ტრანსფობია

ტიკტოკმა ტრანსფობიური და გარდაქმნის თერაპიის მხარდამჭერი მასალის აკრძალვისთვის წესდება შეიმუშავა

სოციალური მედიის პლატფორმა ტიკტოკი გენდერული ნაცვალსახელებისა და მიმართვის ფორმის არასწორი გამოყენების, ტრანსგენდერი ადამიანისთვის დაბადებისას მინიჭებული სახელის გამოყენების, მიზოგინიის და ,,გარდაქმნის თერაპიის” მხარდამჭერი კონტენტის წინააღმდეგ ბრძოლას იწყებს და ამისთვის საიტის წესდება განაახლა. ტიკტოკმა

ტრანსფობია გერმანიაში — ანტი-ქვიარ თავდასხმების გაზრდილი მაჩვენებელი

გერმანიის ქალაქებში – მიუნსტერში, აუგსბურგსა და ბრემენში, სამი თვის განმავლობაში ქვიარ ადამიანებზე სამი სასტიკი თავდასხმა მოხდა. ერთ-ერთი ასეთი შემთხვევის შედეგად ტრანსგენდერი კაცი, მალტე გარდაიცვალა. მან ლესბოსელი ქალების დაცვა სცადა, რომლებსაც ავიწროებდნენ და შეურაცხყოფდნენ. თავდამსხმელმა მალტეს დაარტყა, კაცი ასფალტზე დაეცა და

ტრანსგენდერი ქალები, რომელთა სიცოცხლე ტრანსფობიურმა განწყობებმა და სისტემამ შეიწირა

20 ნოემბერი ტრანსგენდერი ადამიანების ხსოვნის საერთაშორისო დღეა, რომელიც 1999 წლიდან აღინიშნება და პატივს მიაგებს ტრანსფობიური გარემოსა და სისტემის გულგრილობის გამო გარდაცვლილი ადამიანების ხსოვნას. ბოლო

ტრანსგენდერი ქალები, რომელთა სიცოცხლე ტრანსფობიურმა განწყობებმა და სისტემამ შეიწირა

20 ნოემბერი ტრანსგენდერი ადამიანების ხსოვნის საერთაშორისო დღეა, რომელიც 1999 წლიდან აღინიშნება და პატივს მიაგებს ტრანსფობიური გარემოსა და სისტემის გულგრილობის გამო გარდაცვლილი ადამიანების ხსოვნას.

ბოლო ათწლეულში საქართველოში არსებულ ტრანსფობიურ განწყობებსა და სისტემურ გულგრილობას არაერთი ადამიანის სიცოცხლე შეეწირა. მკვლელობის შემთხვევების გამოძიების გაჭიანურებული პროცესი, ჯანდაცვის სისტემის გულგრილობა და ტრანსგენდერი ადამიანების წინაშე არსებული ფინანსური გამოწვევები არაერთ ადამიანს გაუსაძლის, სიცოცხლისთვის საშიშ გარემოს უქმნის, რომლის გამოსასწორებლად ქმედითი ნაბიჯები არ იდგმება.

სტატიაში კიდევ ერთხელ გავიხსენებთ გარდაცვლილ ტრანსგენდერ ქალებს, რომელთა სიცოცხლე სახელმწიფო ნების არარსებობას შეეწირა.

საბი

ტრანსგენდერი ქალი, საბი ბერიანი 2014 წლის 11 ნოემბერს, საკუთარ ბინაში, შსს-ის ინფორმაციით შელაპარაკების ნიადაგზე მოკლეს. 2015 წლის 7 აგვისტოს, თბილისის საქალაქო სასამართლომ საბი ბერიანის მკვლელობაში ბრალდებული ლევან კოჭლოშვილი ნაწილობრივ გაამართლა და სხივის ნივთის დაზიანებისა [ბრალდებულმა საბი ბერიანის ბინაში ხანძარი გააჩინა] და ტრანსგენდერი ქალის, ბიანკა შიგუროვას ცემისთვის თავისუფლების 4 წლით აღკვეთა მიუსაჯა. 

