩენილის “ბუნაგი” ნელ-ნელა სახლს ემსგავსება, რომელიც ურთიერთსიყვარულზე დგას. თუ The Last of Us ჯერაც არ გინახავთ, ცრემლის ღვრა გელით, მე-3 ეპიზოდის ყურებისას კი სულისმოთქმა გაგიჭირდებათ.
The 100 პოსტ-აპოკალიფსურ სამყაროში გადარჩენისთვის ბრძოლის ამბავს გვიყვება. ამ ბრძოლაში კლარკი და ლექსა დაპირისპირებულ მხარეებზე აღმოჩენილი პერსონაჟები არიან, რომლებიც ერთმანეთს საკუთარი ხალხის დაცვისთვის მიმდინარე მოლაპარაკებისას ხვდებიან. მათი ურთიერთობა ნელ-ნელა ვითარდება და მაყურებელმა ზუსტად იცის, რომ დიდი ალბათობით, წარუმატებლობისთვისაც არის განწირული.
კლარკი და ლექსა ერთმანეთს აძლიერებენ, ერთმანეთს გამძლეობას, ემოციების გამოხატვას ასწავლიან, მუდმივად უწევთ არჩევანის გაკეთება სხვების უსაფრთხოებასა და სიყვარულს შორის, უმკლავდებიან სასტიკ სამყაროში დამალულ სასიკვდილო საფრთხეებს და ამ გზაზე სწავლობენ, რომ ცხოვრება მეტია, ვიდრე გადარჩენისთვის ბრძოლა.
Heartstopper შესანიშნავი თინეიჯერული დრამაა, რომელიც თვითგამორკვევის პროცესს, მჩაგვრელ გარემოსთან გამკლავების ამბავსა და რომანტიკული ურთიერთობის განვითარების ისტორიას აღწერს.
ორი სკოლის მოსწავლის ახალგაზრდული, თავბრუდამხვევი, რიგ მომენტებში დამაბნეველი და ემოციური ურთიერთობა ისეთ მნიშვნელოვან გამოწვევებზე არის აქცენტირებული, როგორიც ქამინგაუთი, სექსუალური ორიენტაციის გაცნობიერებასთან დაკავშირებული შიშები და დაბნეულობა, სიძულვილით მოტივირებული ჩაგვრა, მასკულინობის საზიანო გავლენა, მშობლების მხრიდან მიმღებლობა, სასკოლო სივრცეში არსებული გამოწვევები და სხვა რიგი საკითხებია.
ჯერ სერიალის ერთი სეზონი გამოვიდა, თუმცა საინტერესოა, როგორ განვითარდება ორი ახალგაზრდა ბიჭის ურთიერთობა მომდევნო სეზონში, როცა ახალ სირთულეებთან შეჭიდება მოუწევთ.
ოჯახური დრამის, The Fosters-ის ცენტრალური პერსონაჟები, სტეფი და ლენა სერიალების ისტორიაში ერთ-ერთი ყველაზე სტაბილური წყვილია, რომელიც სიუჟეტის დაწყებამდე 10 წლით ადრე შეხვდნენ. სერიალის განვითარებასთან ერთად, წყვილს ოჯახური ცხოვრების არაერთი სირთულის გამოვლა და დანგრევის პირას მისული ურთიერთობის ხელახლა შენება უწევს.
სტეფი და ლენა 5 ბავშვს ზრდიან და სერიალში შვილად აყვანის, უფრო კი ძალადობრივ, არაჯანსაღ გარემოს გამორიდებული ბავშვების გამოცდილებები, ახალი ოჯახის შენების, ნდობის მოპოვების, წარსულის ტრავმებთან გამკლავების თემები იშლება.
Oz-ის სიუჟეტი კაცების ციხეში ვითარდება. 6 სეზონის განმავლობაში ძალაუფლებისთვისა და გადარჩენისთვის მიმდინარე რასობრივ და სოციალურ ბრძოლას ვხედავთ. სერიალი ფოკუსში აქცევს ძალადობრივ მიკროსამყაროს, რომელიც ადამიანისთვის გამანადგურებელი საფრთხის შემცველია.
ამ გარემოში შეუძლებელია ჯანსაღი ურთიერთობა და სერიალის მთავარ პერსონაჟ ტობიასსა და კრისს შორის რომანტიკული მიზიდულობაც არ არის სამაგალითო. მათი ურთიერთმიზიდულობა ძალმომრეობით, ეჭვებით თუ სხვა პატიმრების მხრიდან მომდინარე საფრთხესთან გამკლავების აუცილებლობით არის დაღდასმული. თუმცა ეს ორი პერსონაჟი ყველაზე უიმედო ადგილას ერთმანეთს პოულობს და პატიმრობის დღეები მცირედით მაინც მსუბუქდება. ამიტომ, ეს ურთიერთობა ერთ-ერთი ყველაზე დასამახსოვრებელია.
2022 წელი განსაკუთრებით დატვირთული აღმოჩნდა ქვიარ სერიალების თვალსაზრისით, რაზეც GLAAD-ის 2022 წლის კვლევაც მოწმობს. კვლევის მიხედვით, ლგბტქი პერსონაჟების სატელევიზიო რეპრეზენტაციამ წელს მაქსიმუმს მიაღწია.
გთავაზობთ 2022 წლის საუკეთესო ქვიარ სერიალებს:
90-იანი წლების მიწურულს კანადაში იდენტურმა ტყუპმა დებმა, ტეგან რეინ ქუინმა და სარა კირსტენ ქუინმა ინდი-პოპ ჯგუფი, Tegan & Sara შექმნეს, რომელმაც მალევე მოიპოვა პოპულარობა. დებმა 10-ზე მეტი მუსიკალური ალბომი გამოუშვეს, არაერთი მუსიკალური ჯილდოს მფლობელები გახდნენ და 2019 წელს მემუარების წიგნიც გამოსცეს, რომელსაც ეყრდნობა 2022 წლის სერიალი, სადაც მოთხრობილია დების ცხოვრება საერთაშორისო აღიარებამდე.
მიმდინარე წლის გაზაფხულზე ნეტფლიქსის პლატფორმაზე ელის ოუსმანის ვებ-კომიქსის მიხედვით გადაღებული სერიალი დაემატა, რომელიც სკოლის ორი მოსწავლის, ნიკ ნელსონის და ჩარლი სპრინგის ისტორიას გვიამბობს. ქამინგაუთზე, მიმღებლობაზე, პირველ სიყვარულზე და მეგობრობაზე გადაღებული ეს სერიალი მაყურებელმა მალევე შეიყვარა. სერიალის ახალი სეზონი ეკრანებზე სულ მალე გამოვა.