2016 წლის 25 მაისს, სააპელაციო სასამართლომ საბი ბერიანის მკვლელობასთან დაკავშირებით საქალაქო სასამართლოს გადაწყვეტილება ძალაში დატოვა. 2016 წლის 30 დეკემბერს, საქართველოს უზენაესმა სასამართლომ დააკმაყოფილა პროკურატურის მოთხოვნა, ლევან კოჭლაშვილი დამნაშავედ ცნო და 10 წლით თავისუფლების აღკვეთა მიუსაჯა.

ბიანკა

2016 წლის 4 თებერვალს, 22 წლის ტრანსგენდერი ქალი, ბიანკა შიგუროვა საკუთარ ბინაში გარდაცვლილი იპოვეს. შსს-მ მიზეზად გაზის გაჟონვა დაასახელა და გამოძიება სისხლის სამართლის კოდექსის 115-ე, თვითმკვლელობამდე მიყვანის მუხლით დაიწყო.

ზიზი

2016 წლის 16 ოქტომბერს, ზიზი შეყილაძეს თავს დაესხნენ და ყელისა და თავის არეში დაზიანებები მიაყენეს. მისი მდგომარეობა მძიმე იყო და კომაში იმყოფებოდა. 23 ნოემბერს, მიღებული დაზიანებების შედეგად, ზიზი გარდაიცვალა.

2017 წლის 3 თებერვალს, თბილისის საქალაქო სასამართლომ ბრალდებულს, განზრახ მკვლელობისთვის და სხვა დანაშაულისთვის დაკისრებული მსჯავრის შეკრების პრინციპის გათვალისწინებით, 13 წლით თავისუფლების აღკვეთა მიუსაჯა. სასამართლოს გადაწყვეტილებით, საქმეში სიძულვილის მოტივი არ ფიგურირებდა და დანაშაული შეფასდა, როგორც ურთიერთშელაპარაკების ნიადაგზე მომხდარი დანაშაული.

ლიკა

24 წლის ტრანსგენდერი ქალი, ლიკა 2018 წლის 19 ივლისს ბათუმის ინფექციური პათოლოგიის, შიდსისა და ტუბერკულოზის ცენტრში გარდაიცვალა. ლიკას აივ-ინფექცია/შიდსი და ტუბერკულოზის ის ფორმა ჰქონდა, რომელიც გადამდები არ არის. გარდაცვლილის ბებიის თქმით, „გარდაცვლილისგან ბაქტერიების გავრცელების საშიშროება“ არსებობდა, ამიტომ ექსპერტიზის ბიუროს შენობიდან გადაასვენეს და დაკრძალეს, თუმცა ბათუმის ინფექციური პათოლოგიის, შიდსისა და ტუბერკულოზის საავადმყოფოს ფიზიო-პულმონოლოგიური დეპარტამენტის უფროსმა, დიმიტრი ცეცხლაძემ იმ დღეებში რადიო თავისუფლებასთან განაცხადა, რომ ბაქტერიების გავრცელების საშიშროების შესახებ გავრცელებული ინფორმაცია სიმართლეს არ შეესაბამებოდა.

ტრანსგენდერ ქალზე სიცოცხლის ბოლო დღეებში ბაბუა ზრუნავდა. აქტივისტების თქმით, ლიკას გარდაცვალება სისტემური გულგრილობის შედეგი იყო.

„იმის გამო, რომ სისტემა მათ საჭიროებებს სათანადოდ ვერ ხედავს, ეს ადამიანები ჯანმრთელობის მრავალი გამოწვევის წინაშე დგებიან და იმ პროგრამებშიც კი, რომლებიც მეტნაკლებად ხელმისაწვდომია ადამიანებისთვის, ვერ ახერხებენ სათანადო ჩართულობას. მკურნალობის მიღებისას მრავალი ხილული თუ უხილავი ბარიერი იქმნება ხოლმე, რის გამოც ხშირად ადამიანები მკურნალობას წყვეტენ და სისტემა მათ იმ დრომდე ვეღარ ხედავს, სანამ ისინი სტაციონარში არ მოხვდებიან. რის შემდეგაც მათ სათანადოდ არ მკურნალობენ, რის გამოც ფატალური შედეგებიც დგება ხოლმე. ტრანსგენდერ ადამიანებს იმ სერვისებშიც კი უწევთ თანხის გადახდა, რაც უფასოდ ეკუთვნით, რადგან სწორი პროფილის გადამისამართება არ ხდება ხოლმე და ყველამ არ იცის, რისი უფლება აქვს და რა უნდა მოითხოვოს ჯანდაცვის კონკრეტული უწყებებისგან“, — აღნიშნავდა გოჩა გაბოძე რადიო თავისუფლებასთან საუბრისას.

ტრანსგენდერი ქალი ტაილანდიდან

2021 წლის პირველ ნოემბერს, ვერაზე, მასაჟის სალონში ტაილანდის მოქალაქე ტრანსგენდერი ქალი მოკლეს, მეორე ქალი კი დაჭრეს.

მოკლულსა და ბრალდებულს შორის დაპირისპირება მას შემდეგ მოხდა, რაც მომხმარებელმა მასაჟის სპეციალისტს, მასაჟის გარდა, დამატებითი სექსუალური ხასიათის მომსახურება მოსთხოვა, რაზეც უარი უთხრეს. პოლიციამ მკვლელობაში ბრალდებული 23 წლის კაცი ცხელ კვალზე დააკავა და ბრალი განზრახ მკვლელობისთვის წარუდგინა.

ტრანსფობია გერმანიაში — ანტი-ქვიარ თავდასხმების გაზრდილი მაჩვენებელი

გერმანიის ქალაქებში – მიუნსტერში, აუგსბურგსა და ბრემენში, სამი თვის განმავლობაში ქვიარ ადამიანებზე სამი სასტიკი თავდასხმა მოხდა. ერთ-ერთი ასეთი შემთხვევის შედეგად ტრანსგენდერი კაცი, მალტე გარდაიცვალა. მან ლესბოსელი ქალების დაცვა სცადა, რომლებსაც ავიწროებდნენ და შეურაცხყოფდნენ. თავდამსხმელმა მალტეს დაარტყა, კაცი ასფალტზე დაეცა და თავის ტვინის მძიმე დაზიანება მიიღო. მიღებული ტრავმისგან ის, 6 დღის შემდეგ, კომაში მყოფი გარდაიცვალა.

ამ ფაქტმა გერმანიის მაცხოვრებლების შეშფოთება გამოიწვია. ქვეყნის მმართველი სოციალ-დემოკრატიული პარტიის ერთ-ერთმა ლიდერმა, სასკია ესკენმა ტვიტერზე დაწერა:

“ეს ინციდენტი არის სასტიკი შეხსენება იმისა, რომ სიძულვილით მოტივირებული დანაშაულები ქვიარ ადამიანების წინააღმდეგ გრძელდება. ყოველ კვირა, ყოველ დღე”.

სტატისტიკურად, გერმანიაში დღეში 2 ანტი-ქვიარ თავდასხმა ფიქსირდება, თუმცა ქვეყნის შინაგან საქმეთა სამინისტრო აღიარებს, რომ რეალური რიცხვი ბევრად მეტია. ორგანიზაცია ლესბოსელებისა და გეების ასოციაცია (LSVD), ასევე, პოლიცია, მიიჩნევს, რომ შემთხვევების 90% არ არის აღრიცხული. ბევრი თავდასხმა კრისტოფერ ქუჩის დღის მარშებს ემთხვევა. კრისტოფერ ქუჩის დღე ლგბტქი პრაიდების სახელწოდებაა, რომელიც რამდენიმე გერმანულენოვან ქვეყანაში ტარდება.

“ხილვადობა ყოველთვის დაკავშირებულია საფრთხესთან. სამწუხაროდ,  ქვიარ ადამიანების ყოველი საჯარო შეკრება მათ რისკის ქვეშ აყენებს. ჩვენ გულწრფელები უნდა ვიყოთ ამასთან დაკავშირებით. თუმცა, პრობლემა მხოლოდ კრისტოფერ ქუჩის დღის მოვლენები არ არის. თავდასხმები ხდება ყოველდღე, დღის ყოველ მონაკვეთში, ყველაზე გადატვირთული ქუჩებიდან ყველაზე ვიწრო ჩიხებამდე. ხდება მეტროში, ავტობუსში, სკოლის ეზოში, კომპანიებში, კლუბებსა და სავაჭრო ცენტრებში. სასტიკად ჟღერს, მაგრამ სამწუხაროდ, არასდროს ვართ ჭეშმარიტად უსაფრთხოდ“, — განაცხადა DW-სთან ინტერვიუში ლესბოსელებისა და გეების ასოციაციის ფედერალური საბჭოს წევრმა, ალფონსო პანტისანომ.