A League of Their Own 1992 წლის ამავე სახელწოდების ამერიკულ ფილმს ეფუძნება, თუმცა სერიალში დამატებულია ბევრი ახალი პერსონაჟი და სიუჟეტური ხაზი. სატელევიზიო შოუში მოქმედება მეორე მსოფლიო ომის კვალდაკვალ ვითარდება და გვიამბობს კარსონ შოუს ისტორიას, რომელიც ქმრის ომში წასვლის შემდეგ გადაწყვეტს, მოსაწყენი პატარა ქალაქის ცხოვრება ზურგს უკან მოიტოვოს და რამე ახალი სცადოს, რის გამოც ის კალათბურთის ქალთა ჯგუფს შეუერთდება.
HBO 2019 წლის სერიალი Los Espookys მეგობრების ჯგუფზე გვიამბობს, რომლებიც ჰორორის ჟანრის ფილმების მიმართ თავიანთ საერთო სიყვარულს უჩვეულო ბიზნესად გადააქცევენ და შექმნიან გასართობ პარკს Los Espookys. სერიალში მოქმედება ლათინურ ამერიკაში ვითარდება და კარგად წარმოაჩენს ლათინური ამერიკული კულტურისთვის დამახასიათებელ განსაკუთრებულობას და ჯადოსნურ გარემოს.
Sort of CBC-ის და HBO Max-ის ერთობლივი ნამუშევარია, რომელიც მცირე ეკრანებზე 2021 წელს გამოჩნდა და მალევე დაიმსახურა კრიტიკოსების დადებითი შეფასებები. სერიალი მილენიალი არაბინარული იდენტობის მქონე საბი მეჰბუბის ისტორიას მიჰყვება, რომელიც საკუთარი ცხოვრების დამორჩილებას და ერთგვარი როლის პოვნას ცდილობს ლგბტქ+ ბარში, სადაც ბარმენია და ამავდროულად, იმიგრანტი მშობლების გარემოცვაში, ასევე, მდიდარი წყვილის ოჯახში, სადაც ძიძად მუშაობს. სერიალმა არაერთი პრესტიჟული კანადური ჯილდო მიიღო.
2019 წლის სატელევიზიო პრემიერის შემდეგ, ფანები თითქმის სამი წელი ელოდნენ გახმაურებული ამერიკული სერიალის მეორე სეზონს, რომელიც თინეიჯერი ნარკოდამოკიდებული გოგოს, რუ ბენეტის ისტორიას გვიამბობს. HBO-ს ერთ-ერთი ყველაზე წარმატებული პროექტი ფიქციურ ამერიკულ ქალაქში მცხოვრები მოზარდების ცხოვრებას გვაჩვენებს და მათ ისტორიებს შეულამაზებლად ასახავს. როგორია თანამედროვე სამყარო მოზარდებისთვის, რა პრობლემებთან და გამოწვევებთან უწევთ მათ შეჯახება — ეს ის კითხვებია, რომელზეც პასუხის გაცემას სერიალი ცდილობს.
The Staircase ქვიარ მინისერიალია, რომელიც 2004 წელს გადაღებულ დოკუმენტურ სერიალს ეფუძნება. The Staircase-ში მოთხრობილია ოჯახური ძალადობის სასტიკი ისტორია. დრამის ჟანრის სერიალში მთავარ როლში კოლინ ფირტი გვევლინება. მაიკლ პეტერსონი დეტექტივების ჟანრის მწერალია, რომელსაც არაერთი წიგნი ეკუთვნის, თუმცა საზოგადოების დიდი ნაწილის ყურადღებას მას შემდეგ მიიქცევს, რაც 2001 წელს მისი ცოლი უცნაურ ვითარებაში გარდაიცვლება.
What We Do in the Shadows კომედიური ჟანრის ჰორორ სერიალია, რომელიც ოსკაროსანი რეჟისორის, ტაიკა ვაიტიტის 2014 წლის ფილმს ეფუძნება. სერიალში დოკუმენტური ფილმებისთვის დამახასიათებელი ესთეტიკითაა აღწერილი ფიქციური ამბები უძველეს და ძლევამოსილ ვამპირებზე, რომლებიც თანამედროვე სამყაროში ცდილობენ თავიანთი ადგილის დამკვიდრებას. არაერთი პრესტიჟული სატელევიზიო ჯილდოს მფლობელი სერიალის მეოთხე სეზონი მაყურებელმა სულ რამდენიმე თვის წინ იხილა.
The Sex Lives of College Girls HBO Max-ის კიდევ ერთი გახმაურებული სერიალია, რომლის ორი სეზონი უკვე იხილა მაყურებელმა. თინეიჯერული ჟანრის კომედიური დრამა სერიალი კოლეჯის 4 ამერიკელი სტუდენტი გოგოს ისტორიას გვიამბობს, რომლებსაც აქტიური სექსუალური ცხოვრება აქვთ და ცდილობენ, თავი გაართვან გარდამავალ პერიოდს მოზარდობიდან ზრდასრულობაში. სერიალის ცენტრალურ ფიგურებად გვევლინებიან კიმბერლი, ბელა, ლეიტონი და უიტნი.
Our Flag Means Death ამერიკული რომანტიკული კომედიაა, სადაც მოქმედება სამი საუკუნის წინანდელ სამყაროში, მეკობრეების ოქროს ხანაში ვითარდება. სერიალი გვიამბობს ჯენტლმენი სტიდი ბონეტის, ბარბადოსელი არისტოკრატის ისტორიას, რომელიც უარს ამბობს მოსაწყენ ცხოვრებაზე, ქორწინებაზე და მეკობრეობას გადაწყვეტს. სერიალი, რომლის ერთი სეზონიც უკვე იხილა მაყურებელმა, მეკობრეების ფათერაკებით სავსე სამყაროზე გვიამბობს, ფონად კი ქვიარ სიყვარულის დაუვიწყარი ისტორია გასდევს.