არასრული მონაცემები

DW-ის ცნობით, გერმანიის კრიმინალური პოლიციის ფედერალური ოფისი ანტი-ქვიარ დანაშაულებს “გენდერული/სექსუალური იდენტობის” კატეგორიაში მხოლოდ 2020 წლიდან აღრიცხავს. ამ და სექსუალური ორიენტაციის ნიშნით ჩადენილი დანაშაულების სტატისტიკა მნიშვნელოვნად გაზრდილია — 66% და 50%-ით. თავდასხმები, რომლებშიც მთავარი ფაქტორი ტრანსგენდერი ადამიანების მტრობაა, ცალკე არ აღირიცხება.

ბერლინში პოლიცია შემთხვევების საშუალოზე მაღალ რაოდენობას აფიქსირებს და ქვიარ დანაშაულებზე კარგად მუშაობს, მაგრამ ეს იმას არ ნიშნავს, რომ გერმანიის სხვა ქალაქებში მსგავსი დანაშაულები არ ხდება.

“თუ მიუნხენის, შტუტგარტის ან ფრანკფურტის პოლიციაში მივალ და ვიტყვი, რომ სექსუალური ორიენტაციის გამო თავს დამესხნენ, ეს შეიძლება ჩაიწეროს ისე, როგორც ფიზიკური შეურაცხყოფა. აქედან გამომდინარე, ქვიარ თავდასხმა სტატისტიკიდან ქრება. ბერლინში სხვაგვარადაა. დედაქალაქში პოლიციას ამ საკითხთან დაკავშირებით ბევრი ტრენინგი აქვს გავლილი“, — აცხადებს ალფონსო პანტისანო.

პოლიტიკურად მოტივირებული ძალადობა

ტრანსგენდერი კაცის, მალტეს გარდაცვალებამ ჰომოფობიური დანაშაულების ჩამდენ პირებთან დაკავშირებით დებატები გამოიწვია. ზოგიერთი გახმაურებული თავდასხმა ახალგაზრდა კაცების, ზოგიერთი მუსლიმისა და გერმანიაში მიგრირებული ადამიანის მიერაა ჩადენილი. ფსიქოლოგმა და მწერალმა, აჰმად მანსუნმა, რომელიც ყურადღებას ისლამზე ამახვილებს, გერმანულ მედია Bild-ს მიუნსტერში სავარაუდო ჩეჩენ დამნაშავეზე მიუთითა:

“ჰომოსექსუალების სიძულვილი ჩეჩენ, ავღანელ და სირიელ კაცებში გავრცელებულია. ამ ქვეყნებიდან მიგრაციის ზრდასთან ერთად, გერმანიაში ჰომოფობიაც იზრდება”, — განაცხადა მან.

გერმანიის კრიმინალური პოლიციის ფედერალური ოფისის მწირი მონაცემები აჩვენებს, რომ ტრანსგენდერ ადამიანებს უცხო და რელიგიური იდეოლოგიები უქმნიან საფრთხეს, მაგრამ უპირველეს ყოვლისა, საფრთხე ულტრამემარჯვენე სოციალური გარემოდან მოდის. “გენდერული/სექსუალური იდენტობის” და “სექსუალური ორიენტაციის” კატეგორიის დანაშაულების უმეტესობა მემარჯვენე დამნაშავეების ჩადენილია. თუმცა, არ შეიძლება მათ მიეწეროთ ყველა დანაშაული, რაც მიგვითითებს იმაზე, რომ ჰომოფობიური თავდასხმები პრობლემას წარმოადგენს მთლიანი საზოგადოებისთვის.

პოლიტიკოსების რეაქცია

ტრანსგენდერი კაცის სიკვდილმა ქალაქ მიუნსტერში პოლიტიკოსების შეშფოთება გამოიწვია. გერმანიის ფედერალური მთავრობის კომისარმა სექსუალური და გენდერული მრავალფეროვნების მიღების საკითხებში, სვენ ლემანმა, სხვადასხვა ასოციაციაში ტრანსფობიისა და ჰომოფობიის წინააღმდეგ სამოქმედო გეგმა გაგზავნა. ასეთ პროექტს დიდი ხნის განმავლობაში ითხოვდნენ.

სხვა ქვეყნებთან შედარებით, ლგბტქი უფლებების საკითხებში გერმანია ბევრად უკან არის. მაგალითად, აქ ტრანსგენდერ და ჰომოსექსუალი ადამიანებს ჯერ კიდევ არ შეუძლიათ გახდნენ სისხლის დონორები.

2021 წელს, 16 ფედერაციული მხარის შინაგან საქმეთა მინისტრების კონფერენციაზე ჰომოფობიურ და ტრანსფობიურ ძალადობასთან საბრძოლველად სამუშაო ჯგუფის შექმნა გადაწყდა, თუმცა ამ თემაზე შეხვედრა პირველად 2022 წლის სექტემბერში გაიმართა.

“ეს ნიშნავს, რომ პოლიტიკოსებს ამ საკითხთან დაკავშირებით მთელი წელი არაფერი გაუკეთებიათ. ჩვენ ვცხოვრობთ ქვეყანაში, რომელსაც აქვს პრეტენზია, რომ მხარს უჭერს მრავალფეროვნებას. ჩემი აზრით, გერმანიას მრავალფეროვნების პრობლემა აქვს. ჩვენ ამაზე უნდა ვისაუბროთ”, — აღნიშნა ლესბოსელებისა და გეების ასოციაციის ფედერალური საბჭოს წევრმა, ალფონსო პანტისანომ.

ტიკტოკმა ტრანსფობიური და გარდაქმნის თერაპიის მხარდამჭერი მასალის აკრძალვისთვის წესდება შეიმუშავა

სოციალური მედიის პლატფორმა ტიკტოკი გენდერული ნაცვალსახელებისა და მიმართვის ფორმის არასწორი გამოყენების, ტრანსგენდერი ადამიანისთვის დაბადებისას მინიჭებული სახელის გამოყენების, მიზოგინიის და ,,გარდაქმნის თერაპიის” მხარდამჭერი კონტენტის წინააღმდეგ ბრძოლას იწყებს და ამისთვის საიტის წესდება განაახლა. ტიკტოკმა აღნიშნული გადაწყვეტილება გენდერული სამართლიანობის დაცვის ჯგუფ – UltraViolet-ისა და GLAAD-ის რეკომენდაციების შემდეგ მიიღო.

„სიძულვილის შემცველი, აკრძალული იდეოლოგიების წინააღმდეგ მეტად ცხადი წესდების შემოღება გადავწყვიტეთ, რაც ტრანსგენდერი ადამიანისთვის დაბადებისას მინიჭებული სახელის გამოყენებას, გენდერული მიმართვის არასწორ გამოყენებას, მიზოგინიასა და „გარდაქმნის თერაპიის“ მხარდამჭერი მასალების აკრძალვას გულისხმობს. ისიც უნდა ითქვას, რომ მსგავსი იდეოლოგია ტიკტოკზე დიდი ხანია დაუშვებელია, თუმცა კონტენტის შემქმნელებისა და სამოქალაქო ორგანიზაციებისგან გავიგეთ, რომ ამ ყველაფრის სამოქმედო წესდებაში გაწერა აუცილებელია. ამავდროულად, ვიმედოვნებთ, რომ უკვე ხელმისაწვდომი ფუნქცია, რომელიც ადამიანებს ნაცვალსახელის მითითების შესაძლებლობას აძლევს, ურთიერთპატივისცემაზე დამყარებულ ინკლუზიურ დიალოგს ხელს უწყობს.“ – ვკითხულობთ ტიკტოკის განცხადებაში.

GLAAD-ის აღმასრულებელი დირექტორის, სარა ქეით ელისის თქმით, „ქსელში ტრანსფობიური კომენტარების გამოყენება ან „გარდაქმნის თერაპიის“ მხარდაჭერა რეალურ სივრცეებშიც საფრთხეს ქმნის. ტიკტოკის განახლებული წესდება ლგბტქი ადამიანების ონლაინ უსაფრთხოებას ბევრად გაზრდის, რაც სხვა სოციალური ქსელებისთვისაც მაგალითი უნდა იყოს“.

წყარო: GLAAD