კომედიური სერიალები სხვადასხვა სექსუალური ორიენტაციისა და გენდერული იდენტობების მქონე ადამიანების რეპრეზენტაციით ნამდვილად არ გამოირჩევა. მთავარი თუ მეორეხარისხოვანი ქვიარ პერსონაჟები უმეტესად გეები ან ლესბოსელები არიან და იშვიათად თუ გაიელვებენ სხვა პერსონაჟები, რომელთა გამოცდილებების ასახვაც ნაკლებად ხდება.
მიუხედავად ამ დანაკლისისა, არაერთი სერიალი თუნდაც გეი და ლესბოსელი პერსონაჟების ისტორიისა და რომანტიკული ურთიერთობის მრავალშრიანობის ასახვით გამორჩეულია. ამ სტატიაში 13 საუკეთესო ქვიარ წყვილს შეხვდებით, რომლებიც ყველასთვის კარგად ნაცნობ კომედიურ სერიალებში ერთ-ერთ მთავარ როლში გვევლინებიან.
Modern Family, სერიალების მოყვარულებისთვის კარგად ნაცნობი სიტკომი, რომელიც ჯეი პრიჩეტის დიდი ოჯახის შესახებ გვიყვება, არაერთი დაუვიწყარი ურთიერთობით არის დახუნძლული. ჯეისა და გლორიას, კლერისა და ფილის, ჰეილისა და დილანის, კემერონისა და მიჩელის წყვილის ურთიერთობაში ნებისმიერი მაყურებელი იპოვის საკუთარ თავს.
სერიალის პრემიერა 2009 წელს შედგა და იქამდე არსებული სხვა სიტკომებისგან განსხვავებით, რომლებშიც მთავარ როლებში ძირითადად ჰეტერო პერსონაჟები გვხვდებოდნენ, მრავალფეროვნების, სხვადასხვა გამოცდილებისა და იდენტობის მქონე პერსონაჟების ისტორიის ჩვენება დაისახა მიზნად.
კემერონისა და მიჩელის დრამატული, კომიკური და ამაღელვებელი სიყვარულის ამბავი მართლაც დაუვიწყარია. იმ გამოწვევებზე, რომლებთან გამკლავება ქვიარ ადამიანებს უწევთ, თანამედროვე ოჯახის ეს წევრები მაყურებელს სერიალისთვის ჩვეული იუმორით აფიქრებენ.
ჩვენ თვალწინ ტრადიციული შეხედულებების მქონე ჯეი პრიჩეტის დამოკიდებულებები ნელ-ნელა იცვლება და ის სულ უფრო მეტად უსწორებს თვალს იმ შეცდომებს, რაც გეი შვილთან ურთიერთობისას ჰქონია.
არანაკლებ მნიშვნელოვანია შვილად აყვანასთან დაკავშირებული სირთულეები, ფრუსტრაცია და ოჯახის ცნების ხელახალი გააზრება თუ საგანმანათლებლო სისტემის ჰეტერონორმატიული დამოკიდებულება, რომელსაც ქვიარ წყვილებისა და მათ შვილების მიმართ უთანასწორო დამოკიდებულება აქვს.
თუ Modern Family ჯერაც არ გინახავთ, კემერონი და მიჩელი, ასევე, სერიალის სხვა პერსონაჟები ყველა ნეგატიური და პოზიტიური მახასიათებლების მიუხედავად, შეგიყვარდებათ და სერიალის დასრულების შემდეგ კიდევ არაერთხელ მიუბრუნდებით ამბებს, რომლებიც გვახვედრებს, რომ ოჯახი უპირობო სიყვარულით დაკავშირებული ადამიანების ერთობაა, რომელიც ბევრად მეტია, ვიდრე სისხლით ნათესაობა.
ნიუ-იორკის პოლიციის კრიმინალური დეპარტამენტის წევრების პირადი ცხოვრებისა და საგამოძიებო საქმიანობის შესახებ გადაღებული სიტკომი 2013 წელს დაიწყო. სერიალის შემქმნელებს მასკულინური, ჰეტერონორმატული გარემოს შესახებ პირდაპირი კომენტარის გაკეთებაც შეეძლოთ, თუმცა სიტკომი უბრალოდ გვაცნობს კაპიტან რეიმონდ ჰოლტს — გაწონასწორებულ, ემოციურად ჩაკეტილ, დეპარტამენტის მკაცრ უფროსს, რომელიც გეია.
რაც დრო გადის, კაპიტან ჰოლტს სულ უფრო უკეთ ვეცნობით და ვხვდებით, რომ ამ პერსონაჟის მიღმა, რომელიც დეპარტამენტის სხვა წევრებისთვის, განსაკუთრებით ჯეიკ პერალტასთვის, მამის ფიგურაა, ისეთივე “იდიოტი” იმალება, როგორებიც სხვები არიან. სერიალი კაპიტან ჰოლტის წარსულის ჩანართებით გვიყვება იმ გამოწვევების, მცდარი წარმოდგენების, არატოლერანტული გარემოს შესახებაც, რაც საპოლიციო სისტემაში არსებობს.
განსაკუთრებით სასაცილო და ყურადსაღები კი რეიმონდისა და დოქტორ კევინ კოზნერის სიყვარულის ამბავია. ორი ემოციურად ჩაკეტილი ადამიანის ურთიერთობა გამოწვევებით, უთანხმოებით, დრამატული დეტალებით, შერიგებითა და მაინც, ურღვევი კავშირით მოგხიბლავთ. თანაც, ამ წყვილის პირად ცხოვრებაში დეპარტამენტის სხვა წევრები მუდამ ცხვირს ყოფენ, რაც განსაკუთრებით სასაცილოა.
ამ სერიალის სიუჟეტი ქალთა ციხეში ვითარდება და 7 სეზონის განმავლობაში არაერთი ქალი პატიმრის ისტორიას, ყოველდღიურ გამოწვევებს ვეცნობით, რომელიც უკეთ გვიხსნის იმ გზას, რაც მართლმსაჯულების სისტემაში მოხვედრამდე გაიარეს. პატიმრებს შორის არსებული სინაზის, სისასტიკის, ურთიერთზრუნვის, სიყვარულის ამბები სულ უფრო გვაახლოებს პერსონაჟებთან და მათ შორის არაერთი წყვილის გამორჩევაც შეიძლება.
თუმცა, სერიალის მთავარ პერსონაჟად პაიპერ ჩეპმენი ითვლება და მისი სასიყვარულო ისტორიაც ყველაზე ხანგრძლივად ვითარდება, თანაც, არაერთი გამოწვევითაა სავსე. ალექსსა და პეიპერს შორის არსებული დამოკიდებულების ასახსნელად მხოლოდ ისიც კმარა, რომ ჩეპმენის ციხეში მოხვედრა სწორედ ალექსთან კავშირის ბრალია.
ყველა გაუგებრობისა და წყვილს შორის არსებული უთანხმოებების, ღალატის, ბრაზის მიუხედავად, მათ შორის მიზიდულობა, ემოციური მიჯაჭვულობა იმდენად ძლიერია, რომ ძნელი წარმოსადგენია, სერიალის ბოლოს ერთად არ დარჩნენ. ამ ინტრიგას მხოლოდ იმ შემთხვევაში გაიგებთ, თუ სერიალის ყურებას დაიწყებთ.
სერიალის კიდევ ერთი, ფანებისთვის განსაკუთრებით საყვარელი წყვილი ფუსეი და სოსო არიან. მომხიბლავი, მხიარული, მეგობრული და გაბედული ფუსეი მაყურებლებისთვის დასაწყისიდანვე ერთ-ერთი უსაყვარლესი პერსონაჟი იყო და როცა ახალ, დაბნეულ, შეშინებულ პატიმართან მისი დამეგობრების, შემდეგ კი რომანტიკული ურთიერთობის განვითარება ვიხილეთ, ბევრმა შეუფერებელ წყვილად მიიჩნია.
თუმცა, სერიალის ერთ-ერთი ყველაზე მნიშვნელოვანი ხაზი მაყურებლის წარმოდგენას სრულად ცვლის, თანაც, მართლმსაჯულების სისტემაში არსებულ სერიოზულ გამოწვევებზე კომენტარსაც გვთავაზობს. არ დაგასპოილერებთ, მაგრამ ის კი უნდა ითქვას, რომ სერიალის მთავარი ხიბლი თუ ძლიერი მხარე სწორედ ამ პერსონაჟების ირგვლივ განვითარებული მოვლენებია, რაც მეხუთე, სერიალის ყველაზე მასშტაბურ სეზონში პიკს აღწევს.
Schitt’s Creek ჯონი და მოირა როუზებისა და მათი განებივრებული შვილების, დეივიდისა და ალექსისის ამბავია, რომლებიც გაკოტრდებიან და ყველასგან მივიწყებულ, უკაცრიელ ქალაქში გადადიან საცხოვრებლად.
სერიალი აუტანელ, ქედმაღალ პერსონაჟებს გვაცნობს, რომლებიც სერიიდან სერიამდე ჩვენს თვალწინ იცვლებიან და ერთმანეთთან თუ ადგილობრივ მცხოვრებებთან საერთო ენის გამონახვას, დაახლოებას, მეგობრული ურთიერთობის განვითარებას ახერხებენ.
ყველაზე დიდი ტრანსფორმაციის გზას კი დეივიდი გადის — შეუმდგარი, ფუფუნების მოყვარე ბისექსუალი ბიჭი, რომელიც დამოუკიდებელ, წარმატებულ, ნაკლებად ტოქსიკურ ადამიანად შედგომას ახერხებს და ცხოვრებაში პირველად მყარი ურთიერთობის შენარჩუნებაც გამოსდის.
პატრიკისა და დეივიდის წყვილი ერთმანეთს აბალანსებენ, სისუსტეების დაძლევაში ეხმარებიან და კარიერული თუ პირადი წარმატების გზასაც ერთად გადიან. შეიძლება ითქვას, რომ სიტკომების ისტორიაში დეივიდი და პატრიკი ერთ-ერთი ყველაზე არატოქსიკური წყვილია.
Glee დაუვიწყარ მუსიკალურ ნომრებთან ერთად მრავალფეროვანი გამოცდილებების ასახვითაც გამოირჩეოდა. სერიალის მთავარ პერსონაჟებს შორის კურტი, ღიად გეი მოსწავლეც იყო.
კურტისა და ბლეინის ურთიერთობა მხარდაჭერის, სირთულეებთან ერთობლივად გამკლავების, გრძნობების ღიად გამოხატვის საუკეთესო მაგალითია. თანაც, ორივე შესანიშნავად მღერის, კარგი ეკრანულ ურთიერთობას სხვა რა სჭირდება?!
Glee-ის კიდევ ერთი, არატოქსიკური და ამაღელვებელი სიყვარულის ისტორია მეგობრობით იწყება. სანტანასა და ბრიტნის ურთიერთობის შეუმჩნეველი დასაწყისი და ამის პარალელურად დიდი მეგობრობის შენარჩუნება ის საუკეთესო კომბინაციაა, რომელმაც მათი სიყვარული სრულყოფილად აქცია.
ისინი უპირველეს ყოვლისა მეგობრები არიან, რომლებსაც ერთმანეთის საუკეთესოდ ესმით, ამიტომ ნებისმიერ სიტუაციაში ახერხებენ, რომ ერთმანეთის მხარდაჭერა, გაძლიერება, გრძნობების გამოხატვა შეძლონ.
Barry დაქირავებული მკვლელის შესახებ გვიყვება, რომელიც სამსახიობო კარიერას იწყებს. შთამბეჭდავი პერსონაჟებითა და ისტორიებით დახუნძლული, აბსურდული, სატირული, დრამატული სერიალი ბოლო წლების ერთ-ერთი საუკეთესო ნამუშევარია.
Barry შესანიშნავად ახერხებს, რომ კრიმინალური სამყაროს შესახებ ფილმებსა და სერიალებში დამკვიდრებული ფსევდო მასკულინური წარმოდგენები სასაცილოდ აიგდოს. ამასთან, მაყურებელი ერთი წამით არ მოიწყენს.
თუნდაც ნოჰო ჰენკისა და კრისტობალ სიფუენტესის ურთიერთობა რად ღირს, რომელიც რომეო და ჯულიეტას ქვიარ ვერსიას მოგაგონებთ. ჩეჩნური და ბოლივიური ნარკოსამყაროს ლიდერების სიყვარულს კრიმინალური დაჯგუფებები, შუღლი, ოჯახი, მკვლელობების სერია და გამოძიება წინ ვერ ეღობება. მეტიც, მთელ ამ აურზაურში მაინც რჩება დრო და ადგილი იმისთვის, რომ გეი წყვილს შორის რომანტიკული მომენტების წყება ვიხილოთ, მაგალითად, ისეთი უბრალო სიტუაციები, როგორიც ნეტფლიქსის ერთად ყურება ან ბანდების დაპირისპირებისას ერთმანეთის სიკვდილისგან დაცვაა.
Atypical აუტისტური სპექტრის მქონე ბიჭის ცხოვრებასა და მისი ოჯახის ისტორიას გვიყვება და, შეიძლება ითქვას, რომ ბოლო წლების ერთ-ერთი ყველაზე ჰუმანური სერიალია. Atypical-ის შემქმნელები ახერხებენ, რომ თითოეული პერსონაჟის გამოცდილება სრულყოფილად ასახონ.
მთავარი პერსონაჟის, სემ გარდნერის დის, კეისის თვითგამორკვევის, ძმასთან ურთიერთობის, ცხოვრების სირთულეებში გარკვევის, ზრდასრულობაში გადაბიჯებისა და სასიყვარულო ცხოვრების ამბავი გულგრილს არავის დატოვებს.
კეისისა და იზის რომანტიკული ურთიერთობა ბავშვობის მეგობრობიდან იწყება და უკვე ზრდასრული პერსონაჟები საკუთარი თავის ძიებისა და გაუცხოების შემდეგ ერთმანეთს პოულობენ. ისინი ერთმანეთს სექსუალურ ორიენტაციასთან დაკავშირებულ კითხვებზე პასუხების გაცემაში ეხმარებიან, შიშებისა და უხერხულობის გადალახვას ერთად ცდილობენ.
Sex Education სერიალების ყველა მოყვარულისთვის კარგად არის ნაცნობი. საშუალო სკოლის მოსწავლეების სექსუალური თვითგამორკვევის შესახებ გადაღებული სერიალი მრავალფეროვან გამოცდილებებს, გარდატეხის ასაკის თანმდევ უხერხულობას, თვითშემეცნებას, სკოლაში სექსუალური განათლების არარსებობით გამოწვეულ სირთულეებსა და სხვა არაერთ თემას იკვლევს.
სერიალის განსაკუთრებით დრამატული ხაზი ერიკისა და ადამის ურთიერთობაა, რომელიც ფიზიკური და სექსუალური ძალადობით, ინტერნალიზებული ჰომოფობიისგან გამოწვეული აგრესიითა და თვითგამორკვევის თანმდევი სირთულეებით იწყება და სიუჟეტის განვითარებასთან ერთად მიმღებლობის, სიყვარულის ძალით ადამიანის გარდაქმნის ისტორიას ვეცნობით.
Sex Education-ის კიდევ ერთი გამორჩეული წყვილი ლილი და ოლა არიან. უცხოპლანეტელებით შეპყრობილი, მორცხვი ლილი სერიალის ერთ-ერთი ყველაზე დასამახსოვრებელი პერსონაჟია.
მისი და ოტისის ყოფილი შეყვარებულის, ოლას ურთიერთობა ურთიერთმხარდაჭერის, სინაზის, გაგებისა და პოზიტიური გამოცდილებების შესანიშნავი ილუსტრაციაა. ამიტომ, ფანებისთვის განსაკუთრებით გულდასაწყვეტი იყო ის ფაქტი, რომ ლილისა და ოლას სერიალის მეოთხე სეზონში ვერ ვიხილავთ.
Crazy Ex-Girlfriend მოსაზღვრე პიროვნული აშლილობის მქონე წარმატებული ქალის, რებეკა ბანჩის შესახებ გვიყვება, რომელიც გადაწყვეტს, რომ ყოფილი შეყვარებულის დასაბრუნებლად კარიერა მიატოვოს და საცხოვრებლად ახალ ქალაქში გადავიდეს.
კომედიურ მიუზიკლში არაერთი სახასიათო პერსონაჟი გვხვდება, რომლებიც რებეკა ბანჩთან ურთიერთობის თუ პირადი გაურკვევლობების გამო მუდმივად ახალ თავგადასავლებში ეხვევიან. სერიალის ერთ-ერთი საუკეთესო რომანტიკული ხაზი თეთრი ჯოშისა და დერილის ურთიერთობაა, რომელიც ისეთ მნიშვნელოვან თემებს უსვამს ხაზს, როგორიც წყვილს შორის არსებული ასაკობრივი სხვაობა, თვითგამორკვევა, ურთიერთობებში არსებული ისეთი მნიშვნელოვანი ბარიერებია, როგორიც შვილის ყოლის სურვილთან დაკავშირებული აზრთა სხვადასხვაობა და სხვა დეტალებია.
რაც არ უნდა იყოს, ყველა უთანხმოების მიუხედავად, თეთრი ჯოშისა და დერილის ურთიერთობა მაინც იმაზე ბევრად შემდგარი და არატოქსიკურია, ვიდრე სხვა პერსონაჟების თავგადასავლები.
ტოქსიკური მრავალშვილიანი ოჯახის კომედიურ, ხშირ შემთხვევებში კი დრამატულ ისტორიას მილიონობით ერთგული ფანი ჰყავს, რაც მრავალფეროვანი, სახასიათო პერსონაჟების დამსახურებაა. სერიალი არც ქვიარ რეპრეზენტაციას უჩივის — იანი, მიკი, დები თუ სხვა, მეორეხარისხოვანი პერსონაჟები ამის ნათელი მაგალითია. თუმცა, ფანებისთვის განსაკუთრებით საყვარელი იანისა და მიკის წყვილია, რომელიც გარემოსგან ნაკარნახევი თვითსიძულვილის, მენტალური ჯანმრთელობის გამოწვევების, სიღარიბითა და ძალმომრეობით გამოწვეული კრიმინალური ქმედებების ისტორიას ასახავს, რის პარალელურადაც ურთიერთმიზიდულობა, სინაზის გამოვლინებები, სიყვარული სულ უფრო ძლიერდება და ამარცხებს საკუთარი თავის ვერ მიღებას თუ მჩაგვრელ გარემოს.
7 ოქტომბერს, ბევრისთვის საყვარელი სერიალი გრეის ანატომია მე-19 სეზონით დაბრუნდა. სანამ გულშემატკივრები ახალი სერიების სანახავად თბილად მოკალათდებით, მანამდე საუკეთესო ლგბტქი ეპიზოდები გავიხსენოთ, რომლის ნაკლებობასაც გრეის ანატომია არ განიცდის.
ეს პირველი შემთხვევაა, როდესაც გრეის ანატომიაში ტრანსგენდერი ადამიანი გამოჩნდა. მნიშვნელოვანია, როგორ ექცევიან ექიმები ტრანსგენდერ ადამიანებს საზოგადოებაში. ეს თემა აქტუალურია და ის ფაქტი, რომ დონას როლის შემსრულებელი ალექსანდრა ბილინგსი თავად ტრანსგენდერი ადამიანია, ამ როლს ნამდვილობას მატებს.
სერიაში ექიმი მერედით გრეი მარკ სლოუნს სქესის კვლავმინიჭების ოპერაციაში ეხმარება, მაგრამ ყველაფერი იცვლება, როდესაც სლოუნი აღმოაჩენს, რომ მის პაციენტს ძუძუს კიბო აქვს. დონას გული სწყდება, რომ თავისი ოცნების ასრულება, შესაძლოა, სიცოცხლის ფასად დაუჯდეს. მარკი და მერედითი მის გამხნევებას ცდილობენ.
ამ ეპიზოდში მერედითი ხაზს უსვამს იმ უსამართლობას, როდესაც შენი სიყვარულის დამალვა გიწევს. გეი ურთიერთობები კაცებს შორის და ემოციები, რომლებსაც ისინი სერიალში გამოხატავენ და აზიარებენ, გამამხნევებლად შეგვიძლია მივიჩნიოთ.
მერედითი და დერეკი კლინიკურ კვლევას ატარებენ. მათი შემდეგი პაციენტი ჯარისკაცი დარენია. მისი მეგობარი ბიჭი ტოდი, ოპერაციის დაწყებამდე, საავადმყოფოში დარენის მოსანახულებლად მიდის. შეყვარებულები ერთმანეთს კოცნიან, რასაც დარენის მამა დაინახავს.
ქირურგი ერიკა ჰანი ამ ეპიზოდში ერთ-ერთ ყველაზე დასამახსოვრებელ ფრაზას ამბობს. ის კალი ტორესს უყვება, რომ ლესბოსელობის გაცნობიერება იგივეა, რაც პირველად სათვალით სამყაროს დანახვა. მას და ტორესს სერიალში ხანმოკლე ურთიერთობა ჰქონდათ, სანამ ერიკა მოულოდნელად დატოვებდა შოუს. მისმა წასვლამ ბევრ გულშემატკივარს გაუცრუა იმედი.
ერიკას გრძნობები არ შეესაბამება იმას, რასაც კალი განიცდის. კალისთვის ეს ერთგვარი კარის გახსნაა სექსუალობის შესასწავლად. მოგვიანებით, ის აცხადებს, რომ ბისექსუალია.
ტრავმატოლოგი კალი ტორესის მამა სიეტლ გრეისის ჰოსპიტალში ეკლესიის პასტორთან ერთად მიდის, რათა ქალიშვილი დაარწმუნოს, რომ გეი არ არის. ეპიზოდი აჩვენებს რეალურ ხედვას, თუ როგორ შეიძლება მოექცნენ ლგბტქი თემის წევრებს საყვარელი ადამიანები.
კალის მამა მისთვის ბიბლიის ჩანაწერების ციტირებას იწყებს, რაზეც კალის გული სწყდება. ის პარტნიორს, არიზონას ეუბნება, რომ არ სჭირდება ისეთი ოჯახი, რომელიც მას ვერ მიიღებს ისეთს, როგორიც არის.
არიზონა კალის მამასთან დალაპარაკებას გადაწყვეტს და ეტყვის, რომ საკუთარი მამისგანაც იგივე რეაქციას ელოდა, როდესაც გაიაზრა თავისი სექსუალური ორიენტაცია, მაგრამ ამის მაგივრად, მამამ ჰკითხა, იყო თუ არა იგივე ადამიანი, რომელიც მან აღზარდა, რადგან იცოდა, რომ მისი შვილი, რომელიც ასე ძლიერ უყვარს, სექსუალური ორიენტაციის გამო როგორც ადამიანი ვერ შეიცვლებოდა.
სამოქალაქო პარტნიორობის საბუთების შესატანად წასულ პაციენტს ცხენის ეტლი ფეხქვეშ თელავს. კაილი კალის უხსნის, რომ სურდა, ეს დღე განსაკუთრებული ყოფილიყო, რადგან ვაშინგტონის შტატმა გეი ქორწინება ნამდვილ ქორწინებად არ აღიარა და სიეტლში გადაწყვიტეს ჩამოსვლა.
მის მიერ წარმოთქმული სიტყვები გულსატკენია. კაილი ამბობს, რომ ერთი და იმავე სქესის ადამიანებს არ აქვთ ისეთივე აღიარება, როგორიც ჰეტეროსექსუალ წყვილებს. აღსანიშნავია, რომ ვაშინგტონში გეი ქორწინება 2012 წელს, ამ ეპიზოდის ეთერში გასვლიდან ერთი წლის შემდეგ.
ამ ეპიზოდში არიზონასა და კალის ქორწილის დღეა. მასში კარგად ჩანს ის რთული პერიოდი, რომელიც სერიალის ერთ-ერთმა საუკეთესო წყვილმა გამოიარა. ქორწილამდე ორივეს ბევრი წინააღმდეგობა შეხვდა, მათ შორის, მშობლების მხრიდან, რომლებსაც ამ ქორწინების აღიარება არ სურდათ.
ექიმი ბეილი კალის ამხნევებს და ეუბნება, რომ ეკლესია და დედამისი ჯერ კიდევ არ არიან მზად ამისთვის, მაგრამ ამან არ უნდა შეაჩეროს და უნდა დაქორწინდეს იმ ქალზე, რომელიც უყვარს. მაყურებელი ხედავს მკვეთრ კონტრასტს მერედითისა და დერეკის ოფიციალურ ქორწინებასა და კალისა და არიზონას წინააღმდეგობებით სავსე ქორწინებას შორის. ეს ხაზს უსვამს იმას, რომ ჰეტეროსექსუალი წყვილები პრივილეგიებით სარგებლობენ.
გრეის ანატომიის ტრანსგენდერი პერსონაჟები ბრაიანი და ჯესი ტრანსგენდერ თინეიჯერებს ძლიერ მესიჯს უგზავნიან. ბრაიანი ოპერაციისთვის საავადმყოფოში მიდის. ბრაიანის მამა, მისტერ უესტონი არასწორ აზრს ავრცელებს, როდესაც ამბობს, რომ ბრაიანი გარკვეულ ფაზას გადის და ეს დროებითია. ჯესი ცდილობს აუხსნას, რომ მან არ იცის, რას ნიშნავს სხვის სხეულში ყოფნა.
მოგვიანებით, ჯესი მისტერ უესტონს იმის შესახებ ესაუბრება, თუ როგორ უყვარს ბრაიანს მამამისი და სურს, მომავალში მისნაირი გახდეს.
ეს ეპიზოდი ზიანისმომტან გარდაქმნის თერაპიას ეხება.
მას შემდეგ რაც მშობლებმა ჯესის უთხრეს, რომ გამოსასწორებელ ბანაკში აგზავნიდნენ, ორი თინეიჯერი გოგო მატარებლის ლიანდაგებს ჩაუვარდა, რადგან ისინი ფიქრობდნენ, რომ მხოლოდ ასე შეძლებდნენ ერთად ყოფნას. როდესაც კალი გოგოების ისტორიას გაიგებს, სურს ჯესის დაეხმაროს და ყველას გაუზიაროს საკუთარი აზრი გარდაქმნის თერაპიასთან და იმ ზიანთან დაკავშირებით, რაც შედეგად მოზარდს შეიძლება მიადგეს. ეპიზოდი პოზიტიურად სრულდება, რადგან ჯესის მამა ცოლს უპირისიპირდება და შვილის მხარეს გადადის.
მერედითს და ამელიას პარკინსონის დაავადების სამკურნალოდ მილიონობით დოლარს სთავაზობენ. დაწესებულებაში ყოფნისას, ისინი ხვდებიან ექიმ კაი ბარტლს, შთამბეჭდავ ნეირომეცნიერს, რომელიც უჯრედული კვლევებითაა ცნობილი და სერიალში პირველი არაბინარული პერსონაჟია. სერიალში ჩანს კაისა და ამელიას ურთიერთობა, რომლებიც პანდემიის დროს, Zoom-ის მეშვეობით, ფლირტს იწყებენ.
ამ ეპიზოდის დასაწყისში ოუენი და ტედი ბავშვებთან ერთად საავადმყოფოში შედიან. მათი შვილი, ლეო ფლანელის პერანგში და კოვბოის ქუდშია გამოწყობილი. ოუენი აღნიშნავს, რომ ის კოვბოის ჰგავს, მაგრამ ლეო ამ ფაქტს უარყოფს და ამბობს, რომ გოგოა. ტედი ცდილობს აუხსნას, რომ ის კოვბოის კოსტიუმში გამოწყობილი ბიჭია. საბოლოოდ, ლეო ეთანხმება.
ტედი ფიქრობს, რომ ლეო დაბნეულია საკუთარ გენდერულ იდენტობასთან დაკავშირებით და ამ თემის განსახილველად ოუენს თერაპევტთან კონსულტაციას სთავაზობს. ოუენი გაკვირვებული არ არის და ფიქრობს, რომ შესაძლოა, ლეო ტრანსგენდერი ადამიანი აღმოჩნდეს, მშობლების მოვალეობა კი, ნებისმიერ სიტუაციაში შვილის მხარდაჭერაა.
სერიაში ჩანს, რომ მათ საბოლოოდ მაინც ვერ გადაწყვიტეს, როგორ მოეგვარებინათ ეს საკითხი, ამიტომ შეთანხმდნენ, სიტუაციაში გასარკვევად თავად მისულიყვნენ თერაპიაზე. საინტერესოა, როგორ გაგრძელდება ლეოს ირგვლივ განვითარებული მოვლენები ახალ სეზონში.
გრეის ანატომიაში ეს პირველი ეპიზოდი არ არის, რომელშიც ტედი და ოუენი შვილს მხარს უჭერენ. ლეო სერიალში ანიმაციურ გმირ ელსას კოსტიუმითა და ბალერინას კაბითაც გვხვდება. “ელსა, მიყვარხარ”, — ასე მიმართავს ოუენი შვილს დამშვიდობებისას, ხოლო დედის კითხვაზე, რომელსაც აინტერესებს, რატომ აცვია ლეოს ბალერინას კაბა, ოუენი პასუხობს, რომ ლეოს მოსწონს ასეთი კაბები, რითაც ხაზს უსვამს, რომ ამაში უცნაური არაფერია.
მე-18 სეზონის ფინალურმა, მე-20 სერიამ მაყურებლის ყურადღება კიდევ ერთხელ მიმართა იმ დისკრიმინაციულ მიდგომაზე, რომელიც არამხოლოდ ქვიარ ადამიანებისთვის არის საზიანო. ამჯერად სერიალი სისხლის დონაციაზე გეი და ბისექსუალი კაცებისთვის დაწესებულ შეზღუდვებს გამოეხმაურა.
“ეს აბსურდული, საზიზღარი იდეა, რომ ჩემი სისხლი, ჩემი სექსუალურად აქტიური გეი სისხლი… ჩემი სისხლი ისეთივეა, როგორიც ყოველთვის იყო“, — ამბობს ჯეიკ ბორელის პერსონაჟი, როცა გამოუვალი მდგომარეობით აღელვებული ქირურგიული განყოფილების უფროსს ესაუბრება.
სისხლის დონაციაზე დაწესებული აკრძალვა 80-იანი წლებიდან იღებს სათავეს, როცა აივ-პანდემიის შესახებ არც ცოდნა არსებობდა და არც შესაბამისად გამართული სამედიცინო აღჭურვილობა, რაც სისხლის ტესტირებას მარტივს გახდიდა. მიუხედავად იმისა, რომ მას შემდეგ მეცნიერება მნიშვნელოვნად განვითარდა, აკრძალვა უამრავ ქვეყანაში დარჩა. აღსანიშნავია, რომ არაერთმა ქვეყანამ სისხლის დონაციაზე შეზღუდვის გაუქმება ან შემსუბუქება სწორედ პანდემიისას დაიწყო, როცა სისხლის მარაგის პრობლემა მთელ მსოფლიოში აქტიურად დადგა.
გრეის ანატომია უფრო და უფრო ორიენტირებული ხდება ქვიარ თემატიკაზე. საინტერესოა, რა სიახლეები გველოდება სერიალის ახალ სეზონში, რომლის პირველი სერიაც უკვე გამოსულია.
12 სექტემბერს, ემის 74-ე დაჯილდოების მთავარი ცერემონია გაიმართება, იქამდე კი, 3 და 4 სექტემბერს, ემის კრეატიული ხელოვნების 74-ე დაჯილდოების გამარჯვებულები გახდა ცნობილი.
2021-2022 წლის საუკეთესო ნამუშევრებს შორის მრავლად იყო ლგბტქი სატელევიზიო რეალითი შოუები და სერიალები, რომელთა ნაწილს გამარჯვებულის ტიტულიც ერგო.
მიმდინარე სატელევიზიო სეზონის რეალითი და შეჯიბრის ფორმატის შოუებს შორის ფავორიტები დრეგ კულტურის წარმომადგენლები — Rupaul’s Drag Race და We’re Here გახდნენ.
Drag Race-ის წამყვანმა, რუპოლმა რეალითი ან შეჯიბრის ტიპის შოუს საუკეთესო წამყვანის ნომინაციაში მე-7 გამარჯვება მოიპოვა, რაც ამ კატეგორიაში რეკორდული მაჩვენებელია. გარდა ამისა, Drag Race-მა გაიმარჯვა საუკეთესო პროდუქტის დიზაინის კატეგორიაშიც.
We’re Here-მა გამარჯვება დოკუმენტური ან რეალითი შოუსთვის შექმნილი საუკეთესო კოსტიუმებისთვის მოიპოვა, ხოლო დრეგ შემსრულებელმა და მეიქაფ არტისტმა, ლაილა მაკქვინმა საუკეთესო მაკიაჟის კატეგორიაში გაიმარჯვა. მასთან ერთად პრიზი კიდევ ერთი ქვიარ შოუს, Legendary-ის მეიქაფ არტისტმა მოიპოვა.
საუკეთესო რეალითი შოუ Queer Eye გახდა.
სერიალების კატეგორიებში ლიდერები ქვიარ შოუები, Euphoria და The White Lotus გახდნენ.
The White Lotus-მა გამარჯვება 5 კატეგორიაში — კასტინგისთვის, ანთოლოგიის ან მინისერიალის ტიპის შოუსთვის შექმნილი საუკეთესო მუსიკის, თემის მუსიკის, მონტაჟისა და ხმის ინჟინერიისთვის მოიპოვა.
5 კატეგორიაში გახდა გამარჯვებული Euphoria-ც. სერიალმა გამარჯვება საუკეთესო ქორეოგრაფიისთვის, ერთკამერიანი სერიალის საუკეთესო კინემატოგრაფიისთვის, თანამედროვე მაკიაჟისთვის და ერთკამერიანი დრამატული სერიალის საუკეთესო მონტაჟისთვის მოიპოვა. გარდა ამისა, დრამატული სერიალის საუკეთესო მოწვეული მსახიობის კატეგორიაში კოლმან დომინგომ გაიმარჯვა.
ემის 74-ე დაჯილდოების მთავარი ნომინაციების გამარჯვებულები 12 სექტემბერს გამოცხადდება და სავარაუდოა, რომ გამარჯვებულებს შორის ლგბტქი სერიალებსა და მსახიობებს მრავლად ვიხილავთ.
74-ე კრეატიული ემის გამარჯვებულთა სრული სიის ნახვა შეგიძლიათ ამ ლინკზე.
GLAAD-ის ახალი კვლევის მიხედვით, რომელიც სატელევიზიო სივრცეში ლესბოსელი, გეი, ბისექსუალი, ტრანსგენდერი და ქვიარ პერსონაჟების რეპრეზენტაციას ეხება, ლგბტქი პერსონაჟების გამოცდილებების ასახვამ რეკორდულ ნიშნულს (11.9%) მიაღწია. კვლევის შედეგები „პრაიმტაიმ“ (საღამოს 8 საათიდან 11 საათამდე საეთერო დრო) შოუების შესწავლას ეყრდნობა.
ამასთან, 2021-2022 წლების სატელევიზიო ეთერში შოუების ძირითად შემადგენლობაში ლესბოსელ პერსონაჟებს (40%) ხშირად ვხვდებით, რაც ტელევიზიის ისტორიაში პირველად აღემატება გეი პერსონაჟების ოდენობას. 42-მდე გაიზარდა ტრანსგენდერი პერსონაჟების რიცხვი, რაც წინა კვლევის მონაცემებს 13-ით აღემატება. 637 ლგბტქი პერსონაჟიდან 183 ბისექსუალია.
GLAAD-ის ბოლო კვლევა ბევრად მასშტაბურია და ფარავს Amazon-ს, Hulu-ს, Netflix-ს, Apple TV+-ს, Disney+-ს, HBO Max-ს, Paramount+-ს, Peacock-ს, სხვა სტრიმინგ პლატფორმებსა და სატელევიზიო არხებს. კვლევის მიხედვით, ლგბტქი პერსონაჟების რეპრეზენტაციით სატელევიზიო არხებიდან CW (17,1%) ლიდერობს, მეორე ადგილზე Fox-ია (13,3%), მესამეზე კი ABC (12,5%).
სტრიმინგ სერვისებზე რეპრეზენტაციით ისევ გეი პერსონაჟები ლიდერობენ 33%-ით, ამას ბი+ პერსონაჟები მოსდევენ – 32%-ით და ლესბოსელი პერსონჟები – 27%-ით. სტრიმინგ პლატფორმებიდან ლგბტქი პერსონაჟები ყველაზე მრავლად Netflix-ის შოუებში გვხვდებიან, მომდევნო კი HBO Max-ია, რომელსაც Amazon და Hulu მოჰყვებიან.
სატელევიზიო არხების 775 ძირითადი როლის შემსრულებლების მეოთხედი შავკანიანია, რაც ისტორიული მაქსიმუმია, ლათინოამერიკელი პერსონაჟები კი 8%-ს შეადგენენ, აზიელი პერსონაჟების რიცხვი სულ რაღაც 7%-ია.
კვლევამ შშმ პირების რეპრეზენტაციაც შეისწავლა. აღმოჩნდა, რომ რეგულარული პერსონჟების მხოლოდ 2,8%-ია შეზღუდული შესაძლებლობების მქონე, რაც მნიშვნელოვნად ჩამორჩება რეალური პოპულაციის მაჩვენებელს. მიმდინარე სატელევიზიო სეზონში მხოლოდ 2 აივ-დადებითი პერსონაჟი გვხვდება.
წყარო: TVLine
